¿Ti myëbëjktëp?

Nmëbëjktëbëts ko “Dios wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën” (2 Timotee 3:16). Pääty, yëˈëjëts nyajtuundëbë Biiblyë parëts niˈigyë nˈixyˈattë Dios, ets nan yëˈëjëts xytyuˈumooytyëp parëts oy njukyˈattë.

Biiblyë jyënaˈany: “Waˈanë jäˈäy tnijawëdë ko mijts, mxëˈaty Jyobaa, mijts jeˈeyë naytyuˈuk diˈib mˈijtp Jantsy Këjxm abëtsemy nyaxwinyëdë” (Salmo 83:18). Päätyëts yëˈëyë nˈawdattë Jyobaa Dios. Nan nduundëbëtsë mëjää parëtsë jäˈäy nduknijawëdë Diosë xyëë, pes yëˈëjëts niDestiigëˈäjttëp (Isaías 43:10-12).

Yëˈëjëts nbanëjkxtëbë Jesus ets nmëbëjktëbëts ko yëˈë “Diosë yˈUˈunk”,a ja Kristë diˈib yajwinˈijx diˈib miin yä Naxwiiny (Fwank 1:34, 41; 4:25, 26). Ko Jesus yˈoˈky, ta jyukypyejky ets ta jyëmbijty tsäjpotm (1 Korintʉ 15:3, 4). Ko tiempë nyajxy, ta Dios pyëjtakë Rey mä yˈAnaˈam Kyutujkën (Diˈibʉ Jatanʉp o Apocalipsis 11:15). Diosë yˈAnaˈam Kyutujkën, yëˈë tuˈugë gobiernë diˈib të tyëjkënë tuumbë ets yëˈë diˈib yajjëmbitaambyë Naxwinyëdë jantsy tsuj (Daniel 2:44). Biiblyë twandaˈaky: “Diˈib yujy tudaˈaky, yëˈë jyaˈˈatandëbë naxwinyëdë, ets ttukxondäˈägäˈändë mëjwiin kajaa ja tuˈugyëˈäjtën diˈib jaˈˈatäämp” (Salmo 37:11, 29).

Nan nmëbëjktëbëts ko tijatyë Biiblyë myaytyakypy mbäät tyamë jäˈäy pyudëkëty (Isaías 48:17, 18). Päätyëts ndundë mëjää parëts nmëmëdowdë yˈanaˈamën. Extëm nˈokpëjtakëm, Biiblyë xyˈanmäˈäyëm ko kyaj yˈoyëty nyaˈˈaxëˈkëmë niniˈkx këbäjk etsë jot winmäˈäny, päätyëts kyaj njuˈuktë ets kyajts njëˈxtë droogë (2 Korintʉ 7:1). Nan kyajts ndundë diˈibë Biiblyë yajkubojkypy, extëm ko jäˈäy nyayajmuktëgoyëty, ko yˈity tsyëënë oypyënëty mëët ets ko myeetsy (1 Korintʉ 6:9-11).