“Jeˈeyë tuk jëmëjt nˈamdoyë jotkujkˈäjtën”

WIˈIXËTS TË NJUKYˈATY:

Japëts ntsënääytyë Tellancourt mä tuˈugë käjpn diˈib Francia. Ndeetyëts tsyoony Francia etsë ndäägëts Italia. Kojëtsë njëmëjt tuktujk, tajëts ojts nëjkxtë tsënaabyë Italia, mä tuˈugë lugäär mä tyundë ayoobë jäˈäy jap Roma pëˈääy. Nimëjääwëtsë netyë xëë tiempë nyajnaxtë, ja ndääk ndeetyëts jeˈeyë nety nyaytyukˈoojëdë meeny sentääbë.

Kojëtsë njëmëjt 15, tajëtsë ndääk xyˈanmääy etsëts njënbëtsëm ndëjkpëtsëmët parëts nˈëxtäˈäyëdë nmëtnaymyaayëbë. Tajëts duˈun nduuny, kyajts nëgoo nekyyajpaty mäjëtsë ndëjk ets nbatëtsë nmëtnaymyaayëbë, per yëˈë diˈib kyaj yˈoyëty. Tëgok, tajëts xymyëwingoony tuˈugë yetyëjk diˈib këxëˈkp ko oyjyaˈay etsëts xyˈawäˈänë droogë, tajëts ojts nˈaxäjë, pes nayajnaxanëbëtsë nety mëjjäˈäy mëˈˈënäˈk. Duˈunëts nbatsondakyë axëknëˈë axëktuˈu, nyajtunyëtsë droogë ets nˈity ntsëënëts oypyënëty mëët, extëmë jäˈäy diˈibë duˈumbë tyuunkˈäjttëp. Kanäkˈokëts nyaˈˈaguanëˈäjty. Jantsy naytyuˈugëts nnayjäˈäwë, kyajtsë nety nekyyajtsobäätyë njukyˈäjtën, oyëts nˈoogët o njukyˈatët. Ets kojëtsë njëmëjt 16, tajëts njanayaˈooganë, tuk boteyëts nˈukyë whisky etsëts naygyujëduˈujë kom nëëjoty. Tëgëk xëëjëts nˈijty ets kyajtsë ti njot njäˈäwëm.

Tajëts ogäˈän nyajtsobatyë njukyˈäjtën, per axëkjäˈäyëts njëmbijty, nwinˈëˈënëtsë jäˈäy. Nayˈawäˈänëbëts ijty parëts mëdë jäˈäy nˈit ntsëënët, ets kojëts xywyoonëjkxtë mä tyëjk, tajëts nmoˈoyë droogë etsëtsë net nmeetsy. Yëˈëts ijty nyajwaˈkxypyë droogë jap Italia ets yëˈëts xyajtuump tuk grupë axëkjäˈäy diˈib naynyijäˈäwëdëp oymyääjëty. Xëmëts ijtyë jotmay nmëdaty mëdë polisiyë. Per oyëtsë nety jantsy axëëk njukyˈaty, ijtpëtsë nety seguurë ko tam tiko njukyˈäjtëm. Päätyëtsë Dios nmënuˈkxtaky: “Jeˈeyë tuk jëmëjt nˈamdoyë jotkujkˈäjtën”.

BIIBLYË YAJTËGÄJTSËTSË NJUKYˈÄJTËN:

Kojëtsë njëmëjt 24, tajëts ndukniwinmäˈäyë nëjkxäˈäny Inglaterra. Oˈkën jëjpˈamëtsë nety nˈity, mët ko yëˈëtsë nety xyaˈoogäämbë narkotrafikante. Per mäjëts nganëjkxynyëm, tajëtsë ndääk ojts nguˈixë, xyajmonyˈijx xyajmonyjäˈäwëts kojëts jap nbatyë Annunziato Lugarà, tapëtsë ndääk ttukmëtmaytyaˈagyë Biiblyë.a Nnijäˈäwëbëtsë nety ko mëk axëkjäˈäy të jyukyˈaty, päätyëts xyˈatsëˈkë etsëts nyajtëëy ti nety jap tyuumpy. Tajëts xytyukmëtmaytyaky ko të dyajtëgatsyë jyukyˈäjtënë parë të jyaˈty Jyobaa tyestiigë. Etsëts xyˈanmääy parëts nˈëxtäˈäyëdë Testiigë kojëts njäˈtët Inglaterra. Per kyajts duˈun nduuny, duˈunyëmëts axëëk njukyˈajty.

Tëgokëts nˈijxy tuˈugë Testiigë tˈawanë rebistë Diˈib Xytyukˈawäˈänëm mëdë ¡Despertad! mä tuˈugë kaye mä mayë jäˈäy nyaxtë jap Londres. Tajëts njamyejtsy tijëtsë nety të ndukwandaˈagyë Annunziato etsëts nyajtëëy ja Testiigë pën mbäädëts xyaˈëxpëky.

Xyajmonyˈijx xyajmonyjäˈäwëts tijatyëts njäjt. Extëm nˈokpëjtakëm, xyˈajäjt xyjotjäjtëts wiˈixë Dios yajnimaytyaˈaky mä 1 Fwank 1:9 mä jyënaˈany: “Pën mayäjtsëm ko nbekytyuˈunëm, Dios diˈibë tyiimpy ja tëyˈäjtën, xypyojpëmaˈxäˈänëm es xyajwatsëm”. Tyäˈädë ää ayuk yajtëgäjtsëtsë njukyˈäjtën, pes kyajtsë nety wäˈäts të njukyˈaty. Tajëts ndëjkë yeˈebyë mä tyuˈukmuktë Jyobaa tyestiigëty, mäjëts jantsy oy ojts nyaˈˈaxäjë. Kojëts nˈijxy wiˈix jantsy oy jantsy oy nyayjawëdë, tajëts nanduˈun njënany ko ndukˈitëyaambyëtsë Diosë kyäjpn diˈib yajpatp extëm tuˈugë familyë, pes yëˈë diˈibëtsë nety xëmë ntsejpy.

Kyajts nëgoo ojts xytsyiptakxëty nmastuˈudëdë droogë ets kojëts axëëk nˈity ntsëënë, per diˈibëts ojts xytsyiptakxë, yëˈë nyajtëgatsëdëtsë njäˈäyˈäjtën. Pes nˈijxëts ko tsojkëbëtsë nety nwintsëˈëgëdë jäˈäy etsëts nmëjˈixët. Duˈunyëmëts ndunyë mëjää parëts nyaˈoyë njäˈäyˈäjtën. Per tamëts kujk nyaˈoyë mët kojëtsë Jyobaa xypyudëkë. Mä jëmëjt 1997 ko nety të nyaxy tëdujk poˈo mäjëts ndëjkë ëxpëjkpë, tajëts nnëbejty extëmë Jyobaa tyestiigë.

WIˈIXËTS NDUKˈOYˈATY:

Kojëts nnëbajtääy, tajëts nbëjkyë Barbara, tuˈugë kiixy diˈibë nety näämnëm nanduˈun të nyëbety. Niduˈuk diˈibëtsë nety mëët të naymyayëty, ta nanduˈun tyëjkë ëxpëjkpë ko tˈijxy wiˈixëtsë nety të ndëgatsy mëjwiin kajaa. Tyam, të nyëbattë mët tuˈugë myëgaˈax toxytyëjk. Nan tëjkë ëxpëjkpë tuˈugëtsë nanwelë myëgaˈax diˈibë netyë jyëmëjt 80 naxy, ets ok, ta nyëbejty.

Tyam ndunyëts mëjjäˈäy mä tuˈugë tuˈukmujkën ets kajaatsë nxëë ndiempë nyajnaxtë mëdëtsë ngudëjk mäjëts ndukmëtmaytyäˈäktë Diosë yˈayuk pënaty kyäjpxtëbë italiano jap Londres. Näˈäty, xytyuktëjkëbëtsë moˈon tujkën kojëts njamyetsy wiˈixëts të njukyˈaty, perë Barbara yëˈëts xëmë xyjotkujkmoopy. Tyamnëmëtsë net nmëdaty diˈibëtsë nety ntsejpy: tuˈugëtsë nfamilyë diˈib të kyopkpëky ets tuˈugëtsë nDeety diˈibëts xytsyojkp. Jeˈeyëts tuk jëmëjtë Dios nˈamdooyë jotkujkˈäjtën, per mas kajaajëts të xymyoˈoy.