¿Wiˈix mbäät nnayjyäˈäwëm agujk jotkujk ko nbatëmë ayoˈon jotmay?

1. ¿Ti yˈandijpy ja Diosë “yˈagujkˈäjt jyotkujkˈäjtën”, ets wiˈix xypyudëjkëm? (Filipʉs 4:6, 7).

TA AGUJKˈÄJT jotkujkˈäjtënë mëdiˈibë jäˈäy kyaj tnijawëdë, ets yëˈë yajmaytyakp ja Diosë “yˈagujkˈäjt jyotkujkˈäjtën” mëdiˈibë oy xyajnayjyäˈäwëm ko oy nˈijtëm mët yëˈë. Ko njäˈäwëmë Diosë “yˈagujkˈäjt jyotkujkˈäjtën”, yëˈë mëdiˈibë seguurë xyajnayjyäˈäwëm (käjpxë Filipʉs 4:6, 7). Jantsy oy mëdë nmëguˈukˈäjtëm nˈijtëm mëdiˈibë tsyojktëbë Jyobaa ets nanduˈun mët “ja Dios, diˈibë xymyoˈoyëm ja agujkˈäjt jotkujkˈäjtën” (1 Tes. 5:23). Mbäädë Jyobaa xymyoˈoyëm ja agujkˈäjt jotkujkˈäjtën ko ndukˈijxpajtëm ets ko nmëmëdoˈowëm. Yäˈädë agujkˈäjt jotkujkˈäjtën oy xyajnayjyäˈäwëm ko nbatëmë ayoˈon jotmay.

2. ¿Tiko nˈijtëm seguurë ko mbäät nmëdäjtëm ja Diosë yˈagujkˈäjt jyotkujkˈäjtën?

² ¿Mbäät njäˈäwëm ja Diosë yˈagujkˈäjt jyotkujkˈäjtën ko nbatëmë ayoˈon jotmay? ¿Mbäädëdaa kyaj nëgoo nmäˈäy ndäjëm ko jyaˈˈatyë yuu päˈäm mëdiˈibë ninäjxp, ko tii yˈayoˈonbëjktaˈaky, ko jäˈäy tmëdattë jëën tsip ets ko nyajpajëdijtëm? Ko nbatëmë duˈumbë jotmay, mbäät xyˈatsëˈkëm. Perë Jesus duˈun tˈanmääy ja yˈëxpëjkpëty: “[Këdii] mjotmayˈooktë es ni xykyamëdattët ja tsëˈëgë” (Fwank 14:27). Mayë nmëguˈukˈäjtëm të duˈun ttundë extëmë Jesus jyënany ets mët ko Jyobaa pyudëkëdë të tjawëdë ja agujkˈäjt jotkujkˈäjtën oy të tpäättë ayoˈon jotmay.

IJTËM AGUJK JOTKUJK OY JYAˈˈATYË PÄˈÄM MËDIˈIBË NINÄJXP

3. ¿Wiˈix xypyëjkxëmë agujkˈäjt jotkujkˈäjtën ko jyaˈˈatyë päˈäm mëdiˈibë ninäjxp?

³ Ko jyaˈˈatyë päˈäm mëdiˈibë ninäjxp, mbäät pojˈam dyajtëgatsyë jukyˈäjtën. Extëm nˈokpëjktakëm, COVID-19 të mayë jäˈäy dyaˈooky ets të dyajpäˈämbety. Ko ëxpëkyjyaˈay të tpayeˈeytyë wiˈixë jäˈäy të tkuˈayowëdë, ta nimay të jyënäˈändë ko kyaj oy yˈokmää yˈokpoˈkxnëdë ets ko të niˈigyë myëjwindëkë ja mëk moˈon mëk tujkën, mäˈäy täjën ets ko niˈigyë jäˈäy të tjëˈxnëdë droogë o yˈuknëdë, ttsiˈk tkojxnëdë kyujëën kyudëjk o axtë këˈëm nyayaˈooganëndë. Pën jäjtpë päˈäm mëdiˈibë ninäjxp mä mtsëënë, ¿ti mbäät xytyuny parë myajpäädët agujk jotkujk ets kyaj mëmadäˈägëdët ja mëk moˈon mëk tujkën?

4. Extëmë Jesus ojts tnaskäjpxë mä tiempë jyëjpkëxanë, ¿tiko xyajnayjyäˈäwëm jotkujk?

⁴ Jesus ojts tnaskäjpxë ko mä tiempë jyëjpkëxanë jyaˈˈatäˈänyë “mëk päˈäm” “mäjatyë nax käjpn” (Luk. 21:11). Ko duˈun nnijäˈäwëm, jotkujk xyajnayjyäˈäwëm mët ko kyaj ajotkumonë xytyukjäjtpajtëm. Ets tyam duˈunën ja tyuny jyatyëty extëmë Jesus ojts tnaskäjpxë. Pääty nˈokpanëjkxëm ja käjpxwijën mëdiˈibë ojts xymyoˈoyëm: “[Këdii] mnayˈatsëˈëgëdë” (Mat. 24:6).

5. 1) Extëm jyënaˈanyë Filipʉs 4:8, 9, ¿ti mbäädë Jyobaa nˈamdoˈowëm ko jyaˈˈatëdë päˈäm mëdiˈibë ninäjxp? 2) ¿Wiˈix xypyudëjkëm ko nmëdoowˈijtëmë Biiblyë mëdiˈibë të yajgrabaraty?

⁵ Ko jyaˈˈatyë päˈäm mëdiˈibë ninäjxp, nmëmäˈäy nmëdäjëm ets ntsëˈkëm. Duˈun jyajty tuˈugë nmëguˈukˈäjtëm mëdiˈibë xyëwˈäjtypy Desi.b Ko ja jyamy o ja tsyëgum yaˈoˈkë COVID-19, ja pryimë ets ja dyoktoor mëdiˈibë nety yajtsoybyajtëdëp, ta Desi tsyëˈkë ko yˈokninäjxënët ja päˈäm ets ko ttukninaxët ja tyääk mëdiˈibë të myëjjäˈäyënë. Nanduˈun ojts tmëmay tmëdäjy ko tkaˈokpatnët ja tyuunk ets mä tpëkët ja meeny sentääbë mëdiˈibë tyukjuyëp ja kyaˈay yˈukënë ets ja tyëjkˈajuytyuk. Yëˈëyë myëmääy myëdäj ets kyaj ojts yˈokmää yˈokpoˈkxnë. Per pyat jatëgok ja agujkˈäjt jotkujkˈäjtën. ¿Ti pudëjkë? Ko tmënuˈkxtakyë Jyobaa parë pyudëkëdët ets kyaj nëgoo myay tyäjët (käjpxë Filipʉs 4:8, 9). Desi ojts nanduˈun tmëdoowˈity wiˈixë Jyobaa jyënaˈany ko tmëdoowˈijty mä Biiblyë të yajgrabaraty. Yëˈë jyënaˈany: “Ja ääw yoˈkn mëdiˈibë jap yajmëdoop jantsy oyëts xyajnayjyäˈäwë ets xytyukjamyajtsëts ko Jyobaa xymyëmääy xymyëdäjpëts” (Sal. 94:19).

6. ¿Wiˈix mbäät xypyudëjkëm ko nˈëxpëjkëm ets ko nëjkxëm reunyonk?

⁶ Ko jyaˈˈatyë päˈäm mëdiˈibë ninäjxp, kyaj mbäät nˈoktuˈunënë winë extëmë nety të nˈijxwëˈëmëm. Per kyaj net yëˈë xyajtuˈuˈadujkëm parë kyaj nˈokˈëxpëjkënë o kyaj nˈoknëjkxënë reunyonk. Mä ëxpëjkpajn ets mä bideo nbatëmë eksperiensyë wiˈixë nmëguˈukˈäjtëm të twinguwäˈägëdë duˈumbë jotmay ets kyaj të tmastuˈuttë Jyobaa (1 Peed. 5:9). Ko nëjkxëm reunyonk xypyudëjkëm parë nwinmäˈäyëm tijatyë Biiblyë myaytyakypy ets nnaymyëjääwmoˈoyëm nixim niyam (Rom. 1:11, 12). Ko nbawinmäˈäyëm wiˈixë Jyobaa të tpudëkë nmëguˈukˈäjtëm ko nety yuumëët päˈämmëët yajpäättë, ko naytyuˈuk nyayjyäˈäwëdë ets ko tsyëˈk jyäˈäwëdë, mbäät ja nmëbëjkënyëˈäjtëm dyajkëktëkë ets nˈijtëm seguurë ko nanduˈun xypyudëkëyäˈänëm.

7. ¿Wiˈix mbäät nbanëjkxëmë yˈijxpajtënë apostëlë Juan?

⁷ Oy ko nˈëxtäˈäyëmë winmäˈäny wiˈix mbäät mëdë nmëguˈukˈäjtëm ngäjpx nmaytyakëm. Per ko jyaˈˈatyë päˈäm mëdiˈibë ninäjxp, kyaj mbäät pën nˈokmëwingoˈonënë. Ets mbäät duˈun nnayjyäˈäwëm extëmë apostëlë Juan, mëdiˈibë nety jyaˈixaambyë Gayo wingëjxm jëjpkëjxm (3 Fwank 13, 14). Per tuk tiempë kyaj nety mbäät tˈixy, ta ttuknigejxy tuˈugë neky. Pën ëtsäjtëm kyaj mbäät nnaybyatëm mët ja nmëguˈukˈäjtëm wingëjxm jëjpkëjxm, oyxyëp ko nmëgäjpxëm mä telefënë, nduknigajxëmë mensaje o nduˈunëmë bideo yamaadë. Ko ngäjpx nmaytyakëm mëdë nmëguˈukˈäjtëm, ta kyaj naytyuˈuk nnayjyäˈäwëm ets jotkujk nˈijtëm. ¿Ti mbäät nduˈunëm pën jam nëgooyë tii nmëmoˈon nmëdujkënë? Oy ko ndukˈawäˈänëm ja mëjjäˈäytyëjk wiˈix nnayjyäˈäwëm ets ngupëjkëm wiˈix xyjyotkujkmoˈoyëm (Is. 32:1, 2).

NˈOKˈIJTËM AGUJK JOTKUJK OY TI YˈAYOˈONBËJKTÄˈÄGËT

8. ¿Wiˈix nnayjyäˈäwëm ko tijaty yˈayoˈonbëjktaˈaky?

⁸ Mbäät jeky xymyëmay xymyëdäjy pën mä mtsëënë të yˈayoˈonbëjktaˈaky extëmë nëë tuu, yuˈkxyë naxwinyëdë o ko winë tyooytyëgoy. Ets pën të yˈoogyë mjëëky mmëguˈuk o të xyajtëgoyë mjukyˈäjt madakën, mbäät jantsy axëëk mnayjyawëty, mon tuk o axtë mˈawäˈändaˈaky. Per kyaj yëˈë tˈandijy ko kyaj xymyëdatyë mëbëjkën o ko niˈigyë xytsyoky tijaty mmëdäjty mjaygyejpy. Pes mëj ayoˈon të xypyaaty ets yajjaygyukëyäämp tiko duˈun mnayjyawëty (Job 1:11). Per oy nuˈun nwinguwäˈkëmë ayoˈon jotmay mbäät nnayjyäˈäwëm jotkujk. Min nˈokˈijxëm wiˈix.

9. Extëmë Jesus jyënany, ¿wiˈix mbäät xypyudëjkëm parë nnayjyëjpˈijxëm ko tijaty yˈayoˈonbëjktäˈägët?

⁹ Näägë jäˈäy wyinmaytyë ko mä yˈit lyugäär kyaj tii yˈayoˈonbëjktäˈägäˈäny. Per oy ko njamyajtsëm extëmë Jesus jyënany ko niˈigyë tijaty yˈayoˈonbëjktäˈägäˈäny ets ko mbäät nanduˈun nguˈayoˈowëm. Jesus ojts tˈanëëmë ja yˈëxpëjkpëty ko mä nety ja tiempë jyëjpkëxanë, naxäämbë “mëk ujx” ets jyaˈˈatäˈänyë wiinkpë ayoˈon (Luk. 21:11). Ojts nanduˈun tnigajpxy ko niˈigyë myëjwindëkëyaˈany ja axëkˈäjtën. Yäˈädë axëkˈäjtën ta tyam nˈijxëm ko jäˈäy tyondë myaatstë, tsyiptun tsyipkäjpxtë ets ko nyayajäämˈook nyayajnääxˈoogëdë (Mat. 24:12). Perë Jesus kyaj jyënany ko yëˈëyë kyuˈayowëyandëp pënaty kyaj tmëdundë Jyobaa. Tyam nimayë Diosmëduumbëty tkuˈayowëdë ko tijaty yˈayoˈonbëjktaˈaky (Is. 57:1; 2 Kor. 11:25). Jyobaa kyaj xytyimyyaˈˈawäˈätspëtsëˈëmëm mëjˈäjtëngyëjxm, per xëmë xymyoˈoyëm tijaty nyajtëgoyˈäjtëm parë nyajpatëm agujk jotkujk ets kyaj ti nmëmäˈäy nmëdäjëm.

10. Ko nnayjyëjpˈijxëm kontiempë, ¿tiko njënäˈänëm ko ndukˈijxpajtëmë netyë Jyobaa? (Proverbios 22:3).

¹⁰ Ko ti yˈayoˈonbëjktäˈägët, mbäät kyaj nëgoo ntsëˈk njäˈäwëm pën të nnayjyëjpˈijxëm kontiempë. ¿Yëˈë nety yˈandijpy ko kyaj ndukˈijxpajtëmë Jyobaa? Kyaj. Pën nnayjyëjpˈijxëm yëˈë nety nmëbëjkëm ko Jyobaa xykyuentëˈatäˈänëm. ¿Tiko duˈun njënäˈänëm? Yëˈko Biiblyë xyˈanmäˈäyëm ko tsojkëp nnayjyëjpˈijxëm ko tii ayoˈon myinët (käjpxë Proverbios 22:3). Jyobaa nyax kyäjpn janääm jatsojk xytyukˈawäˈänëm wiˈix mbäät nnayjyëjpˈijxëm ko tii yˈayoˈonbëjktäˈägët, extëm ko yajkajpxyë kartë mä kongregasionk ets mä ëxpëjkpajn.c ¿Ti ndunäˈänëm pën ndukˈijxpajtëmë Jyobaa? Nbanëjkxäˈänëm extëm tyam xynyëˈëmoˈoy xytyuˈumoˈoyëm mä tii kyaˈˈayoˈonbëjktaˈakynyëm.

11. ¿Ti xytyukˈijxëmë yˈijxpajtënë Margaret?

¹¹ Nˈokwinmäˈäyëm wiˈix jyajty tuˈugë nmëguˈukˈäjtëm mëdiˈibë xyëwˈäjtypy Margaret. Të nety yˈanëˈëmxëdë ja kuduunktëjk ets pyëtsëmët mä tyëjk mët ko tamë nety ja toyë jëën jyëdity. Nimay ja jäˈäy pyëtsëëmdë, ta ja karreteerë yˈadujktääy mëdë maygyarrë ets kyaj mbäät nyekynyäjxtë. Kom nëgooyë jyojknë, ta Margaret ojts wyeˈemy kyarroty. Per të nety nyayjyëjpˈixyëty, pääty kyaj wiˈix jyajty kyëbejty. Mä ja kyarteerë tapë nety të tpëjktaˈaky tuˈugë mapë mëdiˈibë naytyuktuˈumooyë parë tmatsëdë wiink tuˈu. Ets të nety ojts tˈokniˈˈijxpë mätsoo mbäät pyëtsëmy ko ti ayoˈon tyun jyatëdët. Ko duˈun ttuuny, yëˈë pudëjkë parë kyaj wiˈix jyajty.

12. ¿Tiko yˈoyëty nmëmëdoˈowëm extëm nyajnëˈëmoˈoy nyajtuˈumoˈoyëm ko tii yˈayoˈonbëjktaˈaky?

¹² Mbäät näˈätyë kuduunktëjk xyˈanmäˈäyëm ets kyaj nbëtsëˈëmëm jënoty tëgoty o ko tsojkëp nbëtsëˈëmëm parë kyaj wiˈix njäjt ngëbajtëm. Taaˈäjtpë jäˈäy mëdiˈibë kyaj tmëmëdowäˈändë kuduunk justisëty mët ko kyaj tnikaˈagäˈändë ja jyëën tyëjk. ¿Per ti tyuundëbë Diosmëduumbëty? Biiblyë jyënaˈany: “Nintsënˈäjtëmgyëjxm mëmëdowdë pënëty yajkutujkp yä naxwiiny, dëˈën ja yajkutujkpëkopk, mët ko yëˈë waanë këjxm ja kyutujkën, es pënëty anaˈamdëp kyutujkën patkëˈëy, [ets] pënëty kyejxypy” (1 Peed. 2:13, 14). Diosë kyäjpn janääm jatsojk xyˈanmäˈäyëm wiˈix mbäät nnayjyëjpˈijxëm ets nanduˈun xytyukjamyajtsëm ko tsojkëp nmoˈoyëm ja mëjjäˈäytyëjk ja numero de telefënë. Duˈun mbäät pojˈam xypyatëm ko ti ayoˈon tyun jyatëdët. ¿Të nmoˈoyëm? Mbäädë Diosë kyäjpn xyˈanmäˈäyëm ets nbëtsëˈëmëm mä ndëjkˈäjtëm o nwëˈëmëm, o mä wyaˈkxy ja jeˈxy pëky. O xyˈanmäˈäyëm näˈä nbudëjkëm ja nmëguˈukˈäjtëm ets wiˈix mbäät nduˈunëm. Pën kyaj nmëdoˈowëm, mbäät nnaybyëjktakëm ayoˈon jëjpˈam ets nanduˈun ja mëjjäˈäytyëjk mët ko yëˈëjëty xyˈijxˈijt xykyuentëˈäjtëm (Eb. 13:17). Margaret jyënaˈany: “Kots nmëmëdooy wiˈixëtsë Diosë nyax kyäjpn ojts xynyëˈëmoˈoy xytyuˈumoˈoyëm ets ja mëjjäˈäytyëjk, yëˈëts xypyudëjkë parëts kyaj wiˈix njäjty ngëbejty”.

13. ¿Ti tyuundëbë nmëguˈukˈäjtëm mëdiˈibë të ttukpëtsëëmduˈuttë ja yˈit lyugäär parë duˈunyëm nyayjyawëdë agujk jotkujk?

¹³ Mayë nmëguˈukˈäjtëm të ttukpëtsëëmduˈuttë ja yˈit lyugäär mët ko jäˈäy tsyiptundë, nyaynyibëdëˈëgëdë o ko tii yˈayoˈonbëjktaˈaky. Per mä jyäˈttë, tyuundëbë mëjääw parë jatëgok tˈijxwëˈëmdë ja jukyˈäjtën ets kyaj tjäˈäytyëgoytyë ja Diosë tyuunk. Duˈunyëm “tkäjxwäˈxtë ja Diosë yˈayuk” extëm ttuundë ja Diosmëduumbëty mä primer siiglë ko jäˈäy nyibëdëˈkëdë ets ojts yˈayeˈeywyäˈkxtäˈäytyë (Apos. 8:4). Ko nyëjkxtë ëwäˈkx käjpxwäˈkxtë, ta tjäˈäytyëgoytyë ja yˈayoˈon jyotmay ets nyayjyawëdë agujk jotkujk.

JOTKUJK NNAYJYÄˈÄWËM OY NYAJNIBËDËˈKËM

14. ¿Tiko mbäät xypyëjkxëmë jotkujkˈäjtën ko nyajnibëdëˈkëm?

¹⁴ Ko nyajnibëdëˈkëm, mbäät kyaj jotkujk nekynyayjyäˈäwëm mët ko kyaj nˈoknëjkxënë ëwäˈkx käjpxwäˈkxpë ets reunyonk extëm xëmë nduˈunëm, ets mbäät nanduˈun kyaj jotkujk nˈoktuˈun nˈokˈayoˈowënë mët ko yëˈëyë ntsëˈkënë ko ja kuduunk justisë xytsyuˈum xymyäjtsëm. Ko duˈumbë jotmay jyaˈˈaty, mbäädë net nmëmäˈäy nmëdäjëm wiˈix njatäˈän ngëbatäˈänëm. Ets kyaj wiˈixëty ko duˈun nnayjyäˈäwëm. Per oy ko nnaygyuentëˈäjtëm parë kyaj xyaamët ja mëbëjkën extëmë Jesus tˈanmääy ja yˈëxpëjkpëty (Fwank 16:1, 2). Pääty, ¿ti mbäät nduˈunëm parë duˈunyëm nyajpatëm jotkujk ko nyajnibëdëˈkëm?

15. ¿Tiko kyaj mbäät ntsëˈkëm ko nyajnibëdëˈkëm? (Fwank 15:20; 16:33).

¹⁵ Biiblyë jyënaˈany: “Nidëgekyë diˈibaty jikyˈatandëp wäˈäts mä Jesukristë, yajpajëditandëp” (2 Tim. 3:12). Tuˈugë nmëguˈukˈäjtëm mëdiˈibë xyëwˈäjtypy Andréi, kyaj tjamëbëkany ko ja Diosë tyuunk kyubojky mä tsyëënë. Yëˈë ta wyinmääy: “Yä ta nimayë Testiigë, tsipë jäˈäy xytsyuˈumdäˈäyëm”. Oy duˈun jyawinmääy, ojts tmëmay tmëdäjy. Perë wiinkpë nmëguˈukˈäjtëm yëˈë Jyobaa tyukkëdëjkëdë ets kyaj wyinmääytyë ko ninäˈä kyayajtsumäˈän kyayajmatsäˈändë. Nyijäˈäwëdëbë nety ko mbäät yajtsum yajmatstë, per kyaj yëˈëyë ojts tmëmay tmëdäjtë extëmë Andréi. ¿Ti net tyuunë Andréi? Ta nanduˈun ttukëdëjkë Jyobaa ja yˈamay jyotmay extëm ja myëguˈuktëjk. Ko duˈun ttuny, ta nyayjyäˈäwë agujk jotkujk, ets duˈunyëm tyambäät nyayjyawëty oy tpäätyë amay jotmay. Ëtsäjtëm mbäät nanduˈun nyajpatëm agujk jotkujk. Jesus ojts jyënany ko jäˈäy xypyajëditäˈänëm, per ojts nanduˈun jyënaˈany ko mbäät mëk ndënäˈäyëm ets kyaj nmastutëmë Dios (käjpxë Fwank 15:20; 16:33).

16. ¿Ti tsojkëp nduˈunëm ko nyajnibëdëˈkëm?

¹⁶ Ko kyubokëdë Diosë tyuunk mä ntsënäˈäyëm, xynyëˈëmoˈoyäˈän xytyuˈumoˈoyäˈänëm ja nmëguˈukˈäjtëm mëdiˈibë tuundëp Betel ets ja mëjjäˈäytyëjk, yëˈë xyˈanëëmëyäˈänëm wiˈix mbäät duˈunyëm nˈëwäˈkx ngäjpxwäˈkxëm ets nreunyonkˈäjtëm. Pën nbatëmë duˈumbë jotmay, oy ko nmëdoˈowëm oyë nety ngajaygyujkëm tiko duˈun nyajnëˈëmoˈoy nyajtuˈumoˈoyëm (Sant. 3:17). Ets ninäˈä mbäät nganimaytyakëmë nmëguˈukˈäjtëm ets tijaty yajtuump mä kongregasionk pënaty kyaj pyäädëdë tnijawëdët (Ecl. 3:7).

17. ¿Ti ëtsäjtëm nanduˈun ndunäˈänëm extëm ja apostëlëty?

¹⁷ Tuk pëky tiko Satanás tnibëdëˈëgyë Diosë kyäjpn, yëˈko “të nyajtuknipëjkëm ets nigäjpx nimaytyakëmë Jesus” (Apoc. 12:17, TNM). Kyaj nasˈijxëm etsë Satanás mëdë jyaˈay xyˈatsëˈkëm, pes agujk jotkujk nnayjyäˈäwëm ko duˈunyëm ngäjpxwäˈkxëm ets ndukniˈˈijxëmë jäˈäy ja tëyˈäjtën oy nyaˈˈaxëkˈijxëm. Extëm ko ja yajkutujkpë tˈanmääytyë ja apostëlëty ets kyaj yˈokkäjpxwäˈkxnëdët, yëˈë myëmëdoowdë Dios, duˈunyëm ojts yˈëwäˈkx kyäjpxwäˈkxtë ets agujk jotkujk nyayjyäˈäwëdë (Apos. 5:27-29, 41, 42). Ko kyubokëdë Diosë tyuunk duˈun mbäät ngäjpxwäˈkxëm extëm kyaj jäˈäy tpëktëdë kuentë (Mat. 10:16). Pën nduˈunëm duˈun, ta nnayjyawëyäˈänëm agujk jotkujk duˈun ëtsäjtëm, Jyobaa ets pënaty ndukninëjkxëm ja oybyë ayuk.

“DIOS DIˈIBË XYMYOˈOYËM JA AGUJKˈÄJT JOTKUJKˈÄJTËN, ITËP MËT MIITSËTY”

18. ¿Mä tsyoony ja agujkˈäjt jotkujkˈäjtën mëdiˈibë nyajtëgoyˈäjtëm?

¹⁸ Nˈokˈijtëm seguurë ko oy nuˈun nbatëmë ayoˈon jotmay, mbäät nnayjyäˈäwëm jotkujk. Per tsojkëp njamyajtsëm ko yëˈë nyajtëgoyˈäjtëm ja Diosë yˈagujkˈäjt jyotkujkˈäjtën, mëdiˈibë yëˈëyë Jyobaa mbäät xymyoˈoyëm. Nˈoktukjotkujkˈäjtëmë Jyobaa ko jyaˈˈatëdë päˈäm mëdiˈibë ninäjxp, ko ajotkumonë ayoˈon tyun jyaˈˈatëdë o ko nyajnibëdëˈkëm. Nˈokwinmäˈäyëm tijatyë Dios xytyukwandakëm ets tijaty nˈëwxijt njëjpˈijxëm ets kyaj nmastutëm ja nyax kyäjpn. Ko duˈun nduˈunëm, ta ja “Dios diˈibë xymyoˈoyëm ja agujkˈäjt jotkujkˈäjtën” yajpäädët mët ëtsäjtëm (Filip. 4:9). Mä ja tuˈukpë artikulo nˈixäˈänëm ti mbäät nduˈunëm parë nbudëjkëmë nmëguˈukˈäjtëm ets nyayjyawëdët agujk jotkujk ko tpäättëdë ayoˈon jotmay.