Wiˈix tyam mbudëkëty tijaty ojts yajnaskäjpxë mä Apocalipsis

1, 2. Oknigäjpx tuk pëky tiko jyëjpˈamëty nnijäˈäwëm tijaty yajmaytyakp mä Apocalipsis.

¿TË NÄˈÄ xyˈokˈijxpë mä jäˈäy tmëdaty jantsy mayë retratë? Waˈan nituˈuk xykyaˈixyˈaty pënaty jam mˈijxypy mä ja retratë. Per ta ajotkumonë xyˈijxpääty tuˈugë retratë mä jam mdanë, ¿ti net mduumpy? Ta yajxon xyˈixy ets xyjyajamyatsäˈäny näˈä ets mää duˈun ojts mretratëpëtsëmy. Mjaˈëxkapaampy niˈamukë pënaty jam mëët myajpääty. Tëgatsyë taabë retratë mëdiˈibë jam mˈijxypy mët ko tam myajpääty.

² Pes duˈunënë taabë liibrë Apocalipsis extëmë taabë retratë. ¿Tiko? Min nˈokˈijxëm majtsk pëky. Myëduˈuk pëky, yëˈko ëtsäjtëm ojts nyajtuknijäˈäyëm. Pes mä tsyondaˈagyë yäˈädë liibrë jyënaˈany: ‘Yäˈädë ja Dios ojts ttuknijawë ja Jesukristë, ets tukˈëwaanëty ja tyuumbëtëjk mëdiˈibë tunan jatanëpën tsojk’ (Apoc. 1:1, TY). Yäˈädë liibrë ëtsäjtëmën të nyajtuknijäˈäyëm ninuˈun nDiosmëduˈunëm, kyaj yëˈëjëty niˈamukë jäˈäy. Pääty kyaj mëjˈixy mëjmëdoy njäˈäwëm ko nˈijxëm wiˈixën ja tyam yˈadëy tijaty jap ojts yajnaskäjpxë, pes duˈunxyëp extëm nyajpatëm mä ja retratë.

3, 4. Extëm jyënaˈanyë Apocalipsis, ¿näˈä nety yˈadëwäˈäny tijaty jap ojts yajnaskäjpxë, ets tixyëp mbäät nduˈunëm?

³ Myëmajtsk pëky tiko jyëjpˈamëty nnijäˈäwëm tijaty ojts yajnaskäjpxë mä Apocalipsis, yëˈë parë njaygyujkëm näˈäjën duˈun tyunäˈäny jyatäˈänyëty. Apostëlë Juan myaytyakë yäˈädë tiempë ko jyënany: “Mët yëˈëgyëjxm kotsë Dios xywyinmäˈänymyooy, tats nyajpaty mä taabë nWintsënˈäjtëmë xyëëw” (Apoc. 1:10, TNM). Apostëlë Juan naa jaa tkujäˈäyë mä jëmëjt 96. Ets jekyë netyë tiempë yˈaknaxäˈäny parë myinët ja “nWintsënˈäjtëmë xyëëw” (Mat. 25:14, 19; Luk. 19:12). Per tijaty ojts yajnaskäjpxë mä Biiblyë, yëˈë xytyukˈijxëm ko ja “nWintsënˈäjtëmë xyëëw”, jaajën tsyondaky mä jëmëjt 1914 ko Jesus tyëjkë anaˈambë jam tsäjpotm. Desde jaa, ta yˈadëëwtsondaky tijatyë nety të yajnaskäjpxë mä Diˈibʉ Jatanʉp, mëdiˈibë nanduˈun abatnäjxëdëbë Diosmëduumbëty. Pääty, yëˈën ndukjukyˈäjtëm ja tiempë mä Jesus të yˈanaˈamtsondaknë jam tsäjpotm.

⁴ Jantsy oy nnayjyäˈäwëm ko yëˈë ndukjukyˈäjtëmë yäˈädë tiempë, pääty oy ko njaygyujkëm extëm yajkujäˈäyë mä Apocalipsis, mä jyënaˈany: ‘Agujk jotkujk ja jäˈäy yajpäättë mëdiˈibë kyäjpxtëbën ets pyaduundëbën ja ääw ayuk mëdiˈibë jap jääybyety miimbën mä yäˈädë nokyën, jaˈa ko wingoomp ja xëëw jëmëjt’ (Apoc. 1:3, TY). Duˈunë duˈun, tsojkëp ngäjpxëm ets nbaduˈunëm ja ‘ääw ayuk mëdiˈibë jap jääybyety miimbën mä yäˈädë nokyën’. ¿Mëdiˈibatyën tsojkëp nbaduˈunëm?

IX PËN KYUPËJKYPYË JYOBAA EXTËM XYMYËDUNY

5. Extëm jyënaˈanyë Diˈibʉ Jatanʉp, ¿tiko jyëjpˈamëty nˈijxëm pën kyupëjkypyë Jyobaa extëm nmëduˈunëm?

⁵ Mä Diˈibʉ Jatanʉp kapitulo 1 yëˈë xytyukˈijxëm yajxon ko Jesus yˈijxy tyuumpy tijaty tuun jäjtëp mäjaty nduˈukmujkëm (Diˈibʉ Jat. 1:12-16, 20; 2:1). Ets mbäät nbëjkëmë kuentë ko jantsy duˈun, extëm tˈanmääy ja wëxtujkpë kongregasionk mëdiˈibë nety yajpatp Asia Menor. Myooy ja ëwij käjpxwijën mëdiˈibë nety mbäät pyudëkëdë ja Diosë mëduumbëty parë tˈixtët pën kyupëjkypyë Jyobaa extëmë netyë tmëdundë. Yäˈädë ëwij käjpxwijën mëdiˈibë yäjk, mbäät nanduˈun tyam xypyudëjkëm ninuˈun nmëduˈunëmë Dios. Yëˈë xytyukˈijxëm ko Jesukristë mëdiˈibë nWintsënˈäjtëm, nyijäˈäwëp yajxon pën ijtëm oy mëdë Jyobaa. Jesus yëˈë mëdiˈibë xynyëˈëmoˈoy xytyuˈumoˈoyëm, xykyuwäˈän xynyixäjëm ets yˈijxtaapy tijaty. Nyijäˈäwëp nanduˈun tidën tsojkëp nduˈunëm parë duˈunyëmë Jyobaa xykyupëjkëm. Minë net nˈokˈijxëm tuk pëky majtsk pëky ja ëwij käjpxwijën mëdiˈibë yäjk ets tiko tsyokyëty tyam nmëmëdoˈowëm.

6. 1) Extëm jyënaˈanyë Diˈibʉ Jatanʉp 2:3, 4, ¿wiˈixë nety yajpäättë ja Diosmëduumbëty mëdiˈibë Éfeso? 2) ¿Ti xytyukniˈˈijxëm?

⁶ (Käjpxë Diˈibʉ Jatanʉp 2:3, 4). Kyaj nnasˈijxëm ets xyaamëdë tsojkën mëdiˈibë tim jawyiin ojts njäˈäwëm mä Jyobaa. Jesus yˈanmääy ja Diosmëduumbëty mëdiˈibë Éfeso ko të nety myadäˈäktë ets ko të tmëduunˈadëˈëtstë Jyobaa oy nuˈun të tpäättë amay jotmay. Per të nety xyaˈamnëdë ja tsyojkën. Pääty, jëjpˈamë nety ets jatëgok dyajmëjwiinëdët ja tsyojkënë parë Jyobaa tkupëkët extëm tˈawdattë. Nanduˈun tyam jyaty, kyaj jeˈeyë tsyokyëty nmëmadakëm tijaty, tsojkëbën nˈijxëm tiko duˈun nduˈunëm. Jyobaa kyaj jeˈeyë tˈixy tijaty ndukmëduˈunëm, nanduˈunën tˈixy tiko duˈun nduˈunëm. Pes yëˈë niˈigyë yajtsobatypy ko nmëduˈunëm mët ko ntsojkëm ets mët ko nyajtsobatëm tijaty xytyukmëduˈunëm (Prov. 16:2; Mar. 12:29, 30).

7. 1) Extëm jyënaˈanyë Diˈibʉ Jatanʉp 3:1-3, ¿ti jotmayë nety myëdäjttëp ja Diosmëduumbëty mëdiˈibë Sardis? 2) ¿Ti ëtsäjtëm tsojkëp nduˈunëm?

⁷ (Käjpxë Diˈibʉ Jatanʉp 3:1-3). Nˈoknayaˈijtëm wijy kejy ets kyaj nnaygyumanäjxëm. Ja Diosmëduumbëty mëdiˈibë Sardis tëgatsy ja jotmay tpattë, pes yëˈëjëty të nety jantsy oy yˈokDiosmëduundëbë. Per kyaj nety tˈokjotmooynyëdë, päätyë Jesus yˈanmääyëdë ko tsojkëbë nety jatëgok nyiwij nyikajtët mët ko të nety nyaygyumanaxëdë. ¿Ti yäˈädë xytyukniˈˈijxëm? Ko Jyobaa kyaj tjäˈäytyëgoy tijaty ndukmëduˈunëm (Eb. 6:10). Per kyaj net nwinmäˈäyëm kom të jeky nmëduˈunëmë Jyobaa, pes mbäädë net jeˈeyë nboˈkxënë. Waˈan tyam kyaj duˈun nˈoktuˈunënë Diosë tyuunk extëm ijty, per tsojkëp niˈigyë njotmoˈoyëm “ja Nintsënˈäjtëmë tyuunk” ets nnayaˈijtëm wijy kejy axtë ko jyäˈtët ja kutëgoˈoyën (1 Kor. 15:58; Mat. 24:13; Mar. 13:33).

8. ¿Ti xytyukniˈˈijxëm extëmë Jesus tˈanmääy ja Diosmëduumbëty mëdiˈibë Laodicea? (Diˈibʉ Jatanʉp 3:15-17).

⁸ (Käjpxë Diˈibʉ Jatanʉp 3:15-17). Nˈokmëduˈunëmë Jyobaa amumduˈukjot ets nˈoktukxondakëm. Extëmë Jesus tˈanmääy ja Diosmëduumbëty mëdiˈibë Laodicea ojts dyajnigëxëˈëky ko tamˈäjtpë nety jatuˈugë jotmay. Pes ojts tˈanëëmë “jeˈeyë mjokxˈattë”, yëˈë nety yˈandijpy ko kyaj tnekytyukxondäˈäktë ja Diosë tyuunk, ets ko duˈunë nety yajpäättë “extëm tuˈugë mëk ayoobë jäˈäyën”. Pääty, tsojkëbë nety niˈigyë ttsoktëdë Jyobaa ets tjotmoˈoytyët ja tyuunk (Diˈibʉ Jat. 3:19). ¿Ti yäˈädë xytyukniˈˈijxëm? Ko pën kyaj nekytyukxondakëmë Diosë tyuunk, tsojkëp niˈigyë nduˈunëmë mëjääw parë nyajtsobatëm tijatyë Jyobaa xymyoˈoyëm ets ja nyax kyäjpn (Diˈibʉ Jat. 3:18). Ninäˈä mbäät nganasˈijxëm parë xyajtuˈuˈadujkëmë meeny sentääbë mët ko oy ja xëëw jukyˈäjtën nyajnaxäˈänëm ets kyaj net jëjpˈam nˈokpëjktakënë ja Diosë tyuunk.

9. Extëmë Jesus tˈanmääy ja Dios mëduumbëty mëdiˈibë Pérgamo ets Tiatira, ¿mä ti tsyokyëty nnaygyuentëˈäjtëm?

⁹ Nˈokjëjpkudijëm tijaty tukniˈˈijxëdëbë apostatas. Jesus ojts tˈooy nääk ja Diosmëduumbëty mëdiˈibë Pérgamo mët ko dyajmëjwindëjkëdë ja naxwinyëdë jäˈäyë tyukniˈˈijxën ets dyajnaywyäˈkxëdë ja myëguˈuktëjk (Diˈibʉ Jat. 2:14-16). Per myëjkumääy ja Diosmëduumbëty mëdiˈibë Tiatira, pes të nety tjëjpkudijëdë ja “Satanásë yˈëxpëjkënë ayuˈutsyëbë” ets yˈanmääy parë niˈigyë tpadundët ja tëyˈäjtën (Diˈibʉ Jat. 2:24-26). Ja Diosmëduumbëty mëdiˈibë nety kyaj tmëdattë mëk ja myëbëjkën ets të yajwinˈëëndë mët ja tukniˈˈijxën mëdiˈibë kyaj tyëyˈäjtënëty, tsojkëbë nety jyodëmbittët. Nanduˈun ëtsäjtëm, tsojkëp njëjpkudijëm tukëˈëyë tukniˈˈijxënë mëdiˈibë Jyobaa kyaj tkupëky. Mbäät näˈätyë apostatas kyëxëˈëktë “ko Dios mëduundëp”, per “mä tijaty tyuundëp nyigëxëˈëktë ko kyaj tyëyˈäjtënëty” (2 Tim. 3:5, TNM). Per pën xëmë nˈëxpëjkëmë Diosë yˈAyuk, mbäät pojënë nbëjkëmë kuentë ets njëjpkudijëm tijaty tukniˈˈijxën kyaj tyëyˈäjtënëty (2 Tim. 3:14-17; Juud. 3, 4).

10. ¿Ti ja tuk pëky xytyukniˈˈijxëm extëmë Jesus tˈanmääy ja Diosmëduumbëty mëdiˈibë Pérgamo ets Tiatira?

¹⁰ Nˈokjëjpkudijëm tukëˈëyë mä jäˈäy axëëk yˈit tsyëënëdë. Tamˈäjtpë nety jatuˈugë jotmay mëdiˈibë pyattëp ja Diosmëduumbëty mëdiˈibë Pérgamo ets Tiatira. Nääk ja Diosmëduumbëty kyaj nety tjëjpkudijëdë ko jäˈäy axëëk yˈit tsyëënëdë ets päätyë Jesus yˈanmääyëdë ko kyaj nety yˈoyëty ko duˈun yˈadëˈëtstë (Diˈibʉ Jat. 2:14, 20). ¿Ti yäˈädë xytyukniˈˈijxëm? Pën kyaj njëjpkudijëm ko jäˈäy axëëk yˈit tsyëënëdë, Jyobaa kyaj tkupëkäˈäny extëm nˈawdäjtëm, oyxyëbë nety jeky kujk njamëduˈunëm ets oy mëjwiin kajaa tuunk njanikëjxmˈäjtëm mä nyax kyäjpn (1 Sam. 15:22; 1 Peed. 2:16). Jyobaa tsyojkypy ets njukyˈäjtëm extëm tniˈanaˈamë, oyë naxwinyëdë jäˈäy niˈigyë dyajmäˈättë ja yˈanaˈamën ets axëëk jyukyˈattë (Éfes. 6:11-13).

11. ¿Tijaty të njäjtëm? (Ix nanduˈunë rekuäädrë “Tijaty xytyukniˈˈijxëm”).

¹¹ ¿Tijaty kujk njäjtëm? Ko jëjpˈam ets nˈijxëm pënë Jyobaa kyupëjkypy extëm nmëduˈunëm. Pën nbëjkëmë kuentë ko tam ti nduˈunëm mëdiˈibë kyaj yˈoyëty, tsojkëp netyë nnayajtëgäjtsëm parë Jyobaa xykyupëjkëm (Diˈibʉ Jat. 2:5, 16; 3:3, 16). Per ¿wixatyë Jesus tˈakˈanmääy ja Diosmëduumbëty mëdiˈibë nety yajpattëp mäjaty ja tuˈukmujkën?

NAYJYËJPˈIXËDË PARË XYMYËMADÄˈÄGËT KO MYAJNIBËDËˈËGËT

12. ¿Ti xytyukniˈˈijxëm extëmë Jesus tˈanmääy ja Diosmëduumbëty mëdiˈibë Esmirna ets Filadelfia? (Diˈibʉ Jatanʉp 2:10).

¹² Minë net tyam nˈokˈijxëm wiˈix yaˈˈanmääy ja Diosmëduumbëty mëdiˈibë Esmirna ets Filadelfia. Jesus anmääyëdë parë kyaj tsyëˈëgëdët ko yajnibëdëˈëktët, mët ko Jyobaa kunuˈkxanëdëbë nety pën kyaj tmastuˈuttë (käjpxë Diˈibʉ Jatanʉp 2:10; 3:10). ¿Ti xytyukniˈˈijxëm extëm yaˈˈanmääytyë? Ko seguurë jäˈäy xynyibëdëˈëgäˈänëm ets ko tsojkëp nnayjyëjpˈijxëm parë nmëmadakëm (Mat. 24:9, 13; 2 Kor. 12:10). ¿Tiko jyëjpˈamëty nyaˈijtëm winmäˈänyoty extëmë Jesus jyënany?

13, 14. ¿Wiˈix tkuˈayowëdë Diosmëduumbëty tijaty yajmaytyakp mä Diˈibʉ Jatanʉp kapitulo 12?

¹³ Mä Apocalipsis jyënaˈany ko mä ja “nWintsënˈäjtëmë xyëëw”, o ja tiempë mëdiˈibë tyam ndukjukyˈäjtëm, yajnibëdëˈëgandëp ja Diosmëduumbëty. Mä kapitulo 12 jyënaˈany ko jantsy jeˈeyë nyaxkëdaky ja Diosë yˈAnaˈam Kyutujkën jam tsäjpotm, ta “ja tsip tyuunë”. Miguel, mëdiˈibë nanduˈun yajtijp Jesukristë, ko jyëmbijty tsäjpotm ta mëdë yˈanklëstëjk tyuˈukmujky ets tsyiptuundë mëdë Satanás ets ja kyaˈoybyëtëjk (Diˈibʉ Jat. 12:7, 8). Perë Satanás mët ja kyaˈoybyëtëjk kyaj myadaktë, ta yajkujëbijpnäjxtë yä Naxwiiny mä nëgooyë jäˈäy dyaˈˈayoownëdë (Diˈibʉ Jat. 12:9, 12). ¿Wiˈixë net tˈaxëktuny ja Diosmëduumbëty?

¹⁴ Mä Diˈibʉ Jatanʉp jap yajnimaytyaˈaky wiˈixë Satanás nyayjyawëty ko yajkujëbijpnäjxy yä Naxwiiny. Kom kyaj mbäät nyekyjyëmbity tsäjpotm, pääty tjantsy tyukjotˈambëkyë Diosmëduumbëty mëdiˈibë jukyˈatandëp tsäjpotm, mët ko yëˈë yä Naxwiiny kyudënääytyëp ja Diosë yˈAnaˈam Kyutujkën ets yëˈë “nyikëjxmˈäjttëp tnimaytyäˈäktët pënën Jesus” (Apoc. 12:17, TNM; 2 Kor. 5:20; Éfes. 6:19, 20). ¿Wiˈix të yˈadëy mëdiˈibë yää ojts yajnaskäjpxë?

15. ¿Pënën ja “majtskpë testiigë” mëdiˈibë yajmaytyaktëp mä Diˈibʉ Jatanʉp kapitulo 11, ets wiˈix yajtuundë?

¹⁵ Satanás yëˈë yajtuun pënaty myëtsipˈäjttëbë Dios parë yajnibëdëˈktë ja Diosmëduumbëty mëdiˈibë nëjkxandëp tsäjpotm mëdiˈibë nety yajnëjkxtëbë jëjpˈamˈäjtën mä yajkäjpxwaˈkxyë Diosë yˈayuk. Yäˈädë nmëguˈukˈäjtëm, yëˈë duˈun ja “majtskpë testiigë”b mëdiˈibë yajmaytyaktëp mä Diˈibʉ Jatanʉp ko jyënaˈany yaˈoogëdë jäˈäy (Diˈibʉ Jat. 11:3, 7-11). Mä jëmëjt 1918, yajniwäämbajttë niduktujkë nmëguˈukˈäjtëm mëdiˈibë nety yajnëjkxtëbë jëjpˈamˈäjtën mä Diosë tyuunk ets yaˈˈanmääytyë ko jeky yˈitäˈändë pujxndëgoty. Ko duˈun yajtsuumdë, waˈan ja jäˈäy wyinmääytyë ko jabäädën jyëjpkëxy ja Diosë tyuunk.

16. ¿Ti tuun jäjtë mä jëmëjt 1919, ets ti tyuunˈadëtsypyë Satanás axtë tyambäät?

¹⁶ Mä Diˈibʉ Jatanʉp kapitulo 11 nanduˈun ojts yajnaskäjpxë ko ja “majtskpë testiigë”, jyukypyëkäˈändë jatëgok ko waanë ja tiempë nyaxët. Ets duˈunën tyuun jyäjtë, pes marsë mä jëmëjt 1919, ta ja Diosmëduumbëty mëdiˈibë jukyˈatandëp tsäjpotm yˈawäˈätspëtsëëmdë, ni jeˈeyë kyaˈijttë tuk jëmëjt pujxndëgoty, ets ko tiempë nyajxy, ta jyëgaktääy ja yˈëˈënën. Yäˈädë nmëguˈukˈäjtëm, ta jatëgok ojts ttuuntsondäˈäktë ja Diosë tyuunk. Perë Satanás kyaj ojts myëboˈkxëdë. Desde jaa, ta tjantsy yajpëtsëëmyë “komnëë”, ja njënäˈänëm, ko tnibëdëˈëky niˈamukë Diosmëduumbëty (Apoc. 12:15, TY). Päätyën tsyokyëty ets niˈamukë “nmëmadakëm ets nmëdäjtëm ja mëbëjkën” (Apoc. 13:10, TNM).

JOTMOˈOY JA DIOSË TYUUNK MËDIˈIBË TË MDUKNIPËKYËTY

17. ¿Wiˈix ajotkumonë të yajpudëkëdë ja Diosmëduumbëty oy nuˈunë Satanás jyanibëdëˈëgëdë?

¹⁷ Mä Diˈibʉ Jatanʉp kapitulo 12 jyënaˈany ko ajotkumonë kyëxëˈëgäˈäny pën pudëkëdëp ja Diosmëduumbëty ko yajnibëdëˈëktë, pes jap jyënaˈany ko duˈunxyëp extëm wyeˈemy “awats ja naxwinyëdë es tˈuktääy ja mëjnëë” (Diˈibʉ Jat. 12:16). Ets duˈunën të tyuny të jyatyëty, pes tijatyë Satanás yajjaˈäjtypy yä naxwiiny extëm näägë yajkutujkpëty të tpuwäˈägëdë näˈätyë Diosë kyäjpn. Jyobaa tyestiigëty të kanäkˈok myadäˈäktë ko nyaynyitsiptunëdë mä yajkutujkpëty ets päätyë net yajnasˈixëdë parë duˈunyëm Diosmëdundët. ¿Per wiˈixë net dyajtundë yäˈädë tiempë? Niˈigyë tjotmoˈoytyë ja tuunk mëdiˈibë Jyobaa të tyuknipëkëdë (1 Kor. 16:9). ¿Ti tuungën të yajtuknipëktë?

18. ¿Ti tuungën tyam nikëjxmˈäjtëm mä tiempë jyëjpkëxanë?

¹⁸ Jesus ojts tnaskäjpxë ko ja yˈëxpëjkpëty tkäjpxwäˈkxäˈändë abëtsëmy nyaxwinyëdë ja “oybyë ayuk diˈibë nyimaytyakypy ja tsäjpotmëdë kutujkën” mä kyaminyëm ja kutëgoˈoyën (Mat. 24:14). Parë duˈun yˈëwäˈkx kyäjpxwäˈkxtë, yëˈë pudëjkëdëbë anklëstëjk, pes yëˈë myëdäjtypy “ja oybyë ayuk diˈibë winë xëë winë tiempë wëˈëmp, es yajkäjxwäˈxët mä tëgekyë nax käjpn, mä tëgekyë naxwinyëdë, es mä tëgekyë wiinkpë ayuk käjxpë” (Diˈibʉ Jat. 14:6).

19. ¿Ti ja tuk pëky nˈëwäˈkxäˈän ngäjpxwäˈkxäˈänëm?

¹⁹ Ëtsäjtëm kyaj jeˈeyë ngäjpxwäˈkxëm ja oybyë ayuk mëdiˈibë nyimaytyakypy ja Diosë yˈAnaˈam Kyutujkën. Nanduˈunën xypyudëjkëmë anklëstëjk mëdiˈibë yajmaytyaktëp mä Diˈibʉ Jatanʉp kapitulo 8 axtë 10. Yäˈädë anklëstëjk, yëˈë nyigäjpx nyimaytyaktëp ja amay jotmay mëdiˈibë tukmiin tukëdakëdëp pënaty kyaj tkupëktë ja Diosë yˈAnaˈam Kyutujkën. Ets yëˈë tyam jaa nˈëwäˈkx ngäjpxwäˈkxëm ja ääw ayuk mëdiˈibë jäˈäy jyäˈäwëdëp extëm “ja tëtsn” etsë “jënˈyaˈank”, pes yëˈë nnimaytyakëm wiˈixë Dios dyajkutëgoyaˈany tijatyë Satanás yajtuumpy yä naxwiiny (Diˈibʉ Jat. 8:7, 13). Tsojkëbë jäˈäy tnijawëdët ko tadën wyingoonë ja kutëgoˈoyën. Ko duˈun nbudëjkëm, mbäädë net dyajtëgatstë ja jyukyˈäjtën ets tsyokwëˈëmdët ko Jyobaa dyajminët ja yˈakë (Sof. 2:2, 3). Tsojkëp nˈijtëm amëk jotmëk, pes mayë jäˈäy kyaj tˈoymyëdowdë yäˈädë ääw ayuk. Ets ko nety tsyondaknë ja mëj ayoˈon, mas mëk mëdiˈibë nˈëwäˈkxäˈän ngäjpxwäˈkxäˈänëm (Diˈibʉ Jat. 16:21).

PADUN ‘JA ÄÄW AYUK MËDIˈIBË YAP JÄÄYBYETY MIIMBËN’

20. ¿Ti akˈyajnimaytyäˈägäämp mä ja majtskpë artikulo?

²⁰ Jëjpˈam ets nbaduˈunëm ‘ja ääw ayuk mëdiˈibë yap jääybyety miimbën’ mët ko ta nˈijxëm wiˈix yˈadëy tijaty yajmaytyakp mä Apocalipsis (Apoc. 1:3, TY). Per ¿wiˈixën mbäät nmëmadakëm ko nety nyajnibëdëˈkëm ets duˈunyëm amëk jotmëk nˈëwäˈkx ngäjpxwäˈkxëm? Ta majtsk pëky ti mbäät xyajjotmëktakëm. Tim jawyiin, yëˈë extëmë Apocalipsis tnimaytyaˈaky jyatäˈän kyëbatäˈändë Diosë myëtsip, ets myëmajtsk, yëˈë wiˈixë Jyobaa xykyunuˈkxäˈänëm mä tiempë myiny kyëdaˈaky pën kyaj nmastutëm. Yäˈädë yajnimaytyäˈägäˈäny mä ja majtskpë artikulo mëdiˈibë nˈakˈixäˈänëm.