Nˈokkukäjpxëm ja yetyëjkjäˈäyëty mëdiˈibë tuundëp mä Diosë kyäjpn

1. ¿Tijatyë Jesus xytyukmëduˈunëm?

NIPËN duˈun kyaˈoyjyaˈayëty extëmë Jesus. Ko yˈijty yä Naxwiiny yajtuunë myëkˈäjtën parë ttuunyë miläägrë ets pyudëjkë mayë jäˈäy (Luk. 9:​12-17). Per mä mas niˈigyë dyajnigëxëˈkyë yˈoyjyaˈayˈäjtën ja ko ojts xykyuˈoˈk xykyutëgoˈoyëm (Fwank 15:13). Ko Jesus jyukypyejky duˈunyëm xypyudëjkëm, ets duˈun extëm ojts twandaˈaky yˈamdoobyë Jyobaa ets xytyukpudëjkëmë yˈespiritë santë parë xyˈagujkmoˈoy xyjyotkujkmoˈoyëm ets parë xyaˈëxpëjkëm (Fwank 14:​16, 17, notë; 16:13). Ko nëjkxëm reunyonk jap nanduˈunë Jesus xytyukniˈˈijxëm wiˈix mbäädë jäˈäy nyaˈëxpëjkëm parë tmëdundëdë Dios (Mat. 28:​18-20).

2. ¿Pënatyën ja yetyëjkëty mëdiˈibë yajmaytyaktëp mä Efesios 4:​7, 8?

² Ta ja tuk pëky wiˈixë Jesus xypyudëjkëm. Apostëlë Pablo jyënany ko Jesus pyatëjkë këjxm, “nyayäjkë yetyëjkëty” (käjpxë Efesios 4:​8, TNM). Ets jyënany ko päätyën duˈun të xymyoˈoyëm parë tpudëkëdët ja Diosë kyäjpn (Éfes. 1:​22, 23; 4:​11-13). Yäˈädë yetyëjkëty mëdiˈibë Jesus nyayajkypy, yëˈë sirkuitëty, mëjjäˈäytyëjkëty ets pënaty pudëjkëdëp.a Yäˈädë yetyëjkjäˈäyëty pokyjyaˈay yajpäättë ets tëgooytyëp (Sant. 3:2). Per yëˈëjënë Jesus yajtuunëdëp parë xypyudëjkëm.

3. Nimaytyäˈäk mëët tuˈugë ijxpajtën wiˈix mbäät nbudëjkëm ja yetyëjkjäˈäyëty mëdiˈibë Jesus të tnayaky.

³ Jesus yëˈë të tnayaky yäˈädë yetyëjkëty parë tpudëkëdët ja kongregasionk (Éfes. 4:12). Per niˈamukë ëtsäjtëm mbäät wiˈixëm nbudëjkëmë yäˈädë nmëguˈukˈäjtëm parë ttundët ja tuunk mëdiˈibë të yajtuknipëktë. Parë njaygyujkëm yajxon, nˈokpëjktakëm tuˈugë ijxpajtën: mä yajkojy tuˈugë salonk, tamë nmëguˈukˈäjtëm mëdiˈibë nyikëjxmˈäjttëp ja tuunk. Per niˈamukë mbäät wiˈixëm dyaktë ja naybyudëkë extëm ko dyajkay dyaˈuuktët. Nanduˈun jyaty mëdë nmëguˈukˈäjtëm mëdiˈibë wyindënääytyëp ja tuunk mä Diosë kyäjpn, extëm ja mëjjäˈäytyëjkëty, pënaty pudëjkëdëp ets ja sirkuitëty, niˈamukë mbäät nbudëjkëmë yäˈädë nmëguˈukˈäjtëmëty. Min nˈokˈijxëm wiˈix ndukˈoyˈäjtëm ko mëk tyundë ets wiˈix mbäät ndukˈijxëm mëdë Jesus ko nyajtsobatëm tijaty tyuundëp.

PËNATY PYUDËJKËDËBË MËJJÄˈÄYTYËJKËTY TË YAJTUKNIPËKTË TIJATY TYUNDËP

4. Mä primer siiglë, ¿wiˈix dyäjktë naybyudëkë pënaty pyudëjkëdëbë mëjjäˈäytyëjkëty?

⁴ Mä primer siiglë, tamˈäjttë nmëguˈukˈäjtëmëty mëdiˈibë yajtuunkmooytyë ets tpudëkëdët ja mëjjäˈäytyëjkëty (1 Tim. 3:8). Waˈanë yäˈädë nmëguˈukˈäjtëm dyäjktë naybyudëkë extëmë Pablo jyënany mä 1 Korintʉ 12:28. Pënaty pyudëjkëdëbë mëjjäˈäytyëjkëty kajaa ijty tyundë parë mbäädë mëjjäˈäytyëjk dyajtundë ja xyëëw tiempë mä yaˈëxpëktë ets tkuˈixy tkugäjpxëdë ja myëguˈuktëjk. Extëm nˈokpëjktakëm, waˈan ijty yëˈë tjääynyaxtë ja Diosë jyaaybyajtën o nëjkx tjuy tkëbattë ti ijty tuump parë yajjääynyaxy.

5. ¿Tijatyën tyam tyuundëp pënaty pyudëjkëdëbë mëjjäˈäytyëjkëty?

⁵ ¿Tijaty tyam tyuundëp pënaty pyudëjkëdëbë mëjjäˈäytyëjkëty? (1 Peed. 4:10). Yëˈë ijxtëp wiˈix tyuˈuyeˈey ja kuentë mä kongregasionk, tˈixtë ja territooryë, tˈamdowdë ëxpëjkpajn ets ko jyaˈty ta tmoˈoytyë ja nmëguˈukˈäjtëm. Yëˈë nanduˈun yˈijxtëp ja soniidë, tyundë akomodadoor ets mä yˈaˈoyë salonk. Ko duˈun tyundë, ta oy tijaty yajtuny mä ja kongregasionk (1 Kor. 14:40). Ta nanduˈun mëdiˈibë yajtuknipëjktëp dyajnaxtëdë diskursë o mëdiˈibë näjxp mä Wiˈix njukyˈäjtëm ets Diosmëduˈunëm. Mbäät nanduˈun tpudëkëdë pënaty wyindënääytyëp ja grupë, ets näˈäty mbäät ja mëjjäˈäytyëjk yˈanëˈëmxëdë parë nëjkx tkuˈix tkugäjpxëdë myëguˈuktëjk.

6. ¿Tiko nguˈëˈëw ngukäjpxëm tijaty tyuundëp pënaty pyudëjkëdëbë mëjjäˈäytyëjkëty?

⁶ ¿Wiˈix ndukˈoyˈäjtëm tijaty tyundëp pënaty pyudëjkëdëbë mëjjäˈäytyëjkëty? Tuˈugë nmëguˈukˈäjtëm mëdiˈibë xyëwˈäjtypy Beberlyb ets tsyëënë Bolivia, jyënaˈany: “Ko mëk tyundë pënaty pyudëjkëdëbë mëjjäˈäytyëjkëty, tats jeˈeyë njäjnë reunyonkˈäjtpë, nˈëëw nyaxnë, ngomentaräjnë, nmëdoowˈijnë ja diskursë, nˈijxnëts ja bideo etsë dibujë. Yëˈë yˈijxˈijt kyuentëˈäjttëp ja nmëguˈukˈäjtëm mä tyunyëtyë reunyonk ets pënaty naygyonektaräjtëdëp. Ko kyexyë reunyonk, ta nanduˈun dyajwäˈätstë jëën tëjk, tjuuttë ja meeny, tnigaxëdë ëxpëjkpajn mëdiˈibë tëgoyˈäjtp. ¡Pääty nguˈëˈëw ngukäjpxëbëts ko mëk tyundë!”. Jatuˈugë nmëguˈukˈäjtëm mëdiˈibë xyëwˈäjtypy Leslie, ets tsyëënë Colombia duˈun jyënaˈany: “Pënaty pyudëjkëdëbë mëjjäˈäytyëjkëty, mëjwiin kajaa tpudëkëdë nmëmëjjäˈäyëts mëdiˈibë tuump mëjjäˈäy. Koxyëbë yäˈädë nmëguˈukˈäjtëm tkayaktë naybyudëkë mëkxyëp tyukëdaˈagyëty ja nmëmëjjäˈäyëts, pääty nguˈëˈëw ngukäjpxëbëts ko tyundë agujk jotkujk”. Seguurë ko ëtsäjtëm, nguˈëˈëw ngukäjpxëm nanduˈunë yäˈädë nmëguˈukˈäjtëmëty (1 Tim. 3:13).

7. ¿Wiˈix mbäät nyajnigëxëˈkëm ko nmëjjäˈäwëm tijaty tyuundëp pënaty pyudëjkëdëbë mëjjäˈäytyëjkëty? (Ix nanduˈunë dibujë).

⁷ Waˈan jeˈeyë njënäˈänëm ko nguˈëˈëw ngukäjpxëm tijaty tyuundëp pënaty pyudëjkëdëbë mëjjäˈäytyëjkëty, perë Biiblyë xyˈanmäˈäyëm: “Jäˈäygyëdäˈäktë”, yäˈädë yëˈë yˈandijpy ko tsojkëp nyajnigëxëˈkëm ko nguˈëˈëw ngukäjpxëm (Kol. 3:15). Min nˈokˈijxëm wiˈixë Daavid mëdiˈibë tuump mëjjäˈäy dyajnigëxëˈëky ko jyantsy myëjjäˈäwëp. Yëˈë jyënaˈany: “Nduknijäˈäyëbëts tuˈugë neky ja nmëguˈukˈäjtëm mëdiˈibë pyudëjkëbë mëjjäˈäytyëjkëty, nduknigejxypyëtsë mensaje mäts ngujayë tuˈugë tekstë o mäts nˈanëëmë wiˈixëts të xypyudëkë o tikots njäˈäygyëdaˈaky tijaty yëˈë tyuumpy”. Pascal mëdë Jael, mëdiˈibë tsënääytyëp Nueva Caledonia, nyinuˈkxtakëdëp pënaty pyudëjkëdëbë mëjjäˈäytyëjkëty. Duˈun jyënäˈändë: “Janääm jatsojkëts nguˈëw ngukäjpxëdë Jyobaa, ko jyapˈattë pënaty pyudëjkëdëbë mëjjäˈäytyëjkëty mäts nduˈukmuktë. Nan nˈamdoow nbëjktsoowdëbës parë duˈunyëmë Jyobaa pyudëkëdët”. Jyobaa myëdoowˈijtypy ko yäˈädë nmëguˈukˈäjtëm myënuˈkxtäˈägëdë ets niˈamukë ja nmëguˈukˈäjtëmëty ttukˈoyˈattë (2 Kor. 1:11).

MËK TYUNDË PËNATY TUUNDËP MËJJÄˈÄY

8. ¿Tiko Pablo jyënany ko mëk jyantsy tyuundë ja mëjjäˈäytyëjkëty mä primer siiglë? (1 Tesalónikʉ 5:​12, 13).

⁸ Pënaty tuundë mëjjäˈäy mä primer siiglë, mëk jyantsy tyuundë (käjpxë 1 Tesalónikʉ 5:​12, 13; 1 Tim. 5:17). Nyëˈëmooy tyuˈumooytyë ja kongregasionk, yajnäjxtë reunyonk ets nayˈëëw naygyäjpxëdë wiˈix tijaty ttunandë. Yˈëwij kyäjpxwijtë nanduˈun tsuj yajxon ja myëguˈuktëjk parë mëk ja myëbëjkën tmëdattët (1 Tes. 2:​11, 12; 2 Tim. 4:2). Kyuentëˈäjttë ja fyamilyë, tyuundë nanduˈunë mëjääw parë oy yˈijttë mëdë Jyobaa ets tmëdäjttë mëk ja mëbëjkën (1 Tim. 3:​2, 4; Titʉ 1:​6-9).

9. ¿Tijaty tyam tyuundëp ja mëjjäˈäytyëjkëty?

⁹ Pënaty tyam tuundëp mëjjäˈäy mëk nanduˈun jyantsy tyundë. Extëm nˈokpëjktakëm, nëjkxtëp ëwäˈkx käjpxwäˈkxpë (2 Tim. 4:5). Myooytyëbë oybyë ijxpajtën ja myëguˈuktëjk ko nyëjkxtë jënˈayeˈey tëjkˈayeˈebyë, tyukniwijtsëdëp mäjaty tyëjkˈayeˈeyäˈändë, tyukniˈˈijxëdëp wiˈix yajtunäˈäny ets wiˈix dyaˈëxpëktëdë jäˈäy. Mä tyundë fes, yajxon tijaty tpayeˈeytyë ets yajnigëxëˈktëbë paˈˈayoˈowën. Ko tuˈugë nmëguˈukˈäjtëm pyokytyuny mëjwiin kajaa, pyudëkëdëp parë jatëgok oy yˈitët mëdë Jyobaa, per yaˈijtëp nanduˈun wäˈäts ja Diosë kyäjpn (1 Kor. 5:​12, 13; Gal. 6:1). Yëˈë mëjjäˈäytyëjkëty yˈijxˈijt kyuentëˈäjttëp nanduˈun ja myëguˈuktëjk (1 Peed. 5:​1-3). Oy ja diskursë tjantsy yajnaxtë mët ko të ttuundäˈäktë, yˈixyˈäjttëbë myëguˈuktëjk mëdiˈibë mëët tyuˈukmuktë, ets kyuˈijx kyugäjpxëdëp parë tmëjääwmoˈoytyë. Ta nanduˈun näägë mëjjäˈäytyëjk mëdiˈibë nyikëjxmˈäjttëp kanäk pëky ja tuunk extëm mä yajkojˈyë salonk, mä yˈaˈoyë ets mä yajtukniwitsë asamblee tëgëëk xëëbë. Ets ta mëdiˈibë tuundëp mä Komitee mëdiˈibë wyinguwäˈkëdëp ja doktoortëjk mä hospital ets mëdiˈibë kyuˈijxëdëbë päˈäm jäˈäy. ¡Mëjwiin kajaa jyantsy tyundë yäˈädë mëjjäˈäytyëjkëty!

10. Oknimaytyäˈäk tuk pëky majtsk pëky tiko ntsojkëm ja nmëguˈukˈäjtëm mëdiˈibë tuundëp mëjjäˈäy.

¹⁰ Jyobaa ojts twandaˈaky ko ja borreegë kuentëˈäjtpë tsuj yajxon tkuentëˈatäˈäny ja borreegë ets ko “kyaj nyekytsyëˈëgëyäˈän nyekyjyawëyäˈändë” (Jer. 23:4). Duˈunën tˈijxyë Johanna mëdiˈibë tsënaapy Finlandia ko ja tyääk mëk pyäˈämbejty. Yëˈë jyënany: “Tsipëts pën ndukmëtmaytyäˈägët wiˈixëts nnayjyawëty, per tuˈugë nmëguˈukˈäjtëm mëdiˈibë tuump mëjjäˈäy myëdoowˈijt wiˈixëts nmëtmaytyaky, nuˈkxtak mët ëjts, ets xyˈanmääyëts ko Jyobaa xytsyojkpëts. Kyajëts yajxon njamyetsy wixatyëts xyˈanmääy, per mëdiˈibëts njamyejtsypy, yëˈë ko xyˈagujkmooy xyjyotkujkmooyëts. Nwinmayëts ko yëˈë Jyobaa mëdiˈibë kajxë parëts xypyudëjkë mätsë nety nyajtëgoyˈaty”. Ets mijts, ¿wiˈix të mbudëkëdë mëjjäˈäytyëjkëty mä mduˈukmuky?

11. ¿Wiˈix mbäät ndukˈijxëm ja mëjjäˈäytyëjkëty ko nyajtsobatëm tijaty tyuundëp? (Ix nanduˈunë dibujë).

¹¹ Jyobaa tsyojkypy ets ndukˈijxëm ja mëjjäˈäytyëjkëty ko ntsojkëm mët ko “mëk tyundë” (1 Tes. 5:​12, 13). Henrietta, tuˈugë nmëguˈukˈäjtëm mëdiˈibë tsënaapy Finlandia, duˈun tnimaytyaˈaky: “Mëjjäˈäytyëjkëty xondaˈakyˈääw xondaˈakyjyot tpudëkëdë myëguˈuktëjk, per kyaj duˈun ttundë mët ko yˈawäätsëˈattë o ko kyaj tmëdattë amay jotmay. Pääty, näˈäty nˈanmaabyëts niduˈuk ja nmëguˈukˈäjtëm: ¡Yëˈë yam ndukˈawanëyaampy ko jantsy oy mduny mëjjäˈäy!”. Tuˈugë nmëguˈukˈäjtëm mëdiˈibë xyëwˈäjtypy Sera ets tsyëënë Turquía, jyënaˈany: “Tsojkëp nmëjääwmoˈoyëm ja mëjjäˈäytyëjkëty parë duˈunyëm tyuunˈadëˈëtstët. Pääty nduknijäˈäyëdëbëtsë neky, nwoowdëbëts kaabyë ets nëjkxtëbëts mëët ëwäˈkx käjpxwäˈkxpë”. Pën ja tuˈugë nmëguˈukˈäjtëm mëdiˈibë mguˈëwëyaampy mgukäjpxëyaampy ko mëk jyantsy tyuny, oy ko xyˈëxtäˈäyëdë winmäˈäny wiˈix mbäät duˈun xytyuny (1 Kor. 16:18).

JA SIRKUITËTY MYËJÄÄWMOOYTYËP JA DIOSMËDUUMBËTY

12. Mä primer siiglë, ¿pënaty yajtuknipëjktë parë tmëjääwmooytyë ja kongregasionk? (1 Tesalónikʉ 2:​7, 8).

¹² Ta ja tuk pëky wiˈixë Jesus tpudëjkë mäjaty tyuˈukmujktë ja Diosmëduumbëty. Mä primer siiglë, ja mëjjäˈäytyëjkëty mëdiˈibë Jerusalén yëˈë kyajxtë Pablo mëdë Bernabé ets ja wiingatypyë Diosmëduumbëty parë nëjkx tkuˈixëdë mäjaty tyuˈukmuktë ja myëguˈuktëjk (Apos. 11:22). Ets yajkajxtë parë nëjkx tmëjjääwmoˈoytyë, duˈun extëm tyam ttundë ja mëjjäˈäytyëjkëty ets pënaty pudëjkëdëp (Apos. 15:​40, 41). Yäˈädë yetyëjkjäˈäyëty mëk tyuundë axtë pyëjktaktëbë jyukyˈäjtën oˈkën jëjpˈam mä nety ja myëguˈuktëjk dyaˈëxpëktë ets tjotmëkmoˈoytyë (käjpxë 1 Tesalónikʉ 2:​7, 8).

13. ¿Tijaty tyuundëbë sirkuitë?

¹³ Pënaty tuundëp sirkuitë, sëmään sëmään nyëjkxtë mä tuˈugë tuˈugë kongregasionk ets oorëˈam tniyeˈeyëdë parë jam jyäˈttë. Sëmään sëmään nanduˈun dyajnaxtë diskursë, tkuˈix tkugäjpxëdë ja myëguˈuktëjk, tmëdatyë reunyonk mët ja prekursoorëty, mëdë mëjjäˈäytyëjkëty ets tjuuttë grupë ko nyëjkxtë tëjkˈayeˈebyë. Yëˈë yˈijxtëp wiˈix tyunäˈänyëtyë asamblee tëgëëk xëëbë, asamblee de sirkuitë ets tˈagäjpxëdë ja diskursë mëdiˈibë yajnaxandëp. Yëˈë nanduˈun tyukniwijtsëp ja klase mëdiˈibë myëdäjtëbë prekursoorëty, ja reunyonk mët ja prekursoorëty mëdiˈibë tuunëp ko ja asamblee de sirkuitë tpääty, ets näˈäty yajmëgäjpxp Betel parë yajtuknipëky tuˈugë tuunk mëdiˈibë tsojkˈam yajtuunäämp.

14. Oknimaytyäˈäk ti tyuundëp ja sirkuitë ets pääty ja nmëguˈukˈäjtëm tsyokëdë.

¹⁴ ¿Wiˈixë kongregasionk ttukˈoyˈattë ko mëk tyundë ja sirkuitëty? Tuˈugë nmëguˈukˈäjtëm mëdiˈibë tsënaapy Turquía duˈun jyënaˈany: “Tëgok tëgokëts xykyuˈixëdë sirkuitëty xypyudëjkëbëts parëts nyajpäädët mët ja nmëguˈukˈäjtëmëty ets nbudëkëdëts. Nuˈunëts kujk nˈixyˈatyë sirkuitë nituˈuk kyajjënäˈändë ko kyaj tmëdattë tiempë, xëmëts xymyëtkäjpx xymyëtmaytyäˈäktë”. Johanna, mëdiˈibë të yˈokˈyajmaytyakpë mä parrafo 10 ojts mëdë sirkuitë nyëjkxy tëjkˈayeˈebyë, per nipën tkapattë. Yëˈë duˈun tnimaytyaˈaky: “Oyëts nipën ngapattë, per xëmëts njamyetsy taabë xëëw. Jaˈko tëtsë nety nimajtsk ja ntsëˈë tsyoondë ets nëgooyëtsë nety nbaˈˈayoownëdë. Per ja sirkuitë tajëts xytyukjaygyujkë ko mä ja jembyë jukyˈäjtën kyaj pën yˈoknaynyikaˈaganënë, xëmë jam tuˈugyë nyajpäädäˈänënë”. Seguurë ko ëtsäjtëm të nanduˈun xyjyotkujkmoˈoyëmë sirkuitë ets päätyën mëk ntsojkëm (Apos. 20:37 axtë 21:1).

15. 1) ¿Wiˈix mbäät nguytyuˈunëm extëm jyënaˈanyë 3 Fwank 5-8 parë nyajnigëxëˈkëm ko nmëjjäˈäwëm ti tyuundëbë sirkuitë? (Ix nanduˈunë dibujë). 2) ¿Tiko mbäät nguˈëˈëw ngukäjpxëm ja nmëguˈukˈäjtëmë kyujëën kyudëjkëty mëdiˈibë tuundëp mä kongregasionk, ets wiˈix mbäät nduˈunëm? (Ixë rekuäädrë mä jyënaˈany “Jamyatstë nanduˈun ja kyujëën kyudëjkëty”).

¹⁵ Apostëlë Juan yˈanmääy ja Diosmëduumbë mëdiˈibë xyëwˈäjt Gayo ets yˈoyjyaˈaytyäˈägët mët ja myëguˈuktëjk mëdiˈibë nety kyuˈijxëdëp ja kongregasionk. Duˈun tˈanmääy: “Oy xytyuny mët ko xypyudëkëdë mä tyuˈuyoˈoytyë, mët ko Dios tsyejpy es dëˈën xytyunët” (käjpxë 3 Fwank 5-8). ¿Wiˈix mbäät nanduˈun ëtsäjtëm tyam nduˈunëm? Ko nwoˈowëm ja sirkuitë kaabyë ets ko nëjkxëm mëët tëjkˈayeˈebyë. Min nˈokˈijxëm ti tyuumbyë Leslie mëdiˈibë të yˈokˈyajnimaytyakpë mä parrafo 6 parë dyajnigëxëˈky ko kyukäjpxëp ti tyuundëp ja sirkuitë. Yëˈë duˈun jyënaˈany: “Nˈamdoobyëtsë Jyobaa ets tmoˈoyët tijaty yajtëgoyˈäjttëp. Mëdëtsë nmëmëjjäˈäy, nnijäˈäyëdëbëts nanduˈun mäts nˈanëëmëdë ko xypyudëjkëdëbëts mëjwiin kajaa kojëts xykyuˈixëdë”. Nˈokjamyajtsëm ko ja sirkuitëty anuˈkxëdëp nanduˈun extëm ëtsäjtëm. Näˈäty päˈämbajttëp, myëmääy myëdäjtëp tijaty ets nayjyäˈäwëdëp mon tuk. Pën jam ti xynyamoˈoy oy kyamëjwiin kyakajaajëty o xyˈagujkmoˈoy xyjyotkujkmoˈoy, yëˈë netyë Jyobaa myajtunëp parë tmoˈoy tijaty yˈamdoowdëp (Prov. 12:25).

TËGOYˈÄJTPË YETYËJKJÄˈÄYËTY MËDIˈIBË TUNDËP MÄ DIOSË KYÄJPN

16. ¿Tijaty mbäädë yetyëjkjäˈäyëty nyayajtëwëdë? (Proverbios 3:27).

¹⁶ Mäjatyë kongregasionk abëtsëmy nyaxwinyëdë, tëgoyˈäjttëbë yetyëjkjäˈäyëty mëdiˈibë tundëp mä Diosë kyäjpn. Pääty pën të mnëbajnë, ¿mbäät duˈun mduny? (käjpxë Proverbios 3:27). ¿Mduumbyë mëjääw parë mdunët pyudëjkëbë mëjjäˈäy? Ets pën duˈun mduunë, ¿të xypyëjktaˈagyë mwinmäˈäny parë mdunët mëjjäˈäy?c ¿Ja tii mëdiˈibë mbäät xyˈaktuny parë mnëjkxët mä Eskuelë parë pënaty kyäjpxwäˈkxtëbë Diosë Kyutujkën? Ko mnëjkxët mä yäˈädë eskuelë, mbäät mas niˈigyë Jesus myajtunyëty. Ets pën mjënäämp ko tsip duˈun mduˈunët, anëëmë Jyobaa waˈan mdukpudëkëty ja yˈespiritë santë ets xytyunët yajxon ja tuunk mëdiˈibë tyam myajtuknipëjkp (Luk. 11:13; Apos. 20:28).

17. ¿Ti xytyukˈijxëm ko ja yetyëjkjäˈäyëty mëk jyantsy tyundë mëdiˈibë Jesus të tnayaky?

¹⁷ Ko mëk jyantsy tyundë ja yetyëjkjäˈäyëty mëdiˈibë Jesus të tnayaky, yëˈë xytyukˈijxëm ko yëˈë tyam xynyëˈëmoˈoy xytyuˈumoˈoyëm mä yäˈädë tiempë jyëjpkëxanë (Mat. 28:20). Jesus mëdiˈibë nReyˈäjtëm mëk xyjyantsy tsyojkëm, oyjyaˈay ets pääty xymyoˈoyëm ja nmëguˈukˈäjtëm mëdiˈibë mbäät xypyudëjkëm. ¿Këdii njantsy myëjjäˈäwëm ko duˈun nyajpudëjkëm? Pën duˈun, nˈokˈëxtäˈäyëm ja winmäˈäny parë ndukˈijxëm ko nyajtsobatëm. Nˈokkuˈëˈëw nˈokkukäjpxëmë Jyobaa, pes yëˈë mëdiˈibë yajkypy “tëgekyë ja oybyë ets ja tsujpë” (Sant. 1:17).