DIˈIB MIIMP MÄ NYIˈAK: ¿JABÄÄT TIJATY JYËJPKËXY KO JÄˈÄY YˈOOKY?

Jyajëjpkuwäˈägëyandëbë oˈkën

Oˈkën, yëˈë tuˈugë mëtsip diˈib xyˈatsëˈkëm ets diˈib niˈamukë njajëjpkuwäˈägëyäˈänëm. Tsip ngupëjkëm ko tuˈugë jäˈäy yˈooky diˈib mëk ntsojkëm. Ets pën ënäˈkˈäjtëm, waˈan nwinmäˈäyëm ko ninäˈä ngaˈoogäˈänëm, duˈunën mayë jäˈäy wyinmaytyë.

Ja anaˈambëtëjk diˈib Egipto, yëˈë diˈib niˈigyë pyayoˈoytyë wiˈix kyaj mbäät yˈooktë. Ets yëˈëyë tyuundë nuˈun jyukyˈäjttë, nanduˈun ja milˈambë tyuumbëty. Jap Egipto tapë potsy diˈib yajtëyˈäjtëndëjkëp ko kyaj jyaˈoogandë, per kyaj ttukpëtsëëmdë wyinmäˈäny.

Wintsëndëjk diˈib china jyamëwinmäˈänybyäädandë ti mbäät ttundë parë kyaj yˈooktët ets tiiyëm jyatuundë, jyapäädandë nëë diˈib mbäät tˈuuktë diˈib kanäk pëky të yaˈˈadaamuky. Tuˈugë wintsën diˈib xyëˈäjt Qin Shi Huang, ojts tˈanëëmë ja jyaˈayëty parë tpäättët ja nëë diˈib yaˈukp diˈib myëdäjtypyë magia parë kyaj yˈoogët. Perë tyäˈädë nëë diˈib yaˈˈadaamujk myëdäjtypyë nety mercurio o nëë diˈib myëdäjtypyë pujxn. Ets ko Qin Shi Huang tˈuky ja nëë diˈibë nety kanäk pëky të yaˈˈadaamuky, ta yˈoˈky.

Mä jëmëjt 1513, tuˈugë jäˈäy diˈib España diˈib xyëˈäjt Juan Ponce de León diˈib tijaty pyayoˈoy, tsyoˈony desde Puerto Rico ets ttuknäjxy ja mejny parë tˈëxtäˈäyaˈany wiˈix mbäädë jäˈäy xëmë ënäˈk yajpääty. Mä nety duˈun tyuˈuyoˈoy, ta jyajty Florida (Estados Unidos), per ko waanë tiempë nyajxy, ta yaˈoˈkë jäˈäy diˈib Estados Unidos ets kyaj tpaty diˈibë nety yˈëxtaapy.

Ja anaˈambëtëjk diˈib Egipto, wintsëndëjk ets ja jäˈäyëty diˈib tijaty pyayoˈoytyë, jyatuundë mëjää parë tjajëjpkuwäˈägëyandë oˈkën. Ets oy ngaˈoymyëdoˈojëm tijaty tyuundë, njaygyujkëm ko kyaj jyaˈoogandë, pes niˈamukë naxwinyëdë jäˈäy xëmë jyukyˈatäˈäny.

¿MBÄÄDËDAA NJËJPKUWÄˈKËMË OˈKËN?

¿Tiko jäˈäy kyaj yˈoogäˈändë? Biiblyë nyigajpxypy tiko. Jyobaa diˈib të xyajkojëm yajnimaytyaˈaky: “Tukëˈëyë ak tiempë mëët të tpëjtaˈaky jantsy tsuj. Axtë tiempë diˈib kyaj jyëjpkëxy të tpëjtaˈaky mä jäˈäyë kyorasoon” (Eclesiastés 3:11).a Pääty niˈamukë njajukyˈatäˈänëm winë xëë winë tiempë yä Naxwiiny, kyaj jeˈeyë njukyˈatäˈänëm 80 jëmëjt (Salmo 90:10).

¿Tiko Dios tpëjtaky mä korasoon ja tiempë diˈib kyaj jyëjpkëxy? ¿Yëˈëdaa parë axëëk nnayjäˈäwëm? Kyaj. Dios të xytyukwandakëm ko tim tsojkë oˈkën dyajjëjptëgoyaˈany. Biiblyë xëmë tnimaytyaˈaky ko jëjptëgoyäämbë oˈkën ets ko Dios xytyukwandakëm parë njukyˈäjtëm winë xëë winë tiempë. (Ixë rekuäädrë “Yajmëmadaˈagyë oˈkën”.)

Jesus ojts yajxon tnigajpxy: “Esë tyäˈädë jikyˈäjtën winë xëë winë tiempë, jaˈa yëˈë ko [...] mij, tiˈigyë Dios, mˈixyˈatëdë es xyˈaxäjëdëts ëj extëm ja Kristë es tmëbëktët ko mij xykyajxëts yä naxwiiny” (Fwank 17:3). Mbäät nˈawäˈätspëtsëˈëmëm mä oˈkën. Perë Jesus jyënany ko yëˈëyë Dios diˈib mbäät dyajjëjptëgoyë oˈkën.

[Notë]

[Rekuäädrë diˈib mä pajina 4]

Yajmëmadaˈagyë oˈkën

“Yëˈë jyënaambyë oˈkën winë xëë winë tiempë, etsë Jyobaa ja Wintsën diˈib Yajkutujkp jyantsy yajtëˈëtsaampy winëë mä niˈamukë jäˈäyë wyiin jyëjp.” (Isaías 25:8.)

“Diˈibë Dios tsyejpy, yëˈë diˈibëts xyˈijxp es xymyëbekyëts extëm ja yˈUˈunk, nmoˈoyëpts ja jikyˈäjtën winë xëë winë tiempë.” (Fwank 6:40.)

“Ja okpë mëtsip diˈibë Dios yajkutëgoyaampy, yëˈë ja oˈkën.” (1 Korintʉ 15:26.)

“Tëyˈäjtëngyëjxm amumduˈuk tnijawëdë ko tmëdattë ja jikyˈäjtën winë xëë winë tiempë, mët ko Dios, diˈibë kyaj yˈandaˈaky, extë mä kyajnëmë naty ja naxwinyëdë kyojynyëm xywyandakëm tadë jikyˈäjtën.” (Titʉ 1:2.)

“Dios yajtëtsxëdët tëgekyë ja wyinëë. Kyaj yˈokˈijnët ja oˈkën.” (Diˈibʉ Jatanʉp [Apocalipsis] 21:4.)