DIˈIB MIIMP MÄ NYIˈAK: ANËË DIˈIBË DIOS XYTYUKMËJAGAMGAKËM

Yajniwäämbajtë Dios ko kyaj ti xyëë

WIˈIXË JÄˈÄY JYËNÄˈÄNDË “Kyajnëmëts nayjaygyukëdë pën mbäät njënäˈänëm ko Dios tamë xyëë. Ets pën jantsy tam, nan kyajts nëjkx nnijawëdë ti txëˈaty.” (Profesoor David Cunningham, mä lyiibrë Theological Studies.)

WIˈIXË BIIBLYË JYËNAˈANY Dios këˈëm jyënany: “Ëjtsën Jyobaa. Duˈuntsën nxëˈaty” (Isaías 42:8). Jyobaa yëˈë tuˈugë xëë diˈib miimp mä ayuk ebreo ets nyikejy, “Yëˈë Tyuumpy ets duˈun Tyun Jyatëdët” (Génesis 2:4, notë).

Jyobaa tsyejpy etsë xyëë ngäjpxëm. Biiblyë jyënaˈany: “Käjpxëdë xyëë. Tuknijawëdë nax käjpn wiˈix yëˈë jyaˈayˈaty. Nigäjpxtë ko këjxmë xyëë yˈity” (Isaías 12:4).

Jesus ojts dyajtuunë Diosë xyëë ets ojts ttukniˈˈixëdë ja yˈëxpëjkpëty. Tëgok, duˈun tmënuˈkxtakyë Tyeety: “Tëjëts nduknijawë mxëë”. ¿Tiko duˈun ttuuny? Yëˈë yˈakjënany: “Parë ja tsojkën diˈibëts mijts mëët të xytsyeky yˈitët mët yëˈëjëty, etsëts nˈitët tuˈugyë mët yëˈëjëty” (Juan 17:26, TNM).

¿TIKO MBÄÄT XYNYIJAWË? Tuˈugë ëxpëkyjyaˈay, Walter Lowrie diˈib tyukˈijtëbë relijyonk, tkujäˈäyë: “Pën tuˈugë jäˈäy kyaj tˈixyˈatyë Dios ets kyaj tnijawë ti txëˈaty, [...] kyaj mbäät ttseky, pën kyaj tˈixy extëmë jäˈäy”.

Victor, sëmään sëmään ijty nyijkxy tsäjptëgoty, per ninuˈunë nety tkaˈixyˈatyë Dios. Yëˈë jyënaˈany: “Kojëts nnijäˈäwë ko Dios txëˈaty Jyobaa, duˈunëts njäˈäwë extëmxyëbëts ojts nyajtukwinguwowë. Taanëmëts nˈixyˈajty diˈibëtsë nety të nmëdoy ko jyantsy yajnimaytyaˈaky. Tajëts nˈijxyë Dios extëm tuˈugë jäˈäy, ets desde jaajëts mëët naymyaaybyëjkë”.

Jyobaa myëwingoompy “pënaty winmäˈäyxyëdëp ja xyëë” ets duˈun twandaˈaky: “Nbaˈˈayowandëbëts, duˈun extëm tuˈugë uˈunkteety tpaˈˈayoyë yˈuˈunk diˈib mëduunëp” (Malaquías 3:16, 17). Dios nan kyunuˈkxypy pënaty tukmëgäjpxëbë xyëë. Biiblyë jyënaˈany: “Niˈamukë pënaty kyäjpxtëbë Jyobaa xyëë, nitsoˈogäämp” (Romanos 10:13, TNM).