Myëmajtskpë yajtëˈëwën: ¿Wiˈixëts njatët kojëts nˈoogët?

ROMAN, mutsknëmë nety ko tuˈugë myëtnaymyaayëbë yˈoˈky mä tuˈugë karrë yˈayoˈonbaty. Yëˈë jyënaˈany: “Jantsy kanäk jëmëjtëts ojts nmëmay nmëdäjy kojëts ja nmëtnaymyaayëbë yˈoˈky. Ets xëmëts nnayajtëëwë wiˈix njäjtëm ko nˈoˈkëm”.

¿Tiko duˈunë jäˈäy nyayajtëwëdë? Yëˈko niˈamukë naxwinyëdë jäˈäy kyaj yˈoogäˈändë. Oy nuˈun jeky të jyukyˈattë nipën kyaˈoogäˈäny. Ets may axtë tsyëˈkëdëp wiˈixëdaa jyattët ko yˈooktët.

¿Wiˈix nääk tˈatsoojëmbittë? May jyënäˈändë ko tap ti diˈib jukyˈäjtˈadëtsp ko nˈoˈkëm. Ets tmëbëktë ko oyjyaˈay nyëjkxtë tsäjpotm, ets ko axëkjäˈäy yajtëytyundë winë xëë winë tiempë. Nan ta diˈib jënandëp ko oˈkpë kyaj mä nyekyjyukyˈaty ets ko nyaxyë tiempë ta yajjäˈäytyëgooynyëdë.

¿Ti yˈandijpy ko duˈun yˈatsowdë? Nääk yëˈë yajjaygyujkëdëp ko tap ti diˈib jukyˈäjtˈadëtsp, etsë wiinkpë dyajjaygyukëdë ko nanëgoobë njukyˈäjtëm, päätyë net jyënäˈändë: “Nˈokkäˈäy nˈokˈukëm jeˈeyë. Ayä bom nˈoˈkëm” (1 Korintʉ 15:32).

¿Wiˈixë Biiblyë tyukniˈˈixë? Ko kyaj ti jyukyˈäjtˈadëˈëtsy ko tuˈugë jäˈäy yˈooky. Dios ojts twinmäˈänymyoˈoyë Salomón parë tkujayët: “Diˈib jukyˈäjttëp nyijäˈäwëdëp ko oogandëp; perë oˈkpë, kyaj nitii tkanijawëdë” (Eclesiastés 9:5). Pënaty të yˈooktë “nitii tkanijawëdë” ti tuun jäjtëp, pääty kyaj ti tjawëdë, nitii mbäät tkatundë ets tsip tpudëkëdët pënaty jukyˈäjtp o tˈaxëktunët.

Kyaj tyëyˈäjtënëty extëm mayë jäˈäy wyinmaytyë, pesë Dios kyaj ojts ttuknibëjtäägë parë jäˈäy yˈoogët. Ojts dyajkojˈyë Adán, ja tim jawyiimbë yetyëjk, parë jyukyˈatët winë xëë yä Naxwiiny. Dios jeˈeyë tëgok ojts tnigajpxyë oˈkën: ko tˈanmääyë Adán wiˈix wyimbëtsëmäˈäny ko tjëˈxët ja ujts tsäˈäm. Duˈun tˈanmääy: “Kopkpëky ko nëjkx mˈooky” (Génesis 2:17, Mʉgoxpʉ ja̱ noky mʉdiˈibʉ jyaayʉn Moisés [MNM]). Koxyëbë Adán mëdë Eva tmëmëdoodë Dios, taxyëp mëdë tyëëm yˈääts jyukyˈattë winë xëë yä Naxwiiny.

Perë Adán ojts pyokytyuny ko tkamëmëdooyë Dios, ets ta tkumëdooy mëdë oˈkën (Romanʉs 6:23). Ko yˈoˈky, nitii kyapëtsëëmy diˈib jukyˈäjtˈadëtsp. Mbäät njënäˈänëm ko Adán duˈunyë tyëgooy. Pes të netyë Dios yˈanëˈëmxëty: “Mëk duˈun mdunëty, ets mjäjëdëty mbëxyikëdëty, taanëm ja mgäˈäyën mˈukën xypyäädëty xyˈixëty. Ets duˈun mjuukyˈatëty, koonëm mˈawimbitëty, jatëgok nax, mä ojts mtsoonyën. Jaˈa ko mijts nax mëët [mˈoytyunyëty], ets nax jatëgok mˈawimbitëty” (Génesis 3:19, MNM). Pääty, kom niˈamukë jam të ntsoˈonëm mä Adán, ta niˈamukë të xynyinäjxëmë poky etsë oˈkën (Romanʉs 5:12).

Per oyë Adán kyamëdooy, Dios jeˈeyëm tkuytyunäˈäny diˈib tyuknibëjtakë. Yëˈë tsyojk ets tyäˈädë Naxwinyëdë tyuktukët mëdë Adángë tyëëm yˈääts diˈib wäˈäts jäˈäy, ets duˈunën tyunäˈäny jyatäˈänyëty (Génesis 1:28; Isaías 55:11). Jyobaa tim tsojkë oˈkpë dyajjukypyëkäˈäny. Apostëlë Pablo tkujäˈäyë: “Dios dyajjikypyëkäˈäny tëgekyë oˈkpë diˈibë ijt oyjyaˈay es nandëˈën diˈibë ijt kaˈoyjyaˈay” (Apostʉlʉty 24:15).

Roman, diˈib të yajmaytyaˈaky, ojts tˈëxpëjktsondaˈagyë Biiblyë ets ojts tnijawë wiˈix tyukniˈˈixë ko jäˈäy yˈooky ets pënën Dios, ets yëˈë diˈib yajtëgäjtsë jyukyˈäjtën.

Jap niˈigyë xynyijawët wiˈix njäjtëm ko nˈoˈkëm mä liibrë ¿Ti tëyˈäjtën jantsy tukniˈijxëbë Biiblyë? kapitulo 6. Mbäät xyajjënaky mä Internet www.jw.org/mco

[Rekuäädrë diˈib mä pajina 7]

¿Wiˈixë Jesus tyukniˈˈijxë mä wiˈix njäjtëm ko nˈoˈkëm?

Ja tiempë mä Jesus jyukyˈajty, nääk diˈib nyiwintsënˈäjttë ja relijyonk kyaj tmëbëjktë ko oˈkpë jyukypyëktë, perë Jesus kyaj duˈun wyinmääy (Lukʉs 20:27). Ets nan kyaj tyukniˈˈijxë ko pëtsëëmp ti diˈib jukyˈäjtˈadëtsp ko tuˈugë jäˈäy yˈooky. ¿Wiˈix tyukniˈˈijxë?

Ojts tˈijxkijpxyë oˈkën extëm ko jäˈäy myaˈay. Jesus duˈun jyënany ko Lázaro yˈoˈky: “Ja nmëtnaymyaayëbëˈäjtëm Lasarë të myanaxy. Per nejxyëts nˈokˈyuxy”. Ja yˈëxpëjkpëty kyaj tjaygyujkëdë tidën myaytyäˈägaampy, pääty yˈanmääyëdë: “Wintsën, pën të myanaxy, mëbäädëbë [jam]”. Perë Jesus yëˈë nety myaytyakypy ko Lázaro të yˈoˈknë. Kom ja yˈëxpëjkpëty kyaj tjaygyujkëdë, pääty ttimˈanmääy: “Lasarë të yˈoˈknë” (Fwank 11:11-14).

Jyënany ko oˈkpë jyukypyëkäˈändë. Ko Jesus jyajty mä Lázaro kyugäjpnëty, tyaxk xëëbë nety të yˈoˈknë. Ets parë tjotkujkmooy ja Marta, ta tˈanmääy: “Yëˈë mmëgaˈax jikypyëkëp jatëgok”. Ta net ojts twandaˈaky: “Ëjtsë dëˈën ja jikypyëjkën es ja jikyˈäjtën. Diˈibëts xymyëbëjkp, oy yˈoogët, jikypyëkëp”. Ta net ojts dyaˈixyëty ko kyaj nëgoobë jyënaˈany ets ta dyajjukypyejkyë Lázaro mayjyaˈay wyinduuy (Fwank 11:23, 25, 38-45).

Jesus nan ojts ttukˈixyë apostëlë Juan mä twandaky ko oˈkpë jyukypyëkäˈändë. Ets ko jäˈtäämbë tiempë mä oˈkpë yˈawäˈätspëtsëmäˈändë mä yˈittë tsumy matsypyëm (Diˈibʉ Jatanʉp [Apocalipsis] 20:13).