Nˈokˈyaˈijxëm ko nmëjjäˈäjëm ti Jyobaa të ttuny
Yajjamyatsäˈänyë Jesusë yˈoˈkën xëë 17 äämbë abril
1. ¿Wiˈix nyayjäˈäwë ja diˈib jyaˈay salmo ets wiˈix mbäät nanduˈun nayjäˈäwëm ko yajjamyatsäˈänyë Jesus yˈoˈkën xëë?
1 Jyobaa mëjwiin kajaa të xynyasˈayoˈojëm ets të xyaˈˈawäˈätspëtsëˈëmëm, pääty ja diˈib jyaˈay salmo dyajtëëy: “¿Wiˈixëts mbäädë Jyobaa nˈokmëgëbety mët tukëˈëyë oyˈäjtën diˈibëts të xytyukmëduny?” (Sal. 116:12). Tyam, mas niˈigyë mbäät dyaˈixëdë Dios mëduumbë ko myëjjäˈädëp ti Jyobaa të ttuny. Pes ko nyajxy kanäk mëgoˈpx jëmëjt mä yajkujäˈäyë tyäˈädë ää ayuk, ta Jyobaa tmooyë naxwinyëdë jäˈäy tuˈugë regalë mas mëjpë, ko ojts xyjuˈuybyëtsëˈëmëm. Mientrës nˈawijx njëjpˈijxëm parë jyäˈtët 17 äämbë abril, nˈokˈyaˈijxëm ko mëjwiin kajaa nmëjjäˈäjëm (Kol. 3:15).
2. ¿Wiˈix ndukˈoyˈäjtëm ko të nyajjuˈuybyëtsëˈëmëm?
2 ¿Wiˈix ndukˈoyˈäjtëm ko të nyajjuˈuybyëtsëˈëmëm? Mët ko të nyajjuˈuybyëtsëˈëmëm mbäädë Dios “tmeˈxy ja nbojpëˈäjtëm” (Kol. 1:13, 14). Ets nan mbäät nmëduˈunëmë Dios mëdë jot winmäˈäny wäˈäts (Ebre. 9:13, 14). Kyaj ti njëjptsëˈk njëjpjäˈäjëm mbäät nmënuˈkxtakëm näˈä ndimtsojkëm (Ebre. 4:14-16). Pënaty myëbëjktëp ko Jesus të xyjuˈuybyëtsëˈëmëm, ¡mbäät nëjkx jyukyˈattë winë xëë winë tiempë! (Fwank 3:16).
3. ¿Wiˈix mbäät nyaˈijxëm ko nmëjjäˈäjëm ko Jyobaa të xyjuˈuybyëtsëˈëmëm?
3 Nˈokˈyaˈijxëm ko nmëjjäˈäjëm. Tuk peky wiˈix mbäät nyaˈijxëm, yëˈë ko ngäjpxëm jabom jabomë Biiblyë diˈib yajkäjpxp ko tpäätyë Jesusë yˈoˈkën xëë ets nbawinmäˈäyëm. Mä La Atalaya 1 de febrero de 2011 jap tmëminyë tyäˈädë artikulo “¿Está usted listo para el día más importante del año?”, të yajtuknibëjktäägë parë xypyudëjkëm. Ja tuk peky wiˈix mbäät nyaˈijxëm ko nmëjjäˈäjëm, yëˈë ko Jyobaa nmënuˈkxtakëm amumduˈukjot parë nˈanmäˈäyëm ko mëjwiin kajaa nmëjjäˈäjëm ko të xyjuˈuybyëtsëˈëmëm (1 Tes. 5:17, 18). Ets ja tuk peky, yëˈë ko nëjkxëm mä yajjamyatsäˈänyë Jesusë yˈoˈkën xëë, extëm ojts tniˈanaˈamë (1 Kor. 11:24, 25). Ets duˈun extëm Jyobaa niˈamukë jäˈäy ttsojktäˈäy, nanduˈunë naty nyaˈijxëmë duˈumbë tsojkën ko nwoˈojëm ja mayjyaˈay (Isa. 55:1-3).
4. ¿Wiˈixë net mbäät nwinmäˈäyëm?
4 Pënaty myëjjäˈädëp ti Jyobaa të ttuny, myëjpëjtaktëbë Jesusë yˈoˈkën xëë, kyaj duˈun tˈixtë extëm oytyim diˈibëtyë tuˈukmujkën. ¡Tyäˈädë xëë yëˈë diˈib mas jëjpˈam mä tuˈukpë jëmëjt! Mä nˈawijxëmë Jesusë yˈoˈkën xëë, oy ko duˈun nwinmäˈäyëm extëmë Salmo 103:2 jyënaˈany: “Mëjkumayë Jyobaa, ets këdii xyjaˈaytyëgoy tijaty të ttuny”.