Nˈokpudëjkëm pënaty wyinguwäˈkëdëbë ayoˈon jotmay

1. ¿Wiˈixë Jyobaa tˈatsoowëmbijty ko yˈuˈunk jyaˈa myënuˈkxtaˈagyëty?

¿MNIJÄˈÄWËP mijts ko mbäädë Jyobaa myajtunyëty parë tˈatsoowëmbitët ti amdoow pëjktsoowëp tuˈugë yˈuˈunk jyaˈa? Jyobaa mbäät dyajtuny pënaty tuundëp mëjjäˈäy, ministerial, prekursoor, publikadoor oy yetyëjkëty, tyoxytyëjkëty o myëjjäˈäy myutskjäˈäyëty. Ko tuˈugë Dios mëduumbë tˈamdoy tpëjktsoyë Jyobaa naybyudëkë, yëˈë xëmë dyajtunyë mëjjäˈäytyëjk ets nanduˈunë wiinkpë Dios mëduumbëty parë “yajjotkujkmoˈoytyë” (Kol. 4:11). Jantsy jotkujk nnayjyäˈäwëm ko mbäät duˈunë Jyobaa nmëduˈunëm ko ja nmëguˈukˈäjtëm nbudëjkëm. Mbäät duˈun nyäjkëmë naybyudëkë ko myinëdë päˈäm mëdiˈibë ninäjxp, ko tii yˈayoˈonbëjktäˈägët o ko nyajnibëdëˈkëm.

KO MINYË PÄˈÄM MËDIˈIBË NINÄJXP

2. ¿Tiko tsyiptaˈaky nbudëjkëmë nmëguˈukˈäjtëm ko myinyë päˈäm mëdiˈibë ninäjxp?

² Ko myinyë päˈäm mëdiˈibë ninäjxp mbäät tsyiptaˈaky nnaybyudëjkëm nixim niyam. Extëm nˈokpëjktakëm, waˈan njaninëjkxäˈänëm tuˈugë nmëguˈukˈäjtëm mä tyëjk, per kyaj mbäät ninëjkxëm mët ko xynyinäjxëm ja päˈäm. O waˈan njawowäˈänëm mä jëën tëjk parë mëët ngäˈäy nˈukëm pënaty yaˈˈamääytyaktëbë meeny sentääbë, per kyaj nanduˈun mbäät nwoˈowëm. Waˈan njantsy japudëkëyäˈänëm ja nmëguˈukˈäjtëm, jeˈeyë ko ja nfamilyëˈäjtëm yajtëgoyˈajtypy nanduˈunë naybyudëkë. Per ko nbudëjkëm nuˈun nmadakëm, agujk jotkujkë Jyobaa yajnayjyawëty (Prov. 3:27; 19:17). Pääty, ¿ti net mbäät nduˈunëm?

3. ¿Ti xytyukniˈˈijxëm ja yˈixpajtënë mëjjäˈäytyëjk mëdiˈibë nety yajpattëp mä Desi gryupë? (Jeremías 23:4).

³ Ti mbäät ttundë mëjjäˈäytyëjk. Pën mijts mëjjäˈäy mduny, ixyˈat yajxon ja mborreeguˈunk (käjpxë Jeremías 23:4). Desi mëdiˈibë të yˈokˈyajmaytyakpë mä ja tuˈukpë artikulo, duˈun jyënaˈany: “Yëˈë mëjjäˈäytyëjk mëdiˈibë mätsë ngrupë xëmëtsë nety xymyëtpëtsëmdë ëwäˈkx käjpxwäˈkxpë, ets ttundë mët ëëtsëty tiigatiity”.b Ko duˈun ja mëjjäˈäytyëjk ttuundë, ta kyaj ojts tsyiptakxëdë tpudëkëdët ja Desi ko jyajtyë COVID-19 ets yˈoˈky tyëgooyë jyëëky myëguˈuk.

4. ¿Tiko ja mëjjäˈäytyëjk kyaj ojts tsyiptakxëdë tpudëkëdët ja Desi, ets ti xytyukniˈˈijxëm?

⁴ Desi jyënaˈany: “Naymyaayëbëtsë nety mët ja mëjjäˈäytyëjk, pääty kyajts ojts xytsyiptakxë ndukmëtmaytyäˈägët wiˈixëts nyayjyawëty ets tijatyëts nmëmääy nmëdajpy”. ¿Ti yäˈädë tukniˈˈijxëbë mëjjäˈäytyëjk? Ko tsojkëp yajxon tˈijxˈit tkuentëˈatët ja byorreegë ets mëët nyaymyaaybyëkëdet mä kyajnëm ti ayoˈon tpäättë. Ets pën miimp tuˈugë päˈäm ets kyaj mbäät xynyinëjkxtë mä jyëën tyëjk, ëxtäˈäytyë winmäˈäny parë xynyijawëdet wiˈix yaˈix yajpäättë. Desi duˈun tjamyetsy: “Näˈäty, mä tuˈukpë xëëw, xymyëgäjpxtëts ja mëjjäˈäytyëjk ets xytyuknigajxtëtsë mensaje. Ja tekstë mëdiˈibëts xytyuknigajxtë xyˈajäjt xyjyotjäjtëts oyëtsë nety njanijawë wiˈix jyënaˈany”.

5. ¿Wiˈix mbäädë mëjjäˈäytyëjk tnijawëdë tijaty yajtëgoyˈäjttëbë nmëguˈukˈäjtëm, ets wiˈix mbäät tpudëkëdë?

⁵ Tuk pëky wiˈix mbäädë mëjjäˈäytyëjk tnijawëdë tijaty yajtëgoyˈäjttëbë nmëguˈukˈäjtëm, yëˈë ko jawyiin tniwinmayëdët tijaty mbäät dyajtëwdë (Prov. 20:5). ¿Jam tmëdattë kyaˈay yˈukënë o ja ääy tsooy mëdiˈibë yajtëgoyˈäjttëp? ¿Waˈanë tyuunk kyaj tnekypyaaty? ¿Mbäät nnayˈawäˈänëm parë nˈëxtäˈäyëmë naybyudëkë mëdiˈibë gobiernë yajkypy? Desi ojtsë nmëguˈukˈäjtëm myoˈoyëdë tijatyë nety yajtëgoyˈajtypy. Per mëdiˈibë niˈigyë pudëjkë, yëˈë ko ja mëjjäˈäytyëjk myëjääwmooyëdë mëdë Diosë yˈAyuk ets dyajnigëxëˈktë ja tsojkën. Desi jyënaˈany: “Nuˈkxtaktë ja mëjjäˈäytyëjk. Kyajts nekyjyamyetsy wiˈixë Jyobaa tˈanmääytyë, mëdiˈibëts njamyejtsypy, yëˈë ko oyëts xyajnayjyäˈäwëdë. Duˈunëts njäˈäwë extëmxyëp Jyobaa xyˈanëëmë: ‘Kyaj naytyuˈuk myajpääty’” (Is. 41:10, 13).

6. ¿Wiˈix mbäät niˈamukë nnaybyudëjkëm? (Ixë dibujë).

⁶ Ti mbäät nduˈunëm niˈamukë. Nnijäˈäwëm ko pënaty tuundëp mëjjäˈäy, yëˈë jawyiinˈäjtp mbäät tpudëkëdë nmëguˈukˈäjtëm. Perë Jyobaa tsyojkypy ets niˈamukë nnaybyudëjkëm ets nnaymyëjääwmoˈoyëm (Gal. 6:10). Kyaj ti mëjwiin kajaa tsyokyëty parë nmëjääwmoˈoyëm ja nmëguˈukˈäjtëm. Extëmë ënäˈkuˈunk, mbäät dyaˈoyëdë tuˈugë dibujë o tjäˈäytyë neky parë tmëjääwmoˈoyët tuˈugë nmëguˈukˈäjtëm. Ënäˈktëjk, mbäät nëjkx tjuuy tkëbajtëdë tijaty ja nmëguˈukˈäjtëm o jam ti ttukpudëkëdët. Etsë wiinkpë, mbäät dyaˈoyëdë kaaky tojkx parë nëjkx tmoˈoytyë ja nmëguˈukˈäjtëm mëdiˈibë pëjkëp. Ko myëjwindëkë tuˈugë päˈäm mëdiˈibë ninäjxp, niˈamukë nyajtëgoyˈäjtëm ets pën xymyëjääwmoˈoyëm. Pääty ko kyëxëdë reunyonk oy ko waanë nwëˈëmëm parë ngäjpx nmaytyakëm mëdë nmëguˈukˈäjtëm, duˈun mä salonk o mä të naygyonektaräjtëm. Pënaty tuundëp mëjjäˈäy yajtëgoyˈäjttëp nanduˈun ets nmëjääwmoˈoyëm. Näägë nmëguˈukˈäjtëm jyaaytyëp tuˈugë nekyuˈunk mä tmooytyë dyoskujuyëm ja mëjjäˈäytyëjk, pes ko jyaˈˈatyë yuu päˈäm mëdiˈibë ninäjxp mas mëk tyundë. Pääty, oy ko niˈamukë nbaduˈunëmë yäˈädë käjpxwijënë: “Naybyudëkëdë nixim niyam ets yajmëjwiin yajkajaajëdë ja mëbëjkënëty” (1 Tes. 5:11).

KO AJOTKUMONË TII YˈAYOˈONBËJKTAˈAKY

7. ¿Wiˈix nguˈayoˈowëm ko tii yˈayoˈonbëjktaˈaky?

⁷ Ko tii ajotkumonë yˈayoˈonbëjktaˈaky, mbäät jantsy pojënë dyajtëgatsyë jukyˈäjtën. Mbäät tuˈugë jäˈäy dyajtëgoy tijaty myëdäjty jyaygyejpy, ja jyëën tyëjk o axtë yˈooky ja jyëëky myëguˈuk. Etsë nmëguˈukˈäjtëm pyattëp nanduˈunë duˈumbë ayoˈon. ¿Wiˈix mbäät nbudëjkëm?

8. ¿Ti mbäät ttundë ja mëjjäˈäytyëjk etsë tääk teety mä kyajnëm jyaˈty tuˈugë ayoˈon?

⁸ Ti mbäät ttundë ja mëjjäˈäytyëjk. Miitsëty pënaty tuundëp mëjjäˈäy, oy ko xypyudëkëdët ja nmëguˈukˈäjtëm ets nyayjyëjpˈixëdët mä kyajäˈtynyëm tuˈugë ayoˈon. Ixtë pën të niˈamukë nmëguˈukˈäjtëm tjaygyukëdë ti mbäät ttundë ko myinët tuˈugë ayoˈon ets mdukˈawanëdët wiˈix yaˈijx yajpäättë. Margaret, mëdiˈibë të yˈokˈyajmaytyakpë mä ja tuˈukpë artikulo, duˈun jyënaˈany: “Mä reunyonk yajnäjxtë mëjjäˈäytyëjk tuˈugë diskursë mä tnimaytyaktë ko duˈunyëmë nety ja toyë kyeˈeky, ets ko netyë yajtukpëtsëëmduˈudët ja jëën tëjk pënë ja kuduunktëjk duˈun dyajnigutukëdë o pën yaˈijxp ko niˈigyë ja toyë myëjwindaˈaky”. Ko duˈun dyajnäjxtë diskursë kajaats xypyudëjkëdë, pes kyum mëgoxk sëmään mëjwiin kajaa kyeky ja toyë. Tääk teety, nimaytyaktë mä mDiosˈawdattë tuk familyë ti mbäät xytyundë niduˈuk niduˈuk ko ajotkumonë myinët tuˈugë ayoˈon. Pën miitsëty mët ja mˈuˈunk mˈënäˈk të kontiempë mnayjyëjpˈixëdë, ta kyaj nëgoo nëjkx mtsëˈk mjawëdë.   

9. ¿Ti mbäät ttundë mëjjäˈäytyëjk mä kyaminynyëm tuˈugë ayoˈon ets ko nety të nyaxy?

⁹ Pën mijts mnikëjxmˈäjtypy tuˈugë grupë, amdow kontiempë niˈamukë nmëguˈukˈäjtëm ja nyumero de telefënë ets kyaj jyaanëmëty ko nety myiny tuˈugë ayoˈon. Kujäˈäyëtyaˈay, ets pën jam pën dyajtëgatsyë nyumero, ta xyaˈˈajamët. Duˈuntsoo ko myinët tuˈugë ayoˈon nëjkxëp xymyëgajpxy niduˈuk niduˈuk ja nmëguˈukˈäjtëm ets xynyijawët wiˈix yaˈix yajpäättë. Ta net xytyukˈawanët ja mëjjäˈäy mëdiˈibë tyukniwijtsëp tijaty, ets yëˈë, ta ttukˈawanët ja sirkuitë. Ko duˈun ttundët, ta niˈamukë ndukˈoyˈatäˈänëm. Ko ja toyë yˈayoˈonbëjktaky, ja syirkuitë Margaret kyaj myaay 36 oorë mët ko tpudëjkë ja mëjjäˈäytyëjk parë ttukniwijtsëdë wiˈix yˈittët ja nmëguˈukˈäjtëm mëdiˈibë nety të ttukpëtsëëmduˈuttë ja jyëën tyëjk naa 450 (2 Kor. 11:27). Ko duˈun tyuundë, ta niˈamukë ja nmëguˈukˈäjtëm tpattë ja jyäjtakn.

10. ¿Tiko jyëjpˈamëty ets ja mëjjäˈäytyëjk tˈijxˈit tkuentëˈatët ja myëguˈuktëjk? (Fwank 21:15).

¹⁰ Pënaty tuundëp mëjjäˈäy yëˈë nyikëjxmˈäjttëp ets tpudëkëdët ja myëguˈuktëjk mëdë Diosë yˈAyuk ets tjotkujkmoˈoytyët (1 Peed. 5:2). Ko nyaxy tuˈugë ayoˈon, tsojkëp dyajtëwdët pën kyaj wiˈix të jyat të kyëbattë, pën jamë kyaˈay yˈukënë, wyit xyox ets pën kyaj të wyindëgoy ja jyëën tyëjk. Per oyë nety të jyanäjxnë kanäk poˈo, mbäät duˈunyëm ja nmëguˈukˈäjtëm yajjotkujkmoˈoyäˈändë ets yajpudëkëyäˈändët (käjpxë Fwank 21:15). Harold, mëdiˈibë tuump Komitee mä tuˈugë Betel të tpudëkë ets të tjotkujkmoˈoy nimayë nmëguˈukˈäjtëm mëdiˈibë të yˈayoˈonbäättë, yëˈë jyënaˈany: “Tsojkëp nyaxëdë tiempë. Pes mbäät ja nmëguˈukˈäjtëm oy yˈoknayjyawëdë, per ko tjamyatstë wiˈix të jyat të kyëbattë, wiˈix yˈoˈky tyëgooy ja jyëëky myëguˈuk, o ko dyajtëgooytyë mëdiˈibë nety mëjwiin kajaa yajtsobattëp, mbäät jatëgok tyuktëkëdë moˈon tujkën. Ko duˈun jyattë, kyaj yëˈë tˈandijäˈäny ko kyaj tmëdattë mëbëjkën; pes mbäät oypyënëty duˈun nyayjyawëty”.

11. ¿Wiˈix mbäät ja mëjjäˈäytyëjk tˈakpudëkëdë ja familyë mëdiˈibë të yˈayoˈonbäättë?

¹¹ Jëjpˈam ets ja mëjjäˈäytyëjk ttundët extëm jyënaˈanyë Romanʉs 12:15: “Pujëy puyääxë diˈibë jëëy yaxtëp”. Pënaty të tsyokwëˈëmdë ko tii yˈayoˈonbëjktaˈaky, tsojkëp yajtukjamyatstët ko duˈunyëmë Jyobaa tsyokëdë ets nanduˈun ja nmëguˈukˈäjtëm. Ja mëjjäˈäytyëjk mbäät tpudëkëdë ja familyë parë duˈunyëmë Dios tmëdundët, nyuˈkxtäˈäktët, yˈëxpëktët, nyëjkxtët reunyonk ets yˈëwäˈkx kyäjpxwäˈkxtët. Oy ko nanduˈun tpudëkëdët ja tääk teety parë ttukjaygyukëdët ja yˈuˈunk yˈënäˈk ko oyxyëp tijaty ttimyyajtëgooytyaabyëdë, ta mëdiˈibë kyaj mbäät dyajtëgoytyë: ko nyaymyayëdët mëdë Jyobaa. Tääk teety, tukjamyatstë mˈuˈunk mˈënäˈk ko Jyobaa xëmë myëtnaymyaayëbëˈatäˈänëdë ets ko ninäˈä kyamastuˈudäˈänëdë. Tukmëtmaytyäˈäktë ko nmëdäjtëm tuˈugë familyë abëtsëmy nyaxwinyëdë mëdiˈibë xëmë xypyudëkëyäˈänëm (1 Peed. 2:17).

12. ¿Ti mbäät nduˈunëm niˈamukë parë nyäjkëmë naybyudëkë ko tii yˈayoˈonbëjktäˈäget? (Ixë dibujë).

¹² Ti mbäät nduˈunëm niˈamukë. Pën të tii yˈayoˈonbëjktaˈaky naa jamyë mä mtsëënë, yajtëwë mëjjäˈäytyëjk wiˈix mbäät xyakyë naybyudëkë. Mbäät xyajjäjtaˈagyë nmëguˈukˈäjtëm mëdiˈibë yäjktëbë naybyudëkë ko tii yˈayoˈonbëjktaˈaky o ja mëdiˈibë të wyindëgoytyë ja jyëën tyëjk. Mbäät nanduˈun xyakyë naybyudëkë parë xyajwäˈkxëdë jëˈxy pëky o tijaty ja nmëguˈukˈäjtëm yajtëgoyˈäjttëp. Ets pën jagam ja ayoˈon të tyuny të jyatyëty, mbäät nanduˈun xyakyë naybyudëkë. ¿Wiˈix? Ko xynyinuˈkxtäägët pënaty të yˈayoˈonbäättë ets xyakët ja mˈayäjk mˈagoˈonën parë yajpudëkëdët ja nmëguˈukˈäjtëm (2 Kor. 1:8-11; 8:2-5). Ets pën mbäät mnëjkxy mä ja lugäär, yajtëw ja mëjjäˈäytyëjk wiˈix mbäät jam xyaky ja naybyudëkë. Pën myajwoop, seguurë ko myajtukniˈˈixëyäämp ti mdunëp parë mbäät myajpëjktaˈaky mä tsyokyëty ja naybyudëkë.

KO NYAJNIBËDËˈKËM

13. ¿Ti jotmay pyattëbë nmëguˈukˈäjtëm mä kyuboky Diosë tyuunk?

¹³ Yëˈë nmëguˈukˈäjtëm mëdiˈibë tsënääytyëp mä Diosë tyuunk të kyuboky, mas mëkë jyukyˈäjtënë dyajnaxtë mët ko pyattëbë wiinkpë jotmay extëm ko yubat pyäˈämbattë, dyaˈˈamääytyäˈäktë meeny sentääbë o yˈook tyëgoytyë jyëëky myëguˈuk. Ets näˈäty ja mëjjäˈäytyëjk kyaj mbäät tninëjkxtë ja myëguˈuktëjk parë tmëjääwmoˈoytyët o tmëgäjpxtët. Duˈun jyajtyë Andréi, mëdiˈibë të yˈokˈyajmaytyakpë mä ja tuˈukpë artikulo. Tuˈugë nmëguˈukˈäjtëm mëdiˈibë nety yajpatp mä gryupë, yaˈˈamääytyakypyë netyë meeny sentääbë, ets ok, ta karrë yaˈˈayoˈonbatë. Yajtsujk kanäkˈok ets kyaj mbäät nyekytyuuny. Per yajpudëjkë oyë netyë gobiernë të nyibëdëˈëgëdë ets oy jyaˈˈatyë pandemia. Etsë Jyobaa kyaj nanduˈun ojts nyaˈixyëty.

14. ¿Wiˈixë mëjjäˈäytyëjk dyaˈixëdë ko tyukˈijxpajttëbë Jyobaa?

¹⁴ Ti mbäät ttundë ja mëjjäˈäytyëjk. Andréi, ta tmënuˈkxtakyë Jyobaa ets yäjk ja naybyudëkë nuˈun myadaky. ¿Wiˈixë Jyobaa pyudëjkë? Yëˈë yajtuunë nmëguˈukˈäjtëm mëdiˈibë nety awäˈätstum yajpajttëp parë tpudëjkëdë ja myëguˈuk nuˈun myadaktë. Tam mëdiˈibë myënëjkxtë mä ja doktoor ets tam mëdiˈibë myooytyë ja meeny sentääbë. Ko duˈun dyaˈijxëdë ja jotmëkˈäjtën ets nyaybyudëjkëdë nixim niyam ojtsë Jyobaa kyunuˈkxëdë (Eb. 13:16). Mëjjäˈäytyëjk, ko kyubokëdë Diosë tyuunk amdowdë wiinkpë nmëguˈukˈäjtëm ja naybyudëkë (Jer. 36:5, 6). Jëjpˈam nanduˈun xytyukˈijxpattëdë Jyobaa, ets yëˈë mbudëkëyanëdëp parë xyˈijxˈit xykyuentëˈatët ja nmëguˈukˈäjtëm.

15. ¿Ti mbäät nduˈunëm parë tuˈugyë nnayaˈijtëm ko nyajnibëdëˈkëm?

¹⁵ Ti mbäät nduˈunëm niˈamukë. Ko nyajnibëdëˈkëm kyaj mbäät nekytyuˈukmujkëm nimay. Pääty tsyokyëty tuˈugyë nnayaˈijtëm. Nˈokjamyajtsëm ko yëˈë Satanás nmëtsipˈäjtëm kyaj yëˈëjëty ja nmëguˈukˈäjtëm. Pën jam ti jotmay nmëdäjtëm mëdë nmëguˈukˈäjtëm, nˈoknayaˈoˈoyëm netyë ets nˈoknaybyokymyaˈkxëm (Prov. 19:11; Éfes. 4:26). Nˈoknaybyudëjkëm nixim niyam (Titʉ 3:14). Ko Andréi mët ja gryupë tpudëjkëdë ja nmëguˈukˈäjtëm, tyukˈoyˈäjttë niˈamukë. Mas niˈigyë ojts nyayajtuˈugyëdë ets duˈun nyayjyäˈäwëdë tukjëëky tukmëguˈukpën (Sal. 133:1).

16. Extëm jyënaˈanyë Kolosʉ 4:3, 18, ¿wiˈix mbäät nbudëjkëmë nmëguˈukˈäjtëm mëdiˈibë yajtukmëtsipˈäjttëp ko Dios mëdundë?

¹⁶ Oyë gobiernë dyajkubokyë Diosë tyuunk, milˈamë nmëguˈukˈäjtëm duˈunyëm tmëdundë Jyobaa. Nääk tsumy matsy ittë mët ko tmëdundë Dios. Nˈokninuˈkxtakëmë yäˈädë nmëguˈukˈäjtëm, ja fyamilyë ets pënaty jotmëktaktëp parë nëjkx tniˈëëwduˈut tnikäjpxtuˈuttë, tjotmëkwingäjpxëdë mëdë Diosë yˈAyuk ets tmoˈoytyë tijaty yajtëgoyˈäjttëp (käjpxë Kolosʉ 4:3, 18).c Nˈokjamyajtsëm ko mëjwiin kajaa pyudëkëyäˈänëdë ko ninuˈkxtakëm (2 Tes. 3:1, 2; 1 Tim. 2:1, 2).

17. ¿Wiˈix mbäät nnayjyëjpˈijxëm ko nyajnibëdëˈkëm?

¹⁷ Mbäät desde tyam xyˈixtë ti mdunandëp mëdë mfamilyë ko nety myajnibëdëˈëktë (Apos. 14:22). Këdii yëˈëyë xymyëmay xymyëdäjtë wiˈix mbäät mjat mgëbattë. Yajkëktëkëdë niˈigyë mëbëjkën ets pudëkëdë ja mˈuˈunk mˈënäˈk parë nanduˈun ttundët. Pën jaa näˈä anaxy xytyimymyëmay xytyimymyëdäjtë, tukmëtmaytyäˈäktë Jyobaa (Sal. 62:7,8). Nimaytyäˈäktë tuk familyë ko taaˈäjtp kanäk pëky tiko mbäät ndukjotkujkˈäjtëmë Jyobaa.d Duˈun extëm jyëjpˈamëty ndukniˈˈijxëmë uˈunk ënäˈk ti tyundëp ko ti ajotkumonë yˈayoˈonbëjktäˈägët, nanduˈun mbäät ndukniˈˈijxëm ti tyundëp ko nyajnibëdëˈkëm ets ttukˈijxpattëdë Jyobaa. Duˈun nëjkx yˈittë jotmëk ets kyaj tsyëˈëk jyawëdët.

18. ¿Ti nˈëwxijt njëjpˈijxëm mä tiempë myiny kyëdaˈaky?

¹⁸ Ja jotkujkˈäjtënë mëdiˈibë Dios xymyoˈoyëm seguurë xyajnayjyäˈäwëm (Filip. 4:6, 7). Yëˈë nanduˈun yajkujkëbë ääw jot ko myinyë päˈäm mëdiˈibë ninäjxp, ko tii yˈayoˈonbëjktaˈaky ets ko nyajnibëdëˈkëm. Jyobaa yajtuumpy nanduˈun ja mëjjäˈäytyëjk parë xyˈijxˈijt xykyuentëˈäjtëm ets xyajtuˈunëm niˈamukë parë nnaybyudëjkëm nixim niyam. Yäˈädë jotkujkˈäjtënë mëdiˈibë Dios yajkypy, xypyudëjkëm parë nnayjyëjpˈijxëm ko xytyukjäjtëmë jotmayë mëjwiin kajaabë, extëm ja “mëj ayoˈon” mëdiˈibë wingoomp (Mat. 24:21). Ko jyäˈtëdë yäˈädë ayoˈon, jëjpˈam ets kyaj nëgoo ndimytsyëˈk ndimyjyäˈäwëm ets nbudëjkëm ja nmëguˈukˈäjtëm parë nanduˈun kyaj tsyëˈëk jyawëdët. Per ko nyaxëdë yäˈädë ayoˈon, nitii nëjkx xykyanekyˈamaymyoˈoyäˈän xykyanekyjyotmaymyoˈoyäˈänëm. Taanëm njukyˈatäˈänëm agujk jotkujk ets winë xëëw winë tiempë duˈun extëmë netyë Jyobaa ttsoky (Is. 26:3, 4).