Nˈokwintsëˈkëm pënaty të myëjjäˈäyënë
“Ko yëˈë mëjjäˈäytyëjk xyˈixëty [...]. Myajˈixëdëp yëˈë neywyingutsëˈëgë.” (LEV. 19:32, Mʉgoxpʉ ja̱ noky mʉdiˈibʉ jyaayʉn Moisés [MNM])
¿WIˈIX MˈATSOOJËMBITÄˈÄNY?
¿Nuˈunë Jyobaa dyajtsobäätyë mëjjäˈäytyëjk diˈib kyaj myastuˈutyëty?
¿Ti nyikëjxmˈäjttëp ja uˈunk ënäˈk parë mëdë tyääk tyeety diˈib të myëjjäˈäyënë?
¿Wiˈix mbäät ja nmëguˈukˈäjtëm diˈib mä naymyujkën tmëjkumaytyë pënaty të myëjjäˈäyënë?
1. ¿Ti jotmay tyamë naxwinyëdë jäˈäy wyinguwäˈkëdëp?
JYOBAA ninäˈä tkatsejky etsë naxwinyëdë jäˈäy yˈayowët mët ko myëjjäˈäyënë. Diˈib tyuknibëjtakë, yëˈë etsë yetyëjk toxytyëjk yajpäättët oy mëk mä ja lugäärë tsujpë. Per kyaj duˈun tyuun jyäjtë, pes “axtë tyam tëgekyë diˈibë Dios pyëjtak moon tujkp” (Rom. 8:22). Per, ¿wiˈixëdaa Dios nyayjawëty ko naxwinyëdë jäˈäy yˈayoy mët ko pyokyjyaˈayˈattë? Kyaj yëˈëyë poky kaytyey yajkuˈayowë, nanduˈunë mëjjäˈäyˈat, pes may diˈib të myëjjäˈäyënë kyaj nyekyyajtundë kuentë ets kyaj nyekyyajpudëkëdë mä meerë dyajtëgoyˈattë (Sal. 39:5; 2 Tim. 3:3).
2. ¿Tiko nmëjjäˈäwëm ko mä naymyujkën jyapëtyë nmëguˈukˈäjtëm diˈib të myëjjäˈäyënë?
2 Niˈamukë Dios mëduumbë myëjjäˈäwëdëp ko mä naymyujkën yajpäättë yetyëjk toxytyëjk diˈib të myëjjäˈäyënë. Pes xypyudëjkëm mët ja wijyˈäjtën diˈib myëdäjttëp ets ja myëbëjkën. Nimay ëtsäjtëm, nmëdäjtëmë jiiky mëguˈuk diˈib të myëjjäˈäyënë ets niˈamukë nmëmäˈäy nmëdäjëm, oy njiikyˈäjt nmëguˈukˈäjtëm o kyaj (Gal. 6:10; 1 Peed. 1:22). Pääty, min nˈokˈijxëm wiˈixë Dios tˈixy pënaty të myëjjäˈäyënë. Nanduˈun nˈixäˈänëm tijaty nyikëjxmˈäjtypyë familyë ets ja nmëguˈukˈäjtëm diˈib mä naymyujkën.
“KËDIIJËTS XYˈËXTIJY”
3, 4. 1) ¿Diˈibë nuˈkxtakën yajkujäˈäyë mä Salmo 71? 2) ¿Ti mbäät tˈamdowdë Dios pënaty të myëjjäˈäyënë?
3 Salmo 71:9 jyënaˈany: “Këdiijëts xyˈëxtijy mäjëts të nmëjjäˈäyënë; këdiijëts xyjaˈaytyëgoy kojëtsë nety kyaj nˈokmëdäjnë mëjää”. Waˈan yëˈëjëtyë David diˈib duˈun nuˈkxtak. Yëˈë myëduunë Dios desde ko myutskˈäjty axtë ko ojts myëjjäˈäyënë, ets kajaa tijatyë Jyobaa tyuktuunë (1 Sam. 17:33-37, 50; 1 Rey. 2:1-3, 10). Per oy mëjwiin kajaa tijaty ttuuny, duˈunyëmë Jyobaa tmënuˈkxtaky parë kyunuˈkxëdët ets kyuentˈatëdët (käjpxë Salmo 71:17, 18).a
4 Mä naymyujkën, tap mayë nmëguˈukˈäjtëm diˈib duˈun extëmë David. Oy tsip nimëjää xyëë tiempë tˈakˈyajnaxtë mët ko të myëjjäˈäyënë, tyuundëbë mëjää parë tmëjkumaytyë Dios (Ecl. 12:1-7). May, kyaj nyekymyadäˈäktë tijaty ttundët, extëm nyëjkxtët käjpxwäˈkxpë. Per duˈun extëmë David, myënuˈkxtaktëbë Jyobaa parë kyunuˈkxëdët, kyuentˈatëdët ets seguurë yˈittë ko yaˈˈatsoojëmbitäämbë nyuˈkxtakën. Nnijäˈäwëm ko Jyobaa mbäät tˈatsoojëmbity mët ko yëˈë wyinmäˈänymyooyë David parë tkujäˈäyë mä Biiblyë tijaty jotmay wyinguwäˈkë diˈib tyam nanduˈunë mëjjäˈäytyëjk pyattëp.
5. ¿Nuˈunë Jyobaa dyajtsobäätyë mëjjäˈäytyëjk diˈib kyaj myastuˈutyëty?
5 Biiblyë yajxon tnigäjpx ko Jyobaa yajtsobatypy pënaty të myëjjäˈäyënë diˈib kyaj myastuˈutyëty ets tsyejpy parë nwintsëˈkëm (Sal. 22:24-26; Prov. 16:31; 20:29). Biiblyë duˈun xyˈanmäˈäyëm: “Ko yëˈë mëjjäˈäytyëjk xyˈixëty, mwäˈägëˈëgëp ënetyë ets xykyäjpxpoˈkxëty. Myajˈixëdëp yëˈë neywyingutsëˈëgë, mëët ko jyaajëty yëˈë Dios. Ëjts duˈun Wintsën [Jyobaa]” (Lev. 19:32, MNM). Tyäˈädë ää ayuk yëˈë xytyukˈijxëm ko tsojkëbë nety yajwintsëˈëgët pënaty të myëjjäˈäyënë diˈib yajpattëp mä naymyujkën, nanduˈun tyam mbäät yajtuny. Per ¿pën diˈib nyikëjxmˈäjtypy ets tkuentˈattëdë mëjjäˈäytyëjk ets tmoˈoyët tijaty yajtëgoyˈajtypy?
¿TI NYIKËJXMˈÄJTYPYË FAMILYË?
6. ¿Ti ijxpajtën yäjkë Jesus parë yajkuentˈatëdë tääk teety?
6 Diosë yˈAyuk jyënaˈany: “Mwingutsëˈëgëp yëˈë mdeety mdääk” (Éx. 20:12, MNM; Éfes. 6:2). Jesus ojts tnigajpxyë tyäˈädë anaˈamën ko ojts tˈanëëmëdë fariseety etsë eskriibëty ko kyaj nety yˈoyëty extëm yˈadëˈëtstë ko ja tyääk tyeety tkakuentˈattë (Mar. 7:5, 10-13). Jesus pyëjtakë oybyë ijxpajtën. Ko nety yˈooganë mä të yajkëxwopy kepykyëjxy, ta ja apostëlë Juan diˈib mëk tsyojk, ttuknipëjky parë ja tyääk yajkuentˈatët, waˈanë nety ja tyääk të kyuˈoˈknë (Fwank 19:26, 27).
7. 1) ¿Wiˈixë Pablo tˈanmääy ja Dios mëduumbëty? 2) ¿Ets tijaty yˈaknigäjpx?
7 Ko Pablo tnijäˈäyë Timoteo, ojts tˈanëëmë Dios mëduumbëty ko tsojkëbë nety tkuentˈattëdë fyamilyë (käjpxë 1 Timotee 5:4, 8, 16). Yëˈë nety tyukmëtmaytyakypyë Timoteo pënaty mbäät yajpudëkë mä ja naymyujkën ets pënaty kyaj. Ets ojts yajxon tnigajpxy ko pën nyikëjxmˈäjttëp tkuentˈatët ja kuˈookytyoxytyëjk diˈib të myëjjäˈäyënë, yëˈë ja uˈunk ënäˈk, okˈënäˈk ets ja jiiky mëguˈuk. Ko duˈun ttundët, ta kyaj nëgoo ja meeny sentääbë dyajtunët ja naymyujkën. Nanduˈun tyam, nyajnigëxëˈkëm ko ntsojkëmë Dios, ko nmoˈoyëm ja jiiky mëguˈuk tijaty yajtëgoyˈajtypy.
8. ¿Tiko Biiblyë kyaj tnigajpxy wiˈix mbäät yajkuentˈatyë tääk teety diˈib të myëjjäˈäyënë?
8 Uˈunk ënäˈk diˈib të yaˈkˈabajnëdë, yëˈë diˈib nyikëjxmˈäjttëp parë tmoˈoytyëdë tyääk tyeety tijaty yajtëgoyˈajtypy. Pablo ojts jyënaˈany ets yajkuentˈatët ja jiiky mëguˈuk diˈib ëxpëjkp, per oy ja tääk teety kyaˈëxpëktë, tsojkëp nanduˈun yajkuentˈatët. Wiˈixëm ja tääk teety dyajtëgoyˈattë naybyudëkë. Pääty, tuˈuk tuˈugë familyë mbäät twinmay wiˈix tkuentˈatäˈänyë jyiiky myëguˈuk diˈib të myëjjäˈäyënë. Pes kyaj tyuknaxëty tijaty yajtëgoyˈäjttëp, wiˈixëm ja yuu päˈäm tmëdattë ets wiˈixëm jyaˈayˈattë. Ta näägë mëjjäˈäytyëjk diˈib kanäägë yˈuˈunk yˈënäˈk ets ta diˈib jeˈeyë tuˈuk. Ta nääk diˈib pudëjkëdëbë gobiernë ets ta diˈib kyaj. Ets nan kyaj tyuknaxëty tijaty tsyojkënyëˈäjttëp. Pääty, kyaj nety yˈoyëty ets nan kyaj nety ntsojkëm ja nmëguˈukˈäjtëm ko nˈëbat ngäjpxpatëm mä wiˈix tkuentˈattë ja jyiiky myëguˈuk diˈib të myëjjäˈäyënë. Pes pën tyuundëp extëmë Biiblyë jyënaˈany, mbäädë Jyobaa kyunuˈkxëdë ets mbäät dyaˈoybyëtsëmy tijaty tyuundëp, duˈun extëm xëmë Jyobaa ttuny desde ko Moisés jyukyˈajty (Núm. 11:23).
9-11. 1) ¿Ti jotmay wyinguwäˈkëdëp näägë nmëguˈukˈäjtëm? (Ixë dibujë mä tsyondaˈagyë tyäˈädë artikulo.) 2) ¿Tiko uˈunk ënäˈk kyaj mbäät pojënë tmastuˈuttë Diosë tyuunk? Pëjtäˈäk tuˈugë ijxpajtën.
9 Ko uˈunk ënäˈk jagam tsyëënëdë, mbäät tsyiptakxëdë parë tpudëkëdët ja tyääk tyeety. Per näˈäty, tsojkëp netyë tninëjkxtët mët ko ajotkumonë të yˈayoˈonbääty, mbäät të kyëday o të kyëdëjy tyekytyëjy. Ets mbäädë net dyajtëgoyˈattë naybyudëkë, mbäät jeky o waanë.b
10 Pënaty yëˈëyë Diosë tyuunk tyuundëp ets jagam yajpäättë mä jyëën tyëjk, mbäät tsyiptakxëdë parë twinmaytyët ti diˈib tyundëp. Pënaty tuundëp Betel, o sirkuitë, distritë, misioneerë yajtsobattëbë tyuunk, pes duˈun tˈixtë ko yëˈë Jyobaa diˈib tuunkmooyëdëp. Per pën päˈämbajtpë tyääk tyeety diˈib tim jawyiin wyinmääytyëp yëˈë: “Tsojkëbëts net nmastuˈuttët ja nduunk parëts njëmbittët mäjëtsë ndëjk etsëts nguentˈattët ja ndääk ndeety”. Per mä duˈun tkatundë, oyxyëp ko tmënuˈkxtäˈäktë Jyobaa ets tˈixtët pën ja tyääk tyeety jyantsy tsyojktëp o yajtëgoyˈäjttëp ja naybyudëkë. Kyaj mbäät pojënë tmastuˈuty tijaty nyikëjxmˈäjtypy mä Diosë tyuunk, pes mbäät kyaj tnayajtëgoyˈattë naybyudëkë. ¿Waˈandaa kyaj jeky yajkuentˈatäˈäny? ¿Mbäät näägë nmëguˈukˈäjtëm diˈib mä nyaymyukyëty ja mdääk ndeety nyayˈawanëdë parë tpudëkëdët? (Prov. 21:5.)
11 Extëm nˈokpëjtakëm, majtskë nmëguˈukˈäjtëm diˈib tukaˈaxëty, jagamë nety Dios mëdundë. Tuˈuk tyuny misioneerë jap Sudamérica, ets jatuˈuk tyuny Betel, Brooklyn (Nueva York). Ko ja tyääk tyeety ojts dyajtëgoyˈattë naybyudëkë, ta ja uˈunk ënäˈk mët ja nyëdoˈoxyëty jyëmbijttë Japón parë tˈixäˈändë wiˈix mbäät tpudëkëdë ja tyääk tyeety. Ja diˈibë nety tuundëp Sudamérica ojts tniwinmayëdë ko tmastuˈudäˈändë tyuunk ets jyëmbitäˈändë mä tyëjk. Per ta ojts myëgajpxyëty mä telefënë ja diˈib yajnëjkxypyë jëjpˈamˈäjtën mä mëjjäˈäytyëjk diˈib tuundëp mä naymyujkën. Ets yaˈˈanmääy ko të nety tnimaytyäˈäktë ja jotmay diˈib myëdäjtypy ets ko tsyojktëbë nety parë jyëmbittët ets duˈunyëm tyundët misioneerë. Tyäˈädë mëjjäˈäytyëjk nayˈawäˈänëdë parë tkuentˈatäˈändë ja misioneerë tyääk tyeety, pes yajtsobattëbë nety ko duˈun tyundë. Niˈamukë ja familyë tmëjjäˈäwëdë ko duˈunë mëjjäˈäytyëjk pyudëjkëdë.
12. ¿Ti tsojkëp tˈixtët ja familyë mä ttukniwinmayëdë wiˈix tkuentˈatäˈändë ja tyääk tyeety?
12 Tiiyëm tyuundëbë familyë diˈib Dios mëduundëp parë tkuentˈattë ja tyääk tyeety, per tsojkëp niˈamukë nˈijxëm parë kyaj axëëgë Diosë xyëë nyajwëˈëmëm. Kyaj duˈun njäˈäyˈäjtëm extëm ja jäˈäyëty diˈib nyiwintsënˈäjttë relijyonk, ja tiempë mä Jesus jyukyˈajty (Mat. 15:3-6). Yëˈë ndunäˈänëm diˈib mbäädë Dios yajmëjpëtsëmyëty etsë naymyujkën (2 Kor. 6:3).
¿TI NYIKËJXMˈÄJTYPYË NAYMYUJKËN?
13, 14. ¿Wiˈixë Biiblyë jyënaˈany ko naymyujkën nyikëjxmˈäjtypy tkuentˈatët pënaty të myëjjäˈäyënë?
13 Kyaj niˈamukë nmadakëm parë nbudëjkëm ja nmëguˈukˈäjtëm diˈib aduˈugë Diosë tyuunk tyuundëp extëm të yajnigajpxy. Per extëm yajmaytyaˈaky tyuun jyäjtë mä primer siiglë, yëˈë xytyukˈijxëm ko naymyujkën mbäät nyaytyukjotmaytyunyëty ja nmëguˈukˈäjtëm diˈib të myëjjäˈäyënë, diˈib xëmë Jyobaa myëduumpy. Mä Biiblyë jyënaˈany ko mä ja naymyujkën diˈib Jerusalén “ni pënë naty mä yëˈëjëty diˈibë tëgoyˈäjtxëp” tijaty. Tyäˈädë kyaj yëˈë tˈandijy ko ak mëkjäˈäyë nety. Yëˈë duˈun yˈandijpy, ko yajpudëjkëdë ja diˈib ayoodëp, pes ja nmëguˈukˈäjtëm diˈib mä naymyujkën ojts “dyajwäˈxtë niduˈugatyëty nëˈën pën dyajtëgoyˈaty” (Apos. 4:34, 35). Ok, ta jyamˈäjty tuˈugë jotmay mä naymyujkën. Yëˈko näägë kuˈookytyoxytyëjk kyaj nety yajmoˈoytyë jabom jabom ja kyaˈay yˈukën. ¿Ti tyuundë ja apostëlëty? Ojts tnikäjpxpattë yetyëjk diˈib mbäät tnikëjxmˈattë parë dyajwäˈkxtët tuknaxë käˈäy ukën mä ja kuˈookytyoxytyëjk (Apos. 6:1-5). Oy ko duˈun yajtukniwijtsë, yëˈë ko mä Pentekostes mä ja jëmëjt 33, nimayë jabyoˈkxyjyaˈayëty ojts tpanëjkxtsondäˈäktë Kristë ets ojts wyëˈëmdë jam Jerusalén parë dyajkëktëjkëdë myëbëjkën, nan yajmooytyë käˈäy ukën. Ets oy jeˈeyë tuk tiempë ojts wyaˈkxy ja käˈäy ukën, per extëm ttuundë tijaty ja apostëlëty, yëˈë xytyukˈijxëm ko nmëguˈukˈäjtëm diˈib mä naymyujkën, mbäät tpudëkë ja myëguˈuktëjk diˈib të myëjjäˈäyënë.
14 Extëm të nˈijxëm, Pablo ojts tˈanëëmë Timoteo diˈibë kuˈookytyoxytyëjk mbäät tˈaxäjë ja naybyudëkë mä naymyujkën (1 Tim. 5:3-16). Santiago diˈib jyaayë Biiblyë nanduˈun tkujäˈäyë ko ja Dios mëduumbëty nyikëjxmˈäjttëp parë tkuentˈattët ja kuˈookyˈuˈunk, kuˈookytyoxytyëjk ets pënaty yajtëgoyˈäjttëbë naybyudëkë (Sant. 1:27; 2:15-17). Etsë apostëlë Juan duˈun jyënany: “Pën ja pën tmëdaty tjaygyepy diˈibë ndukjikyˈäjtëm, es tˈixy ja myëguˈuk tyëgoyˈäjtxëty, es kyaj tpaˈˈayoy, ¿wiˈix mbäät tmëdaty ja Diosë tsyojkën?” (1 Fwank 3:17). Ets pën niduˈuk niduˈugë Dios mëduumbë nyikëjxmˈäjttëp parë tpudëkëdët ja myëguˈuktëjk, pes nanduˈun ja naymyujkën.
15. ¿Tijaty mbäät yaˈixy parë yajpudëkëdët pënaty të myëjjäˈäyënë?
15 Ta näägë paˈis mä mëjjäˈäytyëjk yˈittë mëjuy o tˈaxäjëdë naybyudëkë diˈib yäjktëbë gobiernë (Rom. 13:6). Per ta mä kyaj duˈumbë naybyudëkë yajˈyaky. Pääty kyaj tyuknaxëty wiˈix mbäät ja jiiky mëguˈuk o ja naymyujkën tkuentˈattë pënaty të myëjjäˈäyënë. Mayë uˈunk ënäˈk diˈib Dios mëduundëp kyaj wingon tsyëënëdë mä ja tyääk tyeety ets mbäät yëˈë yajtuˈudukëdë parë kyaj nëgoo tijaty ttukmëdundët. Pääty yaˈˈanëëmëdë uˈunk ënäˈk ets kyäjpx myaytyäˈäktët mët ja nmëguˈukˈäjtëm diˈib tuump mëjjäˈäy mä naymyujkën mä nyëjkxtë ja tyääk tyeety parë tˈixtët tijaty naybyudëkë yajtëgoyˈäjttëp. Ja mëjjäˈäytyëjk diˈib tuundëp mä naymyujkën, mbäät tpudëkëdë pënaty të myëjjäˈäyënë parë tˈaxäjëdët ja naybyudëkë diˈib yäjktëbë gobiernë. Nan mbäät tˈixtë pën të ja tsyooy tˈuuky o kyaj, o pën të dyaˈˈawäˈätsy ja soobrë mä myinyë resiibë mä tijaty kyayajkugëbety. Ko duˈun ttundët ja mëjjäˈäytyëjk diˈib tuundëp mä naymyujkën, mbäädë net ttukˈawanëdë ja uˈunk ënäˈk. Ets ko mëët ja uˈunk ënäˈk kyäjpx myaytyäˈäktët, mbäät kyaj myëjwindëkë amay jotmay. Ets ja uˈunk ënäˈk nan jotkujk nyayjawëdët ko tam pën wingon yajpääty mä ja tyääk tyeety diˈib pudëkëdëp ets tukˈawanëdëp ko ti tyun jyatëdët.
16. ¿Ti näägë nmëguˈukˈäjtëm tyuundëp parë tpudëkëdë pënaty të myëjjäˈäyënë diˈib mä naymyujkën?
16 Näägë nmëguˈukˈäjtëm yajtuundëbë xyëë tiempë etsë jyot myëjää parë tpudëkëdë ja nmëguˈukˈäjtëm diˈib të myëjjäˈäyënë, ets ttundë duˈun mët ko ttsoktë. Naytyukjotmaytyuunëdëp ets naytyukniwijtsëdëp ja tuunk mëdë wiinkpë nmëguˈukˈäjtëm parë tkuentˈattë. Kom kyaj mbäät aduˈugë Diosë tyuunk ttuunëdë, agujk jotkujk nyayjawëdë ko tpudëkëdë ja mëjjäˈäytyëjk parë kyaj ja yˈuˈunk yˈënäˈk tmastuˈuttët ja tuunk diˈib nyikëjxmˈäjttëp. ¡Jantsy oy ko duˈunë nmëguˈukˈäjtëm dyaˈixëdë jäˈäyˈäjtën! Per kyaj net yëˈë tˈandijy ko ja uˈunk ënäˈk kyaj tnekynyikëjxmˈattë parë tpudëkëdët ja tyääk tyeety, tsojkëp tkuentˈattët nuˈun myadäˈäktë.
NˈOKMËJKUMÄˈÄYËMË MËJJÄˈÄYTYËJK MËDË ÄÄ AYUK DIˈIB PUDËKËDËP
17, 18. ¿Tiko jyëjpˈamëty ets oy nyaymyënëjkxëdët ja mëjjäˈäytyëjk mët ja diˈib kuentˈäjtëdëp?
17 Duˈun pënaty të myëjjäˈäyënë ets duˈun pënaty kuentˈäjtëdëp, mbäät ttundë mëjää parë oy nyayjawëdët, diˈib mbäät pyudëkëdë yëˈko oy jyaˈayˈattët. Näˈäty ko jäˈäy myëjjäˈäyënë, ta tyuktëkëdë mëk moˈon mëk tujkën o kyaj oy nyekynyayjawëdë. Pääty pën mijts mguentˈäjtypy ja mëjjäˈäytyëjk, oy ko xytyunëdë mëjää parë xymyëjkumayët ets xypyudëkët. ¿Wiˈix mbäät xytyuny? Ko xëmë oy xymyëtkäjpx xymyëtmaytyäˈägët. Tsojkëp nmëjkumäˈäyëm pënaty të myëjjäˈäyënë diˈib xëmë Jyobaa myëduundëp. Jyobaa kyaj tjäˈäytyëgoy tijaty yëˈë të ttundë ets ëtsäjtëm nan kyaj njäˈäytyëgoˈoyëm (käjpxë Malaquías 3:16c etsë Ebreeʉsʉty 6:10).
18 Ko nanduˈun nxikoj nˈandakojëm mbäät yëˈë xypyudëjkëm parë kyaj nmëkjäˈäwëm tijaty nwinguwäˈkëm tuˈuk tuˈugë xëë (Ecl. 3:1, 4). Mayë nmëguˈukˈäjtëm diˈib të myëjjäˈäyënë kyaj nëgoo yajjotkëxtë. Jyaygyujkëdëp ko wiˈix jyaˈayˈattë mbäät niˈigyë jäˈäy kyuˈixëdë ets kyuentˈatëdë o mbäät kyaj. Näˈäty nmëdoyˈäjtëm ko näägë nmëguˈukˈäjtëm nëjkx tkuˈixëdë mëjjäˈäytyëjk, ta jyënäˈändë: “Ëjtsë nety nëjkx nmëjämoˈoyaˈany, per yëˈëjëts diˈib të xymyëjämoˈoy” (Prov. 15:13; 17:22).
19. ¿Ti pudëkëyanëdëbë ënäˈktëjk etsë mëjjäˈäytyëjk ko tyukjäˈtëdët ja ayoˈon jotmay?
19 Nˈawijx njëjpˈijxëm ets jyäˈtët ja xëë mä kyaj pën nyekymyëjjäˈäyët, nyekyˈayowët ets mä nëjkx niˈamukë nyajpatëm wäˈäts jäˈäy. Per mä duˈun kyajäˈtynyëm, tsojkëp nbëjtakëmë jot winmäˈäny mä diˈib nˈawijx njëjpˈijxëm. Pes diˈib xyaˈitäˈänëm mëk parë nmëmadakëm ja ayoˈon jotmay, yëˈë ko nmëbëjkëm tijatyë Dios të xytyukwandakëm. Tyäˈädë mëbëjkën nan yëˈë xypyudëjkëm parë “kyaj nˈanuˈkxëm, ets oy nikëjxy këbajky nwindëgoˈoyëm, jap jodoty niˈigyë yˈajamë tuˈuk tuˈugë xëë” (2 Cor. 4:16-18, Traducción del Nuevo Mundo; Eb. 6:18, 19). Per ¿ti xypyudëkëyäˈänëm parë nguentˈäjtëm pënaty të myëjjäˈäyënë? Yajnigäjpxäˈäny mä ja tuˈukpë artikulo.
[Notë]
a Salmo 71:17, 18: “Dios, mijts diˈib të xytyukniˈˈixë desde kojëts nˈënäˈkˈäjty, ets axtë tyam duˈunyëmëts nimaytyaˈaky ja mduunk diˈibë jantsy mëjwiin kajaa. Ets axtë namëjjäˈäyëdëts ets ngupoˈojëdëts, mijts Dios, këdiijëts xymyastuˈuty. Minëts nˈoktukˈawanë pënaty miin jäjtp wiˈix xymyëdaty ja mëkˈäjtën. Ets nˈoktukˈawanëts niˈamukë pënaty minan jäˈtandëp wiˈix xymyëdatyë mëjää”.
b Mä jatuˈukpë artikulo yajnigajpxy tijaty mbäät nduˈunëm parë nguentˈäjtëmë mëjjäˈäytyëjk.
c Malaquías 3:16: “Mä tadë tiempë pënatyë nety tsyëˈkëdëbë Jyobaa maytyaktë nixim niyam, niduˈuk niduˈuk mëdë jyamyëët, etsë Jyobaa jyagyujkëˈadëts ets myëdooˈadëts. Ets tuˈugë liibrë mä yajkujayë tijaty yajjääytsyondaky wyindum parë pënatyë nety tsyëˈkëdëbë Jyobaa ets parë pënaty winmäˈäyxyëdëp ja xyëë”.
[Dibujë diˈib mä pajina 20]
Pën jam pën yˈayoˈonbääty, ¿ti mbäät ttundë ja nmëguˈukˈäjtëm diˈib mä naymyujkën? (Ixë parrafo 15 etsë 16)