¿Ti nyikëjxmʼäjttëp diʼib pyudëjkëdëbë mëjjäʼäytyëjk?

Mä Biiblyë majtsk grupë yajnigajpxyë jäʼäy diʼib tuundëp mä naymyujkën, pënaty: “kyuentʼäjttëp ja mëbëjkpëtëjk mëdë pyudëjkëbëty” (Filipʉs 1:1). Mä tuʼuk tuʼugë naymyujkën tap yajpäättë nmëguʼukʼäjtëm diʼib duʼun tuundëp. ¿Ti tyuundëp diʼib pyudëjkëdëbë mëjjäʼäytyëjk parë ndukʼoyʼäjtëm?

Pyudëjkëdëbë mëjjäʼäytyëjk. Diʼib pyudëjkëbë mëjjäʼäytyëjk, yëʼë diʼib oy yajpatp mëdë Jyobaa, diʼib tyuumpy tijaty yajtuknipëjkp, diʼib mbäät yajtukjotkujkʼaty ets mbäät duʼun tyundë ënäʼktëjk etsë mëjjäʼäytyëjk. Yëʼë tyuundëp ja tuunk tijaty yajtukniwijtsëp mä naymyujkën ets mä ja Tëjk mäjëts nʼëxpëktë, xëmë ttundë tyäʼädë tuunk, pes nan jëjpʼam yajtunäʼäny. Duʼun ja mëjjäʼäytyëjk tmëdattë niʼigyë tiempë parë yaʼëxpëktët ets kyuentʼattët.

Tyuundëp tijaty yajtuknipëjktëp. Nääk diʼib pyudëjkëbë mëjjäʼäytyëjk, yëʼë diʼib yʼaxäjëdëp pënaty miindëp mä naymyujkën ets tmoʼoytyë lyugäär. Ets tap diʼib tuundëp mä soniidë, mä ëxpëjkpajn yajʼyaky, mä ja kuentë yajtuny ets yëʼë diʼib tyukniwijtsëdëp mä nëjkx ja nmëguʼuktëjkëtyëts kyäjpxwäʼkxtë. Nanduʼun tyundë mä wyaʼatsy ets yʼaʼoyë ja Tëjk mäjëts nʼëxpëktë ets tpudëkëdë pënaty të myëjjäʼäyëndë duʼun extëm të yajtuknipëktë. Yëʼëjëty, xondaʼakyʼää xondaʼakyjyot ttundë diʼib të yajtuknipëktë ets niʼamukëtsë nmëguʼuktëjk myëjʼixëdë mët ko mëk tyundë ets oy jyaʼayʼattë (1 Timotee 3:13).

Yäjktëbë oybyë ijxpajtën extëmë Dios mëduumbë. Diʼib pyudëjkëdëbë mëjjäʼäytyëjk, yajwinʼixtë mët ko oy jyaʼayʼattë. Ko dyajnaxtë diskursë yëʼëts xypyudëjkëdëp parëts niʼigyë nyajkëktëkëdët ja nmëbëjkën ets nan xymyooytyëbëtsë oybyë ijxpajtën ko ttukʼit ttukxondë mä kyäjpxwäʼkxtë. Ets mët ko tuʼugyë tyundë mëdë mëjjäʼäytyëjk, ta dyajjaʼʼattë tuʼugyëʼäjtën etsë jotkujkʼäjtën (Éfesʉ 4:16). Mbäät nanduʼun näʼä tyundë mëjjäʼäy mä naymyujkën.

• ¿Pënaty duʼun tuundëp diʼib pyudëjkëdëbë mëjjäʼäytyëjk?

• ¿Wiʼix tyundë ja diʼib pyudëjkëdëbë mëjjäʼäytyëjk parë oy tijaty yajtunët mä naymyujkën?