¿Tiko të yajtuknibëjtäägë nduˈukmujkëm parë nëjkxëm käjpxwäˈkxpë?

1. ¿Tiko nduˈukmujkëm parë nëjkxëm käjpxwäˈkxpë?

¹ Tëgok, jawyiinë Jesus tyuˈukmujky mët ja yˈëxpëjkpëty mä tkakaxtënëm käjpxwäˈkxpë (Luk. 10:1-11). Myëjämooy ko ttukjamyejtsy ko kyaj nety ak yëˈëyë yajpäättë, pes yëˈë nety tuˈumooyëdëbë Jyobaa, ja “Kugam”. Nan ojts ttukniˈˈixë wiˈixë nety mbäät tkuytyundë diˈib të yajtuknipëktë ets nan tyukniwijtsë ko tkajxtë “nimajtskatyëty”. Tyam, nan pääty nduˈukmujkëm parë nyajtukniˈˈijxëm, nyajmëjämoˈoyëm ets yajtukniwitsët wiˈix nëjkx ngäjpxwäˈkxëm.

2. Ko tyëkëdë abril, ¿nuˈun jyakäˈäny ko nduˈukmujkëm parë nëjkxëm käjpxwäˈkxpë?

² Ko nduˈukmujkëm parë nëjkxëm käjpxwäˈkxpë, ja nety jyeky 10 minutë axtë 15 minutë. Ets ja mä nety yajwijtswaˈkxyë grupë, yaˈˈanëëmëdë mä nyëjkxtët ets yajtunyë nuˈkxtakën. Per abril, ja jeˈeyë jyakanë 5 minutë axtë 7 minutë. Ets pën ja nduˈukmujkëm parë nëjkxëm käjpxwäˈkxpë ko nety të jyëjpkëxy ja naymyujkën, ta mas waanë jyakët, pes pënaty nëjkxandëp të nety jawyiin yˈëxpëktë. Ko kyaj nëgoo jyakët, ta mas jekyë tiempë nmëdäjtëm parë ngäjpxwäˈkxëm. Ets nan kyaj nëgoo wyëˈëmëdët ja prekursoorëty etsë nmëguˈukˈäjtëm diˈibë nety të tyëkëdë käjpxwäˈkxpë mä kyayajjuutynyëmë grupë.

3. ¿Wiˈix mbäät yajtukniwitsë ko nduˈukmujkëm parë nëjkxëm käjpxwäˈkxpë?

³ Ko nduˈukmujkëm parë nëjkxëm käjpxwäˈkxpë, duˈun mbäät yajtukniwitsë extëm niˈamukë nmëguˈukˈäjtëm ttukˈoyˈattët. Mä kanäägë naymyujkën të tˈixtë ko oybyëtsëëmp ko yajwijtswaˈkxyë grupë ets ko määyëm pyëtsëmdë, ets mbäät kyaj jagam wyëˈëmxëdë mä yajjuutyë grupë ets mä kyäjpxwäˈkxäˈändë. Nan mbäät pojënë yajtukniwitsë pënaty mëët nyëjkxtët ets kyaj tsyiptakxëdët ja diˈib nyikëjxmˈäjtypyë grupë tˈixët pënaty të yajtuknipëky. Pënaty tuundëp mëjjäˈäy, yëˈë diˈib yˈixandëp ti diˈib mas oy parë niˈamukë nmëguˈukˈäjtëm ets wiˈix yaˈix yajpäättë.

4. ¿Tiko mä yajjuutyë grupë duˈun jyëjpˈamëty extëm ko nëjkxëm mä naymyujkën?

⁴ Duˈun jyëjpˈamëty extëm ko nëjkxëm mä naymyujkën. Mä yajjuutyë grupë, yëˈëyë nëjkxtëp pënaty pëtsëmandëp käjpxwäˈkxpë, kyaj nyiˈamukëty. Per kyaj yëˈë tˈandijy ko kyaj duˈun jyëjpˈamëty extëm ko nëjkxëm mä naymyujkën. Pes tukëˈëyë ëxpëjkën yëˈë Jyobaa xymyoˈoyëm parë xypyudëjkëm ets nyajnigëxëˈkëmë tsojkën nixim niyam ets nduˈunëm diˈib oy (Eb. 10:24, 25). Pääty, pënaty jyuˈttëbë grupë tsojkëp tniˈëxpëkëdët parë yajmëjkumayëdë Jyobaa ets pyudëkëdët ja nmëguˈukˈäjtëm. Xëmë ko myadäˈäktët pënaty nëjkxtëp käjpxwäˈkxpë, oyxyëp ko ttundë mëjää parë nyëjkxtët mä yajjuutyë grupë.

5. 1) ¿Ti nyikëjxmˈäjtypy ja diˈib yˈijxypy wiˈix ngäjpxwäˈkxëm ko ttukniwitsë parë yajjuudëdë grupë? 2) ¿Wiˈix mbäädë toxytyëjk tjuuttë grupë?

⁵ ¿Wiˈix nyayjëjpˈixëdët ja diˈib jyuˈtypyë grupë? Parë tuˈugë nmëguˈukˈäjtëm tˈëxpëkët yajxon ti yajnaxaampy mä naymyujkën, tsojkëp yajtuknipëkët kontiempë. Nanduˈun mbäät yajtuknipëky ja diˈib jyudaambyë grupë. Pënaty nyikëjxmˈäjtypyë grupë ets diˈib pudëjkëp, yëˈë diˈib jyuˈttëbë grupë mäjaty nbëtsëˈëmëm käjpxwäˈkxpë. Per ko nduˈukmujkëm niˈamukë mä tuˈugë lugäär, ta ja diˈib yˈijxypy wiˈix ngäjpxwäˈkxëm ttuknipëkët tuˈugë nmëguˈukˈäjtëm diˈib jyuudëp ja grupë. Näägë nmëguˈukˈäjtëm diˈib yˈijxypy wiˈix ngäjpxwäˈkxëm, myooytyëp niˈamukë diˈib jyuˈttëbë grupë tuˈugë programë ets nan pyëjtakypy mä tableerë. Ja diˈib yˈijxypy wiˈix ngäjpxwäˈkxëm, yajxon twinˈixët pën mbäät tjuuty ja grupë, pes net ja nmëguˈukˈäjtëm pyudëkëdët pën jyajtypy tyukniˈˈixët ets pën jyajtypy tijaty ttukniwitsët. Pën tuk xëë majtsk xëë kyaj yajpääty nituˈugë mëjjäˈäy o ja diˈib pyudëjkëbë mëjjäˈäy ets nituˈugë yetyëjk diˈib të nyëbajnë diˈib mbäät tjuutyë grupë, ta ja diˈib yˈijxypy wiˈix ngäjpxwäˈkxëm, ttuknipëkët tuˈugë toxytyëjk diˈib të nyëbajnë diˈib mbäät tjuutyë grupë. (Ix mä jyënaˈany “Pën yëˈë tuˈugë toxytyëjk jyuˈtypyë grupë”.)

6. ¿Tiko mbäät yajxon yˈëxpëky ja diˈib jyuudaambyë grupë?

⁶ Ko ti nyajtuknipëjkëm mä Yajniˈëxpëkë Dios Tyuunk o mä Yajniˈëxpëkë wiˈix ngäjpxwäˈkxëm, nmëjpëjtakëm ets yajxon nˈëxpëjkëm. Tuˈuk majtsk jeˈeyë nmëguˈukˈäjtëm diˈib jaanëm twinmayët wiˈix jyënäˈänäˈäny ko nety nyëjkxnë mä naymyujkën. Nanduˈun mbäät nmëjpëjtakëm ko nyajtuknipëjkëm njuˈtëmë grupë. Ets kom tyam kyaj nyekyjakäˈäny, oy ko yajxon nˈëxpëjkëm parë nmëguˈukˈäjtëm pyudëkëdët ets tsojk nyajkëjxëm. Nanduˈun nˈijxëm ja territooryë mä nëjkxäˈänëm käjpxwäˈkxpë mä kyayajjuutynyëmë grupë.

7. ¿Ti mbäät yajmaytyaˈaky ko nbëtsëmäˈänëm käjpxwäˈkxpë?

⁷ Ti yajmaytyäˈägëp. Tëgatsyaty tuˈuk tuˈugë lugäär, pääty ja tuumbë diˈib kuwijy kyaj dyaˈoyë tuˈugë boskejë diˈib tunëp mä yajjuutyë grupë. Per mä rekuäädrë “Tijaty mbäät yajtuny ko nduˈukmujkëm parë nëjkxëm käjpxwäˈkxpë”, kanäk pëky tnigajpxy. Mä yajjuutyë grupë, mbäät yaˈˈanëëmë nmëguˈukˈäjtëm ets nanduˈun yˈatsoojëmbittët. Näˈäganäˈäty mbäät nyaxy tuˈugë demostrasyonk o yaˈixy tuˈugë bideo diˈib mä jw.org diˈib mbäät nyajtuˈunëm mä ngäjpxwäˈkxëm. Ja diˈib jyuudaambyë grupë, oy ko yajxon twinmayët wiˈix tpudëkëyaˈany ets ti tyukniˈˈixëyaampy pënaty pëtsëëmdëp mä tadë xëë.

8. ¿Ti mbäät sääbëdë domingë yajnimaytyaˈaky ko nduˈukmujkëm parë nëjkxäˈänëm käjpxwäˈkxpë?

⁸ Sääbëdë sääbëdë yëˈë mayë nmëguˈukˈäjtëm yˈawäˈänëdëbë rebistë Diˈib Xytyukˈawäˈänëm. Per nimay diˈib pëtsëëmdëp sääbëdë kyaj myadäˈäktë pyëtsëmdët sëmäänoty, pääty mbäät tsyiptakxëdë tjamyatstët wiˈix të ttuundäˈäktë tmëtmaytyäˈägäˈändë jäˈäy mä të Diosˈawdattë mëdë Fyamilyë. Pääty, oy ko ja diˈib jyuˈtypyë grupë tnimaytyäˈägët wiˈix mbäädë jäˈäy yajmëtmaytyaˈaky extëm myiny mä Wiˈix nduˈunëmë Diosë Tyuunk mä kyëjxnë. Nan mbäät tˈanëëmë wiˈix dyajtëkëdët ja maytyaˈaky ko tˈawanëdët ja rebistë, extëm tnimaytyäˈäktët ti të tyuny të jyatyëty, o ti xëë tuunëp mä ja it lugäär. Ets nan mbäät tnimaytyaˈaky ti mbäät yajtuny parë jatëgokë jäˈäy yajnijëmbitët diˈib të yajmoˈoyë rebistë. Ets pën jam tuˈugë nmëguˈukˈäjtëm diˈib të tkëyakyë rebistë mä tadë poˈo, mbäät yaˈˈanëëmë ets tnimaytyäˈägët wiˈix të ttuny, o tmaytyäˈägët tuˈugë eksperiensyë. Ets domingë domingë, nan mbäät duˈun yajtuny mëdë ëxpëjkpajn diˈib yajkëyäjkp mä tadë poˈo. Ko nbëtsëmäˈänëm käjpxwäˈkxpë, nan mbäät yajnimaytyaˈaky wiˈix ngëyäjkëmë ëxpëjkpajn, extëmë foyetë Oybyë ayuk, Mëdow ko Dios mmëgajpxyëty o liibrë ¿Ti tukniˈijxëbë Biiblyë? diˈib ngëyäjkëm oytyim näˈäjëty ets diˈib nyajtuˈunëm mä jäˈäy nyaˈëxpëjkëm.

9. Ko yëˈëyë yajkëyakët tuˈugë inbitasyonk o trataadë, ¿ti mbäät yajnimaytyaˈaky sääbëdë domingë ko nduˈukmujkëm parë nëjkxëm käjpxwäˈkxëm?

⁹ Ko yëˈëyë yajkëyakët tuˈugë inbitasyonk o trataadë, ta mbäät sääbëdë domingë yajnimaytyaˈaky wiˈix ngëyäjkëm mëdë rebistë, o ti mbäät nduˈunëm ko tuˈugë jäˈäy tˈoymyëdowëdë Diosë yˈayuk. Nan mbäät yajmaytyaˈagyë eksperiensyë wiˈix të yajkëyakyë ëxpëjkpajn.

10, 11. ¿Tiko jyëjpˈamëty nnayjëjpˈijxëm parë nëjkxëm mä yajjuudäˈänyë grupë?

¹⁰ ¿Wiˈix mbäät nnayjëjpˈijxëm? Pën ja nmëguˈukˈäjtëm jawyiin yˈëxpëktë wiˈix nëjkx kyäjpxwäˈkxäˈändë, extëm mä Diosˈawdattë mëdë fyamilyë, mbäät xypyudëjkëm mä yajjuutyë grupë ko tnimaytyäˈäktët ti të tˈëxpëktë. Nan mbäät kontiempë njuˈtëmë ëxpëjkpajn mä kyayajjuutynyëmë grupë, net tsojk njäjtëm mä ngäjpxwäˈkxäˈänëm.

¹¹ Nan oy ko nduˈunëmë mëjää parë njäjtëm tsojk mä yajjuudäˈänyë grupë, duˈun extëm ko nëjkxëm mä naymyujkën. Ko ok njäjtëm, mbäädë nmëguˈukˈäjtëm nyaˈijxˈawdijtëm ets nyajmäˈtëm wiˈixë nety të yajtukniwitsë nyëjkxtët. ¿Tiko? Yëˈko ja diˈib jyuˈtypyë grupë, kanäk pëky tijaty tˈixy mä tkatukniwitsënëm. Extëm ko niwaanë jyäˈttë, mbäät tkaxtë mä ja territooryë diˈib kyaj të yˈabëtsëmy. Ets pën jagam, mbäät ttukpagaxtë diˈib jamë kyarrë. O pën jam nyëjkxäˈändë mä tuˈugë lugäär diˈib kutsëˈëgë, mbäät tˈanëëmë tuˈuk majtskë yetyëjk parë jamyë kyäjpxwäˈkxët mä ja nmëguˈukˈäjtëm. Ets pën jam diˈib pëjkëp, mbäät tkexy mä kyaj nëgoo wyimbety o mä kyaj tsyipëtyë nëˈë tuˈu. O mbäät tˈanëëmë diˈib jeky kujk kyäjpxwäˈkxnë parë nyëjkxët mët diˈib jemy. Per ko ok njäjtëm, seguurë ko ja nmëguˈukˈäjtëm twijtstëgatsäˈäny extëmë nety të ttukniwitsë. Näˈäty, mbäät niˈamukë duˈun njäjtëm mët ko jam ti të tyuny të jyatyëty. Per pën xëmë ok njäjtëm, oyxyëp ko nwinmäˈäyëm pën yëˈë mët ko kyaj nmëjjäˈäwëm ko nduˈukmujkëm parë nëjkxëm käjpxwäˈkxpë o mët ko kyaj yajxon tijaty ndukniwijtsëm.

12. ¿Ti mbäät nduˈunëm pën natimˈyëˈëyëm mët tuˈugë nmëguˈukˈäjtëm nëjkxëm käjpxwäˈkxpë?

¹² Mbäät näägë nmëguˈukˈäjtëm jyäˈttë mä yajjuudäˈänyë grupë diˈib të nyaygyäjpxëdë o nääk mbäät tˈawixy ets yajmoˈoyëdë jyamyëët. Per ko natimˈyëˈëyëm mëët nëjkxëm käjpxwäˈkxpë, kyaj nëjkx nduˈunëm mëdë wiinkpë ets nan kyaj nëjkx nyajnimayëmë mëtnaymyaayëbë (2 Kor. 6:11-13). ¿Mbäät näˈäganäˈäty nbëtsëˈëmëm käjpxwäˈkxpë mëdë nmëguˈukˈäjtëm diˈib jemy parë oy yaˈëxpëkët? (1 Kor. 10:24; 1 Tim. 4:13, 15.) Mä të nduˈukmujkëm parë nëjkxäˈänëm käjpxwäˈkxpë, oy ko nmëdooˈijtëm wiˈix nyaˈˈanmäˈäyëm, extëm mä nyajtsondäˈägäˈänëm. Ets ko nety të yajtukniwijtsëtyaˈay, oy ko kyaj nyajtëgäjtsëm ets nëjkxkojëm mä nety të nyajkajxëm.

13. Pën niˈamukë nduˈunëmë mëjää, ¿wiˈix xypyudëkëyäˈänëm ko nduˈukmujkëm parë nëjkxëm käjpxwäˈkxpë?

¹³ Ko jyëmbijttë ja Jesusë yˈëxpëjkpëty mä nety ojts të kyäjpxwäˈkxtë, ta “jyantsyxyondaktë” (Luk. 10:17). Jantsy oy wyimbëtsëëmy mët ko Jesus jawyiin tyuˈukmujky mët ja yˈëxpëjkpëty. Tyam, nan oy wyimbëtsëmy ko nduˈukmujkëm parë nëjkxëm käjpxwäˈkxpë. Pën niˈamukë nduˈunëmë mëjää, ta nëjkx nyajmëjämoˈoyëm, nyajtukniˈˈijxëm, ets nëjkxëp yajxon yajtukniwitsë parë ngäjpxwäˈkxëm ja oybyë ayuk ets “yajknijawët mä tëgekyë naxwinyëdë” (Mat. 24:14).