¿Mduumpy ti Dios mˈamdoowëp?

Tuˈugë jäˈäy diˈib kyaj xyˈixyˈaty o diˈib apenënëm mˈixyˈajtypy, kyaj xyˈanëëmët: “Ko ti xyajtëgoyˈatët, jeˈeyë ko xynyigäjpxët”. Per diˈib oy mëët mnaymyayëty mˈanëëmëp duˈun. Pes niˈamukë nbudëkëyäˈänëm pënaty mëët nnaymyaˈayëm ets ndunäˈänëm tijaty xyˈamdoˈojëm.

Biiblyë xytyukniˈˈijxëm ko Jyobaa xëmë tijaty ttukmëduny parë agujk jotkujk jyukyˈattët pënaty mëduunëp. Extëm nˈokpëjtakëm, ja rey David diˈib mëdë Dios nyaymyaayë, jyënany: “Mëj këjää winë të xytyuny të xykyäjpxy mä ëëtsëtyën koos xyajmëjˈatë [...] kaˈapës xymyäyëty nikajpxtaˈajëty” (Salmo 40:5, Tios yˈääw yˈayuk). Perë Jyobaa kyaj yëˈëyë ttuny, pes tyukmëduumbyë oyˈäjtënë axtë pënaty kyaj myëdunyëty “es dëˈën ja jäˈäy jyotkujkˈattët es xyondäˈäktët” (Apostʉlʉty 14:17).

Komë Jyobaa xyajjotkujkˈatäˈänëm, oy ko nduˈunëmë mëjää parë nanduˈun nyajjotkujkˈäjtëm (Proverbios 27:11). Per ¿ti mbäät nduˈunëm? Biiblyë tˈatsoojëmbity: “Kyaj xyjaˈaytyëgoytyët es xytyundët diˈibë oy esë jäˈäy xypyudëkëdët mëët diˈibë mmëdäjttëp. Ko dëˈën xytyundët, Diosë dëˈën mwintsëˈkëdëp, es yëˈë dëˈën yˈoyjäˈäp” (Ebreeʉsʉty 13:16). ¿Yëˈë tyäˈädë yˈandijpy ko parë nyajjotkujkˈäjtëmë Jyobaa yëˈëyë mbäät nduˈunëm diˈib oy ets ndukpudëjkëmë jäˈäy tijaty nmëdäjtëm?

Kyaj, Biiblyë jyënaˈany: “Kyaj pën mbäät [tyukjotkëdaˈagyëty] ja Dios pën kyaj tmëbeky” (Ebreeʉsʉty 11:6). Nanduˈun jyënaˈany ko Abrahán jaanëm yaˈixyˈajty extëmë “Diosë myëtnaymyaayëbë” ko nety të tpëjtaˈagyë mëbëjkën (Santya̱ˈa̱gʉ 2:23). Jesukristë nanduˈun jyënany ko parë Dios xykyunuˈkxëm, jëjpˈam ets nmëbëjkëm (Fwank 14:1). Per ¿wiˈix mbäädë mëbëjkën xyajkëktëkë extëmë Dios ttseky? Tuk pëky, yëˈko xëmë xyˈëxpëkëdë Biiblyë. Duˈuntsoo xynyijawët ti mˈamdoowëp ets xytyunët tukëˈëyë diˈib tyukjotkëdäˈägëp. Pën mduumbyë mëjää parë niˈigyë xyˈixyˈatët ets xymyëmëdowët, ta niˈigyë mëbëjkënë kyëktëkëyaˈany ets niˈigyë Dios mëwingonäˈänyëty (Kolosʉ 1:9, 10).