DIˈIB MIIMP MÄ NYIˈAK: ¿JABÄÄT TIJATY JYËJPKËXY KO JÄˈÄY YˈOOKY?

Ko jäˈäy yˈooky kyaj jabäät jyëjpkëxy

Betania, yëˈë tuˈugë käjpn diˈib naa mutsk, naa tëgëk kilometrë tmëwingonˈatyë Jerusalén käjpn (Fwank 11:18). Kanäk sëmäänë nety yˈaktëgoyˈaty parë Jesus yˈoogët, ko ajotkumonë ja myëtnaymyaayëbë Lázaro pyäˈämbejty ets yˈoˈky.

Ko Jesus tnijäˈäwë ti nety të tyuny të jyatyëty, ta tˈanmääy ja yˈëxpëjkpëty ko Lázaro määbë nety ets ko yëˈë nëjkx tˈyuxäˈäny (Fwank 11:11). Per ko tpëjkyë kuentë ko ja yˈëxpëjkpëty kyaj nety të tjaygyukëdë, ta tˈanmääy: “Lasarë të yˈoˈknë” (Fwank 11:14).

Të nety taxk xëë nyäjxnë mä Lázaro të nyaxtëkë ko Jesus jyajty Betania ets tˈëxtääyë Marta, ja myëgaˈaxë Lázaro parë tjotkujkmoˈoyaˈany. Ta yˈanmääyë: “Kooxyëp mijë naty mjaaty yää, kyajxyëp të yˈeeky [o yˈooky] ja nmëgaˈaxëts” (Fwank 11:17, 21). Ta Jesus yˈatsooy: “Ëjtsë dëˈën ja jikypyëjkën es ja jikyˈäjtën. Diˈibëts xymyëbëjkp, oy yˈoogët, jikypyëkëp” (Fwank 11:25).

Parë Jesus dyajtëyˈäjtëndëjkë extëmë nety të jyënaˈany, ta tmëwingoonyë oˈkpë jut ets jantsy mëk jyënany: “¡Lasarë, pëtsëm jap!” (Fwank 11:43). Mëjˈixyë jäˈäy tjäˈäwëdë ko Lázaro pyëtsëëmy.

Jesus, të nety nimajtskë jäˈäy tˈokˈyajukypyëjkpë. Niduˈuk, yëˈë Jairo nyëëx, ets nanduˈun jyënany ko määbë nety ja kixyuˈunk (Lukʉs 8:52).

Jesus yˈijxkijpxyë oˈkën extëm ko jäˈäy myaˈay. ¿Tiko? Yëˈko kyaj ti tnekyjawë, jyaˈaytyëgoobyë pëjk adoˈonën ets kyaj tjawë jäj jëmuˈumën (Eclesiastés 9:5; ixë rekuäädrë “Oˈkën duˈun extëm ko jäˈäy jyantsy myëk mäˈäy”). Pënaty tim jawyiin pyanëjkxtë Jesus jyaygyujkëdë yajxon wiˈix yajpäättë oˈkpë. Tuˈugë liibrë jyënaˈany: “Parë [yëˈëjëty] ja oˈkpë, duˈunxyëp extëm jyantsy myëk mäˈäy etsë oˈkpë jut extëmë poˈkxtakn [...] parë pënaty oy të jyukyˈattë” (Encyclopedia of Religion and Ethics).a

Xyjotkujkmoˈoyëm ko nnijäˈäwëm ko oˈkpë kyaj yˈayowdë; määdëp jeˈeyë. Ko duˈun nnijäˈäwëm, ta kyaj tsyiptaˈaky njaygyujkëm wiˈix yajpäättë oˈkpë ets kyaj xynyekyˈatsëˈkëm.

“PËN TUˈUGË JÄˈÄY OˈKP, ¿MBÄÄT JATËGOK JYUKYPYEKY?”

Niˈamukë nˈoyjäˈäwëm ko nmäˈäjëm, ¿per jadaa pën diˈib jyatsojkënyëˈajtypy ets kyaj nyekyjyotwijët? ¿Mbäädë oˈkpë jyukypyëktë diˈib määdëp jutoty duˈun extëm ja Lázaro ets ja nyëëxë Jairo?

Ko Job nyayjäˈäwë ko ooganëp, ta nyayajtëëwë: “Pën tuˈugë jäˈäy oˈkp, ¿mbäät jatëgok jyukypyeky?” (Job 14:14).

Ko Job tmëtmaytyakyë Jyobaa, diˈib tukëˈëyë mëkˈäjtënë myëdäjtypy, ta këˈëm tˈatsoojëmbijty diˈibë nety të nyayajtëyëty: “Mijts xymyëgäjpxäämp ets ëjts atsowäämp. Mjantsy tsyojkënyëˈataampy xyˈixäˈäny diˈibë mgëˈë të dyajkojy” (Job 14:15). Job seguurë yˈijty ko Jyobaa yajjukypyëkanëp. ¿Waˈandaa nety nyaywyinˈëënyëty? Kyaj.

Ko Jesus dyajjukypyejkyë jäˈäy, yëˈë yajnigëxëˈk ko Dios të nety myoˈoyëtyë mëjää parë dyajjëjptëgoyëdë oˈkën. Mä Biiblyë yajnigajpxy ko Jesus jyënany: “Nmëdäjtypyëts ja kutujkën esëts nyajjikypyëkët ja oˈkpëty” (Diˈibʉ Jatanʉp 1:18). Mët ja kutujkën diˈib myëdäjtypy dyaˈˈawäˈätsäˈäny ja oˈkpë jut, duˈun extëm ttuuny ko ojts tniˈanaˈamë ets ja tsää jyëgaˈagët mä netyë Lázaro yajpääty.

Biiblyë kanäkˈok tnigajpxy ko jukypyëkäämbë oˈkpë. Extëm nˈokpëjtakëm, ja kugajpxy Daniel duˈun yˈanmääyë tuˈugë anklës: “Mboˈkxäämp, per mbëdëˈëgäämp parë xyˈaxäjët ja mgumäˈäyën ko ja tiempë jyëjpkëjxnët” (Daniel 12:13). Jesus duˈun tˈanmääy ja saduseeëty diˈib nyiwintsënˈäjttëbë relijyonk, diˈibë nety kyaj tmëbëktë ko jukypyëkandëbë oˈkpë: “Miitsëty nëgoo mˈokkäjxtëgooynyëdë mët ko kyaj xynyijawëdë ja Diosë jyaaybyajtën es ni ja myëkˈäjtënë Dios” (Matewʉ 22:23, 29). Etsë apostëlë Pablo nanduˈun jyënany: “Ëj nmëbejkypyëts [...] ko yëˈë Dios dyajjikypyëkäˈäny tëgekyë oˈkpë diˈibë ijt oyjyaˈay es nandëˈën diˈibë ijt kaˈoyjyaˈay” (Apostʉlʉty 24:15).

¿NÄˈÄ JYUKYPYËKÄˈÄNDË OˈKPË?

¿Näˈä jyukypyëkäˈändë oyjyaˈay ets diˈib kyaj yˈoyjyaˈayëty? “Mä ja tiempë diˈib jëjpkëxanëp”, duˈun extëm tuˈugë anklës tˈanmääyë Daniel. Ets duˈunën tmëbëjkyë Marta ko jukypyëkäämp ja myëgaˈax Lázaro “mä ja tiempë mä ja oˈkpëty jyikypyëktët” (Fwank 11:24).

Ko Biiblyë jyënaˈany “mä ja tiempë mä ja oˈkpëty jyikypyëktët”, yëˈë yˈandijpy ja tiempë mä Jesus yˈanaˈamäˈäny. Pablo tkujäˈäyë: “Kristë koonëm yajkutukët axtë ko yˈanaˈamën patkëˈëy tpëjtäˈägët ja myëtsip. Es ja okpë mëtsip diˈibë Dios yajkutëgoyaampy, yëˈë ja oˈkën” (1 Korintʉ 15:25, 26).Tyäˈädë yëˈë seguurë xyaˈijtëm parë nˈanmäˈäyëmë Dios ets dyajminët ja yˈAnaˈam Kyutujkën ets yajtunëdë tsyojkën yä Naxwiiny.b

Job nyijäˈäwëbë nety yajxon ko Dios yajjukypyëkaambyë oˈkpë. Ko tpäädëdë tiempë, ta kyaj nyekyjaˈˈatäˈänyë oˈkën, ets ninäˈä pën nëjkx kyanayajtëyëty: “¿Jabäät tijaty jyëjpkëxy ko jäˈäy yˈooky?”.

[Notë]

[Rekuäädrë diˈib mä pajina 5]

Oˈkën duˈun extëm ko jäˈäy jyantsy myëk mäˈäy

“Yajtëˈkx yajjäjëtsë nwiin, duˈun, parëts kyaj nmanaxët mä ja oˈkën.” (Salmo 13:3.)

“Es nidëgekyë jäˈäyëty jyantsy jyëˈëy jyantsy yäˈäxtë mët ko ja kixyuˈunk të yˈeeky. Es ja Jesus jyënany: Katë [o këdii] mnakyjyëˈëytyë. yëˈë kixyuˈunk kyaj të yˈeeky. Määp jap. Es ja jäˈäyëty jeˈeyë ttukxiky ja Jesus, jaˈa ko nyijäˈädëp ko të yˈeeky [o yˈooky].” (Lukʉs 8:52, 53.)

“Ja nmëtnaymyaayëbëˈäjtëm Lasarë të myanaxy. Per nejxyëts nˈokˈyuxy. Net ja yˈëxpëjkpëty yˈanmääyëdë: Wintsën, pën të myanaxy, mëbäädëbë dëˈënëˈë. Es ja Jesus jaˈa jyamatyakypy ko naty ja Lasarë të yˈoˈknë.” (Fwank 11:11-13.)

[Rekuäädrë diˈib mä pajina 6]

Oˈkpë jukypyëkandëp

“Oˈkpë jukyˈatandëp [...,] pëdëˈëgandëp. ¡Jotwijtë ets xondäˈäktë agujk jotkujk!” (Isaías 26:19.)

“Jaˈˈatäämp nimay diˈib jotwijandëp diˈib määdëp nääxoty.” (Daniel 12:2.)

“Jäˈtäämp ja tiempë mä ja oˈkpëty diˈibë të nyaxtëkëdë myëdowëp kots ëj ngäjxët.” (Fwank 5:28, 29.)

[Dibujë diˈib mä pajina 5]

“¡Lasarë, pëtsëm jap!”