Nˈokˈyajjaˈäjtëmë tuˈugyëˈäjtën ets kyaj nnayˈijxkijpxyëm mëdë nmëguˈukˈäjtëm

1. ¿Wiˈix wyimbëtsëmy ko jäˈäy ttunyë kompetensyë?

TYAM, mayë jäˈäy ttundë tijaty jeˈeyë parë nyayajmëjpëtsëmäˈänëdë, oy ttimˈaxëktundët ja myëguˈuktëjk. Extëm nˈokpëjtakëm, mbäät tuˈugë jäˈäy diˈib negosyë tuump tˈaxëktunyë myëguˈuk diˈib nenduˈun myëdäjtypyë negosyë nëgoo ko yˈokmëjpëtsëmy. Nan mbäät tuˈugë jäˈäy diˈib tyukˈëyiˈiky tyukuyajtypyë pelotë, nijot dyajtsayuty ja myëguˈuk nëgoo ko yˈokmadaˈaky. O waˈan tuˈugë mixy o kiixy diˈib tëkëyäämp mä unibersidad ttunyë trampë mä yˈeksamen parë tyëkët. Ëtsäjtëm nnijäˈäwëm ko kyaj yˈoyëty duˈun nˈadëtsëm, pesë tyäˈädë tuˈunën yëˈë “diˈibë nyiniˈx kyëbäjk wyinmäˈänyˈäjttëp” (Gal. 5:19-21). Per ¿mbäädëdaa näägë Dios mëduumbëty ttundë kompetensyë mä kongregasionk ets kyaj tpëktëdë kuentë? Jëjpˈam yaˈˈatsoowëmbitët, pes mbäät kyaj nmëguˈukˈäjtëm nyekyˈittë tuˈugyë.

2. ¿Ti nˈixäˈänëm mä tyääbë artikulo?

² Mä tyääbë artikulo yajnimaytyäˈägäˈäny tijaty mbäät xyajwinmäˈäyëm ko oy tijaty nduˈunëm, këdiinëm ja nmëguˈukˈäjtëm. Nenduˈun nˈixäˈänëmë yˈijxpajtënë Dios mëduumbëty diˈib yajmaytyaktëp mä Biiblyë diˈib kyaj ojts nyayˈijxkijpxyëdë mëdë myëguˈuktëjk. Per min jawyiin nˈokˈijxëm tiko mbäät xytyuktëjkëmë duˈumbë jäˈäyˈäjtën.

NˈOKˈIJXËM WIˈIX NJÄˈÄYˈÄJTËM

3. ¿Tijaty mbäät nnayajtëˈëwëm?

³ Oy ko näˈäganäˈäty nˈijxëm wiˈix njäˈäyˈäjtëm, mbäät nnayajtëˈëwëm: “¿Tsojkëbëts pën mëët nnayˈijxkijpxyëdët parëts oy nnayjyawëdët? ¿Tikots mëk nduny mä kongregasionk? ¿Yëˈë parëts nmëjpëtsëmäˈäny o parëts nnayˈijxkijpxyëyaˈanyëty mëdëtsë nmëguˈuktëjk? ¿O päätyëts mëk nduny parëtsë Jyobaa xytyukjotkëdäˈägët?”. ¿Tiko jyëjpˈamëty yaˈˈatsoowëmbitëdë tyääbë yajtëˈëwën? Min nˈokˈijxëm wiˈixë Biiblyë jyënaˈany.

4. ¿Tiko kyaj yˈoyëty nnayˈijxkijpxyëm mëdë wiinkpë nmëguˈukˈäjtëm extëm jyënaˈanyë Galasyʉ 6:3, 4?

⁴ Biiblyë jyënaˈany ko kyaj yˈoyëty nnayˈijxkijpxyëm mëdë wiinkpë nmëguˈukˈäjtëm (käjpxë Galasyʉ 6:3, 4). ¿Tiko kyaj yˈoyëty? Yëˈko pën winmäˈäyëm ko mas niˈigyë oy tijaty nduˈunëm ets këdiinëm ja nmëguˈukˈäjtëm, mbäät xytyuktëjkëmë mëjˈat këjxmˈat. Ets pën winmäˈäyëm ko ja nmëguˈukˈäjtëm niˈigyë tijaty tjat tnijawëdë, mbäädë net nnayjyäˈäwëm ko kyaj ti ntsoowˈäjtëm. Tyäˈädë mbäät xyˈaxëktuˈunëm, päätyën kyaj yˈoyëty nnayˈijxkijpxyëm (Rom. 12:3). Katerinab diˈib tsënaapy Grecia, jyënaˈany: “Xëmëts ijty nnayˈijxkijpxyëty mëdë wiinkpë nmëguˈukˈäjtëm diˈib mas tsuj, diˈib jantsy oy ëwäˈkx käjpxwäˈkxtëp ets diˈib ajiiky amëguˈuk. Kots ijty duˈun nduny, tatsë net nnayjyawëty ko kyajts ti ntsoowëty”. Nˈokjamyajtsëm ko Jyobaa, pääty të xymyëjwoˈowëm mët ko ntsojkëm ets ko nmëdoowˈijtëm wiˈix ja yˈUˈunk xyˈanmäˈäyëm, kyaj yëˈëjëty mët ko nˈaˈëwˈäjt nˈagäjpxˈäjtëm o ko ngëxëˈkëm oy tsuj (Fwank 6:44; 1 Kor. 1:26-31).

5. ¿Ti mdukniˈˈijxëp extëm jyajtyë nmëguˈukˈäjtëm Hyun?

⁵ Mbäät nenduˈun nnayajtëˈëwëm: “¿Wiˈixëtsëdaa nmëguˈuktëjk xyˈixtë, extëm diˈib yajjaˈäjtypyë tuˈugyëˈäjtën o diˈib tsipˈëxtaapy?”. Min nˈokˈijxëm wiˈix jyajtyë Hyun, diˈib tsënaapy Corea del Sur. Yëˈë tuk tiempë tˈijxy extëm ja myëtsip pënaty yajnëjkxtëbë jëjpˈamˈäjtën mä tuˈukmujkën. Duˈun tnimaytyaˈaky: “Nˈëbat ngäjpxpattëbëts ijty ets kyajts ngupëky wiˈix jyënäˈändë”. ¿Wiˈix wyimbëtsëëmy? Yëˈë jyënaˈany: “Kots duˈun njäˈäyˈajty, ta kyaj jyapˈäjtyë tuˈugyëˈäjtën mä kongregasionk”. Ojts niganäägë myëtnaymyaayëbëty pyudëkëdë parë dyajtëgatsëdë jyaˈayˈäjtën. Hyun nnayajtëgäjtsë ets tyam jantsy oy tyuny mëjjäˈäy. ¿Ti xytyukniˈˈijxëm extëm jyajtyë Hyun? Ko tsojkëp nnayajtëgäjtsëm pën nbëjkëmë kuentë ko nnayˈijxkijpxyëm mët ja nmëguˈukˈäjtëm en lugäär nyajjapˈäjtëmë tuˈugyëˈäjtën mä kongregasionk.

KYAJ NNAYJYÄˈÄWËM MËJ KËJXM ETS KYAJ TIJATY NNAYWYINAXËJÄˈÄWËM

6. Extëmë jyënaˈanyë Galasyʉ 5:26, ¿diˈibë jäˈäyˈäjtën tsojkëp njëjpkudijëm parë kyaj nduˈunëmë kompetensyë?

⁶ (Käjpxë Galasyʉ 5:26). ¿Diˈibë jäˈäyˈäjtën tsojkëp njëjpkudijëm parë kyaj nduˈunëmë kompetensyë? Tuˈuk, yëˈë ja mëjˈat këjxmˈat. Tuˈugë jäˈäy diˈib mëj këjxm, jeˈeyë tijaty këˈëm nyaytyukmëtsokyëty. Ets jatuˈuk, yëˈë ko nnaywyinaxëjäˈäwëm tijaty. Diˈib duˈun jäˈäyˈäjtp kyaj jeˈeyë tˈatsoky diˈib ja myëguˈuk myëdäjtypy, nan kyajën ttukmëtsoky parë tijaty tmëdatët. Pääty ko tuˈugë jäˈäy tijaty nyaywyinaxëjäˈäwë, nan yëˈë yˈandijpy ko tˈaxëkˈixy ja myëguˈuk. Seguurë ko kyaj ntsojkëm ets xynyinäjxëmë duˈumbë jäˈäyˈäjtën.

7. Okpëjtäˈäk tuˈugë ijxpajtën diˈib xytyukˈijxëm ko axëktuump ko xytyuktëjkëmë mëjˈat këjxmˈat ets ko nnaywyinaxëjäˈäwëm tijaty.

⁷ Ko jäˈäy tyuktëkëtyë mëjˈat këjxmˈat ets tnaywyinaxëjawë tijaty, duˈun extëmë yujkuˈunk diˈib yajwindëgoobyë kepytyëjk, mbäät tsuj jyantsy kyëxëˈëky ja tëjk, per ko wanaty wanaty ja yujkuˈunk dyajwindëgoy, mbäädë net ok kyujijtnaxy. Nan mbäät duˈun jyaty tuˈugë jäˈäy diˈib jeky kujk Diosmëduny; pën mëj këjxm nyayjyawëty o pën nyaywyinaxëjäˈäwëp tijaty, mbäät yaˈˈayoˈonbäätyëty (Prov. 16:18). Kyaj nëjkx tˈokmëduunë Jyobaa, këˈëm nëjkx nyayˈaxëktunyëty ets nenduˈun ja myëguˈuktëjk. ¿Ti mbäät nduˈunëm parë kyaj xytyuktëjkëm ja mëjˈat këjxmˈat ets kyaj nnaywyinaxëjäˈäwëm tijaty?

8. ¿Ti xypyudëkëyäˈänëm parë kyaj xytyuktëjkëm ja mëjˈat këjxmˈat?

⁸ Mbäät kyaj xytyuktëjkëmë mëjˈat këjxmˈat pën nbanëjkxëm ja käjpxwijën diˈibë apostëlë Pablo myooy ja Dios mëduumbëty diˈib Filipos: “Diˈibë mdundëp miitsëty mä mjikyˈattë, nitii xykyatundët diˈibë jeˈeyë këˈëm xytyukˈoyˈattët o mnaymyëjpëjtäˈägëdët mët ja wiingatypyë, naybyëjtäˈägëdë yuunk naxypy, es xyjawët ko myëjjëty ja wiingatypyë es këdiinëm miitsëty këˈëm” (Filip. 2:3). Pën nyajnäjxëm ja nmëguˈukˈäjtëm niˈigyë mëj, ta kyaj mëët nnayˈijxkijpxyëm ko niˈigyë wyijyˈattë o tjat tnijawëdë tijaty. Niˈigyë nëjkx ndukxondakëm, ets mas, pën jam dyajtundë wyijyˈäjtën mä tmëdundë Jyobaa. Pën ja nmëguˈukˈäjtëm diˈib jyäjt nyijäˈäwëdëp tijaty, pyanëjkxtëp ja käjpxwijën diˈibë apostëlë Pablo yäjk, yëˈëyë yˈixandëp ja oybyë jyaˈayˈäjtën diˈib ja myëguˈuktëjk myëdäjttëp. ¿Wiˈix wyimbëtsëmäˈäny? Niˈamukë nyajpäädäˈänëm tuˈugyë ets agujk jotkujk.

9. ¿Ti xypyudëkëyäˈänëm parë kyaj nnaywyinaxëjäˈäwëm tijaty?

⁹ ¿Ti xypyudëkëyäˈänëm parë kyaj nnaywyinaxëjäˈäwëm tijaty? Yëˈko nˈijtëm yujy tudaˈaky, o ko nwinmäˈäyëm ko kyaj tëgokyë nmëmadaktäˈäyëm. Pën jäˈäyˈäjtëm yujy tudaˈaky, ta kyaj nnayajnaxäˈänëm ko niˈigyë tijaty njäjt nnijäˈäwëm. Niˈigyë njatäˈänëm tijaty oy tyuundëp ja nmëguˈukˈäjtëm. Extëm nˈokpëjtakëm, pën tuˈugë nmëguˈukˈäjtëm jantsy oy dyiskursaraty, mbäät nyajtëˈëwëm wiˈixën ttuny. O pën tuˈugë nmëguˈukˈäjtëm jantsy oyë kaaky tojkx dyaˈoyë, mbäät nˈanmäˈäyëm parë xytyukniˈˈijxëm. Ets pën tuˈugë mixy tsiptakxëp tpäädëdë myëtnaymyaayëbë, mbäät dyajtëy ti pudëjkëp ja diˈib jantsy mayë myëtnaymyaayëbë. Tëgokyë tyääbë mbäät xypyudëjkëm parë kyaj nnaywyinaxëjäˈäwëm tijaty ets parë njäjtëm tijaty nduˈunëm.

NˈOKPANËJKXËM JA YˈIJXPAJTËNË DIOS MËDUUMBËTY DIˈIB YAJMAYTYAKTËP MÄ BIIBLYË

10. ¿Ti jotmay pyatë Gedeón?

¹⁰ Gedeón, yëˈë tyëëmˈäjt yˈäätsˈäjtë Manasés, min nˈokˈijxëm ti tuun jäjtë mët ja jäˈäyëty diˈib tyëëmˈäjt yˈäätsˈäjtë Efraín. Gedeón mët nidëgëk mëgoˈpxë tsyiptuumbëty ojts tmëmadäˈäktë myëtsip mët ko Jyobaa pyudëjkëdë, ets mbäätxyëp jyanayjyäˈäwëdë mëj këjxm. Per ja tyëëm yˈäätsë Efraín, ta nyimiinëdë, kyaj parë myëjkumayäˈänëdë, yëˈë duˈun parë tˈoojäˈändë Gedeón. ¿Tiko duˈun ttuundë? Yëˈko jotˈambëjktë ko Gedeón kyawoowëdë mä nety ojts të dyajkutëgoytyë ja Diosë myëtsip. Yëˈëyë myëmääy myëdäjtë wiˈixë netë jäˈäy yˈoknimaytyäˈägëdët, ets kyaj twinmääytyë ko diˈibë netyë Gedeón të ttuny; yëˈë ko të dyajmëjpëtsëëmë Jyobaa xyëëw ets të tkuwäˈäny ja nyax kyäjpn (Juec. 8:1).

11. ¿Wiˈixë Gedeón tˈatsooy ja tyëëm yˈäätsë Efraín?

¹¹ Gedeón tsuj yajxon tˈanmääy ja tyëëm yˈäätsë Efraín: “¿Ëëtsëty tiijës të ndundë ets yajˈijxkijpxyëty mëët mëdiˈibë miitsëty të xytyundë?”. Ta net ttukjamyetsy wiˈixë netyë Jyobaa të kyunuˈkxëdë. ¿Wiˈix wyimbëtsëëmy? “Ënet ojts jyotkujkëdë” (Juec. 8:2, 3, TY). ¿Tiko Gedeón kyaj nyaytyukmëmadakë mëjˈat këjxmˈat? Yëˈko tsyojkypyë nety ets ja Diosë nyax kyäjpn tuˈugyë yajpäädët.

12. ¿Ti xytyukniˈˈijxëmë Gedeón ets ja tyëëm yˈäätsë Efraín?

¹² ¿Ti xytyukniˈˈijxëm extëm të yajmaytyaˈaky ja tyëëm yˈäätsë Efraín? Ko diˈib mas jëjpˈam mbäät nyajnäjxëm, kyaj yëˈëjëty mä wiˈix ja jäˈäy wyinmayäˈändë mä ëtsäjtëm, yëˈë duˈun wiˈixë Jyobaa myëjpëtsëmët. ¿Ti tukniˈˈijxëdëbë yˈijxpajtënë Gedeón pënaty nyigëbäjkˈäjttëbë fyamilyë ets diˈib tuundëp mëjjäˈäy? Pën jam pën tyukjotˈambëkëdë ko ti të ttundë, oy ko tjaygyukëdët tiko ja jäˈäy të jyotˈambëky, nan oy ko tmëjkumaytyët ko jam ti oy ttundë. Parë tmëjkumaytyët, tsojkëp yˈittët yujy tudaˈaky, ets mas pën yëˈë ja jäˈäy të tyëgoy. Per diˈib mas jëjpˈam, yëˈë ko nˈijtëm tuˈugyë mët ja nmëguˈukˈäjtëm ets kyaj mët ko nˈoktimˈyajnigëxëˈkëm pënën diˈib oy tijaty tyuumpy.

13. ¿Ti jotmay pyatë Ana, ets ti tyuun?

¹³ Min nenduˈun nˈokˈijxëm wiˈix yajnimaytyaˈagyë Ana. Yëˈë pyëjkë Elcaná, tuˈugë lebitë jäˈäy, diˈibë nety mëk jantsy tsojkëp. Perë Elcaná tamë nety jatuˈugë kyudëjk, diˈib xëwˈäjt Peniná. Elcaná yëˈë niˈigyë tsyojkë Ana, etsë “Peniná tamë netyë yˈuˈunk yˈënäˈk, perë Ana nituˈuk”. Peniná “xëmë tnëxiky ttukxiky parë axëëk dyajnayjyawëyaˈanyëty”, axtë jeˈeyë ojts jyëëy yaxnë Ana ets kyaj yˈokkääy yˈokˈuknë (1 Sam. 1:2, 6, 7). Mä Biiblyë nimää kyayajmaytyaˈaky ko Ana axëëk dyajjëmbijty extëm tyuunë Peniná. Niˈigyë jyënaˈany ko Ana yëˈë tyukmëtmaytyakë Jyobaa wiˈixë nety nyayjyawëty ets ko myëbëjk ko yëˈë pudëkëyanëp. Kyaj nnijäˈäwëm pënë Peniná yajtëgäjtsë jyaˈayˈäjtën. Diˈibën tëy nnijäˈäwëm, yëˈë ko Ana ojts jatëgok nyayjyawëty agujk jotkujk, pesë Biiblyë jyënaˈany ko “mä ja wyiin jyëjp kyaj tnekyyaˈijxë mäˈäy täjën” (1 Sam. 1:10, 18).

14. ¿Ti xytyukniˈˈijxëmë yˈijxpajtënë Ana?

¹⁴ ¿Ti xytyukniˈˈijxëmë yˈijxpajtënë Ana? Ko pën nyayˈijxkijpxyëyäˈänëdët mët ëtsäjtëm kyaj tiko nenduˈun nˈadëtsëm. Ets kyaj yˈoyëty mëët ntsiptuˈunëm. En lugäär nyajjëmbijtëm ko axëëk pën xytyuˈunëm, nik oy ko nyaˈoˈoyëm ja jotmay (Rom. 12:17-21). Ets pën kyaj tyëgatsy ja jäˈäy, min duˈunyëm nˈoknayjyäˈäwëm agujk jotkujk.

15. ¿Wiˈix yaˈixyˈajtyë Apolos mëdë Pablo?

¹⁵ Minë net nˈakˈijxëm ti xytyukniˈˈijxëmë yˈijxpajtënë Apolos etsë apostëlë Pablo. Yëˈëjëty, kajaa nety tnijawëdë ja Diosë Jyaaybyajtën, ets oypyënëty yˈixyˈatëdë ko jantsy oy yaˈëxpëktë. Nan pyudëjkëdë nimayë jäˈäy parë ojts tpanëjkxtë Jesus, per kyaj nyayˈaxëkˈijxëdë.

16. ¿Wiˈix jyaˈayˈajtyë Apolos?

¹⁶ Apolos jamë nety “kyugäjpnëty Alejandriië”, tuˈugë lugäär mä ijty mayë jäˈäy nyëjkxtë parë jam yˈëxpëktë. Apolos, jantsy oy yaˈëxpëjky ets “nyijäˈäp yajxon ja Diosë jyaaybyajtën” (Apos. 18:24). Ko Apolos yˈijty tuk tiempë Corinto, nääk ja nmëguˈukˈäjtëm tsyojktë parë yëˈë yaˈëxpëkëdët, ets kyaj dyuˈunëty diˈibë nety jam të yˈokˈijtpëdë extëmë Pablo (1 Kor. 1:12, 13). ¿Waˈandaa Apolos ojts jam dyajnaywyaˈkxyëty ja myëguˈuktëjk? Mbäät njënäˈänëm ko kyaj. Pes ko ojts tsyoˈonë jam Corinto, ta apostëlë Pablo mëktaˈaky yˈanmääyë parë jatëgok jyëmbitët (1 Kor. 16:12). Pablo kyajxyëp tˈanmääyë Apolos parë jyëmbitët koxyëp ojts dyajnaywyaˈkxyëty ja myëguˈuktëjk mä kongregasionk. Mbäät nˈijtëm seguurë ko Apolos ijt yujy tudaˈaky, yajtuunë wyijyˈäjtën parë ojts tˈëwaˈkxy tkäjpxwaˈkxy ja oybyë ayuk ets parë tjotkujkmooyë ja myëguˈuktëjk. Extëm nˈokpëjtakëm, kyaj axëëk nyayjyäˈäwë ko Áquila mëdë Priscila yˈaktukniˈˈijxëdë yajxon ja Diosë nyëˈë tyuˈu (Apos. 18:24-28).

17. ¿Ti tyuunë Pablo parë tuˈugyë yˈittët ja myëguˈuktëjk?

¹⁷ Apostëlë Pablo nyijäˈäwëbë nety yajxon ko jantsy oy tyunyë Apolos. Perë Pablo kyaj tjäˈäwë naywyinaxë. ¿Tiko duˈun njënäˈänëm? Yëˈko Pablo ijt yujy tudaˈaky ets kyaj yëˈë ja wyinmäˈäny ttimˈyajtunany. Extëm nˈijxëm ko ojts tnijayë ja kongregasionk diˈib Corinto, en lugäär nyayajmëjpëtsëmëdët ko nääk jyënandë: “Ëj Pääblëts xyˈëxpëjkpëˈäjtp”, yëˈë niˈigyë tmëjkumääyë Jyobaa etsë Jesukristë (1 Kor. 3:3-6).

18. Extëm jyënaˈanyë 1 Korintʉ 4:6, 7, ¿ti xytyukniˈˈijxëmë yˈijxpajtënë Apolos etsë Pablo?

¹⁸ ¿Ti xytyukniˈˈijxëmë yˈijxpajtënë Apolos etsë Pablo? Ko tëgokyë yˈoybyëtsëëmdäˈäy mët ko Jyobaa xypyudëjkëm mä tyam nduˈunëmë tyuunk ets mä nbudëjkëm mayjyaˈay parë nyëbattët. Ja tuk pëky diˈib xytyukniˈˈijxëm, yëˈë ko nmëguˈukˈäjtëm niˈigyë yajtuunkmoˈoytyët mä kongregasionk extëm mëjjäˈäy o Ministerial, mbäät niˈigyë tpudëkëdë ja myëguˈuktëjk parë dyajjaˈˈattëdë tuˈugyëˈäjtën. ¿Wiˈix ttundë? Ko tˈëwij tkäjpxwijtë ja myëguˈuktëjk jap dyajtsoondë mä Biiblyë, kyaj nyayajmëjpëtsëmëdë, niˈigyë tpudëkëdë ja myëguˈuktëjk parë tmëmëdowdëdë Jesus ets tpanëjkxëdët ja yˈijxpajtën. ¡Nguˈëˈëw ngukäjpxëm ko jyaˈˈatyë duˈumbë nmëguˈukˈäjtëm! (Käjpxë 1 Korintʉ 4:6, 7).

19. ¿Ti tsojkëp nduˈunëm niduˈuk niduˈuk? (Ix nenduˈunë rekuäädrë “Kyaj nˈijxkijpxyëm ja nmëguˈukˈäjtëm”).

¹⁹ Dios të xymyoˈoyëm niˈamukë wijyˈäjtën diˈib mbäät nnaytyukpudëjkëm nixim niyam (1 Peed. 4:10). Näˈäty mbäät nwinmäˈäyëm ko kyaj ti nëgoo nduˈunëm. Per oy yinaty wanaty ti nduˈunëm, mbäät nyajjaˈäjtëmë tuˈugyëˈäjtën mä kongregasionk, duˈun extëm ko jäˈäy tpëjtaˈaky tuˈugaty ja ladriyë mä tyëjkojˈyën. Pääty nˈoktuˈunëmë mëjääw parë kyaj nnayˈijxkijpxyëm mëdë nmëguˈukˈäjtëm ets nˈokˈyajjaˈäjtëmë tuˈugyëˈäjtën parë nˈijtëm agujk jotkujk mëdë nmëguˈukˈäjtëm (Éfes. 4:3).