Mëjjäˈäytyëjkëty, panëjkxˈadëˈëtstë ja yˈijxpajtënë apostëlë Pablo

1, 2. ¿Tiko mbäät pyudëkëdë yˈijxpajtënë apostëlë Pablo pënaty tuundëp mëjjäˈäy?

APOSTËLË Pablo mëk jyantsy tyuuny mët ko tsyojkypyë nety ja myëguˈuktëjk (Apos. 20:31). Pääty ja myëguˈuktëjk mëk tsyojkëdë. Extëm nˈokpëjktakëm, ko tëgok ja mëjjäˈäytyëjkëty mëdiˈibë Éfeso tnijäˈäwëdë ko kyaj mëdë Pablo yˈoknaybyäädanëndë, ta niˈamukë tyëjkëdë jëëy yaxpë (Apos. 20:37). Nanduˈun tyam, pënaty tuundëp mëjjäˈäy tsyojktëp ja myëguˈuktëjk, yajtuundëp ja xyëëw tiempë etsë jyot myëjääw parë tpudëkëdë (Filip. 2:16, 17). Per näˈäty, wyinguwäˈkëdëbë amay jotmay. ¿Ti mbäät pyudëkëdë?

² Pënaty tuundëp mëjjäˈäy mëk tyundë, pääty oy ko tpanëjkxtëdë yˈijxpajtënë Pablo (1 Kor. 11:1). Yëˈë pokyjyaˈayë nety nanduˈun yajpääty, pääty ojts tsyiptakxëty ttunët mëdiˈibë oy, mët ko kyaj nety dyuˈunëty extëmë anklëstëjk (Rom. 7:18-20). Oy nuˈun tpatyë amay jotmay, duˈunyëm agujk jotkujk nyayjyäˈäwë. Pën ja mëjjäˈäytyëjkëty pyanëjkxtëbë yˈijxpajtënë Pablo, mbäät duˈunyëm agujk jotkujk tmëduunˈadëˈëtstë Jyobaa oy nuˈun twinguwäˈägëdët ja amay jotmay. Min nˈokˈijxëm wiˈix mbäät duˈun ttundë.

3. ¿Ti nˈixäˈänëm mä yäˈädë artikulo?

³ Mä yäˈädë artikulo nnimaytyäˈägäˈänëm taxk pëky tijatyë mëjjäˈäytyëjk tsiptakxëdëp ttundët: 1) tsojkëp yˈëwäˈkx kyäjpxwäˈkxtët, per nanduˈun ttundët ja tuunk mëdiˈibë nyikëjxmˈäjttëp, 2) tjuuttëdë tiempë parë tmëjääwmoˈoytyëdë myëguˈuktëjk, 3) kyaj yëˈëyë tmëmay tmëdäjtët ko ti oy tkatundë ets 4) tyuunmuktët mëdë myëguˈuktëjk mëdiˈibë nanduˈun yajpattëp pokyjyaˈay. Nanduˈun nˈixäˈänëm ti Pablo pudëjkë ets wiˈixë mëjjäˈäytyëjk mbäät tpanëjkxëdë yˈijxpajtën.

TSOJKËP YˈËWÄˈKX KYÄJPXWÄˈKXTËT, PER NANDUˈUN TTUNDËT JA TUUNK MËDIˈIBË NYIKËJXMˈÄJTTËP

4. ¿Tiko mëjjäˈäytyëjkëty tsyiptakxëdë tmoˈoytyëdë ijxpajtën ja myëguˈuktëjk mä yˈëwäˈkx kyäjpxwäˈkxtë?

⁴ Tiko tsyiptakxëdë. Pënaty tuundëp mëjjäˈäy kanäk pëky tnikëjxmˈattë tuunk, per tsojkëp nanduˈun dyaktëdë ijxpajtën mä yˈëwäˈkx kyäjpxwäˈkxtë. Min nˈokˈijxëm tuk pëky majtsk pëky. Näˈäty, yëˈë yajtsondaktëbë reunyonk mëdiˈibë tuunëp sëmäängujky o yëˈë yajnäjxtëp ko yaˈëxpëkyë Biiblyë mä nduˈukmujkëm. Tsojkëp nanduˈun dyajnaxtëdë diskursë o tijaty yajtuknipëjktëp. Kajaa nanduˈunë xyëëw tiempë dyajtundë ko ttukniˈˈixëdë tijaty ja myëguˈuktëjk mëdiˈibë tuundëp ministerial ets ko tmëjääwmoˈoytyë ja myëguˈuktëjk (1 Peed. 5:2). Näägë nmëguˈukˈäjtëm mëdiˈibë tuundëp mëjjäˈäy, tyundë mä yajkojˈyë jëën tëjk mä nDiosˈawdäjtëm o mä yˈaˈoyë. Per mëdiˈibën mas jëjpˈam tyuundëp, yëˈë ko tˈëwäˈkx tkäjpxwäˈkxtë Diosë yˈayuk, duˈun extëm niˈamukë ja myëguˈuktëjk (Mat. 28:19, 20).

5. ¿Wiˈixë Pablo dyajkyë oybyë ijxpajtën ko ojts yˈëwaˈkxy kyäjpxwaˈkxy?

⁵ Yˈijxpajtënë apostëlë Pablo. Mä Biiblyë yajnimaytyaˈaky tiko apostëlë Pablo jantsy oy ojts yˈëwaˈkxy kyäjpxwaˈkxy. Duˈun jap ojts dyaky ja ëwij käjpxwijën: “Parë yëˈë xyˈix xytyundët tijaty mas jëjpˈam” (Filip. 1:10, TNM). Etsë Pablo duˈunën ttuuny. Ko yajtuknipëjky ja Diosë tyuunk, jëjpˈamën ojts dyajnaxy nuˈun jyukyˈajty, pes ëwäˈkx käjpxwäˈkx mä mayjyaˈay yajpääty ets winjëën windëjk (Apos. 20:20). Pablo kyaj ojts yˈëwaˈkxy kyäjpxwaˈkxy tuk oorë majtsk oorë o tuk xëëw majtsk xëëw mä tuˈukpë sëmään, oytyim näˈäjëty ojts yˈëwaˈkxy kyäjpxwaˈkxy. Extëm nˈokpëjktakëm, jam Atenas tamë nety tˈëwxity ja myëguˈuktëjk ko ttukmëtmaytyaky ja Diosë yˈayuk tuk grupë jäˈäyëty mëdiˈibë nety mëj ijttëp, ets oy wyimbëtsëëmy ko duˈun ttuuny (Apos. 17:16, 17, 34). Pablo niˈamukë jäˈäy ttukmëtmaytyaky ja Diosë yˈayuk ko nyiminëdë, oyë nety yˈity tsumy matsy mä tuˈugë tëjk (Apos. 28:16-24; Filip. 1:13, 14).

6. ¿Wiˈixë Pablo ttukniˈˈijxë tijaty ja myëguˈuktëjk?

⁶ Pablo yajtuun yajxonë xyëëw tiempë. Ko ijty tsyoony ëwäˈkx käjpxwäˈkxpë, wyoow xëmë ja myëguˈuktëjk parë jyamyëdatëdët. Extëm nˈokpëjktakëm, wyoowë Juan Marcos ko tim jawyiin ojts nyëjkxy ëwäˈkx käjpxwäˈkxpë mä kanäägë it lugäär, ko ojts nyëjkxy mä ja myëmajtskˈokpë, yëˈë wyoowë Timoteo (Apos. 12:25; 16:1-4). Pablo tyukniˈˈijxën ja myëguˈuktëjk wiˈix tijaty ttundët mä tyuˈukmuktë, wiˈix tsuj yajxon tˈijxˈit tkuentëˈattët ja myëguˈuktëjk ets wiˈix yajxon yaˈëxpëktët (1 Kor. 4:17).

7. Extëm jyënaˈanyë Éfesʉ 6:14, 15, ¿wiˈix mbäädë mëjjäˈäytyëjk tpanëjkxëdë yˈëwij kyäjpxwijënë Pablo?

⁷ Tijaty tukniˈˈijxëdëp. Mbäädë mëjjäˈäytyëjk tpanëjkxëdë yˈijxpajtënë apostëlë Pablo ko yˈëwäˈkx kyäjpxwäˈkxtët oytyim näˈäjëty ets kyaj jyaayëty ko nyëjkxtët winjëën windëjk (käjpxë Éfesʉ 6:14, 15). Extëm nˈokpëjktakëm, ko nyëjkxtët juuy këbajtpë o ko nyëjkxtët tuumbë. Ets pën jam tyundë mä yajkojˈyë jëën tëjk mä nˈëxpëjkëm, mbäät ttukmëtmaytyäˈäktë ja Diosë yˈayuk pënaty jamyë tsënääytyëp o mëdiˈibë tijaty tukmëdoˈkëdëp. Duˈun extëmë Pablo, ko nyëjkxtët ëwäˈkx käjpxwäˈkxpë mbäät tijaty ttukniˈˈixëdë ja myëguˈuktëjk, extëm pënaty tuundëp ministerial.

8. ¿Ti näˈäty tsojkëp ttunët tuˈugë nmëguˈukˈäjtëm mëdiˈibë tuump mëjjäˈäy?

⁸ Ja mëjjäˈäytyëjkëty tsojkëp tˈixtët wiˈix ja xyëëw tiempë dyajtundë, kyaj jamyë dyajtundët mä tijaty nyikëjxmˈäjttëp mä ja kongregasionk o tijaty tuknipëjkëdëbë sirkuitë, yëˈko kyaj tiempë tnekymyëdatäˈändë ets yˈëwäˈkx kyäjpxwäˈkxtët. Parë tmëdattëdë tiempë, mbäät näˈäty kyaj tkupëktë ko niˈigyë ja tuunk yˈakˈyajmoˈoytyët. Ko tmënuˈkxtäˈäktëdë Jyobaa, mbäädë net tpëktë kuentë ko pën kyupëjktëp ja tuunk mbäät kyaj tˈokmëdäjnëdë tiempë parë yˈëxpëktët sëmään sëmään tuk familyë. Nyëjkxtët ëwäˈkx käjpxwäˈkxpë o ttukniˈˈixëdët ja yˈuˈunk yˈënäˈk wiˈix mbäät yˈëwäˈkx kyäjpxwäˈkxtë. Ta näägë nmëguˈukˈäjtëm mëdiˈibë tsiptakxëdëp jyënäˈändët ko kyaj tkupëkäˈändë tuˈugë tuunk, per mbäät yˈittë seguurë ko Jyobaa jyaygyujkëp ko kyaj tmëmadaktäˈäytyët parë tijaty tˈaduunmuktët.

TJUUTTËDË TIEMPË PARË TMËJÄÄWMOˈOYTYËDË MYËGUˈUKTËJK

9. ¿Tiko tsyiptakxëdë mëjjäˈäytyëjk ttuundäˈäytyët tijaty nyikëjxmˈäjttëp?

⁹ Tiko tsyiptakxëdë. Kom yëˈë ndukjukyˈäjtëm ja tiempë mëdiˈibë jëjpkëxanëp, pääty nëgoo nˈokpatënë amay jotmay. Ets niˈamukë nyajtëgoyˈäjtëm parë pën xymyëjääwmoˈoyëm, xypyudëjkëm ets xyjyotkujkmoˈoyëm. Ta näägë nmëguˈukˈäjtëm mëdiˈibë yajtëgoyˈäjttëbë naybyudëkë parë kyaj nyëˈëdëgoy tyuˈudëgoytyët (1 Tes. 5:14). Pënaty tuundëp mëjjäˈäy, kyaj mbäät dyajjëgaˈaktë ja amay jotmay mëdiˈibë nwinguwäˈkëm. Perë Jyobaa të tyuknipëkëdë parë xymyëjääwmoˈoyëm ets xykyuentëˈäjtëm. Ets ¿wiˈixën mbäädë tiempë tjuuttë pën nëgooyë tmëdäjnëdë mayë tyuunk?

10. Extëm jyënaˈanyë 1 Tesalónikʉ 2:7, ¿wiˈixë Pablo dyajkyë oybyë ijxpajtën?

¹⁰ Yˈijxpajtënë apostëlë Pablo. Yëˈë xëmë tˈëxtääyë winmäˈäny wiˈixë nety mbäät tmëjkumay ja myëguˈuktëjk ets tmëjääwmooy. Oy ko nanduˈunë mëjjäˈäytyëjk tpanëjkxtëdë yˈijxpajtënë apostëlë Pablo, ko ttsoktët ja myëguˈuktëjk ets yˈoyjyaˈaytyäˈäktët (käjpxë 1 Tesalónikʉ 2:7). Pablo yˈanmääy ja myëguˈuktëjk ko mëkë nety ttsoky ets ko nanduˈunë Jyobaa tsyokëdë (2 Kor. 2:4; Éfes. 2:4, 5). Duˈun tjäˈäwë extëm ja myëtnaymyaayëbëty ets yajnäjx mëdë xyëëw tiempë. Tyukˈijx ja myëguˈuktëjk ko tyukjotkujkˈäjt ko ttukmëtmaytyaky tijaty myëmääy myëdäj ets tijatyë nety yajtëgoyanëp (2 Kor. 7:5; 1 Tim. 1:15). Per kyaj jamyë ja jyot wyinmäˈäny tpëjktaky mä ja amay jotmay mëdiˈibë pyat, niˈigyë tpudëjkë ja myëguˈuktëjk.

11. ¿Tiko Pablo ojts tˈëwijy tkäjpxwijy ja myëguˈuktëjk?

¹¹ Pablo ojts näˈäty tˈëwijy tkäjpxwijy ja myëguˈuktëjk, per kyaj duˈun ttuuny mët ko të nety ttukjotˈambëky. Yëˈë duˈun ko tsyojk ja myëguˈuktëjk ets pyudëkëyan parë kyaj nyayajtëkëdët amayoty jotmayoty. Apostëlë Pablo yˈëwij kyäjpxwij ja myëguˈuktëjk extëm mbäät pojënë tjaygyukëdë ets nyijawëyan wiˈixë nety të tˈaxäjëdë ja ëwij käjpxwijën. Extëm nˈokpëjktakëm, mëk ojts tˈëwijy tkäjpxwijy ja Diosmëduumbëty mëdiˈibë Corinto. Per ok, ta Pablo tkejxyë Timoteo, pes nyijawëyaambyë nety wiˈix ja myëguˈuktëjk të tmëdowdë ja ëwij käjpxwijën mëdiˈibë myooy. Ko tnijäˈäwë ko tsuj yajxon tkupëjktë, ta agujk jotkujk jyantsy nyayjyäˈäwë (2 Kor. 7:6, 7).

12. ¿Ti tsojkëp ttundët ja mëjjäˈäytyëjk parë mbäät tmëjääwmoˈoytyë myëguˈuktëjk?

¹² Tijaty tukniˈˈijxëdëp. Pënaty tuundëp mëjjäˈäy, mbäät tpanëjkxëdë yˈijxpajtënë apostëlë Pablo ko yajpäättët mëdë myëguˈuktëjk. Tuk pëky wiˈix mbäät duˈun ttundë, yëˈko tsojk jyäˈttët reunyonk parë mëët kyäjpx myaytyäˈäktët ja myëguˈuktëjk. Pes jeˈeyë tsyokyëty tuk minutë majtsk minutë parë nˈëboˈkx ngäjpxpoˈkxëm ja nmëguˈukˈäjtëm ets nmëjääwmoˈoyëm (Rom. 1:12; Éfes. 5:16). Ja mëjjäˈäytyëjkëty mëdiˈibë pyanëjkxëdëbë yˈijxpajtënë Pablo, yëˈë yajtuundëbë Biiblyë parë tmëjjääwmoˈoytyë myëguˈuktëjk ets ttukˈixtë ko Jyobaa tsojkëdëp. Janääm jatsojk nanduˈun tmëgäjpxtë ja myëguˈuktëjk, duˈun ttukˈixtë ko tsyojktëp ets yˈëxtääytyëbë winmäˈäny wiˈix tmëjkuˈëw tmëjkugäjpxëdët. Pën tuˈugë nmëguˈukˈäjtëm mëdiˈibë tuump mëjjäˈäy kyäjpxwijaambyë myëguˈuk, tsojkëp dyajtunëdë Diosë yˈAyuk, ets ttukˈawanët määjën tsyokyëty nyayaˈoyëdët. Per tsuj yajxon mbäät tˈanëëmë mët ko tsyojkypy ets ja myëguˈuk tkuytyunët ja ëwij käjpxwijën (Gal. 6:1).

KYAJ YËˈËYË TMËMAY TMËDÄJTËT KO TI OY TKATUNDË

13. ¿Wiˈix nyayjyawëdë ja mëjjäˈäytyëjk ko yëˈëyë tmëmay tmëdäjtë ko kyaj oy tijaty ttundë?

¹³ Tiko tsyiptakxëdë. Mëjjäˈäytyëjkëty pokyjyaˈay yajpäättë ets tëgooytyëp nanduˈun (Rom. 3:23). Näˈäty, tsojkëp ttundëdë mëjääw parë kyaj yëˈëyë tmëmay tmëdäjtët ko kyaj oy tijaty ttundë. Ta näägë nmëguˈukˈäjtëm mëdiˈibë yëˈëyë myëmääy myëdäjtëp mäjaty tyëgoytyë ets kyaj tˈoktukxondaknëdë tijaty tyuundëp. Ta net nääk mëdiˈibë winmääytyëp ko pokyjyaˈay yajpäättë, päätyën duˈun jyaˈayˈattë ets kyaj tiko nyayajtëgatsëdët.

14. Extëm jyënaˈanyë 2 Korintʉ 4:7, ¿wiˈixë Pablo pyudëjkë ko yˈijty yujy tudaˈaky parë oy tijaty ttuuny?

¹⁴ Yˈijxpajtënë apostëlë Pablo. Ijt yujy tudaˈaky ets jyaygyujkë ko tsojkëbë netyë Dios pyudëkëdët parë oy tijaty ttunët. Pes mä nety tkanijawënëm ja tëyˈäjtën, axëëk ojts ttuny ja Diosmëduumbëty. Per ko tiempë nyajxy, ta tpëjkyë kuentë ko kyaj nety yˈoyëty extëm tijaty të ttuny, pääty dyajtëgäjtsyë jyukyˈäjtën ets ja jyaˈayˈäjtën (1 Tim. 1:12-16). Mët ko Jyobaa tpudëjkë Pablo, ta tsuj yajxon ojts tˈijxˈity tkuentëˈaty ja myëguˈuktëjk, pyaˈˈayoow ets ijt yujy tudaˈaky. Mëk tjäˈäwë tëgok tëgok tjamyejtsy tijatyë nety kyaj oy të ttuny, per tyukjotkujkˈäjtë Jyobaa ko të nety pyokymyeˈkxyëty ets kyaj yëˈë xëmë ojts tˈokwinmääynyë (Rom. 7:21-25). Pablo jyaygyujkë ko kyaj mbäät ak oy tijaty ttuundäˈäy, per tyuunë mëjääw parë nyayaˈoˈoyë extëmë Jyobaa ttsoky ets yëˈë tyukˈijxpajt ko ojts ttuunë ja tyuunk (1 Kor. 9:27; käjpxë 2 Korintʉ 4:7).

15. ¿Ti pudëkëyanëp ja nmëguˈukˈäjtëm mëdiˈibë tuump mëjjäˈäy parë oy tijaty ttunët?

¹⁵ Tijaty tukniˈˈijxëdëp. Ko tuˈugë nmëguˈukˈäjtëm yajtuunkmoˈoy parë tyunët mëjjäˈäy kyaj yëˈëjëty mët ko wyäˈätsjäˈäyëty, perë Jyobaa tsyojkypy ets tˈëxkaptët mäjaty tyëgoytyë etsë net nyayaˈoyëdët (Éfes. 4:23, 24). Ko tkäjpxtëdë Diosë yˈAyuk, mbäät pyudëkëdë ets tˈixtët mäjaty mbäät nyayaˈoyëdë. Jyobaa pudëkëyanëdëp parë agujk jotkujk ttundët ja tuunk mëdiˈibë të yajtuknipëktë (Sant. 1:25).

KO TYUUNMUKTËT MËDË MYËGUˈUKTËJK MËDIˈIBË NANDUˈUN YAJPATTËP POKYJYAˈAY

16. ¿Ti mbäät tyuny jyatyëty pën ja mëjjäˈäytyëjk yëˈëyë yˈijxtëp mäjaty tyëgoytyë ja myëguˈuktëjk?

¹⁶ Tiko tsyiptakxëdë. Ko mëjjäˈäytyëjk tyuunmuktë mët ja myëguˈuktëjk, mbäädë net yëˈëyë tˈixtë mäjaty tyëgoytyë. Pën kyaj nyaygyuentëˈatëdë, mbäädë net ttukjotˈambëktë ja myëguˈuktëjk o tˈëbäät tkäjpxpäättë. Apostëlë Pablo duˈun tˈanmääy ja Diosmëduumbëty ko yëˈë duˈun mëdiˈibë Satanás tsyojkypy (2 Kor. 2:10, 11).

17. ¿Wiˈixë Pablo tˈijxy ja myëguˈuktëjk?

¹⁷ Yˈijxpajtënë apostëlë Pablo. Yëˈë xëmë yˈijx tijaty oy tyuundë ja myëguˈuktëjk, per kyaj yëˈë tˈandijy ko kyaj tpëjkyë kuentë mäjaty tyëgooytyë, pes tijaty tyuundë ja myëguˈuktëjk axëktuunë mëjwiin kajaa. Pablo nyijäˈäwëbë nety ko tëgooytyëp ja myëguˈuktëjk, per kyaj nety yëˈë tˈandijy ko axëkjäˈäyëty. Tsyojk ja myëguˈuktëjk ets yëˈëyë yˈijx tijatyë nety oy tyuundëp. Ko tˈijxy wiˈix tuˈuk myëguˈuk dyajnimëjääwdaˈaky parë ttunäˈäny mëdiˈibë oy, ta wyinmääy ko oy ko duˈun ttuny ets ko wanaty yˈakˈyajpudëkëyaˈany.

18. ¿Ti xytyukniˈˈijxëm extëmë Pablo tpudëjkë Evodia mëdë Síntique? (Filipʉs 4:1-3).

¹⁸ Min nˈokˈijxëm wiˈixë Pablo tpudëjkë nimajtsk ja toxytyëjkjäˈäy mä ja kongregasionk mëdiˈibë Filipos (käjpxë Filipʉs 4:1-3). Evodia mëdë Síntique kyaj nety jyawë oy yˈokˈijnëdë mët ko myëdäjttë tuˈugë jotmay. Perë Pablo kyaj ojts yˈoojëdë ets ni kyaˈëbat kyakäjpxpatëdë, yëˈë yˈijx wiˈixë nety jantsy jeky kujk Diosmëdundë, wiˈix jantsy oy jyaˈayˈattë ets ko tsojkëdëbë Jyobaa. Pablo nyijäˈäwëbë nety ko Evodia mëdë Síntique jantsy oyjyaˈayëty, pääty tˈanmääy parë nyayaˈoyëdët. Apostëlë Pablo tuˈugyë nyayaˈijtë mët ja myëguˈuktëjk ets agujk jotkujk nyayjyäˈäwë mët ko kyaj yëˈëyë ojts tˈixy mäjaty tyëgoytyë.

19. 1) ¿Ti tsojkëp ttundët ja mëjjäˈäytyëjk parë yëˈëyë tˈixtët ti oy tyuundëp ja myëguˈuktëjk? 2) ¿Ti mdukniˈˈijxëp ko xyˈixy mä dibujë wiˈix tuˈugë nmëguˈukˈäjtëm mëdiˈibë tuump mëjjäˈäy dyajwäˈätsy ja tëjk mä nˈëxpëjkëm?

¹⁹ Tijaty tukniˈˈijxëdëp. Miitsëty mëjjäˈäytyëjk, oy ko xyˈixtët tijaty oy tyuundëp ja mmëguˈuktëjk. Yëˈëjëty pokyjyaˈay yajpäättë, per myëdäjttëp nanduˈunë oybyë jäˈäyˈäjtën (Filip. 2:3). Mbäät näˈäty xyˈëwij xykyäjpxwijtë tuˈugë nmëguˈukˈäjtëm, per oy ko xypyanëjkxtëdë yˈijxpajtënë apostëlë Pablo, tundë mëjääw ets kyaj xytyukˈyajtsayuttëdë mˈääw mˈayuk o jam ti xytyundët mëdiˈibë axëëk yajnayjyawëdëp. Oy ko xyˈixtët wiˈix ja mmëguˈuk ttsokyë Jyobaa, wiˈix tmëduny ets ko mbäät nyayaˈoyëty. Ko ja mëjjäˈäytyëjk yëˈëyë tˈixtë tijaty oy tyuundëp ja myëguˈuktëjk, mbäät dyajjapˈattë ja tuˈugyëˈäjtën mä nduˈukmujkëm.

PANËJKXˈADËˈËTSTË YˈIJXPAJTËNË PABLO

20. ¿Ti mbäät ttundë mëjjäˈäytyëjk parë tpanëjkxˈadëˈëtstëdë yˈijxpajtënë apostëlë Pablo?

²⁰ Ko mëjjäˈäytyëjk tˈëxpëktëdë yˈijxpajtënë apostëlë Pablo, mbäät niˈigyë pyudëkëdë. Extëm nˈokpëjktakëm, mbäät tˈëxtäˈäytyë mä Wiˈix njukyˈäjtëm ets nDiosmëduˈunëm eneerë 2018, mä jyënaˈany “Naygyuentëˈatëdë, es nandëˈën kuentëˈattë ja mëbëjkpëtëjk”. Mbäät nanduˈun tkäjpxtë rekuäädrë mä jyënaˈany “Nˈokpawinmäˈäyëm ja ijxpajtën diˈibë Biiblyë myaytyakypy”, yäˈädë yajpääty mä Wiˈix njukyˈäjtëm ets nDiosmëduˈunëm oktuubrë 2018, pajina 8. Ko nety të xykyäjpxtäˈäytyë, mbäädë net mnayajtëwëdë: “¿Wiˈixëts xypyudëkë yˈijxpajtënë Pablo parëts duˈunyëm ndukxondäˈägët kots nduny mëjjäˈäy?”.

21. ¿Ti mbäädë mëjjäˈäytyëjk yajnayjyawëdë seguurë?

²¹ Mëjjäˈäytyëjkëty, jamyatstë ko Jyobaa nyijäˈäwëp ko pokyjyaˈay myajpäättë ets ko kyaj ak oy tijaty xytyundë, per mëdiˈibën tëy tsyojkypy yëˈë xëmë xymyëmëdowdët (1 Kor. 4:2). Jyobaa yajtsobat tijaty tukmëduunë apostëlë Pablo ets ko ninäˈä kyamastutë. Mbäät mˈittë seguurë ko Jyobaa yajtsobatypy tijaty mduundëp extëm jyënaˈany mä Ebreeʉsʉty 6:10: “Kyaj tjäˈäytyëgoyët diˈibë miitsëty oy mduundëp. Dios jyamyatsëp ko miits xyaˈijxëdë mtsojkën mët ja jyaˈayëty, mët ko xypyudëjkëdë es dëˈënyëm xyˈaktimpudëkëdë”.