DIˈIB MIIMP MÄ NYIˈAK: ANËË DIˈIBË DIOS XYTYUKMËJAGAMGAKËM

¿Tsiptakp ntsojkëmë Dios?

“Mtsokëbë mDios Jyobaa mët tukëˈëyë mgorasoon, mët tukëˈëyë mniniˈkx mgëbäjk ets mët tukëˈëyë mwinmäˈäny. Tyäˈädë yëˈë diˈib mas mëj etsë tim jawyiimbë anaˈamën.” (Jesukristë, mä jëmëjt 33)a

Ta jäˈäy diˈib tsiptakxëdëp ttsoktëdë Dios, pes wyinmaytyë ko tsip nˈixyˈäjtëm, ko jagam yajpääty o ko jantsy axëkjäˈäy. Min nˈokˈijxëm wiˈix näägë jäˈäy të jyënäˈändë:

“Njaˈˈamdoobyëtsë netyë Diosë naybyudëkë, per duˈunëtsë nety njawë ko jantsy jagam yajpääty. Kyajtsë nety nˈixyë Dios extëm tuˈugë jäˈäy diˈib jyäˈäwëp tijaty.” (Marco diˈib Italia.)

“Njamëdunaambyëtsë netyë Dios, per duˈunëtsë nety nwinmay ko jantsy jagam yajpääty. Duˈunëtsë nety nˈixy ko yëˈë tuˈugë Dios diˈib mëk axëkjäˈäy ets ko jeˈeyë xytyëytyunäˈänëm. Kyajtsë nety nmëbëky pën paˈˈayoop.” (Rosa diˈib Guatemala.)

“Kixyuˈuknëmtsë nety kojëts nmëbëjky ko Dios yëˈëyë yˈijxypyë tëgoˈoyën parë xytyukumëdowäˈänëm. Ok, tajëts nˈijxy extëm tuˈugë jäˈäy diˈib jantsy jagam yajpatp, duˈunxyëp extëm tuˈugë wintsën diˈib yˈaneˈembyë jäˈäy ets kyaj tmëmay tmëdäjy.” (Raimunda diˈib Canadá.)

Ets mijts, ¿wiˈix mˈokwinmay? ¿Tsipëdaa ntsojkëmë Dios? Nuˈun kujkë tiempë nyaxy, duˈun mayë jäˈäy të nyayajtëwëdë, oy tjamëdattë ryelijyonk. Mayë jäˈäy kyaj tnekymyënuˈkxtaktë Dios, nuˈun ja tiempë ojts tyuˈuyoˈoy mä jëmëjt 500 axtë 1,500 mä Jesus të myiny. ¿Tiko? Yëˈko tsyëˈkëdëbë nety. Will Durant, tuˈugë historiador, jyënany: “¿Wiˈix tuˈugë pokyjyaˈay tmënuˈkxtäˈägët tuˈugë jäˈäy diˈib jantsy jagam yajkutujkp ets diˈib atsëˈk ajäˈäwëp?”.

¿Tiko duˈun mayë jäˈäy wyinmaytyë mä Dios? ¿Ti tëyˈäjtën jantsy tukniˈˈijxëbë Biiblyë? ¿Mbäät ntsojkëmë Dios ko nnijäˈäwëm ja tëyˈäjtën mä pënën yëˈë?

[Notë]

[Dibujë diˈib mä pajina 3]

[Yëˈë të dyakyë dibujë]

Anikëjxy, trinidad: Museo Bardini (Florencia); itkujky, infiernë: © Photononstop/Superstock