Nˈoktukxondakëm mä ngäjpxwäˈkxëm ixtëmë Jesús

1. ¿Wiˈix ëjtsäjtëm ndëgatsyˈäjtëm mëdë jäˈäyëty mëdiˈibë naytyijëdëp kristianë?

ËJTSÄJTËM, Jyobaa tyestiigëty tim tëgatsy mëdë jäˈäyëty mëdiˈibë naytyijëdëp kristianë. ¿Tiko? Yëˈko jantsy käjpxwäˈkxäˈänëm (Titʉ 2:14). Per näˈäty, mbäät kyaj ndukxondakëm ko nëjkxëm jënˈayeˈepy tëjkˈayeˈeybyë. Mbäät duˈun njäjtëm ixtëm jyënany tuˈugë nmëguˈukˈäjtëm mëdiˈibë tuump mëjjäˈäy: “Näˈäty, kyajëts ndimytsyojkënyëˈaty nëjkxët jënˈayeˈepy tëjkˈayeˈeybyë”.

2. ¿Tiko näˈäty kyaj ndukxondakëm mä nˈëwäˈkx ngäjpxwäˈkxëm?

² Taaˈäjtpë tuunk mä Diosë kyäjpn mëdiˈibë niˈigyë ndunäˈänëm ets kyaj dyuˈunëty ko nˈëwäˈkx ngäjpxwäˈkxëm. Ixtëm nˈokpëjktakëm, mbäät niˈigyë ndunäˈänëm mä yˈaˈoyë o yajkojˈyë jëën tëjk mä nˈëxpëjkëm o ko nbudëjkëm ja nmëguˈukˈäjtëm mä tijaty yˈayoˈonbëjktaˈaky. ¿Tiko? Yëˈko ënetyë nˈijxëm ti të nduˈunëm ets oy xyajnayjyäˈäwëm. Agujk jotkujk nanduˈun nnayjyäˈäwëm ko nduunmujkëm mët ja nmëguˈukˈäjtëm ets ko tkuˈëw tkukäjpxëdë pënaty nbudëjkëm. Per ko net nëjkxëm ëwäˈkx käjpxwäˈkxpë, mbäät natim jamyëm jëmëjtˈam njënˈayeˈey ndëjkˈayeˈeyënë ets kyaj nëgoo ja jäˈäy tˈokmëdowanëdë. Nnijäˈäwëm nanduˈun ko niˈigyë wyingoonˈadëtsnë ja ayoˈon, niˈigyë jäˈäy xymyëtsipˈatäˈänënë (Mat. 10:22). ¿Ti net xypyudëkëyäˈänëm ets duˈunyëm ndukxondakëm mä nˈëwäˈkx ngäjpxwäˈkxëm?

3. Ixtëm jyënaˈanyë Lukʉs 13:​6-9, ¿pën ojts mëdë Jesús nyayˈijxkijpxyëty, ets tiko?

³ Ja yˈijxpajtënë Jesús, yëˈë xypyudëkëyäˈänëm parë ndukxondakëm mä nˈëwäˈkx ngäjpxwäˈkxëm. Pes ko yajpaty yä Naxwiiny, ojts tjantsy tyukxondaˈaky ja Diosë tyuunk (käjpxë Lukʉs 13:​6-9). Jesús, yëˈë ojts mëët nyayˈijxkijpxyëty tuˈugë yeˈeytyëjk mëdiˈibë nety tëgëk jëmëjt të tkuentëˈaty tuˈugë iigë kepy, per kyaj ojts tyëëmbety. Nanduˈun yëˈë, tëgëk jëmëjt ojts tjapudëkë ja judiyëtëjk, per niwaanë ojts pyanëjkxëdë. Ets duˈun ixtëm ja yeˈeytyëjk ojts tpëjktaˈaky ja abuˈudë parë ja iigë kepy dyakëdë tyëëm, Jesús nanduˈun ojts tjotmoˈoy ja Diosë tyuunk ets tyuunë mëjääw parë ojts tˈajäˈt tjotjäˈtë ja jäˈäyëty.

4. ¿Ti nimaytyäˈägäˈänëm mä yäˈädë artikulo?

⁴ Mä yäˈädë artikulo yajnimaytyäˈägäˈäny wiˈixë Jesús ojts ttukxondaky mä yˈëwaˈkxy kyäjpxwaˈkxy, ets mas niˈigyë ko yˈakˈyajpaty tëdujk poˈo yä Naxwiiny (ixë notë de estudio mëdiˈibë miimp mä Lucas 10:1). Nˈixäˈänëm taxk pëky wiˈix dyajkyë oybyë ijxpajtën: 1) ko jëjpˈam tpëjktaky ti Jyobaa tsyojkypy, 2) ko tnijäˈäwë tijatyë nety të yajnaskäjpxë, 3) ko ttukjotkujkˈäjtyë Tyeety ko yëˈë pudëkëyanëp ets 4) ko yˈijty seguurë ko pyäädaambyë jäˈäy mëdiˈibë myëdoowaambyë oybyë ayuk.

JËJPˈAM TPËJKTAKY TI JYOBAA TSYOJKYPY

5. ¿Wiˈix ojtsë Jesús dyajnigëxëˈëky ko yëˈë nety jëjpˈam pyëjktakypy ti Jyobaa tsyojkypy?

⁵ Jesús tyukxondak ko ojts tkäjpxwaˈkxy “ja oybyë ayuk diˈibë nyigajxypy ja Diosë kyutujkën”, pes nyijäˈäwëbë nety ko yëˈë mëdiˈibë Jyobaa tsyojkypy (Luk. 4:43). Nuˈun yˈakˈyajpaty yä Naxwiiny, yëˈë ojts jëjpˈam tpëjktaˈaky mä jyukyˈäjtën, pes ojts nyijkxy “käjpn ngäjpn ets yaˈëxpëjky” (Luk. 13:22). Ojts nanduˈun ttukniˈˈixë ja yˈëxpëjkpëty ets yˈëwäˈkx kyäjpxwäˈkxtët (Luk. 10:1).

6. ¿Wiˈixë Jyobaa tˈixy ko duˈunyëm nëjkxëm ëwäˈkx käjpxwäˈkxpë oy ti tuunk nduˈunëm mä nyax kyäjpn? (Ix nanduˈunë dibujë).

⁶ Jyobaa mëdë Jesús tsyojktëp ets jëjpˈam nbëjktakëm mä nˈëwäˈkx ngäjpxwäˈkxëm (Mat. 24:14; 28:​19, 20). Tukëˈëyë ja tuunk mëdiˈibë yajtuump mä Diosë kyäjpn, yajtuny parë nyëˈëyeˈey tyuˈuyeˈeyëty mä yajkäjpxwaˈkxy ja oybyë ayuk. Ixtëm nˈokpëjktakëm, ko yajkojˈyë jëën tëjk mä nˈëxpëjkëm, yëˈë ets japë jäˈäy nyëjkxët mëdiˈibë të tˈoymyëdooy ja Diosë yˈayuk ets tˈawdattët. Nanduˈun tukëˈëyë tijaty yajtuump Betel. Ko tijaty yˈayoˈonbëjktaˈaky, nbudëjkëm ja nmëguˈukˈäjtëm ko nmoˈoyëm tijaty yajtëgoyˈäjttëp parë duˈunyëm ttuunˈadëˈëtstëdë Diosë tyuunk, ixtëm ko nyëjkxtët ëwäˈkx käjpxwäˈkxpë. Nˈokjamyajtsëm ko Jyobaa tsyojkypy ets nduˈunëm ja tuunk mëdiˈibë mas jëjpˈam: nˈëwäˈkx ngäjpxwäˈkxëm. Ko duˈun nnijäˈäwëm, yëˈë xypyudëkëyäˈänëm parë njotmoˈoyëm. János, mëdiˈibë tsënaapy Hungría ets tyuny mëjjäˈäy, duˈun jyënaˈany: “Xëmëts naytyukjamyetsyëty ko nitii tuunk duˈun kyajëjpˈamëty ixtëm ko nˈëwäˈkx ngäjpxwäˈkxëm. Yëˈë tuˈugë tuunk mëdiˈibë të nyajtuknipëjkëm”.

7. ¿Tiko Jyobaa ttsoky ets duˈunyëm nˈëwäˈkx ngäjpxwäˈkxëm? (1 Timotee 2:​3, 4).

⁷ ¿Ti mbäät xypyudëjkëm ets duˈunyëm ndukxondakëm mä ngäjpxwäˈkxëm? Yëˈë ko nˈijxëmë jäˈäy ixtëmë Jyobaa tˈixy. Pes yëˈë tsyojkypy ets nimayë jäˈäy yajtuknijawëdët ja oybyë ayuk ets tkupëktët (käjpxë 1 Timotee 2:​3, 4). Kom mbäät yajnitsoˈogëdë, päätyë Jyobaa xypyudëkëyäˈänëm ets yajxon nduˈunëmë yäˈädë tuunk. Nmëdäjtëmë foyetë Ko ntsojkëmë jäˈäy, mëdiˈibë mbäät xypyudëjkëm parë mëdë jäˈäy ndëjkëm käjpx maytyakpë etsë net nyaˈëxpëjktsondakëm, duˈuntsoow Diosmëdundët. Ets oy tyam tkakupëktët ja oybyë ayuk, mbäät nëjkx tˈoymyëdowdë mä jëjpkëjxnë ja mëj ayoˈon ko tjamyatstët ixtëmë ënety të nmëtmaytyakëm. Päätyën jyëjpˈamëty ets nˈëwäˈkx ngäjpxwäˈkxëm

NYIJÄˈÄWË TIJATYË NETY TË YAJNASKÄJPXË

8. ¿Wiˈixë Jesús pyudëjkë ko tnijäˈäwë tijatyë nety të yajnaskäjpxë?

⁸ Jesús nyijäˈäwëbë nety wiˈix yˈadëwäˈäny tijaty ojts yajnaskäjpxë mä Biiblyë, pääty tnijäˈäwë ko jeˈeyë nety yˈëwäˈkxäˈäny kyäjpxwäˈkxäˈäny tëgëk jëmëjt jakujkm (Dan. 9:​26, 27). Nan nyijäˈäwëbë nety, näˈä ets wiˈix yˈoogäˈäny mët ko agajpxyë nety yˈity (Luk. 18:​31-34). Ko Jesús tnijäˈäwë tijatyë nety të yajnaskäjpxë, yëˈë pudëjkë ets yajxon dyajtuuny ja tiempë mä ojts kyäjpxwaˈkxy parë dyajkëxët ja tuunk mëdiˈibë nety ja Tyeety të tyuknipëkyë.

9. Ko njaygyujkëm tijaty ojts yajnaskäjpxë, ¿wiˈix xypyudëjkëm parë duˈunyëm ndukxondakëm mä ngäjpxwäˈkxëm?

⁹ Ko njaygyujkëm tijaty ojts yajnaskäjpxë mä Biiblyë, yëˈë xypyudëkëyäˈänëm parë duˈunyëm ndukxondakëm mä nˈëwäˈkx ngäjpxwäˈkxëm. Nnijäˈäwëm ko yäˈädë jukyˈäjtën tim tsojk jyëjpkëxäˈäny. Tijaty ja tyam tuun jäjtëp ets wiˈixë jäˈäy jyaˈayˈattë, yëˈë xytyukˈijxëm ko duˈunën ojts yajnaskäjpxë mä Biiblyë. Ojts nanduˈun yajnaskäjpxë ko nyaymyëtsipˈatäˈänëdë ja reyë anikëjxytsyoobë mët ja reyë abatkëˈëytsyoobë, jaˈa njënäˈänëm, Reino Unido etsë Estados Unidos mëdë Rusia ets pënaty puwäˈkëdëp, ets ta tyam duˈun tyuny jyatyë (Dan. 11:40). Nnijäˈäwëm nanduˈun ko ja awinaxë tyeky mëdiˈibë yajmaytyakp mä Daniel 2:​43-45, yëˈë yˈandijpy ja gobiernë mëdiˈibë wäˈkpëtsëëmp abëtsëmy nyaxwinyëdë, jaˈa njënäˈänëm, Reino Unido mëdë Estados Unidos. Ko duˈun nnijäˈäwëm, ta net nˈijtëm seguurë ko tim tsojkë Diosë yˈAnaˈam Kyutujkën dyajkutëgoyaˈany ja anaˈambëtëjkëty mëdiˈibë yä naxwiiny. Tukëˈëyë yäˈädë, yëˈë xypyudëjkëm parë nnijäˈäwëm ti tiempë tyam ndukjukyˈäjtëm etsë net ndukjotëgoˈoyëm mä nˈëwäˈkx ngäjpxwäˈkxëm.

10. Ko nnijäˈäwëm tijaty ojts yajnaskäjpxë mä Biiblyë, ¿wiˈix nanduˈun xypyudëjkëm parë duˈunyëm ndukxondakëm mä nˈëwäˈkx ngäjpxwäˈkxëm?

¹⁰ Mä Biiblyë nan ojts jap yajnaskäjpxë ko yajkäjpxwäˈkxäˈänyë oybyë ayuk, ets yëˈë mëdiˈibë njantsy nyimaytyäˈägäˈänëm. Carrie, mëdiˈibë tuump mä República Dominicana, duˈun jyënaˈany: “Kojëts nbawinmay tijatyë Jyobaa të twandaˈaky mä ja tiempë myiny kyëdaˈaky, nëgooyë yˈoyˈäjnë, päätyëtsë net njënäˈäny ko tsojkëbëtsë jäˈäy ndukmëtmaytyäˈägët. Kojëts nˈixy wiˈixë jäˈäy tpäättë amay jotmay, tajëts nbëkyë kuentë ko tsojkëp nanduˈun tnijawëdët tijatyë Jyobaa të tyukwandäˈägëdë”. Mä Biiblyë ojts yajnaskäjpxë ko Jyobaa xypyudëkëyäˈänëm mä nˈëwäˈkx ngäjpxwäˈkxëm. Leila, mëdiˈibë tsoˈomp Hungría, duˈun jyënaˈany: “Ixtëm jyënaˈanyë Isaías 11:​6-9, yëˈëjëts xytyukniˈˈijxëp ko Jyobaa mbäät oytyim pënëty tpudëkë ets nyayajtëgatsëdët. Ets yëˈëts xypyudëjkëp parëtsë net ja jäˈäy ndukmëtmaytyäˈägët oyëts nˈixy ko kyaj jyawë tmëdowäˈäny”. Etsë Christopher mëdiˈibë tsënaapy Zambia, duˈun jyënaˈany: “Ixtëm ojts yajnaskäjpxë mä Markʉs 13:​10, ja oybyë ayuk taajën tyam yajkäjpxwaˈkxy abëtsëmy nyaxwinyëdë, ets jotkujkëts nnayjyawëty kojëts nanduˈun nyaˈˈadëy”. Mä tukëˈëyë tijaty ojts yajnaskäjpxë, ¿mëdiˈibë mijts mbudëjkëp parë duˈunyëm mˈëwäˈkx mgäjpxwäˈkxët?

TYUKJOTKUJKˈÄJT KO PUDËKËYANËBË TYEETY

11. ¿Tiko nety jyëjpˈamëty etsë Jesús ttukjotkujkˈatët ko pudëkëyanëbë Tyeety parë duˈunyëm ttukxondäˈägët mä kyäjpxwaˈkxy? (Lukʉs 12:​49, 53).

¹¹ Jesús xëmë ttukjotkujkˈäjtyë Jyobaa ko yëˈë pudëkëyanëp parë duˈunyëm ttukxondäˈägët mä yˈëwaˈkxy kyäjpxwaˈkxy. Yëˈë wintsëˈkën myëët ojts ja jäˈäy tmëtkajpxy tmëtmaytyaky, per nyijäˈäwëbë nety ko tamˈatäämp ja mëdiˈibë kyaj tˈoymyëdowäˈändë ets nibëdëˈëganëdëp (käjpxë Lukʉs 12:​49, 53). Pënaty nyiwintsënˈäjttë relijyonk, yˈaxëkˈijxtë Jesús axtë jyayaˈoogandë kanäkˈok mët ko kyäjpxwaˈkxy (Fwank 8:59; 10:​31, 39). Perë Jesús duˈunyëm ojts kyäjpxwaˈkxy mët ko nyijäˈäwëbë nety ko Jyobaa xëmë pyudëkëyaˈanyë. Yëˈë duˈun jyënany: “Kyajts naytyuˈuk [nyajpääty], ëjtsë dëˈën mëdëtsë nDeety. Pääty nimajtskëts ëëtsëty. [ . . . ] Kyajts naytyuˈuk xynyasˈixë, jaˈa kots dëˈënyëm nduny diˈibë yëˈë tsyejpy” (Fwank 8:​16, 29).

12. ¿Wiˈixë Jesús tpudëjkë ja yˈëxpëjkpëty ets duˈunyëm kyäjpxwäˈkxtët oy yajtukmëtsipˈatët?

¹² Jesús yˈanëmääy ja yˈëxpëjkpëty ko mbäädë nety ttukjotkujkˈattë Jyobaa mët ko yëˈë pudëkëyanëdëp. Ets kom nyijäˈäwëbë nety ko yajmëtsipˈatandëp, pääty kanäkˈok tˈanëmääy ko Jyobaa yëˈë mëdiˈibë pudëkëyanëdëp (Mat. 10:​18-20; Luk. 12:​11, 12). Yˈanëmääy nanduˈun ko tsojkëp mëk nyaygyuentëˈatëdët (Mat. 10:16; Luk. 10:3). Ets ko ja jäˈäy tkamëdowäˈändët ja oybyë ayuk, kyaj tiko ttukˈatsipˈattët (Luk. 10:​10, 11). Yˈanëmääy nanduˈun ko timnayjyëbëkëdëp ko nety ja jäˈäy yˈaxëktunäˈänëdët (Mat. 10:23). Jesús tyukxondak mä ojts kyäjpxwaˈkxy ets tyukjotkujkˈäjtë Tyeety, per naygyuentëˈäjtë ets kyaj ojts tˈanëjkx tˈayeˈeyë ja amay jotmay (Fwank 11:​53, 54).

13. ¿Tiko mˈity seguurë ko Jyobaa mbudëkëyanëp?

¹³ Tyam, kyaj nanduˈunë jäˈäy xyˈixäˈänëm, pääty nyajtëgoyˈäjtëmë Jyobaa nyaybyudëkë parë duˈunyëm ndukxondakëm mä ngäjpxwäˈkxëm (Diˈibʉ Jat. 12:17). Per mbäät nˈijtëm seguurë ko Jyobaa xypyudëkëyäˈänëm niduˈuk niduˈuk, pesë Jesús ojts xynyinuˈkxtakëm mä Fwank kapitulo 17. Yˈamdoow pyëjktsoowë Tyeety parë yajkuentëˈatët ja yˈapostëlëty etsë Jyobaa myëdoowˈijt. Mä Hechos o Apostʉlʉty jap yajnimaytyaˈaky wiˈixë Dios tpudëjkë ja apostëlëtëjk parë ojts kyäjpxwäˈkxtë agujk jotkujk oyë jäˈäy nyibëdëˈkëdë. Ko Jesús tmënuˈkxtakyë Tyeety, ta tˈanëmääy parë tkuentëˈatët pënaty myëbëjkypy ja oybyë ayuk mëdiˈibë kyäjpxwäˈkxtëp ja apostëlëtëjk. Mbäädë net njënäˈänëm ko Jesús ojts nanduˈun xynyinuˈkxtakëm niduˈuk niduˈuk. Pääty ijtëm seguurë ko Jyobaa yˈatsoowëmbitaampy ja Jesúsë nyuˈkxtakën ets xypyudëkëyäˈänëm duˈun ixtëm tpudëjkë ja apostëlëtëjk (Fwank 17:​11, 15, 20).

14. ¿Tiko nˈijtëm seguurë ko mbäät duˈunyëm ndukxondakëm mä ngäjpxwäˈkxëm? (Ix nanduˈunë dibujë).

¹⁴ Mä wyingoonˈadëtsnë ja kutëgoˈoyën, mbäät niˈigyë xytsyiptakxëm ets ndukxondakëm ko ngäjpxwäˈkxëm. Perë Jesús ojts xytyukwandakëm, ko nyajpudëkëyäˈänëm (Luk. 21:​12-15). Yëˈë mët ja yˈëxpëjkpëty kyaj ttukˈatsipˈäjttë jäˈäy parë tkupëktët ja oybyë ayuk, nanduˈun ëjtsäjtëm kyaj ndukˈatsipˈatäˈänëmë jäˈäy ets kyaj mëët ntsiptunäˈänëm. Taaˈäjtpë lugäär mä nmëguˈukˈäjtëm kyaj mbäät nyëjkxtë ijxnidëˈkxy ëwäˈkx käjpxwäˈkxpë, per duˈunyëm ttundë yäˈädë tuunk mët ko ttukjotkujkˈattë ko Jyobaa mëjääwmoˈoyanëdëp. Ets duˈun ixtëm yajmëjääwmooytyë ja Dios mëduumbëty mä primer siiglë, nanduˈun tyamë Jyobaa xymyëjääwmoˈoyëm parë duˈunyëm ngäjpxwäˈkxëm axtë ko yëˈë jyënäˈänët të jabäät (2 Tim. 4:17). Pääty, mbäät nˈijtëm seguurë ko pën ndukjotkujkˈäjtëmë Jyobaa, yëˈë xypyudëkëyäˈänëm parë duˈunyëm agujk jotkujk ngäjpxwäˈkxëm.

IJT SEGUURË KO PYÄÄDAAMPY JA JÄˈÄY MËDIˈIBË MYËDOWAAMBYË OYBYË AYUK

15. ¿Tiko Jesús yˈijty seguurë ko pyäädaambyë nety ja jäˈäy mëdiˈibë myëdowandëp ja Diosë yˈayuk? Oknimaytyäˈäk.

¹⁵ Jesús yˈëwxijt jyëjpˈijx ko pyäädaambyë jäˈäy mëdiˈibë myëdowandëp ja Diosë yˈayuk, pääty ttukxondaky mä ojts kyäjpxwaˈkxy. Ixtëm mä nety jyëjpkëjxnë jëmëjt 30, Jesús yˈijx ko tamë nety nimayë jäˈäy mëdiˈibë myëdoowˈitaambyë oybyë ayuk, ets yëˈë mëët ojts tˈijxkijpxyë ko ja pëjktaˈaky tyëtsnë ets jeˈeyë myukanë (Fwank 4:35). Ko nyajxy naa tuk jëmëjtën, ta tˈanëmääy ja yˈëxpëjkpëty: ‘May ja pëjktaˈaky pyëdëˈëgäˈäny’ (Mat. 9:​37, 38, TY). Ets ok, ta jatëgok jyënany: ‘Janty may ja pëjktäˈäky pyëdëˈëgaˈany [ . . . ]. Pääty miits xyˈamëdowdëty ja pëjktäˈäky ja nyiwintsën ets nyëjkxtëty ja tyuumbë ets ja pëjktaˈaky pyëdëˈëgëty’ (Luc. 10:​2, TY). Jesús ijt seguurë ko ak pëtsëmäämbë netyë jäˈäy mëdiˈibë myëdowandëbë Diosë yˈayuk, pääty jantsy jotkujk nyayjyäˈäwë ko tpaty ja mëdiˈibë yˈoymyëdoow (Luk. 10:21).

16. ¿Ti ijxpajtënë Jesús pyëjktak parë tpudëjkë ja yˈëxpëjkpëty ets yˈittët seguurë ko pyäädandëbë nety ja jäˈäy mä kyäjpxwäˈkxtë? (Lukʉs 13:​18-21; ix nanduˈunë dibujë).

¹⁶ Jesús tyukniˈˈijxë ja yˈëxpëjkpëty ko tsojkëp duˈunyëm ttukxondäˈäktët mä kyäjpxwäˈkxtë ets yˈittët seguurë ko pyäädandëbë netyë jäˈäy mëdiˈibë yˈoymyëdowandëp. Min nˈokˈijxëm majtskë ijxpajtën mëdiˈibë Jesús pyëjktak (käjpxë Lukʉs 13:​18-21). Myëduˈuk, yëˈë mä tnimaytyaky ko ja Diosë yˈAnaˈam Kyutujkën duˈun ta tuˈugë mostasë päjk mëdiˈibë yoomp ixtëm tuˈugë mëj kepyën. Mëdiˈibë Jesús ojts tnimaytyäˈägäˈäny, yëˈë ko nimay ja jäˈäy tkupëkäˈändë ja oybyë ayuk ets ko nitii kyatuˈuˈadukäˈänëdë. Myëmajtsk, yëˈë ojts mëët tˈijxkijpxyë ja lebaduurë parë dyajjaygyukëyany ko ja oybyë ayuk yajkäjpxwäˈkxäˈäny abëtsëmy nyaxwinyëdë. Ets ko mbäät ja jäˈäyë jyukyˈäjtën dyajtëgäjtsë wanaty wanaty, duˈun ixtëmë lebaduurë dyajˈyeeky ja jëtsy. Ko duˈunë Jesús tpëjktaky ja yˈijxpajtën, yëˈë ojts ttukjaygyukë ja yˈëxpëjkpëty ko mä kyäjpxwäˈkxtë jantsy oy wyimbëtsëmäˈäny.

17. ¿Tiko mbäät duˈunyëm nˈëwäˈkx ngäjpxwäˈkxëm?

¹⁷ Ko nˈijxëm wiˈix naxwinyëdë abëtsëmyë jäˈäy tkupëktë yäˈädë oybyë ayuk, yëˈë xypyudëjkëm parë duˈunyëm ndukxondakëm mä ngäjpxwäˈkxëm. Ko yajjamyetsyë Jesúsë yˈoˈkën xëëw jëmëjt jëmëjt, miyonkˈamë jäˈäy nyëjkxtë, ets tyëkëdë ëxpëjkpë mët ëjtsäjtëm. Milˈam nanduˈun tyëkëdë ëwäˈkx käjpxwäˈkxpë mët ëjtsäjtëm ets nyëbattë. ¿Ninäägë jäˈäy tˈakkupëkäˈändë ja oybyë ayuk? Kyaj nnijäˈäwëm, per mëdiˈibë nnijäˈäwëm, yëˈë ko Jyobaa taa dyajtuˈukmuky ja tëgoy myayjyaˈay mëdiˈibë tsoˈogandëp ko jyäˈtët ja mëj ayoˈon (Diˈibʉ Jat. 7:​9, 14). Jyobaa ja mëdiˈibë nyiwintsënˈäjtypy ja pëjktaˈaky, yˈijxypy ko taanëmë mayjyaˈay yˈakpëtsëmäˈändë. Pääty, ¡nˈakˈëwäˈkx nˈakkäjpxwäˈkxëm ja oybyë ayuk!

18. ¿Ti ntsojkëm ets ja jäˈäy tˈixtët?

¹⁸ Pënaty jyantsy pyanëjkxtëbë Jesús, yëˈë yajtukˈijxwëˈëmdëp ko ttukxondäˈäktë mä yˈëwäˈkx kyäjpxwäˈkxtë. Ko ja jäˈäyëty tˈijxtë wiˈix ja apostëlëty ttukxondäˈäktë mä yˈëwäˈkx kyäjpxwäˈkxtë ets dyajnigëxëˈëktë ja jotmëkˈäjtën, ta “tmëwinmäˈänybyattë ko yëˈëjëty mëët jyëdijttë Jesús” (Apos. 4:13). Ëjtsäjtëm, ntsojkëm nanduˈun ets ja jäˈäy tˈixtët wiˈixën njantsy tyukxondakëm ko nˈëwäˈkx ngäjpxwäˈkxëm, duˈun ta ojtsë Jesús ttukxondaˈagyën.