Mbäät xypyudëkë mfamilyë parë niˈigyë yajpäättët agujk jotkujk

Jyobaa tsyojkypy parë familyë jyukyˈattët agujk jotkujk (Sal. 127:3-5; Ecl. 9:9; 11:9). Per näˈäty, mbäät jam kyaj ti oy ttundë o jam ti tmëmay tmëdäjtë ets ta net kyaj nyekyˈittë jotkujk. ¿Ti mbäät ttundë niduˈuk niduˈuk parë niˈigyë yajpäättët agujk jotkujk?

Ja yetyëjk kasäädë mëdiˈibë oy jäˈäyˈäjtp, wyingutsëˈkëp ja kyujëën kyudëjk extëm “pyaatyëty” (1 Peed. 3:7). Yajpatp mëët, jyaygyujkëp nuˈunën mbäät tijaty ttuny ets jyäˈäwgyëdakypy tijaty tyuumpy ja kyudëjk mëdiˈibë yëˈë tyukˈoyˈäjttëp mëët ja yˈuˈunk yˈënäˈk (Kol. 3:15). Yˈanmaapy ko mëk ttsoky ets myëjkuˈëˈëw myëjkugäjpxëp (Prov. 31:28, 31).

Ja toxytyëjk kasäädë mëdiˈibë oy jäˈäyˈäjtp, pyudëjkëp ja myëmëjjäˈäy (Prov. 31:12). Yˈëygyupëjky kyajpxykyupëjkypy ets myëmëdoopy (Kol. 3:18). Tsuj yajxon tmëˈˈëy tmëgajpxy ets kyaj tniˈoj tniyääxë (Prov. 31:26).

Ja uˈunktääk uˈunkteety mëdiˈibë oy jäˈäyˈäjttëp, yajpattëp mëdë yˈuˈunk yˈënäˈk (Deut. 6:6, 7). Yˈanmääytyëp ko mëk ttsoktë (Mat. 3:17). Nyijäˈäwëdëp wiˈix tjëjwijtsëmbittët ets näˈä, ets tsuj yajxon duˈun ttundë (Éfes. 6:4).

Ja uˈunk ënäˈk mëdiˈibë oy jäˈäyˈäjttëp, myëmëdoowdëp ja tyääk tyeety ets wyingutsëˈkëdëp (Prov. 23:22). Tyukmëtmaytyaktëp wiˈix nyayjyawëdë ets wiˈix wyinmaytyë. Kyupëjktëp nanduˈun ko jam ti yajtukmëgäjpxtë ets wyingutsëˈkëdëp (Prov. 19:20).

KO NETY TË YAˈIJXTÄˈÄYË BIDEO WIˈIX MBÄÄT NMËDÄJTËM TUˈUGË FAMILYË JOTKUJK, TA YAˈˈATSOOWËMBITËDË YÄˈÄDË YAJTËˈËWËN:

¿Ti të ttundë ja tääk teety ets ja uˈunk ënäˈk parë mas niˈigyë yajpäättë agujk jotkujk?