Wiˈix tyunyë liibrë ¿Ti ​tukniˈijxëbë Biiblyë? diˈib wingëjxy miimp

Tyäˈädë liibrë What Can the Bible Teach Us? oknëm pyëtsëmäˈäny kanäk ayuk, nanaduˈun myiny extëmë liibrë ¿Ti tukniˈijxëbë Biiblyë? Tyäˈädë majtskpë liibrë, tuknax tnimaytyaˈagyë tëyˈäjtën ets tuknax tmëminyë kapitulo. Jeˈeyë ko tyäˈädë jembyë liibrë mas wingëjxy tijaty tnimaytyaˈaky. Pes yëˈë të yajtuknigojë pënaty tsiptakxëdëp tjaygyukëdë liibrë ¿Ti tukniˈijxëbë Biiblyë? Mä jyëjpkëxyë tyäˈädë liibrë kyaj tmëminy diˈib mëët kyaˈpxy, yëˈë myëmiimbyë notë mä tkäjpxtëˈkxy diˈib tsip yajjaygyujkëp diˈib miimp mä ja kapitulo. Ets mä tsyondaˈaky tuˈuk tuˈugë kapitulo, kyaj myinyë yajtëˈëwën ets ni rekuäädrë mä yaˈˈajamyatsë. Yëˈë myëmiimpy diˈib të yajtukwijtstuˈuty mä tuˈugë kapitulo. Etsë tyäˈädë liibrë, mbäät oytyim näˈätyë yajkëyaky extëmë liibrë ¿Ti tukniˈijxëbë Biiblyë? ¿Wiˈix mbäät yajxon nyajtuˈunëm tijaty myëmiimbyë tyäˈädë liibrë diˈib wingëjxy miimp parë jäˈäy nyaˈëxpëjkëm?

TIJATY TË YAJTUKWIJTSTUˈUTY. Mbäät duˈunyëmë jäˈäy yˈëxpëky extëm jaayëm yajtuny mëdë liibrë ¿Ti tukniˈijxëbë Biiblyë?, yajkäjpxëdë parrafo ets nyajtëˈëwëm. ¿Ets pën ja jäˈäy kyaj oy tjaygyukë ja ayuk extëm myiny ja liibrë o kyaj oy tjaty lyetrëkäjpxët? Ta mbäät tyunyë tyäˈädë liibrë diˈib miimp wingëjxy. Nan mbäät tyuny tijaty të yajtukwijtstuˈuty ets mbäät yaˈˈanëëmë ja jäˈäy parë këˈëm tkäjpxët ja kapitulo. Mbäät tuk pëky yajnimaytyaˈaky ja tëyˈäjtën naa 15 minutë mä tëgokpë jäˈäy yˈëxpëky. Pes kyaj duˈun ttim nimaytyaˈaky extëm myiny tuˈuk tuˈugë kapitulo. Per tsojkëp jawyiin yajniˈëxpëkët ets yaˈixët nuˈunën ja jäˈäy tjaygyukët. Ets pën yajkäjpxp ja parrafo, ta tyunët tijaty të yajtukwijtstuˈuty parë yaˈˈajamyatsët.

NOTË MÄ ​TˈAKNIMAYTYAˈAKY. Tijaty myaytyakypyë tyäˈädë notë duˈun myaˈkxyëty extëm myiny tuˈuk tuˈugë kapitulo. Ja diˈib yaˈëxpëjkp, yëˈë wyinmayëp pën yˈixandëbë tyäˈädë notë mientrës tˈëxpëktë tyäˈädë liibrë.