Ënäˈktëjk, wimbajtˈadëˈëtstë oy të mjanëbajnëdë

1. ¿Ti nimayë ënäˈktëjk të ttundë?

JËMËJT jëmëjt milˈamë ënäˈktëjk nyëbattë. ¿Të nanduˈun mnëbajnë? Pën të, jantsy agujk jotkujk nyayjyawëdë nmëguˈukˈäjtëm ets nanduˈunë Jyobaa (Prov. 27:11). Okpawinmay tijaty kujk mduumpy. Extëm nˈokpëjktakëm, waˈan kanäk jëmëjt xyˈëxpëjknë Biiblyë ets yëˈë të mbudëkëty parë xymyëbëky ko yëˈë Diosë yˈAyuk. Per mëdiˈibë niˈigyë oy, yëˈë ko tyam mˈixyˈajtypyë Jyobaa ets mtsojkypy, ja mëdiˈibë ojts dyajjäˈäyëtyë Biiblyë. Kom mëk xytsyoky, ta të xytyukwandaˈagyë mjukyˈäjtën ets të mnëbety. ¡Jantsy oy ko duˈun të xytyuny!

2. ¿Ti nˈixäˈänëm mä yäˈädë artikulo?

² Mä mganëbetynyëm, waˈan xypyatyë amay jotmay mä ojts tsyokyëty xyajnigëxëˈëgëdë mmëbëjkën ets seguurë ko mˈakpäädaampy ko tiempë nyaxët. Satanás yˈëxtäˈäyaambyë winmäˈäny parë kyaj xynyekytsyokëdë Jyobaa ets xymyëdunët (Éfes. 4:14). Këdii xynyasˈixë etsë Jyobaa mdukmëjagamgaˈagëdët. ¿Ti mbudëkëyanëp parë xymyëduunˈadëˈëtsëdë Jyobaa? Ko duˈunyëm mwimbajtˈadëˈëtsët, ja njënäˈänëm, ko kyaj natimˈyëˈëyëm xytyunët tijaty të myajtukniˈˈixë (Eb. 6:1). Mä yäˈädë artikulo nˈixäˈänëm wiˈix mbäät duˈun xytyuny.

TI MBÄÄT XYTYUNY PARË MWIMBAJTˈADËˈËTSËT MÄ DIOSË TYUUNK

3. ¿Ti tsojkëp ttundët niˈamukë Diosmëduumbë ko nety të nyëbajnëdë?

³ Ko tuˈugë jäˈäy nyëbajnë, tsojkëp ttunët extëmë apostëlë Pablo tˈanmääy ja Diosmëduumbëty mëdiˈibë Éfeso. Yëˈë duˈun tˈanmääy ja myëguˈuktëjk ko tsojkëp tmëdattët “ja jot winmäˈäny extëmë jäˈäy mëdiˈibë mëjjäˈäy mëˈˈënäˈknë” (Efes. 4:13, TNM). Duˈunxyëp extëm yaˈˈanmääytyë ko tsojkëbë nety wyimbajtˈadëˈëtstët. Ko Pablo ojts tmaytyaˈaky nwimbajtˈadëtsëm mä Diosë tyuunk, yëˈë mëët ojts tˈijxkijpxyë wiˈix yeeky pyety tuˈugë maxuˈunk. Ja tääk teety jantsy agujk jotkujk nyayjyawëdë ko tpäättë tuˈugë yˈuˈunk, per kyaj xëmë duˈun tsaanäˈän tkonäˈändë, pes ko tiempë nyaxët, ta ja uˈunk tmastuˈudäˈäny ja “ënäˈkuˈunkˈat” (1 Kor. 13:11). Nanduˈunën tuˈugë Diosmëduumbë, oy të jyanëbajnë, tsojkëp duˈunyëm wyimbajtˈadëˈëtsët. Min nˈokˈijxëm tuk pëky majtsk pëky ti mbudëkëyanëp parë duˈun xytyunët.

4. ¿Ti mbudëkëyanëp parë mwimbajtˈadëˈëtsët mä Diosë tyuunk? Oknimaytyäˈäk (Filipenses 1:9, TNM).

⁴ Tsok niˈigyë Jyobaa. Të xyajnigëxëˈëky ko mëk xytsyokyë Jyobaa, per mbäät mas niˈigyë xytsyoky. Apostëlë Pablo ojts tnigajpxy wiˈix mbäät xytyuny (käjpxë Filipenses 1:9, TNM). Pablo yˈamdoow pyëjktsoowë Jyobaa parë ja Diosmëduumbëty mëdiˈibë Filipos “niˈigyë dyajmëjwindëkëdët ja tsyojkën”. Yäˈädë yëˈë yˈandijpy ko mbäät mas niˈigyë ntsojkëmë Jyobaa. Parë duˈun nduˈunëm, tsojkëp “nˈëxpëjkëm ja Diosë yˈayuk ets nmëwinmäˈänybyatëm”. Ko niˈigyë nˈixyˈäjtëmë Jyobaa ets ntsojkëm, ta niˈigyë nˈoyˈijxëm wiˈix jyaˈayˈaty ets wiˈix tijaty ttuny. Xëmë nanduˈun nmëmëdowäˈänëm ets nyajnayjyawëyäˈänëm agujk jotkujk. Nduˈunëmë mëjääw parë nnijäˈäwëm ti tsyojkypyë Jyobaa ets ta net duˈun nduˈunëm.

5, 6. ¿Ti ja tuk pëky xypyudëkëyäˈänëm parë niˈigyë ntsojkëmë Jyobaa?

⁵ Ja tuk pëky mëdiˈibë mbäät xypyudëjkëm parë mas niˈigyë ntsojkëmë Jyobaa, yëˈë ko nˈixyˈäjtëmë yˈUˈunk Jesus, pes duˈun meerë jyaˈayˈajty extëm Tyeety (Eb. 1:3). Ets mbäät niˈigyë nˈixyˈäjtëm ko ngäjpxëm ja taxkpë Evangelio. ¿Mgajpxypy xëmë Biiblyë? Pën kyajnëm duˈun xytyuny, oy ko xykyäjpxtsoˈondäˈägët. Ko nety xykyajpxy, pawinmay tijatyë Jesus nyigäjpx nyimaytyak ets wiˈix jyaˈayˈajty. Jesus jantsy oy jyaˈayˈajty, oypyënëty myëwingoonë, axtë ojts myëyujˈyëty ja ënäˈkuˈunk (Mar. 10:13-16). Ets oy nanduˈun dyajnayjyäˈäwë ja yˈëxpëjkpëty, pääty tyukmëtmaytyakëdë wiˈix nyayjyäˈäwëdë ets wiˈix wyinmääytyë (Mat. 16:22). ¿Tiko duˈunë Jesus jyaˈayˈajty? Yëˈko duˈunë Tyeety jyaˈayˈaty, pesë Jyobaa mbäät oypyënëty myëwingonyëty. Mbäät nmënuˈkxtakëm ets ndukmëtmaytyaktäˈäyëm wiˈix nnayjyäˈäwëm. Ijtëm seguurë ko Jyobaa kyaj wiˈix wyinmayaˈany mä ëtsäjtëm, pes xytsyojkëm ets xymyëmäˈäy xymyëdäjëm (1 Peed. 5:7).

⁶ Jesus pyaˈˈayoowë jäˈäy, pesë Mateo duˈun jyënany: “Ko ja Jesus tˈijxy ja mayjyaˈayëty nyiminëdë, ta tpaˈˈayoodë, mët ko moon tujktëbë naty extëmë borreegë diˈibë kyajpë yˈijxˈijt kyuentëˈäjtpë” (Mat. 9:36). ¿Ets wiˈixë Jyobaa tˈixyë mayjyaˈay? Jesus duˈun jyënany: “Yëˈë mDeetyëty diˈibë ijtp tsäjpotm, kyaj ttseky tyëgoyët ni tuˈugë tyäˈädë ënäˈkuˈungëty” (Mat. 18:14). ¡Jantsy agujk jotkujk nnayjyäˈäwëm ko nˈijxëm nuˈunënë Jyobaa xytsyojkëm! Ets ko niˈigyë nˈixyˈäjtëmë Jesus, ta mas niˈigyë ntsojkëmë Jyobaa.

7. ¿Wiˈix mbudëkëyaˈanyëty ko xyajnaxëdë tiempë mëdë nmëguˈukˈäjtëm mëdiˈibë oy Diosmëduundëp?

⁷ Ja tuk pëky mëdiˈibë mbäät xytyuny parë niˈigyë Jyobaa xytsyokët ets mwimbajtˈadëˈëtsët, yëˈë ko mëdë tiempë xyajnaxëdë nmëguˈukˈäjtëm mëdiˈibë oy Diosmëduundëp. Ix wiˈix agujk jotkujk xëmë yajpäättë ets wiˈix jotkujk yajnayjyawëdë ko wyinmäˈäny tpëjktaktë tmëdunäˈändë Jyobaa. Yajtëw wiˈix kujk tmëdundë Jyobaa, ets ko nety tii xytyuknibëjktäägë xytyunäˈäny mä mjukyˈäjtën, tukmëtmaytyäˈäktë, pes mbäät mmoˈoyëdë ëwij käjpxwijën. Päätyënë Biiblyë jyënaˈany: “Oybyëtsëëmp ko jyaˈˈaty nimayë käjpxwijpë” (Prov. 11:14).

8. ¿Ti mbäät xytyuny pën mˈamajtsk mjotmajtskëp mä tijatyë Biiblyë tukniˈˈijxëp?

⁸ Payeˈey mëdiˈibë myaˈˈamajtsk myajjotmajtskëp. Extëm të nˈijxëm mä parrafo 2, Satanás yëˈë tsyojkypy parë kyaj xyajkëktëkët ja mëbëjkën ets xymyëjagamgaˈagëdë Jyobaa. Tuk pëky mëdiˈibë yajtuumpy, yëˈë ko jäˈäy dyaˈˈamajtsk dyajjotmajtskë, pes kyaj ttsoky ets xymyëbëkët ko tëyˈäjtën tijatyë Biiblyë tukniˈˈijxëp. Extëm nˈokpëjktakëm, mbäät tuˈugë jäˈäy mˈanëˈëmxëty ko Dios kyaj yëˈë ojts xyajkojëm ets ko duˈunyë tijaty të yajtukˈijxpäädëˈëky. Ko mutskˈäjty waˈan kyaj mää duˈun xytyimmëdooy, per ko tyam mˈeskuelëˈäjnë, waˈan ja maˈestrëtëjk mdukniˈˈixëdë ets duˈun tnimaytyäˈäktë extëm mbäät mdukmëbëkëdë. Per jamyats ko waˈan ninäˈä të tkapayeˈeytyë ko tam tuˈugë Dios mëdiˈibë tijaty ojts dyajkojy. Jamyats nanduˈun extëm jyënaˈanyë Proverbios 18:17: “Ja mëdiˈibë tim jawyiin käjpxp, duˈun yajmëdoy ko tëyˈäjtën jyawë jyënaˈany, axtë ko ja wiinkpë jyaˈty ets dyajtëy dyajtëdaˈaky”. ¿Ti mdukniˈˈijxëp extëm jyënaˈanyë yäˈädë tekstë? Ko kyaj mbäät xytyimmëbëjktäˈäy tijaty myajtukniˈˈijxëp mä mˈeskuelë. Këˈëmën mbäät xypyayeˈey këkpäät nëˈpäät wiˈixë Biiblyë tyukniˈˈixë. Payeˈey mä ëxpëjkpajn ets yajtëwë nmëguˈukˈäjtëm mëdiˈibë ijty nanduˈun myëbëjktëp ko duˈunyë tijaty të yajtukˈijxpäädëˈëky, ets ti pudëjkëdë parë tmëbëjktë ko tam tuˈugë Dios mëdiˈibë tijaty të dyajkojtäˈäy ets ko mëk xytsyojkëm.b Pën mduumpy duˈun, ta xyˈixäˈäny ko tamën pën ojts xyajkojëm.

9. ¿Ti mdukniˈˈijxëp extëm yajnimaytyaˈagyë Melissa?

⁹ Tuˈugë nmëguˈukˈäjtëm mëdiˈibë xyëwˈäjtypy Melissac tnimaytyaˈaky ko mëdiˈibë pudëjkë parë kyaj ojts yˈamajtsk jyotmajtskë, yëˈë ko tˈëxpëjky wiˈixë Dios tijaty ojts dyajkojy. Yëˈë jyënaˈany: “Mä eskuelë, duˈunë maˈestrë tnimaytyäˈäktë tijaty extëm mbäät xymyëbëky ko jantsy duˈunyë tijaty të yajtukˈijxpäädëˈëky. Tim jawyiin kyajts njapayeˈeyany mëdiˈibëtsë nety xyaˈˈamajtsk xyajjotmajtskëp, pes tsëˈkëts kots nˈëxpëjkpäädët ko duˈunën tijaty të jyantsy yajtukˈijxpäädëˈëky. Per tats njamyejtsy ko Jyobaa kyaj ttsoky ets alokë tijaty nmëbëjkojëm, päätyëts ojts nbayeˈey. Ngäjpxëtsë liibrë ¿Existe un Creador que se interese por nosotros? etsë foyetë ¿Es la vida obra de un Creador? etsë El origen de la vida. Cinco cuestiones dignas de análisis. Mëjwiin kajaajëts xypyudëjkë kots duˈun nˈëxpëjky, ojtsxyëbëts duˈun ngatuny mäts nety nˈamajtsk njotmajtskë”.

10, 11. ¿Ti mbäät mbudëkëty ko mdukminëdët ja axëëkpë tsojkën? (1 Tesalónikʉ 4:3, 4).

¹⁰ Jëjpkudijë ja axëëkpë tsojkën. Ko myaˈkpëtsëmy, mbäät mëk ja tsojkën mdukminyëty parë pën xymyëttsëënëyäˈänët ets mbäät pën mëktaˈaky mˈanëˈëmxëty parë duˈun xytyunët. Satanás yëˈëjën tsyojkypy ets duˈun xytyunët. ¿Per ti mbudëkëyanëp parë kyaj mnaytyukmëmadäˈägëdët ja axëëkpë tsojkën? (Käjpxë 1 Tesalónikʉ 4:3, 4). Ko xymyënuˈkxtäˈägëdë Jyobaa, tukmëtmaytyäˈäk wiˈix mnayjyawëty ets anëëmë parë mmoˈoyëdët ja jot mëjääw ets xyjyëjpkudijët mëdiˈibë kyaj yˈoyëty (Mat. 6:13). Jamyats ko Jyobaa mbudëkëyanëp, pes kyaj yëˈë tˈixy tijaty oy mgatuumpy (Sal. 103:13, 14). Ko xyˈëxpëkëdë Biiblyë mbäät nanduˈun mbudëkëty. Melissa mëdiˈibë të yˈokˈyajmaytyakpë ojts tsyiptakxëty tjëjpkudijët ja axëëkpë jot winmäˈäny mä jäˈäy yˈit tsyëënëdë. Yëˈë jyënaˈany: “Kots xëmë ojts ngajpxyë Biiblyë, yëˈëts xypyudëjkë parëts kyaj nnaytyukmëmadakë. Yëˈëts nanduˈun xytyukjamyajts ko tëëtsë Jyobaa ndukëdëkë njukyˈäjtën ets ko tsojkëbëts nmëdunët” (Sal. 119:9).

¹¹ Tukmëtmaytyäˈägë mdääk mdeety wiˈix mjaty mgëbety, pes kyaj tiko naytyuˈuk xywyinguwäˈägët ja amay jotmay. Mbäät mtsiptakxëty duˈun xytyunët, per oy ko xytyukmëtmaytyäˈägët. Melissa jyënaˈany: “Nˈamdoowëtsë Jyobaa jotmëkˈäjtën ets tatsë ndääk ndeety ndukmëtmaytyaky wiˈixëtsë nety njaty ngëbety. Jantsy jotkujkëts nnayjyäˈäwë kots duˈun nduuny. Ets nnijäˈäwëbëtsë nety ko Jyobaa agujk jotkujk nanduˈun nyayjyawëty”.

12. ¿Ti mbudëkëyanëp parë oy tijaty xytyunët?

¹² Nasˈixë parë mnëˈëmoˈoy mduˈumoˈoyëdët ja Biiblyë kyäjpxwijën. Ko niˈigyë mˈyaˈk mbajnët, ta ja mdääk mdeety tnasˈixëyäˈändë parë këˈëm xywyinˈixët ti mdunaampy. Per ta kanäk pëky mëdiˈibë kyaj xynyijawë wiˈix yajtunäˈäny. Pääty, ¿ti mbäät xytyuny parë kyaj xymyëdëgoyëdë Jyobaa ets duˈunyëm oy mëët mˈitët? (Prov. 22:3). Tuˈugë nmëguˈukˈäjtëm mëdiˈibë xyëwˈäjtypy Kari, jyënaˈany ko mëdiˈibë pudëjkë parë oy tijaty ttuuny, yëˈë ko tjaygyujkë ko tuˈugë jäˈäy mëdiˈibë oy Diosmëduump kyaj tyimtsokyëty yajtukˈawäˈänëtyaˈayët wiˈix mbäät tijaty ttuny mä jyukyˈäjtën. Kari jyënaˈany: “Jawyiinëts ojts nbayeˈey wiˈixë Jyobaa tˈixy mëdiˈibëtsë nety ndunaampy ets kyajts jeˈeyë tijaty nduuny extëmëts pën xyˈanmääy”. Ko xykyäjpxëdë Biiblyë nayajtëwëdë: “¿Tits xytyukniˈˈijxëp mëdiˈibëts yam të ngajpxy mä wiˈixë Jyobaa tijaty tˈixy? ¿Xypyudëjkëbëts parëts oy tijaty ndunët? ¿Wiˈixëts ndukˈoyˈatäˈäny kots nguytyunët mëdiˈibëts yam të ngajpxy?” (Sal. 19:7; Is. 48:17, 18). Pën mgajpxypyë Biiblyë ets mbawinmaapy ja yˈëwij kyäjpxwijën, ta kyaj mtsiptäˈägäˈänxëty xywyinˈixët ti mdunaampy ets mëdiˈibë mbäädë Jyobaa agujk jotkujk yajnayjyawëty. Pën mduumpy duˈun, ta niˈigyë xynyijawëyaˈany wiˈixë Jyobaa wyinmay ets kyaj nëjkx tyimtsokyëty myajtukˈawanët wiˈix tijaty xytyunët. Duˈunë nety xyajnigëxëˈëky ko tamën mwimbajtˈadëˈëtsy.

13. ¿Wiˈix mbäät mbudëkëtyë oybyë mmëtnaymyaayëbë? (Proverbios 13:20).

¹³ Naymyayët mët pënaty tsyojktëbë Jyobaa. Extëm të nˈijxëm mä parrafo 7, pën yëˈë mwinˈijxypyë oybyë mmëtnaymyaayëbë mbudëkëyanëp parë oy mDiosmëdunët (käjpxë Proverbios 13:20). Min nˈokˈijxëm wiˈix jyajtyë Sara. Yëˈë kyaj nety agujk jotkujk yˈoknayjyäˈäwënë ko tmëdunyë Jyobaa, per ¿ti pudëjkë? Sara jyënaˈany: “Nbatëtsë oybyë nmëtnaymyaayëbë mätsë nety meerë nyajtëgoyˈaty. Xëmëts ijty sëmään sëmään nˈajäˈäytyë rebistë mët niduˈuk ja kiixy mëdiˈibëts mëët nnaymyayëty, ets niduˈugëts xyˈanmääy parëts ngomentaratët reunyonk. Kots nduˈukmujky mëdëtsë nmëtnaymyaayëbëty, yëˈëts xypyudëjkë parëts nbëjktakyë nwinmäˈäny nˈëxpëkäˈäny naytyuˈuk etsëts nmënuˈkxtäˈägäˈänyë Jyobaa. Wanaty wanatyëts jatëgok nmëwingoonyë Jyobaa etsëts jatëgok nmëduuny agujk jotkujk”.

14. ¿Wiˈixë Julien tpatyë oybyë myëtnaymyaayëbë?

¹⁴ ¿Ti mbäät xytyuny parë xypyäädëdë oybyë mmëtnaymyaayëbë? Julien, tuˈugë nmëguˈukˈäjtëm mëdiˈibë tyam tuump mëjjäˈäy, duˈun tnimaytyaˈaky: “Kots nˈënäˈkˈäjty xëmëts ijty nëjkxy mëdë nmëguˈukˈäjtëm ëwäˈkx käjpxwäˈkxpë ets duˈunëts nbatyë oybyë nmëtnaymyaayëbë. Nˈijxëts wiˈix jantsy agujk jotkujk yajpäättë ko yˈëwäˈkx kyäjpxwäˈkxtë, tats nwinmääy ko mbäädëts nanduˈun agujk jotkujk nnayjyawëty kots niˈigyë nˈëwäˈkx ngäjpxwäˈkxët, päätyëts nduknibëjktakë ndunäˈäny prekursoor. Nbëjkëtsë nanduˈunë kuentë ko yëˈëyëtsë nety mëët nnaymyayëtyë nmëduknax ets päätyëmtsë nety kyaj nyimayëty ja nmëtnaymyaayëbëts mëdiˈibëts mbäät xypyudëkëdë. Ets kots nyajwooy Betel nbatëts nanduˈunë nmëtnaymyaayëbëty, mëdiˈibëts xypyudëjkëdë parëts yajxon nˈixët tits mëët ja nxëëw ndiempë nyajtuny, ets duˈunëts mas niˈigyë nmëwingoonyë Jyobaa”.

15. ¿Wiˈixë Pablo tˈanmääyë Timoteo? (2 Timotee 2:20-22).

¹⁵ ¿Ti mbäät xytyuny pën mbëjkypyë kuentë ko tuˈugë nmëguˈukˈäjtëm mëdiˈibë mëdë mxëëw tiempë xyajnaxy kyaj mbudëkëyaˈanyëty parë niˈigyë xymyëwingonëdë Jyobaa? Apostëlë Pablo nyijäˈäwëbë nety ko mä primer siiglë tamˈäjtpë netyë jäˈäy mëdiˈibë kyaj oy Diosmëdundë. Pääty tˈanmääyë Timoteo parë nyaygyuentëˈatëdët ets kyaj mëdë xyëëw tiempë dyajnaxët (käjpxë 2 Timotee 2:20-22). Nitii duˈun kyatsobääty extëm ko mëdë Jyobaa nnaymyaˈayëm, per tsojkëp nduˈunëmë mëjääw parë nmëwingoˈonëm. Pääty, kyaj mbäät nasˈijxëm ets nipën xykyatukmëjagamgakëmë Jyobaa (Sal. 26:4).

MBUDËJKËP PARË MWIMBAJTˈADËˈËTSËT KO TIJATY XYˈAKTUKNIBËJKTÄÄGË XYTYUNÄˈÄNY

16. ¿Tijaty mbäät xyˈaktuny?

¹⁶ Yëˈë ak tun mëdiˈibë mbäät mbudëkëty. Extëm mëdiˈibë mbäät dyajkëktëkë mëbëjkën ets mëdiˈibë mbäät mbudëkëty parë oy mDiosmëdunët (Éfes. 3:16). Parë duˈun xytyunët, tsojkëp xëmë xyˈëxpëkëdë Biiblyë ets xykyäjpxët bom bom (Sal. 1:2, 3). O mbäät xëmë Jyobaa xymyënuˈkxtaˈaky winë ääw winë jot. Oy ko nanduˈun xyˈixët ti mëdë mxëëw mdiempë xyajnaxäˈäny ko nety mboˈkxy parë mbäät yajxon ja mdiempë xyajtuny (Éfes. 5:15, 16). Jyobaa jantsy agujk jotkujk nyayjyawëty ko xytyunyë mëjääw parë mas niˈigyë mwimbety.

17. ¿Wiˈix xytyukˈoyˈatäˈäny ko xypyudëkëdë mmëguˈuktëjk?

¹⁷ Ko xypyudëkëdë mmëguˈuktëjk, mas niˈigyë mwimbety mä Diosë tyuunk. Jesus jyënany: “Niˈigyë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm” (Apos. 20:35). Jantsy agujk jotkujk mnayjyawëyaˈanyëty pën jamë mxëëw mdiempë xyajtuny etsë mjot mëjääw mä xypyudëkë mmëguˈuktëjk. ¿Tijaty mbäät xytyukpudëkë? Mbäät xypyëjktaˈagyë mwinmäˈäny ets xypyudëkëdë nmëguˈuktëjk mëdiˈibë mä mgongregasionk, extëm pënaty pëjk ijxëdëp ets pënaty të myëjjäˈäyëndë o xytyukniˈˈixëdët wiˈix dyajtundëdë tyabletë etsë syelulaar. Pën të mnëbajnë ets jeˈeyënëm myaˈkpëtsëmy, tiko xykyapëjktaˈagyë mwinmäˈäny parë mdunët siervo ministerial ets duˈun xypyudëkëdë mmëguˈuktëjk (Filip. 2:4). Mbäät nanduˈun mˈoyjyaˈaytyaˈaky mët pënaty kyaj yˈëxpëktë ko xytyukmëtmaytyäˈägëdë Diosë yˈayuk (Mat. 9:36, 37). Ets mbäät nanduˈun xypyëjktaˈagyë mwinmäˈäny mdunët prekursoor, Betel o mä yajkojˈyë jëën tëjk.

18. ¿Wiˈix niˈigyë xymyëwingonäˈänyë Jyobaa ko xyajmëjwindëkëdë tyuunk?

¹⁸ Mbäät mas niˈigyë xymyëwingonyë Jyobaa ko xyajmëjwindëkëdë tyuunk. Extëm nˈokpëjktakëm, pën mduundëjkëp prekursoor, mbäät mnëjkxy mä Eskuelë parë pënaty kyäjpxwäˈkxtëbë Diosë Kyutujkën, Betel o mä yajkojˈyë jëën tëjk. Okmëdow wiˈix jyënaˈanyë Kaitlyn tuˈugë kiixy mëdiˈibë tuump prekursoora: “Kotsë nety të nëbajnë, yëˈëts xëmë ojts mëët nˈëwaˈkxy ngäjpxwaˈkxyë nmëguˈukˈäjtëm mëdiˈibë jeky kujk Diosmëduunëdë. Xypyudëjkëdëts mëjwiin kajaa parëts niˈigyë nmëwingoonyë Jyobaa. Kots nˈijxy wiˈix jantsy oy tmëdundë Jyobaa, yëˈëts nanduˈun xypyudëjkë parëts niˈigyë nˈëxpëkëdë Biiblyë etsëts mas oyë jäˈäy nyaˈëxpëkët”.

19. ¿Wiˈixë Jyobaa mgunuˈkxäˈänyëty ko mwimbajtˈadëˈëtsët mä tyuunk?

¹⁹ Mëjwiin kajaa Jyobaa mgunuˈkxäˈänyëty pën mwimbajtˈadëtsp mä tyuunk. Pes kyaj nety jam xyajtuny ja mjot mmëjääw mä tijaty kyaj tsyobääty (1 Fwank 2:17). Kyaj nëjkx mnayˈayoˈonmoˈoy mnayjyotmaymyoˈoyëty mët ko oy tijaty xytyuny mä mjukyˈäjtën ets niˈigyë myajpäädäˈäny jantsy agujk jotkujk (Prov. 16:3). Ko oy tijaty xytyunët, pudëkëyanëdëp niˈamukë nmëguˈukˈäjtëm, duˈunë ënäˈktëjk etsë mëjjäˈäytyëjk (1 Tim. 4:12). Per mëdiˈibën mas oy, yëˈë ko kyaj tii xymyëmayaˈany xymyëdäjäˈäny ets agujk jotkujk mnayjyawëyaˈanyëty ko xynyijawë mgupëjkëbë Jyobaa ets ko yëˈë mmëtnaymyaayëbëˈäjtypy (Prov. 23:15, 16).