¿Wiˈix xypyudëjkëm ja ëy yaˈaxy?

¿Diˈibë ëy niˈigyë mˈoymyëdoopy diˈib yajpatp JW Broadcasting^®? ¿Ets tiko? ¿Mjënäˈänëp ko extëm kyëxëˈëky mä bideo duˈun yˈixëty ja jukyˈäjtën? Tiiyëm myaytyakypy tuˈuk tuˈugë ja ëy ets seguurë ko jam tuˈugë diˈib mas nˈoymyëdoˈowëm. Per ja ëy ets ja bideo kyaj jeˈeyë xyaˈijx xyajjäˈäwëm.

Mëjwiin kajaa diˈib xytyukniˈˈijxëm, duˈun mä njukyˈäjtënˈäjtëm ets mä nDiosmëduˈunëm. Näägë ëy yëˈë myaytyakypy wiˈix mbäät nˈoyjyaˈaytyakëm, nˈijtëm tuˈugyë, jotmëk, nmëdäjtëmë mëtnaymyaayëbë, tsojkën etsë mëbëjkën. Etsë wiinkpë yëˈë myaytyakypy wiˈix nnijëmbijtëmë Jyobaa, nbokymyaˈkxëmë nmëguˈukˈäjtëm, nmëmëdoˈowëmë Dios tuˈuk tuˈugë xëëw ets nˈëxtäˈäyëmë winmäˈäny wixaty mbäät nmëduˈunëm. Axtë tap myiny tuˈugë ëy mä wiˈix mbäät nyajtuˈunëm ja telefënë. ¿Tijaty të mdukniˈˈixëty ko xymyëdoowˈityë ëy?

KO NETY TË YAˈIJXTÄˈÄYË BIDEO WINGON YˈIJNË, TA YAˈˈATSOOWËMBITËDË TYÄˈÄDË YAJTËˈËWËN:

• ¿Ti wandakënë tyäˈädë mëjjäˈäytyëjk wyinmääytyëp? (Gén. 12:3).

• ¿Ti mbäät nduˈunëm parë nˈijtëm seguurë ko Jyobaa yaˈˈadëwaampy tijaty të twandaˈaky?

• ¿Pënaty tim tsojk jatëgok nˈixäˈänëm?

• Ko nˈawijx njëjpˈijxëm ja Diosë yˈAnaˈam Kyutujkën, ¿wiˈix xypyudëjkëm parë tyam nmëmadakëmë amay jotmay? (Rom. 8:25).