1922 Myëgoˈpx jëmëjtëp

“XYAJMONYˈIJX XYAJMONYJYÄˈÄWËDËTS EXTËMËTS NYAˈˈANMÄÄYTYË”

Kom niˈigyë ojts nyimayëˈadëˈëtstë ja nmëguˈukˈäjtëm mëdiˈibë ëwäˈkx käjpxwäˈkxtëp, pääty tsojkëbë nety ets niˈigyë pyëtsëmëdë ëxpëjkpajn. Mä Betel mëdiˈibë Brooklyn (Nueva York, Estados Unidos) yajpëtsëëmdëbë netyë rebistë, perë liibrë kyaj, pes yëˈë ijty yˈanmääytyëp tuˈugë empresë parë dyajpëtsëmët. Tëgok, agëjxë ja liibrë ets kanäk poˈo kyaj tnekymyëdäjttë mëdiˈibë kyëyaktëp mä yˈëwäˈkx kyäjpxwäˈkxtë. Päätyë Rutherford dyajtëëy ja nmëguˈukˈäjtëm Robert Martin mëdiˈibë nety nyigëbäjkˈäjtypy ja faabrikë pën mbäät nanduˈun dyajpëtsëmdë liibrë.

Robert duˈun tnimaytyaky: “Kyajts nmëbëkandë kots duˈun xyˈanmääytyë, pes tsojkëbë nety nyaxkëdäˈägët tuˈugë faabrikë ets kyäˈpxtäˈäyët tijaty tunäämp parë mbäät ja liibrë pyëtsëmy”. Ta ja nmëguˈukˈäjtëm ojts tˈanuˈkxtë tuˈugë tëjk jap Brooklyn mä calle Concord, numero 18 ets japën dyajnaxkëdaktë ja faabrikë.

Per kyaj niˈamukë jäˈäy tˈoyˈijxtë kots duˈun nyajnaxkëdaktë ja faabrikë. Pes niduˈuk mëdiˈibë nyigëbäjkˈäjtypy ja empresë mätsë netyë liibrë nyajpëtsëmdë, duˈunëts xyˈanmääytyë: “Nëgoo yˈokˈoyˈäjnë yäˈädë faabrikë mëdiˈibë të xyajnaxkëdäˈäktë, per kyaj xytyukjattë xyajpëtsëmdëdë liibrë, ja kyumdëdujk poˈo të nety xyajwindëgooytyaˈaytyë”.

Robert tnimaytyaky: “Ojtsëts xyjyatukmëbëkäˈändë, per kyaj nety tnijawëdë ko Jyobaa yëˈëts xëmë xypyudëjkëdëp”. Tëyˈäjtën extëmë nety të jyënaˈanyë Robert, pes ko waanë tiempë nyajxy, yäˈädë makinë ja nety tnayajpëtsëëmnë 2,000 liibrë mä tuˈukpë xëëw.

YËˈËTS NYAJTUUNDË RAADYË PARË MILˈAMË JÄˈÄY NDUKNIJÄˈÄWËDËTS JA DIOSË YˈAYUK

Kyajts yëˈëyë nyajpëtsëëmdë liibrë, nyajtuundëts nanduˈunë raadyë parëts ojts ngäjpxwäˈkxtë Diosë yˈayuk. Domingë tsuu mä jëmëjt 1922, 26 äämbë febreerë, ja tim ëgäˈänyë nmëguˈukˈäjtëm Rutherford dyajnäjxy tuˈugë diskursë mëdiˈibë xyëwˈäjt: “Miyonkˈamë jäˈäy mëdiˈibë tyam jukyˈäjttëp ninäˈä kyaˈoogäˈändë”. Jap dyajnäjxy Los Ángeles (California, Estados Unidos) mä ja raadyë KOG.

Naa jaa 25,000 jäˈäy ojts tmëdoowˈittë yäˈädë diskursë ets kyajxtë neky mä tkuˈëw tkukäjpxëdë. Niduˈugë yëˈë Willard Ashford, mëdiˈibë nety tsënaapy Santa Ana (California). Myëjkuˈëˈëw myëjkugäjpxë nmëguˈukˈäjtëm Rutherford ko jantsy oyë nety ja diskursë të dyajnaxy. Duˈun jyënany: “Oy ko ja mdiskursë të xyajnaxy mä raadyë, pes kyajxyëbëts të nëjkxy oyxyëp yaayë muum wingon të xyjyayajnäjxpë, mët ko nidëgëëgëtsë päˈäm jäˈäy nguentëˈaty”.

Nuˈun ja tiempë nyajxy, duˈunyëmë diskursë ojts tˈakˈyajnaxtë, pääty ko jëmëjt yˈabejty 1922, ta mä rebistë The Watch Tower ojts tnigajpxy ko të nety naa 300,000 jäˈäy tmëdoowˈittë Diosë yˈayuk.

Ko tˈijxtë wiˈixë jäˈäy ojts pyudëkëdë ko duˈun dyajnäjxtë diskursë mä raadyë, ta ja nmëguˈukˈäjtëm jyënandë ko nik oy ko këˈëm dyajnaxkëdäˈäktëdë estación de radio jap Staten Island, naa japyë mä Betel mëdiˈibë Brooklyn. Ko tiempë nyajxy, ta yäˈädë estación ojts txëëwmoˈoytyë WBBR parë niˈigyë ojts yajkäjpxwaˈkxyë Diosë yˈayuk.

“ADV”

Mä rebistë The Watch Tower 15 junië 1922, jap ojts yajnigajpxy ko nety tyunäˈänyëtyë asamblee 5 äämbë septiembrë axtë 13 äämp jap Cedar Point (Ohio). Jantsy agujk jotkujk nyayjyäˈäwëdë ja nmëguˈukˈäjtëm ko jyäjttë mä ja asamblee.

Ko tsyondakyë asamblee, ta ja nmëguˈukˈäjtëm Rutherford jyënany: “Ijtpëts seguurë ko Diosteety xykyunuˈkxäˈänëm mä yam të nduˈukmujkëm. Ets nimayë jäˈäy yajtuknijawëyäˈändë Diosë yˈayuk extëmë nety kyajnëm duˈun tyimˈyajtuny”. Pënaty yajnäjxtë ja diskursë yˈanmääytyë ja myëguˈuktëjk parë niˈigyë kyäjpxwäˈkxtët.

Biernës 8 äämbë septiembrë, ja jyäjttë jäˈäy naa niduktujk milën parë tmëdoowˈitäˈändë ja diskursë mëdiˈibë nety yajnaxaambyë Rutherford. Wyinmääytyë ko japën yajnimaytyäˈägäˈäny ti yˈandijpyë yäˈädë letrë “ADV” mëdiˈibë nety miimp mä inbitasyonk. Mientrësë nety lyugäärpäättë, ta nimay tˈijxtë ko mä plataformë tam yˈity axäˈtsmuky tuˈugë lonë. Ko jyajtyë Arthur Claus mëdiˈibë nety tsoˈomp Tulsa (Oklahoma, Estados Unidos), ta tˈëxtääy tuˈugë lugäär mä mbäät mas oy tmëdoowˈity ja diskursë mët ko mä taabë tiempë kyaj nety ti mikrofënë ets ni bosinë.

Ja nmëguˈukˈäjtëm mëdiˈibë ojts dyajtsondaˈaky ja asamblee, ta ojts tnigajpxy ko parë kyaj jyapˈattëdë naynyaˈamë, kyaj mbäät pën yˈoktëjkënë pën të tsyondaknë ja asamblee. Rutherford ja dyajtsondakyë diskursë 9:30, ets yëˈë tim jawyiin ojts tkajpxyë Matewʉ 4:17, mä jyënaˈany: “Ja tsäjpotmëdë kutujkën të wyingony”. Ets ko ojts tnigajpxy wiˈixënë jäˈäyëty yajtuknijawëyäˈändë Diosë yˈayuk, ta ojts tnigajpxy ko “Jesus jyënany ko nety jam yajpatnë tsäjpotm, ta dyajtuˈukmukäˈäny ja jäˈäyëty mëdiˈibë jyantsy myëdunandëbë Jyobaa”.

Ja nmëguˈukˈäjtëm Arthur mëdiˈibë nety jëjpˈam të tpäätyë lyugäär duˈun, jyënany: “Jantsy oyëtsë nety jam nmëdoowˈity ja diskursë”. Per ajotkumonë ta axëëk nyayjyäˈäwë ets pyëtsëëmy, oyë nety tjanijawë ko pën pëtsëëmp kyaj mbäät yˈoktëjkënë.

Ko waanë yˈijty, ta jatëgok oy nyayjyäˈäwë ets ko jyëmbijty, ta tmëdoy ko jäˈäyë kyëˈë tjantsy pyotstë, jantsy agujk jotkujk nyayjyäˈäwë ko duˈun tmëdooy. Pääty wyinmääy ko nik oy ko pyatët tëjknikëjxy parë jap tˈakmëdoowˈitët ja diskursë. Ta pyejty, pes ënäˈknëmë nety, jeˈeyënëmë netyë jyëmëjt 23. Ta tˈijxy ko kuwäˈätstëmë nety ja tëjk, pääty wäˈäts jyantsy yajmëdoy ja diskursë.

Perë Arthur, ta tˈijxy ko tamë nety nanduˈun näägë myëtnaymyaayëbë të pyattë. Niduˈuk, yëˈë Frank Johnson mëdiˈibë ojts pëyeˈegyë nyiminyëty ets yajtëëwë: “¿Kyaj xynyamëdaty tuˈugë nabäjë?”.

Arthur, ta tˈatsooy: “Tyapëts nmëdaty”.

Frank ta yˈatsoowë: “Mijtsënë Dios të mgexyëty parë të tˈatsoowëmbity ja nuˈkxtakënëtyëts. ¿Mˈijxypyë xiibë lonë mëdiˈibë axäˈtsmuky? Yëˈë tuˈugë letreerë. Pääty ko ja fesa jyënäˈänët: nimaytyäˈäktë, nimaytyäˈäktë, ta netyë xymyëtsukët”.

Arthur duˈun ttuuny, yëˈëyë myëdoowˈijt näˈä ja Rutherford dyajjëjpkëjxnë dyiskursë parë net tmëtsukëyaˈany ja lonë. Ets ko ojts dyajjëjpkëxanë, ta mëk jyënany: “Ninäˈä xykyamastuˈuttëdë nWintsënˈäjtëmë Dios. Duˈunyëm xymyëduunˈadëˈëtstët axtë ko kyutëgooytyaˈaytyëdë relijyonk mëdiˈibë kyaj tyëyˈäjtënëty, ëwäˈkx käjpxwäˈkxtë jagambäät. Ja naxwinyëdë jäˈäy tsojkëp tnijawëdët ko Jyobaa yëˈëjënë Dios ets ko Jesukristë yëˈën Rey mä niˈamukë reyëty ets Wintsën mä niˈamukë wintsënëty. Të duˈun tpääty ja tiempë, ¡ixtë ja Rey të tyëjkënë anaˈambë! Miitsëtyën mnimaytyäˈägandëbë yäˈädë Rey. Pääty nimaytyäˈäktë, nimaytyäˈäktë, nimaytyäˈäktë ja Rey etsë yˈanaˈamën”.

Arthur jyënaˈany ko ta tmëtsujkëdë ja lonë mët ja myëguˈuktëjk ets ta kyëxëˈky ja letrë. Yëˈëdëmë nety jap yajnimaytyakp ja letrë mëdiˈibë miimp inglés “ADV” mëdiˈibë yˈandijpy “nimaytyäˈäktë ja Rey etsë yˈanaˈamën”.

TUˈUGË TUUNK MËDIˈIBË JËJPˈAM

Ko asamblee tyuunë jap Cedar Point, pudëjkëdë ja nmëguˈukˈäjtëm parë jamyë jyot wyinmäˈäny tpëjktäˈäktët mä yˈëwäˈkx kyäjpxwäˈkxtë. Ets mëdiˈibë nety duˈun jyantsy tyunandëp agujk jotkujk nyayjyäˈäwëdë. Jap Oklahoma tuˈugë prekursoor (mëdiˈibë ijty yajtijtëp colportor), duˈun tkujäˈäyë: “Japëts ojts nˈëwäˈkx ngäjpxwäˈkxtë mä netyë jäˈäy dyajpëtsëmdë juˈuny o juˈuy ets nëgoo japë jäˈäy yˈayoownëdë”. Yäˈädë nmëguˈukˈäjtëm jyënany ko yajjëëy yajˈyaxëdë jäˈäy ko tmëdoowdë tijaty yajmaytyakp mä rebistë The Golden Age. Yäˈädë prekursoor yˈakjënany: “Jantsy agujk jotkujkëts nnayjyäˈäwëdë kots njotkujkmooytyë yäˈädë jäˈäyëty”.

Ja nmëguˈukˈäjtëm pyëjktë kuentë ko jëjpˈamë nety yajtunët ja tuunk mëdiˈibë Jesus myaytyak mä Lukʉs 10:2, mä jyënaˈany: “May ja jäˈäy diˈibë kyajnëm tˈamëdoonaxtë ja oybyë ayuk. […] Per waanë ja tuumbë”. Ko nety jyëjpkëjxnë jëmëjt 1922 niˈigyë nmëguˈukˈäjtëm ojts yˈëwäˈkx kyäjpxwäˈkxtë jagambäät.