Jyobaa kyuentëˈäjtypy ets kyuwaampy pënaty mëduunëp

1. ¿Tiko Jesus tˈanmääyë Tyeety parë yajkuentëˈattët ja yˈëxpëjkpëty?

JA UX mä netyë Jesus yajmatsanë, ta ja Tyeety tmënuˈkxtaky ets tˈanmääy parë ja yˈëxpëjkpëty yaˈijxˈit yajkuentëˈattët (Fwank 17:15, 20). Jyobaa xëmë tˈijxˈity tkuentëˈaty ets tkuwäˈäny pënaty mëduunëp. Perë Jesus nyijäˈäwëbë nety ko niˈigyë ja yˈëxpëjkpëty nyibëdëˈëgäˈänëdë Satanás ets päätyë nety tsyokyëty parë Jyobaa pyudëkëdët.

2. Extëm jyënaˈanyë Salmo 33:18-20, ¿tiko kyaj mbäät ntsëˈkëm ko nbatëmë amay jotmay?

² Komë Satanás yëˈë tyam anaˈamp yä Naxwiiny, pääty ninuˈun nDiosmëduˈunëm nëgoo nˈokpatënë amay jotmay. Ko duˈun njäjt ngëbajtëm, mbäädë net xyajnayjyäˈäwëm mon tuk ets axtë xytyukmëjagamgakëmë Jyobaa. Per extëm nˈixäˈänëm mä yäˈädë artikulo kyaj tiko mbäät ntsëˈkëm, pesë Jyobaa yˈijxypy tijaty amay jotmay nwinguwäˈkëm ets xypyudëkëyäˈänëm. Nimaytyäˈägäˈänëm nimajtskë Diosmëduumbë mëdiˈibë yajmaytyaktëp mä Biiblyë ets extëm jyäjt kyëbajttë, yëˈë xytyukˈixäˈänëm ko “Jyobaa yˈijxypy pënaty tsëˈk jäˈäwëdëp” (käjpxë Salmo 33:18-20).

KO NAYTYUˈUK NNAYJYÄˈÄWËM

3. ¿Tijaty mbäät xyajnayjyäˈäwëm naytyuˈuk?

³ Mbäät näˈäty naytyuˈuk nnayjyäˈäwëm oy njayajpatëm mët nimayë nmëguˈukˈäjtëm mëdiˈibë Diosmëduundëp. Extëm nˈokpëjktakëm, waˈan näˈätyë ënäˈktëjk wyinmaytyë ko kyaj pën pudëkëdëp ko nety ttukmëtmaytyäˈägäˈändë ja myëˈeskuelëˈˈënäˈk tijaty myëbëjktëp o naytyuˈuk nyayjyawëdë ko nyaxtë wiink kongregasionk. Mbäät näˈäty nanduˈun nnayjyäˈäwëm naytyuˈuk ets axtë nwinmäˈäyëm ko kyaj pën mbäät xypyudëjkëm. Waˈan nanduˈun xytsyiptakxëm nnimaytyakëm wiˈix nnayjyäˈäwëm mët ko nwinmäˈäyëm ko kyaj pën tjaygyukëyaˈany, ets axtë nwinmäˈäyëm ko kyaj pën tpëkyë kuentë wiˈix njäjt ngëbajtëm. Ko duˈun nnayjyäˈäwëm, mbäädë net yëˈëyë nmëmäˈäy nmëdäjënë ets xyajnayjyäˈäwëm naytyuˈuk. Perë Jyobaa kyaj ttsoky ets duˈun nnayjyäˈäwëm. ¿Tiko duˈun njënäˈänëm?

4. ¿Tiko ja kugajpxy Elías jyënany “Ëjts jeˈeyë naytyuˈuk akwëˈëmp”?

⁴ Min nˈokˈijxëm wiˈix jyajtyë Elías. Ko tnijäˈäwë yaˈoogäˈänyëtyë Jezabel, ta kyeˈekyjyëdijty naxy 40 xyëëw (1 Rey. 19:1-9). Elías jap nyayuˈtsë mä tuˈugë äänk ets tˈanmääyë Jyobaa: “Ëjts jeˈeyë naytyuˈuk akwëˈëmp” (1 Rey. 19:10). Yëˈë duˈun wyinmääy ko yëˈëyë nety naytyuˈuk ak tuump extëmë kugajpxy, perë kyaj netyë dyuˈunëty, pesë Abdías të nety dyajnitsoˈoky 100 ja kugajpxyëty mëdiˈibë nety yaˈooganëdëbë Jezabel (1 Rey. 18:7, 13). Per ¿tidaa ko Elías nyayjyäˈäwë naytyuˈuk? Waˈan mët ko wyinmääy ko të nety yˈoˈktäˈäytyë ja kugajpxyëty mëdiˈibë Abdías yajnitsok. O mët ko wyinmääy ko nipënë netyë Jyobaa të tkamëduuntsoˈondaˈaky oy tjaˈijxtë mä ja kopk Carmelo ko yëˈëjën ja Diosë tëyˈäjtënbë. O waˈan mët ko tnijäˈäwë ko yaˈooganëp ja myëtsipëty ets ko nipën mbäät kyanekypyudëkëty. Biiblyë kyaj ttimynyigajpxy tiijën ko Elías duˈun nyayjyäˈäwë, perë mëdiˈibën tëy nnijäˈäwëm, yëˈë ko Jyobaa jyaygyujkë tiko Elías nyayjyäˈäwë naytyuˈuk ets nyijäˈäwëbë nety wiˈix tpudëkëyaˈany.

5. ¿Ti Jyobaa tyuun parë ttukˈijxyë Elías ko kyaj nety naytyuˈuk yajpääty?

⁵ Jyobaa kanäk pëky tijaty ttuuny parë tpudëjkë Elías. Extëm nˈokpëjktakëm, yˈanmääy parë tnimaytyäˈägët wiˈixë nety nyayjyawëty. Majtskˈok dyajtëëy: “Elías, ¿ti yää mduumpy?” (1 Rey. 19:9, 13). Jyobaa myëdoowˈijt ko Elías tyukmëtmaytyakë wiˈixë nety nyayjyawëty. Tyukˈijx nuˈunë nety tmëdatyë mëkˈäjtën parë kyaj naytyuˈuk nyayjyawëdët ets tyukˈawäˈänë nanduˈun ko tamë nety nimayë israelitëty mëdiˈibë duˈunyëm Diosmëduundëp (1 Rey. 19:11, 12, 18). Seguurë ko Elías jantsy agujk jotkujk nyayjyäˈäwë ko ttukmëtmaytyaktääyë Jyobaa wiˈixë nety nyayjyawëty ets ko tˈijxy wiˈix ojts yˈatsoowëmbityëty. Jyobaa tuknipëjkë nanduˈun kanäk pëkyë tuunk, extëm ko nëjkx twinˈixyë Hazael parë tyunët rey jam Siria, Jehú parë yˈanaˈamët jam Israel etsë Eliseo parë tyunët extëmë kugajpxy (1 Rey. 19:15, 16). Ko Elías duˈunë Jyobaa tyuunkmooyë, ta jamyë ja jyot wyinmay tpëjktaky ets tukpäägajxë Eliseo parë jyamyëdatëdët. ¿Ti mbäät nduˈunëm pën nnayjyäˈäwëm naytyuˈuk ets pën nyajtëgoyˈäjtëm parë Jyobaa xypyudëjkëm?

6. ¿Wiˈix mbäät nmënuˈkxtakëmë Jyobaa ko nety nnayjyäˈäwëm naytyuˈuk? (Salmo 62:8).

⁶ Jyobaa tsyojkypy parë nmënuˈkxtakëm. Yˈijxypy wiˈix nnayjyäˈäwëm ets xyˈanmäˈäyëm ko mbäät nmënuˈkxtakëm oytyim näˈäty ets ko yˈatsoowëmbitaampy (1 Tes. 5:17). Agujk jotkujk nyayjyawëtyë Jyobaa ko tmëdoy myënuˈkxtaˈagyëty pënaty mëduunëp (Prov. 15:8). Ko nety nnayjyäˈäwëm naytyuˈuk, mbäät nmënuˈkxtakëm ets ndukmëtmaytyaktäˈäyëm wiˈixën nnayjyäˈäwëm, duˈun extëm ttuunyë Elías (käjpxë Salmo 62:8). Nˈoktukmëtmaytyakëm wiˈixën meerë nnayjyäˈäwëm ets tiijën nmëmääy nmëdäjëm. Nˈokˈanmäˈäyëm parë xytyukˈijxëm tiijën mbäät nduˈunëm. Extëm nˈokpëjktakëm, pën mˈeskuelëˈäjtp, ¿ti mbäät xytyuny pën mnayjyäˈäwëp naytyuˈuk ets pën mtsëˈkëp xytyukmëtmaytyäˈägët ja mmëguˈuktëjk pënën Jyobaa? Mbäät xyˈamdoyë Jyobaa jotmëkˈäjtën etsë wijyˈäjtën parë xynyimaytyäˈägët mëdë mayˈäjt wintsëˈkën tijaty mmëbëjkypy (Luk. 21:14, 15). ¿Ets ti mbäät xytyuny pën mnayjyäˈäwëp mon tuk? Anëëmë Jyobaa parë mbudëkëdët ets xypyäädët tuˈugë nmëguˈukˈäjtëm mëdiˈibë oy Diosmëduump parë xytyukmëtmaytyäˈägët wiˈixën mnayjyawëty ets parë tjaygyukët. Mbäät kyaj mon tuk nnekynyayjyäˈäwëm pën ndukmëtmaytyakëmë Jyobaa wiˈixën nnayjyäˈäwëm, pën nˈijxëm wiˈix tˈatsoowëmbity ja nnuˈkxtakën ets pën nasˈijxëm parë nmëguˈukˈäjtëm xypyudëjkëm.

7. ¿Ti xytyukniˈˈijxëm extëm yajnimaytyaˈagyë Mauricio?

⁷ Jyobaa niˈamukë xytyuunkmoˈoyëm. Yˈijxypy tukëˈëyë tijaty nduˈunëm mä kongregasionk ets mä nˈëwäˈkx ngäjpxwäˈkxëm (Sal. 110:3). Ko jamyë jot winmäˈäny nbëjktakëm mä Diosë tyuunk, xypyudëjkëm parë kyaj naytyuˈuk nnayjyäˈäwëm. ¿Tiko duˈun njënäˈänëm? Min nˈokˈijxëm wiˈix yajnimaytyaˈaky tuˈugë mixy mëdiˈibë xyëwˈäjtypy Mauricio.b Yëˈë, näämnëmë nety nyëbety ko niduˈuk ja myëtnaymyaayëbë wanaty wanaty tmëjagamgekyë Jyobaa. Mauricio jyënaˈany: “Kots nˈijxy wiˈixëts ja nmëtnaymyaayëbë wanaty wanaty tmëjagamgeˈegyë Jyobaa, tats nwinmääy pën mbäädëts duˈunyëm nmëduunˈadëˈëtsyë Jyobaa extëmtsë nety të ndukwandaˈaky etsëts xëmë nyajpäädët mä nyax kyäjpn. Naytyuˈugëts nnayjyäˈäwë etsëts nwinmääy ko nipënë nety mbäät tkajaygyukë wiˈixëts nyayjyawëty”. ¿Ti pudëjkë Mauricio ko duˈun nyayjyäˈäwë? Yëˈë jyënaˈany: “Kots ojts xëmë nˈëwaˈkxy ngäjpxwaˈkxy, yëˈëts xypyudëjkë parëts kyaj ojts yëˈëyë nmëmay nmëdäjy wiˈixëtsë nety nnayjyawëty ets parëts kyaj nekynyayjyäˈäwë naytyuˈuk. Agujk jotkujkëts nanduˈun nnayjyäˈäwë kots ojts niˈigyë nˈëwaˈkxy ngäjpxwaˈkxy mëdë nmëguˈukˈäjtëm”. Extëm nˈijxëm, mbäät agujk jotkujk nnayjyäˈäwëm ko ngäjpxwäˈkxëm mëdë nmëguˈukˈäjtëm oy mëët nganayˈijx nganaybyatëm, pes nnaymyëjääwmoˈoyëm ko mët njäˈäyëmë kartë o ko mëët ngäjpxwäˈkxëm mä telefënë. Per ¿tijatyë Mauricio yˈaktuun? Yëˈë yˈakjënäˈäny: “Niˈigyëts nduundëjkë mä kongregasionk ets nduknibëjktakëts parëts niˈigyë nˈëxpëkäˈäny etsëts mas oy nyajnaxäˈäny tijatyëts xypyatp mä reunyonk. Kots duˈun nduuny, nˈijxëts ko xytsyojkpëtsë Jyobaa ets nanduˈunë nmëguˈukˈäjtëmëty”.

KO XYAJMÄˈÄY XYAJTÄJËM KO NBATËMË AMAY JOTMAY

8. ¿Wiˈix nnayjyäˈäwëm ko nbatëmë amay jotmay?

⁸ Nnijäˈäwëm ko mä tiempë jyëjpkëxanë nbäädäˈänëmë amay jotmay (2 Tim. 3:1). Kyaj nnijäˈäwëm ti amay jotmay nbäädäˈänëm, per mbäät ajotkumonë nbatëm, extëm ko nyaˈˈamääytyakëmë meeny sentääbë, ko doktoor xyˈanmäˈäyëm ko të xypyatëm tuˈugë mëk päˈäm o ko yˈooky tyëgoy tuˈugë jëëky mëguˈuk. Ko duˈun njäjt ngëbajtëm, mbäädë net nnayjyäˈäwëm mon tuk o xyajmäˈäy xyajtäjëm, ets mas niˈigyë pën janääm jatsojk nbatëmë amay jotmay o pën tuˈukmujkp. Per nˈokjamyajtsëm ko Jyobaa yˈijxypy wiˈix njäjt ngëbajtëm ets xypyudëkëyäˈänëm parë nmëmadakëm oytyim mëdiˈibëtyë amay jotmay.

9. Oknimaytyäˈäk tijaty amay jotmay pyattë Job.

⁹ Min nˈokˈijxëm wiˈixë Job jyajty kyëbejty. Yëˈë janääm jatsojk tpatyë amay jotmay mëdiˈibë ojts yajmay yajtäjˈyëty. Tuˈukmujktääy ja jyotmay mä tuˈugë xëëw, extëm ko yajtukˈawäˈänë ko të nety yajwijtskaktäˈäy ja jyëyujk tsyäjpkää, ko të yˈoˈktäˈäy ja tyuumbë myosë, per mëdiˈibë niˈigyë axëëk yajnayjyäˈäwë, yëˈë ko ja yˈuˈunk yˈënäˈk yˈoˈktääy (Job 1:13-19). Job tamnëmë nety tmëmony tmëduky ja yˈamay jyotmay ko pyatë tuˈugë mëk päˈäm mëdiˈibë nëgooyë ojts yaˈˈayoowënë (Job 2:7). Nëgooyë axëëk ojts yajnayjyäˈäwënë ko duˈun jyajty kyëbejty, pääty axtë jyënany: ‘Ëjts käˈäbës nˈëkmëmadäˈäganë. Käˈäbës nˈëkjukyˈatanë’ (Job 7:16, TY).

10. ¿Wiˈixë Jyobaa tpudëjkë Job parë tmëmadaky ja yˈamay jyotmay? (Ixë dibujë mëdiˈibë mä rebistë nyiˈak).

¹⁰ Jyobaa yˈijx tijaty amay jotmayë netyë Job myënäjxy yajnäjxypy. Kom mëkë nety ttsoky, ta tpudëjkë parë tmëmadäˈägët ja amay jotmay ets parë kyaj myastuˈudëdët. Jyobaa këˈëm ojts tmëgajpxyë Job ets ttukmëtmaytyaky nuˈunën tmëdatyë wijyˈäjtën ets wiˈix tˈijxˈity tkuentëˈaty tukëˈëyë tijaty të dyajkojy, extëm jëyujk animal mëdiˈibë ijx kaˈijxën (Job 38:1, 2; 39:9, 13, 19, 27; 40:15; 41:1, 2). Jyobaa kyajx nanduˈunë Elihú parë nëjkx tjotkujkmoˈoy ets tmëjääwmoˈoyë Job. Elihú tyukjamyajtsë Job ko Dios xëmë tkunuˈkxy pënaty kyaj myastuˈutyëty. Jyobaa yˈanmääy nanduˈun Elihú parë nëjkx tsuj yajxon tˈëwijy tkäjpxwijˈyë Job. Ets duˈunën ttuuny, pyudëjkë parë kyaj jeˈeyë këˈëm nyaymyëmay nyaymyëdäjëdët ets xytyukjamyajts ko naxwinyëdë jäˈäy niwiˈixtsow tkamëbäätyë Jyobaa, mëdiˈibë tukëˈëyë tijaty të dyajkojtäˈäy (Job 37:14). Jyobaa ojts nanduˈun tˈanëëmë Job parë tninuˈkxtäägët ja nidëgëëkpë myëtnaymyaayëbë mëdiˈibë nety axëëk të yajnayjyawëty (Job 42:8-10). Ets ¿wiˈixë Jyobaa tyam xypyudëjkëm ko nbatëmë amay jotmay?

11. ¿Wiˈix xyjyotkujkmoˈoyëmë Biiblyë ko nwinguwäˈkëmë amay jotmay?

¹¹ Jyobaa kyaj këˈëm xytyimmëgäjpxëm, duˈun extëm ttuuny mëdë Job. Per xymyëgäjpxëm mët yëˈëgyëjxmë Biiblyë (Rom. 15:4). Xyjotkujkmoˈoyëm ko xytyuknijäˈäwëm myiny kyëdaˈagyë oybyë jukyˈäjtën. Min nˈokˈijxëm tuk majtskë tekstë mëdiˈibë mbäät xyjotkujkmoˈoyëm ko nety nbatëmë amay jotmay. Mä Biiblyë xyˈanmäˈäyëmë Jyobaa ko oytyim yëˈëˈäjtpë ja amay jotmayë mëjwiin kajaabë, “kyaj nitii mbäät xykyatukmastutëm ja tsyojkën ja Dios diˈibë myëdäjtypy mët ëtsäjtëm” (Rom. 8:38, 39). Nanduˈun xyˈanmäˈäyëm ko “wingon yajpääty mä niˈamukë pënaty mmëgäjpxëp” (Sal. 145:18). Xyˈanmäˈäyëm nanduˈun ko pën ndukˈijxpajtëm, mbäät nmëmadakëm oytyim mëdiˈibëtyë amay jotmay mëdiˈibë nwinguwäˈkëm ets axtë mbäät nyajpatëm agujk jotkujk (1 Kor. 10:13; Sant. 1:2, 12). Mä Biiblyë nanduˈun jyënaˈany ko këxäämp naxäämp ja amay jotmay mëdiˈibë tyam nbatëm ets ko kyaj duˈun yˈijtëwäˈäny extëm ja jukyˈäjtënë xëmëkyëjxmbë, mëdiˈibë Jyobaa xytyukwandakëm (2 Kor. 4:16-18). Jyobaa të nanduˈun twandaˈaky ko yajkutëgoyaambyë Satanás ets pënaty puwäˈkëdëp, mëdiˈibë tyam xyˈamaymyoˈoy xyjyotmaymyoˈoyëm (Sal. 37:10). ¿Mjäjtypy agëbajkyë tekstë mëdiˈibë mbäät mbudëkëty ko nety xywyinguwäˈägë amay jotmay mä tiempë myiny kyëdaˈaky?

12. ¿Ti tsojkëp nduˈunëm parë niˈigyë nnaytyukpudëjkëm ja Diosë yˈAyuk?

¹² Parë mas niˈigyë nnaytyukpudëjkëmë Biiblyë, Jyobaa tsyojkypy parë xëmë ngäjpxëm ets nbawinmäˈäyëm. Pën nguytyuˈunëm tijaty nˈëxpëjkëm, ta niˈigyë mëbëjkën kyëktëkëyaˈany ets niˈigyë nmëwingonäˈänëmë Jyobaa. Pën nduˈunëm duˈun, yëˈë xypyudëkëyäˈänëm parë nmëmadakëm ja amay jotmay. Jyobaa xypyudëkëyäˈänëm nanduˈun mët yëˈëgyëjxmë yˈespiritë santë pën nmëbëjkëm tijatyë Biiblyë myaytyakypy. Ko duˈun xytyukpudëjkëm, ta nmëdatäˈänëm ja mëkˈäjtën mëdiˈibë “jyantsymyëjwiin jyantsykyajaaty” parë nmëmadakëm oytyim mëdiˈibëtyë amay jotmay mëdiˈibë tyam nwinguwäˈkëm (2 Kor. 4:7-10).

13. ¿Wiˈix xypyudëjkëm tukëˈëyë tijaty yajpëtsëëmbyë “tuumbë mëdiˈibë kuwijy ets tyuumpy ti wyintsën tsyojkypy”?

¹³ Mët yëˈëgyëjxmë “tuumbë mëdiˈibë kuwijy ets tyuumpy ti wyintsën tsyojkypy”, Jyobaa yëˈë yajtuumpy parë dyajpëtsëmdë jantsy mayë ëxpëjkpajn, bideo etsë ëy yaˈaxy mëdiˈibë mbäät xypyudëjkëm parë niˈigyë nyajkëktëjkëm ja mëbëjkën ets nmëwingoˈonëmë Jyobaa (Mat. 24:45, TNM). Tsojkëp nyajtuˈunëm tukëˈëyë tijatyë Jyobaa xymyoˈoyëm mä meerë nyajtëgoyˈäjtëm. Tyää näämnëm, tuˈugë nmëguˈukˈäjtëm mëdiˈibë Estados Unidos të tkuˈëw tkukäjpxë tukëˈëyë tijatyë Jyobaa xymyoˈoyëm. Yëˈë jyënany: “Nuˈunëts kujk nmëdunyë Jyobaa 40 jëmëjt, janääm jatsojkëts të nbäätyë amay jotmay mä të yaˈijxmatsyëtsë nmëbëjkën”. Yäˈädë nmëguˈukˈäjtëm të tpäätyë amay jotmayë mëjwiin kajaabë. Extëm nˈokpëjktakëm, ja tyatwelë yëˈë yaˈoˈkë tuˈugë amuˈukyjyaˈay ko karrë tyukniwiˈtpajtë, ja tyääk tyeety mëk pyäˈämbajttë ets oˈktë, etsë yäˈädë nmëguˈukˈäjtëm majtskˈok pyatë kanser. Per ¿ti tpudëjkë? Yëˈë tnimaytyaˈaky: “Jyobaa xëmëts të xyˈijxˈity të xykyuentëˈaty, pes tukëˈëyë mëdiˈibë yajpëtsëëmbyë tuumbë mëdiˈibë kuwijy, mëjwiin kajaats të xypyudëkë parëts të nmëmadaˈagyë nˈamay njotmay. Ets mbäädëtsë net nanduˈun njënäˈäny extëmë Job: ‘¡Axtë nˈoogëdëts, kyajts nmastuˈudäˈänyë Dios!’” (Job 27:5).

14. ¿Wiˈixë Jyobaa xytyukpudëjkëmë nmëguˈukˈäjtëm ko nbatëmë amay jotmay? (1 Tesalónikʉ 4:9).

¹⁴ Jyobaa të ttukniˈˈixë pënaty mëduunëdëp parë nyaytsyokëdët nixim niyam ets nyayjyotkujkmoˈoyëdët ko tpäättëdë amay jotmay (2 Kor. 1:3, 4; käjpxë 1 Tesalónikʉ 4:9). Niˈamukë nmëguˈukˈäjtëm duˈun extëmë Elihú, xypyudëkëyäˈänëm parë kyaj nmastutëmë Jyobaa ko nety nbatëmë amay jotmay (Apos. 14:22). Duˈunën yajpudëjkë tuˈugë nmëguˈukˈäjtëm mëdiˈibë xyëwˈäjtypy Diane. Ko ja myëmëjjäˈäy mëk jyantsy pyäˈämbejty, ta ja nmëguˈukˈäjtëm pyudëjkëdë ets myëjääwmooyëdë parë kyaj tmastuˈudëdë Jyobaa oy nuˈun tpäädët ja amay jotmay. Diane, jyënaˈany: “Nuˈunë taabë tiempë nyajxy mäts mëkë nmëmëjjäˈäy pyëjkë, nˈijxtëts wiˈixëtsë Jyobaa xypyudëjkëdë etsëts xyjyotkujkmooytyë. Ja nmëguˈukˈäjtëm wiˈixëmëts xyjyantsy pyudëjkëdë, tamëts mëdiˈibë xynyimiindë mätsë njëën ndëjk ets mëdiˈibëts ojts xymyëgäjpxtë mä telefënë. Kom kyajts ndukjaty nyajˈyeˈeyëdë karrë, yëˈë ijtyë nmëguˈukˈäjtëm naytyukniwijtsëdëp parëts xymyënëjkxtë reunyonk ets ëwäˈkx käjpxwäˈkxpë kots nmadaˈaky”. ¿Këdii jantsy agujk jotkujk nnayjyäˈäwëm ko nyajpatëm mëdë nmëguˈukˈäjtëm mëdiˈibë mëk xytsyojkëm?

NGUˈËˈËW NGUKÄJPXËM KO JYOBAA XYˈIJXˈIJT XYKYUENTËˈÄJTËM

15. ¿Tiko nˈijtëm seguurë ko mbäät nmëmadakëm oytyim mëdiˈibëtyë amay jotmay?

¹⁵ Wiˈixëm niˈamukë nbäädäˈänëmë amay jotmay, per extëm të nˈijxëm, ninäˈä naytyuˈuk ngawinguwäˈägëyäˈänëm. Jyobaa xëmë xypyudëkëyäˈänëm, duˈun extëm tuˈugë uˈunkteety mëdiˈibë mëk tsyojkypyë yˈuˈunk yˈënäˈk. Jyobaa wingon yajpääty mët ëtsäjtëm, myëdoowˈitaampy ko nˈamdoˈowëmë naybyudëkë ets xypyudëkëyäˈänëm (Is. 43:2). Ijtëm seguurë ko mbäät nmëmadakëm oytyim mëdiˈibëtyë amay jotmay mët ko Jyobaa xymyoˈoyëm tukëˈëyë tijaty mbäät xypyudëjkëm extëm: ko mbäät nmënuˈkxtakëm, të xymyoˈoyëmë Biiblyë, mayë ëxpëjkpajn o bideo ets ko xypyudëjkëmë nmëguˈukˈäjtëm mä meerë nyajtëgoyˈäjtëm.

16. ¿Ti tsojkëp nduˈunëm parë duˈunyëmë Jyobaa xyˈijxˈijt xykyuentëˈäjtëm?

¹⁶ Nguˈëˈëw ngukäjpxëm ko nDeetyˈäjtëmë Jyobaa xëmë xypyudëjkëm. Ets ko duˈun ttuny, “yëˈë mëdiˈibë yajxondakypyë ääw jot” (Sal. 33:21). ¿Wiˈix mbäät ndukˈijxëmë Jyobaa ko nguˈëˈëw ngukäjpxëm ko duˈun xyˈijxˈit xykyuentëˈäjtëm? Ko nnaytyukpudëjkëmë tukëˈëyë tijaty xymyoˈoyëm parë nmëmadakëmë amay jotmay. Ets parë Jyobaa duˈunyëm xyˈijxˈijt xykyuentëˈäjtëm ets xykyuwäˈänëm, tsojkëp nduˈunëmë mëjääw parë nmëmëdoˈowëm ets nduˈunëm tijaty tyukjotkëdakypy. Pën nduˈunëm duˈun, ta xyˈijxˈitäˈän xykyuentëˈatäˈänëm xëmëkyëjxm (1 Peed. 3:12).