Nˈokˈyajtuˈunëm yajxonë rebistë diˈib kyaj jyemyëty

Kyaj mbäät pën pyudëkëtyë rebistë pën jeˈeyë nyajnipajtëm o nbëjtakëm puˈxmoty o postäˈägoty, pääty oyxyëp ko nyajwäˈkxëm. Ko tuˈugë jäˈäy tkäjpxët jantsy jeˈeyë tuˈugë rebistë, mbäät niˈigyë tnijawëyäˈänëdë tëyˈäjtën ets pyudëkëdët parë tkäjpxëdë Diosë xyëë, Jyobaa (Rom. 10:13, 14). Tyää yajnigäjpxäˈäny tuk pëky majtsk pëky wiˈix mbäät ngëyäjkëmë rebistë diˈib kyaj jyemyëty.

• Ko nëjkxëm käjpxwäˈkxpë mä territooryë mä näˈäganäˈäty nëjkxëm, nˈokˈyajwëˈëmëmë rebistë mä kyaj pën nbatëm, per oy ko nˈijxëm mä nbëjtakëm.

• Ko ngäjpxwäˈkxëm mä mayjyaˈay yajpääty, extëm mä karrë tsyoony jyaˈty, mbäät nyajtëˈëwëmë jäˈäy diˈib jam awijxtëp pën mbäät ti tkäjpxtë, ta net ndukˈijxëm tuˈuk majtskë rebistë parë twinˈixtët diˈibë kyäjpxandëp.

• Mbäät nnikakëm tuˈuk majtskë rebistë mä jäˈäy tyuˈukmuktë o mä yˈawixtë, extëm mä klinikë. Pën jam ja jäˈäy diˈib nyikëjxmˈäjtypyë tadë lugäär, oy ko jawyiin nˈamdoˈojëmë permisë. Ets pën nˈijxëm ko tam tuˈuk majtskë rebistë, oy ko kyaj nekynyikakëm.

• Mä niˈëxpëjkëm ti ndukmëtmaytyäˈägäˈänëmë jäˈäy diˈib jatëgok nnijëmbitäˈänëm, oy ko nwinmäˈäyëm ti mbäät tˈoymyëdoy tuˈuk tuˈugë jäˈäy. ¿Jamë yˈuˈunk yˈënäˈk? ¿Nëjkxäämp mumaty? ¿Kyojaambyë pëjy ujts? Nˈokwinˈijxëmë rebistë diˈib kyaj jyemyëty ets nˈokˈëxtäˈäyëmë artikulo diˈib mbäät tˈoymyëdoy ets ta nmoˈoyëm ko ninëjkxëm.

• Pën të nyäjxnë kanäk poˈo mä kyaj nekypyatëm tuˈugë jäˈäy diˈib yˈoymyëdoo Diosë yˈayuk, oy ko nˈawäˈänëm tuˈuk majtskë rebistë diˈib kyaj të nmoˈoyëm.