Diˈib Nnayajtëˈëwëm

◼ Pënaty jeky kujk yˈijnë ets kyaj tnekytyuunë Diosë tyuunk, ¿wiˈix yajpudëkët parë mbäät jatëgok nyëjkxtë käjpxwäˈkxpë?

Jantsy jotkujk nnayjäˈäwëm ko tuˈugë nmëguˈukˈäjtëm diˈib kyaj yˈoknëjkxnë käjpxwäˈkxpë, dyaˈixyëty jatëgok ko amumduˈukjot tmëdunäˈänyë Jyobaa (Luk. 15:4-6). Waˈan ko tmëdäjty tuˈugë jotmay o ko yajtukmëtsipˈäjtyë ëxpëjkën, ojts tmäjtsˈyuˈungë Diosë tyuunk, kyaj nyekyˈëxpëjky ets kyaj nyekymyiiny mä naymyujkën. ¿Wiˈix mbäät nbudëjkëm parë jatëgok wyimbatët?

Jëjpˈam ets niˈamukë nˈanmäˈäyëm ko mëk ntsojkëm. Mëjjäˈäytyëjk, yëˈë netyë yˈixtëp wiˈix yajpudëkëyaˈany (Sant. 5:14, 15). Pën kyajnëm jekyë tiempë nyaxy mä kyaj nyekynyijkxy käjpxwäˈkxpë, mbäät jatëgok tyuundëkë mët yëˈëyë ko pyudëkëdët tuˈugë nmëguˈukˈäjtëm diˈib jeky kujk Dios mëduny. Per pën të nyäjxnë jeky mä tmëjagamgekyë Diosë kyäjpn, mbäät niˈigyë ttsekyë naybyudëkë. Mbäät pën yaˈëxpëkyëty parë kyëktëkëdë myëbëjkën etsë tsyojkën mët tuˈugë ëxpëjkpajn diˈib mbäät pyudëkëty. Pën yajmoˈoyäämp ja ëxpëjkën, ta ja diˈib yˈijxypy wiˈix ngäjpxwäˈkxëm, twinˈixët tuˈugë nmëguˈukˈäjtëm diˈib mbäät yaˈëxpëkyëty (Eb. 5:12-14; ixë “Sección de preguntas” mä Nuestro Ministerio del Reino diˈib nobiembrë 1998). Pën mnijäˈäwëp ko taa pën dyajtëgoyˈatyë duˈumbë naybyudëkë, tukˈawanë ja diˈib yˈijxypy wiˈix ngäjpxwäˈkxëm.

Mä ngawoˈojëm tuˈugë jäˈäy käjpxwäˈkxpë diˈib jeky të yˈijnë mä kyaj tnekytyuunë Diosë tyuunk, oy ko jawyiin tyuˈukmukët mët majtskë mëjjäˈäytyëjk parë tˈixtët pën mbäät jatëgok nyijkxy ëwäˈkx käjpxwäˈkxpë. Duˈun mbäädë mëjjäˈäytyëjk ttundë extëm ko tuˈugë jembyë nyëjkxäˈäny käjpxwäˈkxpë (ix mä La Atalaya 15 äämbë nobiembrë 1988, paj. 17, ets mä liibrë ¿Ti tukniˈijxëbë Biiblyë?, paj. 177, parr. 9-11). Tyäˈädë jäˈäy tsojkëp dyaˈixëdët amumduˈukjot ko jantsy nëjkxäämp käjpxwäˈkxpë. Nan tsojkëp ttunët extëm jyënaˈany mä liibrë Organizados pajina 79 axtë 81 ets nyëjkxët jëjwitsë mä naymyujkën.

Nan mbäät mëjwiin kajaa pyudëkëty ko ttukniwitsët näˈäjaty yˈëxpëkäˈäny parë niˈigyë tmëwingonëdë Jyobaa ets xëmë tˈyoˈoyët ja nëˈë tuˈu diˈib mënëjkxp mä jukyˈäjtën winë xëëbë (Mat. 7:14; Eb. 10:23-25). Pën ja diˈib kyaj nyekynyijkxy käjpxwäˈkxpë “[naybyëjtakëp] mëk” o tyuumbyë mëjää ets dyajmëjwindëkë oybyë jäˈäyˈäjtën, ta kyaj “nëgoobë” jyukyˈatët, o ja tuk pëky njënäˈänëm, nëjkxëp tyuundëkë (2 Peed. 1:5-8).