Tëgëk peky diˈib mbäät xypyudëjkëm parë oyë jäˈäy nyaˈëxpëjkëm
1. ¿Tiko jyëjpˈamëty ets oyë jäˈäy nyaˈëxpëjkëm?
1 Niˈamukë diˈib ëwäˈkx käjpxwäˈkxp ak yaˈëxpëjktëp. Ko nëjkxëm käjpxwäˈkxpë, jäˈäy nyaˈëxpëjkëm o nijëmbijtëm jatëgok, yëˈë ndukniˈˈijxëm diˈib jëjpˈam mbäät tnijawëdë. Ko ndukmëtmaytyakëm “ja Diosë jyaaybyajtën”, duˈun nbudëjkëm parë tpäättët, “ja nitsokën” (2 Tim. 3:15). ¡Jantsy oy ja tuunk diˈib nikëjxmˈäjtëm! Pääty, nˈoktuˈunëmë mëjää parë oyë jäˈäy nyaˈëxpëjkëm. Min nˈokˈijxëm tëgëk peky wiˈix mbäät nduˈunëm.
2. ¿Wiˈix mbäädë jäˈäy nyaˈëxpëjkëm wingëjxy?
2 Nˈokˈyaˈëxpëjkëm wingëjxy. Mbäät ti jäˈäy ndukmëtmaytyakëm diˈib të yajxon njaygyujkëm, per ja jäˈäy kyajnëm ttimmëdoy ets tsip tjaygyukët. Pääty ko nyaˈëxpëjkëm, kyaj nëgoo tijaty kajaa njantsy tyukmëtmaytyakëm. Nˈoknimaytyakëm yëˈëyë diˈib jëjpˈam. Kyaj tyim tsekyëty nëgoo jeky nmaytyakëm parë oy nyaˈëxpëjkëm (Pro. 10:19). Nan kyaj nˈëxtäˈäyëm tukëˈëyë tekstë, yëˈëyë mbäät ngäjpxëm diˈib jëjpˈam. Ets ko nety të ngäjpxtäˈäyëm, ta yëˈëyë ndukmëtmaytyakëm ja diˈib mëët tyuˈugyë. Mä ja diskursë diˈib xyëˈäjtypy Sermón del Monte diˈib yajpatp mä Matewʉ kapitulo 5 axtë 7, jap myiny ja tëyˈäjtënë diˈibë Jesus ojts tyukniˈˈixë këkpäät, wingëjxy myaytyaky ets wimbiy ja ayuk diˈib yajtuun.
3. ¿Tiko yˈoyëty nyajtuˈunëmë ijxpajtën, ets diˈibë mas xypyudëjkëm?
3 Nˈokˈyajtuˈunëmë ijxpajtën. Ijxpajtën yëˈë xypyudëjkëm parë xyajwinmäˈäyëm, xyjotjäjtëm ets parë kyaj njäˈäytyëgoˈoyëm. Kyaj mbäät nwinmäˈäyëm ko kyaj njäjtëm wiˈix tijaty nimaytyakëm ets ko kyaj mbäät nbëjtakëmë oybyë ijxpajtën. Jesus yëˈë yajtuunë ijxpajtën diˈib wingëjxy ets kyaj nëgoo jeky tnimaytyaky (Mat. 7:3-5; 18:2-4). Ja tuˈugë ijxpajtën diˈib mas niˈigyë mbäät xypyudëjkëm, yëˈë ko njäˈäyëmë dibujë. Ets ko jawyiin nˈëxpëjkëm, ta nmëwinmäˈänybyatëm wiˈix nduˈunëm.
4. ¿Wiˈix mbäät tijatyë jäˈäy nyajtëˈëwëm?
4 Nˈokˈyajtëˈëwëm tijaty. Ko jäˈäy tijaty nyajtëˈëwëm, ta nyajwinmäˈäyëm. Pääty ko tijaty nyajtëˈëwëm, ta nˈawijxëm parë yˈatsoojëmbitët ets kyaj pojënë nˈatsoˈojëm, net nˈijxëm pën të tjaygyukë. Ets pën kyaj oy të yˈatsoojëmbity, kyaj netyë ngäjpxˈoˈoyëm, mbäät tijaty nˈakˈyajtëˈëwëm parë këˈëm tjaygyukët (Mat. 17:24-27). Ets kom kyaj jyaˈˈatyë yaˈëxpëjkpë diˈib kyaj tyëgoy, päätyë Biiblyë xyˈanmäˈäyëm ets nˈijxëm wiˈix nyaˈëxpëjkëm, pes duˈun nëjkx ndukˈoyˈäjtëm ets nanduˈun ja jäˈäyëty diˈib myëdooˈijtypy (1 Tim. 4:16).