Mëdiˈibë nääk të nyayajtëwëdë

Mä Salmo 61:8 David jyënany ko dyajmëjpëtsëmäˈänyë Diosë xyëëw “xëmëkyëjxm”, ¿waˈan wyinmääy ko ninäˈä kyaˈoogäˈäny?

Kyaj. Jeˈeyë ko tëyˈäjtën extëm jap tkujäˈäyë.

Okˈix wiˈix tkujäˈäyë mä Salmo 61:8 ets mä wiinkpë bersikulo: “Xëmëkyëjxmëts nguyˈëwäˈänyë mxëëw, ets nguytyunäˈänyëts ja nwandakën tuˈuk tuˈugë xëëw”, “Nmëjkumaapy winë ääw winë jot, mijts Jyobaa mëdiˈibëts nDiosˈäjtypy, xëmëkyëjxmëts nyajmëjpëtsëmaˈanyë mxëëw” ets “xëmëkyëjxmëts nmëjkumayaˈanyë mxëëw” (Sal. 61:8; 86:12; 145:1, 2).

Ko duˈunë David jyënany kyaj dyajjaygyukëyanë ko ninäˈä kyaˈoogäˈäny, pes nyijäˈäwëbë nety ko Jyobaa ojts ttuknikäjpxpetyë oˈkënë ja naxwinyëdë jäˈäy ko pyokytyuundë, ets yˈëxkäjp nanduˈun ko pyokyjyaˈayëty (Gén. 3:3, 17-19; Sal. 51:4, 5). David nyijäˈäwëbë nety ko ojts yˈooktë pënaty Dios mëduundë, extëmë Abrahán, Isaac etsë Jacob, ets ko tyukjäˈtaambyë tiempë mä nanduˈun yˈoogäˈäny (Sal. 37:25; 39:4). Extëm jyënany mä Salmo 61:8, yëˈë xytyukˈijxëm ko David të netyë wyinmäˈäny tpëjktaˈaky ko tmëjkumayaˈanyë Dios xëmëkyëjxm, jaˈa njënäˈänëm, mäbäät jyukyˈaty (2 Sam. 7:12).

David kyujäˈäyë nanduˈun wixaty jyajty kyëbejty, extëm nˈijxëm mä tsyondaˈagyë Salmos kapitulo 18, 51 etsë 52. Mä Salmo 23, japë David tˈijxkijpxyë Jyobaa mët tuˈugë borreegë kuentëˈäjtpë mëdiˈibë nyëˈëmoopy tyuˈumoopy ja byorreegë, yˈixˈijty kyuentëˈäjtypy ets yaˈˈagujkˈäjty yajjotkujkˈäjtypy. David duˈun tˈijxˈijty tkuentëˈäjty ja Diosë kyäjpn, ets pääty tmëdunanyë Dios nuˈun ja xyëëw jyukyˈäjtën (Sal. 23:6).

Nˈokjamyajtsëm nanduˈun ko tijatyë David kyujäˈäyë yëˈë winmäˈänymyooyë Jyobaa. Tap mëdiˈibë nety ok adëwäämp, extëm nˈokpëjktakëm mä Salmo 110 David jyënany ko ja Wyintsën nyaxwaatsäˈäny Dios yˈaˈoytsyoo ets yajmoˈoyaˈany ja kutujkën mëjwiin kajaa. Ta tmëmadäˈägäˈäny ja Diosë myëtsipëty ets tpayeˈeyaˈany ‘ja nax käjpn ja nyëë pyoky’. David yëˈë tyëëmˈäjt yˈäätsˈäjt ja Mesías mëdiˈibë anaˈamäämp tsäjpotm ets tunäämp “saserdotë xëmëkyëjxm” (Sal. 110:1-6). Jesus yajtëyˈäjtëndëjkë ko yëˈë yajmaytyakp mä Salmo 110 ets ko yˈadëwäˈäny mä tiempë myiny kyëdaˈaky (Mat. 22:41-45).

Extëm të nˈijxëm, Jyobaa yëˈë wyinmäˈänymyooyë David parë tkujayët tijaty tuun jäjtë mä jyukyˈajty ets tijaty tunan jatanëp ko nety jyukypyeky parë tmëjkumayëdë Jyobaa xëmëkyëjxm. ¿Wiˈixë yäˈädë xypyudëjkëm parë njaygyujkëm extëm jyënaˈanyë Salmo 37:10, 11, etsë 29? Yäˈädë bersikulo adëëw jam Israel ets adëwäämp abëtsëmy nyaxwinyëdë mä tiempë myiny kyëdaˈaky ko netyë Dios tkuytyuny ja wyandakën (ix mä yäˈädë rebistë mä jyënaˈany “Myajpäädäˈäny mët ëjts mä ja it lugäärë tsujpë” parrafo 8).

Pääty extëm jyënaˈanyë Salmo 61:8 etsë wiingatypyë bersikulo, yëˈë xytyukˈijxëm ko David myëjkumayaambyë netyë Jyobaa mientrës jyukyˈaty. Ets nanduˈun xytyukˈijxëm ti David tyunaampy ko Jyobaa yajjukypyëkëdët.