¿Tiko duˈunyëmë jäˈäy yajmeenymyoˈoy?

“Yëˈë jäˈäy tˈaneˈemyë jäˈäy parë axëëk ttuny.” (ECLESIASTÉS 8:9)

EXTËM jyënaˈanyë tyäˈädë tekstë, tëyˈäjtëndëjkëp nuˈun kujkë jäˈäy yˈaneˈemy, pes nyikëjxmˈäjttëbë ayoˈon diˈib tuun jäjtëp. Nuˈun kujkë tiempë nyaxy, të jäˈäy tjatundë mëjää parë tijaty yajtunët tëyˈäjtën myëët, per kyaj të tmëmadäˈäktë mët ko jäˈäy yˈatsoktë ets mët ko yajmeenymyoˈoytyë parë kyaj oy tijaty ttundët. ¿Tiko duˈun tyuny jyatyëty? ¿Tiko duˈunyëmë jäˈäy yajmeenymyoˈoytyë? Mët ko jyaˈˈaty tëgëk pëky diˈib xyˈaxëktuˈunëm.

1. Mët ko nbokyjyaˈayˈäjtëm.

Biiblyë yajxon tnigajpxy ko yëˈë “xymyëmadakëm ja pojpë” (Romanʉs 3:9). Tyäˈädë poky diˈib “ijtp” mä ëtsäjtëm, mbäät yaˈijxkijpxyë mët tuˈugë päˈäm diˈib ninäjxp ets kyaj ti nyitsooy. Nuˈun kujkë tiempë nyaxy, poky duˈun tˈaneˈemyë jäˈäy extëm tuˈugë rey ets xytyuktuˈunëm aguanë ja poky. Mët ko nbokyjyaˈayˈäjtëm, ta mayë jäˈäy tpëjtäˈäktë jëjpˈam tijaty yëˈë tsyojktëp o dyajtundë xyëë jyukyˈäjtën parë tpäädäˈändë meeny sentääbë o kutujkën, oy pën tˈaxëktunët (Romanʉs 5:21; 7:17, 20, 23, 25).

2. Mët ko njukyˈäjtëm mä axëëgë jäˈäy jyukyˈaty.

Tyam, atsojktëbë jäˈäy ets këˈëm tijaty nyaytyukmëtsokëdë. Pääty may tsyiptakxëdë parë tëgatsy jyaˈayˈattët. Ets mët ko tijaty tˈatsoktë, ta tmëdatäˈändë niˈigyë anaˈam kutujkën, meeny sentääbë etsë jukyˈäjt madakën diˈib kyaj tyëgoyˈäjtxëdë. Nëgoo ko tpäättë tijaty tsyojktëp, oy tkatundët tijaty tëyˈäjtën myëët. Kyaj tjëjpkudijëdë tijaty kyaj yˈoyëty, “yëˈë pyanëjkxtëp ja mayjyaˈay parë ttundë tijaty axëëk” (Éxodo 23:2).

3. Mët ko Satanás xyajtëgoyäˈänëm.

Satanás, yëˈë tuˈugë anklës diˈib kyaj yaˈˈaneˈemy ets “diˈibë wyinˈiˈimpy nidëgekyë ja naxwinyëdë jäˈäy” (Diˈibʉ Jatanʉp [Apocalipsis] 12:9). Tyukxondakypy ko jäˈäy ttuny tijaty yëˈë tsyejpy. Ets komë Satanás nyijäˈäwëp ko diˈibë jäˈäy tsyejpy, yëˈë yˈitäˈäny agujk jotkujk ets tmëdatäˈänyë meeny sentääbë, ta net ttuktuny tijaty kyaj yˈoyëty.

¿Yëˈë netë tyäˈädë yˈandijpy ko kuanë Satanás nmëmëdoˈojëm oy ngatunäˈänëm ti yëˈë tsyejpy? Tyäˈädë yaˈˈatsoojëmbitäˈäny mä ja tuˈukpë artikulo.