Nˈokmëjjäˈäwëm ko Jyobaa nmëduˈunëm
1. ¿Wiˈix mayë jäˈäy wyinmaytyë ko nˈëwäˈkx ngäjpxwäˈkxëm?
1 Mä tyamë Satanás yˈaneˈempy, mayë jäˈäy wyinmaytyë ko tsuu winmäˈäny lokë winmäˈäny ko nˈëwäˈkx ngäjpxwäˈkxëm (1 Kor. 1:18-21). Pën nmëjpëjtakëm extëmë jäˈäy wyinmaytyë mbäät xyaˈëxtëkëwäˈkëm ets kyaj nekytyukxondakëmë Diosë tyuunk (Pro. 24:10; Isa. 5:20). Per ¿tiko mbäät nmëjjäˈäwëm ko nxëˈäjtëm Jyobaa tyestiigë? (Isa. 43:10.)
2. ¿Tiko njënäˈänëm ko wäˈäts ja tuunk diˈib nduˈunëm?
2 Ja tuunk diˈib wäˈäts. Apostëlë Pablo ojts tnimaytyaˈaky ko yëˈë ngäjpxwäˈkxëm “ja oybyë ayuk diˈibë tsoˈon mä Diosën” (Rom. 15:15, 16). ¿Ets tiko njënäˈänëm ko wäˈäts ja tuunk diˈib nduˈunëm? Yëˈko yëˈë nmëduˈunëm ja Dios diˈib wäˈäts ets nan yëˈë nyajwatsëmë xyëë (1 Kor. 3:9; 1 Peed. 1:15). Ko ngäjpxwäˈkxëm, Jyobaa duˈun tˈixy “extëmë nwintsëˈkënˈäjtëm”, pääty jyëjpˈamëty pes duˈunën nDiosˈawdäjtëm (Ebre. 13:15).
3. ¿Tiko nitii mëët kyayaˈijxkijpxyë ko nëjkxëm ëwäˈkx käjpxwäˈkxpë?
3 Jantsy oyë tyäˈädë tuunk diˈib nikëjxmˈäjtëm ko nˈëwäˈkx ngäjpxwäˈkxëm, pes winˈixy pënaty duˈun tuundëp. Yëˈë anklësëty jyatunandëbë tyäˈädë tuunk (1 Peed. 1:12). Ets yëˈëjëty jantsy oyxyëp tjatundë. Per ëtsäjtëmë Jyobaa të xywyinˈijxëm parë nduˈunëmë tyäˈädë tuunk diˈib nitii mëët kyayaˈijxkijpxyë, oy nitii ngatsooˈäjtëm “extëmë naxpotsytyuˈtsën” (2 Kor. 4:7).
4. ¿Wiˈix mbäät nyajnigëxëˈkëm ko nmëjjäˈäwëm ja Diosë tyuunk?
4 Diˈib mas jëjpˈam. Pën nˈijxëmë tyäˈädë tuunk ko mëjwiin kajaa tsyobääty, ta jëjpˈam nbëjtakëm mä njukyˈäjtënˈäjtëm ets njuˈtëmë tiempë parë nduˈunëm tuˈuk tuˈugë sëmään (Fili. 1:10). Nˈokpëjtakëm koxyëp ëtsäjtëm nxuxëm mët tuˈugë grupë diˈib abëtsemy nyaxwinyëdë yaˈixyˈäjtp, ets kom njantsy myëjjäˈäwëm, taxyëp xëmë nxuxtakëm parë oy nyajpëtsëˈëmëm. Nanduˈun jyaty ko ngäjpxwäˈkxëm, ko jawyiin nˈëxpëjkëm, ta nyaˈixyˈäjtëm extëm “diˈibë oy tukˈëxpëjkp ja ayuk tëyˈäjtënbë” ets nduˈunëmë mëjää parë oy nyaˈëxpëjkëm (2 Tim. 2:15; 4:2).
5. ¿Pënaty myëjjäˈäwëdëp ja tuunk diˈibë nduˈunëm?
5 Kyaj nasˈijxëm ets yëˈë xyaˈëxtëkëwäˈkëm wiˈixë jäˈäy jyënäˈändë. Pes taanëm mayë jäˈäy diˈib myëjjäˈäwëdëp ko ninëjkxëm. Ets diˈib mas ntsojkëm yëˈë etsë Jyobaa xykyupëjkëm ets kyaj yëˈëjëtyë naxwinyëdë jäˈäy. Ets mbäät nˈijtëm seguurë ko Jyobaa kajaa dyajtsobääty ko nduˈunëmë tyuunk (Isa. 52:7).