Ëy mëdiˈibë Dios xytyukmëwingoˈonëm

Ko nˈëˈëw nyaxëm, yëˈë Jyobaa të xynyamoˈoyëm. Xypyudëjkëm parë oy nwinmäˈäyëm, xyajxondakëm ets yajjënaampy ja ääw jot parë nduˈunëm tijaty. Ets duˈunën xypyudëjkëm ja ëy yaˈaxy mëdiˈibë miimp mä JW Broadcasting^®, per nanduˈun xytyukmëwingoˈonëmë Jyobaa.

Desde 2014, ja kujk pyëtsëmyë ëy, naxy 70, ets tuˈugë yäˈädë ëy mbäädë jäˈäy tmëdowdë naxy 500 ayuk. Per waˈan mnayajtëyëty: “¿Pënën wyaˈpyë yäˈädë ëy yaˈaxy ets wiˈix pyëtsëmy?”.

Nijawë wiˈix yˈoyë yäˈädë ëy yaˈaxy

Ja Komitee mëdiˈibë tukniˈˈijxëp, yëˈë nyëˈëmoopy tyuˈumoopy ja Ekipë mëdiˈibë yajpëtsëëmbyë ëy. Ets yëˈë net yajpëtsëëmdëbë ëy mä JW Broadcasting etsë wiingatypyë. Nimäjktëgëëk japë nmëguˈukˈäjtëm tyundë, yetyëjk toxytyëjk. Tap mëdiˈibë tyukniwijtsëp, mëdiˈibë myaˈkxypy ja ëy ets tap mëdiˈibë yˈijxypy wiˈix pyëtsëmäˈäny. Ja Komitee mëdiˈibë tukniˈˈijxëp të nanduˈun dyaky ja permisë ko mbäädë näägë yäˈädë nmëguˈukˈäjtëm tyundë desde mä jyëën tyëjk. Ets wiˈixëm dyaktë ja naybyudëkë, ta mëdiˈibë jyaapy ja ëy, mëdiˈibë ëëw yaxp ets mëdiˈibë xux koop. Yäˈädë nmëguˈukˈäjtëm yajtuundëp ja wyijyˈäjt kyejyˈäjtën ets kyaj ttsoktë ets pën myëjkuˈëw myëjkugäjpxëdët.

¿Wiˈix yˈoyë ëy yaˈaxy? Tim jawyiin, ja Komitee mëdiˈibë tukniˈˈijxëp, yëˈë wyinˈijxypy ja tekstë mä yajjuudäˈäny ja ëy ets wiˈix ttsoky nyayjyawëdët ja jäˈäy mëdiˈibë myëdoowˈijtypy. Ta net ja nmëguˈukˈäjtëm mëdiˈibë tuundëp mä yˈoyë ëy, tˈixtë wiˈix yajxuˈuxët ja ëy ets pën jyaˈayëp. Ok, ta tgrabarattë, ets ttukmëdoowˈittë ja Komitee mëdiˈibë tukniˈˈijxëp. Yäˈädë komitee yëˈë mëdiˈibë net jënäämp pën oy duˈun o pën jam muum yˈakˈoyëyaˈany. Ta net tˈakwijtsˈoyëdë ets ta tgrabaräjnëdë extëm nyëjkxäˈäny. Yäˈädë ëy yaxy määyëm yajgrabaraty, yajgrabaräjtp Betel ets nanduˈun mä nmëguˈukˈäjtëmë jyëën tyëjk.

Yajtuundëp kanäk pëkyë programë oyatypyë parë tgrabarattë ets tjääytyë ja ëy yaxy. Parë pyëtsëmyë ëy, tsojkëp nanduˈunë tuumbajn mëdiˈibë tyukxuˈux tyukkowdëp, tsojkëbë amplifikadoor, bosinë etsë mikrofënë. Tuˈuk tuˈugë yäˈädë mikrofënë mbäät tsyobääty desde 100 axtë 1,000 dolar. Mä jëmëjt 2020 ja meeny sentääbë tyuuny 116,000 dolar parë yajjuuy tijaty tuump mä yajgrabaratyë ëy.

¿Wiˈix yajkuentëˈaty ja meeny sentääbë mëdiˈibë yajnayäjkp? Ko nimay jam tyundë mä jyëën tyëjk pënaty ëëwdëp o xux koowdëp. Ets en lugäär tyuˈukmujktäˈäytyët pënaty xux koowdëp parë yajgrabaratët, jeˈeyë tjuytyë tuˈugë programë mëdiˈibë yajpëtsëëmdaapy tijatyë jäˈäy tyukxux tyukkoowdëp etsë net txëbindë ja ëy mä komputadoorë.

“Xypyudëjkëbëts mëjwiin kajaa”

¡Jyantsy myëdowandëbë nmëguˈukˈäjtëmë ëy mëdiˈibë pëtsëëmp! Extëmë Tara, mëdiˈibë tsënaapy Alemania, jyënaˈany: “Kots ti nmëmay nmëdäjy ets nmëdoyëtsë ëy mätsë ngëˈëm ayuk, yajkujkëbëtsë nˈääw njot, duˈunëts njawë extëmxyëbëtsë Jyobaa xynyikëˈëy xynyixäjy”. Etsë Dimitri, mëdiˈibë tsënaapy Kazajistán, jyënaˈany: “Njantsy myëdoowˈitaambyëtsë ëy, pes kyajts nmëmay nmëdäjy ti kyuyˈëëy kyuyyaxypy, pes nnijäˈäwëbëts ko ak jap të tsyoˈondäˈäy mä Biiblyë. Yäˈädë ëy xypyudëjkëbëts nanduˈun parëts aduˈugë njot nwinmäˈäny nbëjktäˈägët mä Diosë tyuunk”.

Delia, mëdiˈibë tsoˈomp Sudáfrica, nyimaytyakypy nanduˈun wiˈix tmëdoyë ëy yaˈaxy, jyënaˈany: “Xypyudëjkëbëts mëjwiin kajaa. Kots nnayjyawëty mon tuk o kots jaa ti amay jotmay nbääty, xëmë jyaˈˈaty tuˈugë ëy mëdiˈibëts xypyudëjkëp. Näˈäty, jeˈeyëts nmëdoowˈity parëts kyujkë ja nˈääw njot”.

Tapë ëy mëdiˈibë nmëguˈukˈäjtëm mas niˈigyë yˈoymyëdoowdëp. Lerato, mëdiˈibë nanduˈun tsoˈomp Sudáfrica, jyënaˈany: “Kots nmëdoyë yäˈädë ëy Wingon yˈijnë ets Tëdën tyim wingony ja jembyë jukyˈäjtën jamëts nnayˈixyëty kotsë nety ja ndääk jyukypyeky. Tëgok tëgokëts nmëdoy, duˈunëts njawë extëmxyëbëtsë ndääk xyjyëjpëyëˈkëˈëky parëts xymyënanäˈäny”.

Ta tuˈugë ëy mëdiˈibë mëjwiin kajaa pyudëjkë tuˈugë kiixy mëdiˈibë tsënaapy Sri Lanka. Yëˈë jyënaˈany: “Ja nmaˈestrëts axëëgatyëts ojts xymyëgajpxy mët kots nDestiigëty ets myëdoowdääytyë ja alumnëtëjk. Kyajts nnijäˈäwë wiˈixëts nˈatsowët mët kots ntsëˈkë. Kots njäjty mätsë ndëjk, tatsë ndääk xyˈanmääy etsëts nmëdoowˈitëdë ëy Fuerte tu serás. Yäˈädë ëy xytyukˈijxëts ko tsojkëbëts nˈëxpëkët parëts nnijawët wiˈixëts nˈatsowët. Jakumbom, tats nmëtmaytyaky ja nmaˈestrë, myëdoowˈijt ets tats xyˈanmääy: ‘Tyam njaygyujkëbëtsë net tijaty mmëbëjkypy’. Dyoskujuyëmëts nmoˈoyë Diosë nyax kyäjpn ko dyajpëtsëmyë ëy yaˈaxy mëdiˈibë mbäät xypyudëjkëm’”.

¿Mä tsyoony ja meeny sentääbë parë yˈoyë tukëˈëyë yäˈädë ëy yaˈaxy? Yëˈë tuump ja meeny sentääbë mëdiˈibë miitsëty wiˈixëm mnayäjktëp parë tyuˈuyeˈey ja Diosë tyuunk abëtsëmy nyaxwinyëdë, extëm yajnimaytyaˈaky mä donate.jw.org. Dyoskujuyëm ko mˈoyjyaˈaytyäˈäktë.