Tëjëts ndunyë mëjääw parëts nbanëjkxyë oybyë ijxpajtën

JATS nmaxuˈunkˈäjty 10 äämbë disiembrë 1936, mä siudad Wichita (Kansas, Estados Unidos). Nimäjtaxkëts ndukkaˈaxˈattë ets ëjts diˈib kaˈaxkopk. Ndeetyëts txëˈäjty William etsëtsë ndääk Jean, yëˈëjëty xëmë Dios mëduundë. Ndeetyëts ja ijty tyuny siervo de compañía, o mëjjäˈäy diˈib tijaty tyukniwijtsëp mä mëjjäˈäytyëjk. Ndäägëts yëˈë tëyˈäjtën tuknijäˈäwë nanwelëts, Emma Wagner. Yëˈë nimayë jäˈäy ttukniˈˈijxë tëyˈäjtën, niduˈuk yëˈë Gertrude Steele, diˈib ok tuun misioneera jap Puerto Ricoa (ixë notë). Tamˈäjtpë nety niganäägë jäˈäy diˈibëts mbäät nbanëjkxë yˈijxpajtën.

PËNATYËTS XYMYOOYTYË OYBYË IJXPAJTËN

Njamyejtsypyëts kojëts tëgok mëdëtsë ndeety ojts nëjkxtë käjpxwäˈkxpë sääbëdë tsuu, jatsë netyë njëmëjt mëgoxk. Yëˈëjëtsë nety nˈawäˈänëdëp pënaty näjxtëp tuˈääy ja rebistë La Atalaya etsë rebistë Consolación, diˈib tyam xëˈäjtp ¡Despertad! Mä tadë tiempë, Estados Unidos të nety ttuktëkë Segunda Guerra Mundial. Perë ndeetyëts kyaj ttuktëjkë tyäˈädë tsip. Tamëtsë nety ngäjpxwäˈkxtë ko myiiny tuˈugë doktoor diˈib naa mukëp. Tajëtsë ndeety yaˈˈanmääy ko wintseˈkyny ets ko jeˈeyë tijaty ttukkajpxy parë kyaj nyijkxy tsiptuumbë. Ta yajnimëjkooy ets yaˈˈanmääy: “¡Aber okkojxkëts, jäˈäy wyintseˈkyny!”. Mëkëts njantsy tsyëˈkë, per mëjˈixyëts njäˈäwë ko ja ndeetyëts kyaj ttimmëjpëjtaky ets duˈunyëmë jäˈäy tˈawäˈänë ja rebistë diˈibë nety jam miindëp. Ta tyäˈädë doktoor tˈanmääy tuˈugë soldäädë diˈibë nety jam näjxp: “¡Ix wiˈix xytyuny tyäˈädë jäˈäy wyintseˈkyny!”. Ja soldäädë ta tpëjkyë kuentë ko mukëbë tyäˈädë doktoor, ta tˈanmääy: “¡Nëjkxnë mä mdëjk!”. Ta ojts mëët nyijkxy. Kojëts njamyetsy, nmoobyëtsë dyoskujuyëmë Jyobaa ko tpudëjkë ja ndeetyëts parë yˈitët jotmëk. Jap Wichita ndeetyëts myëdäjtypyë nety majtskë lugäär mä jäˈäy yajkukeepy, ets diˈibë nety jap xëmë nëjkxp yëˈë ja doktoor.

Jatsë netyë njëmëjt tuktujk kojëtsë ndääk ndeety ttoˈktë ja tyëjk ets ja majtskpë lugäär mä jäˈäy yajkukeepy, ta ojts tkojtë tuˈugë tëjk diˈibë karrë pajëdojtëp. Tajëts ojts nëjkxtë mä tyëgoyˈatyë käjpxwäˈkxpë, wingon mä siudad Grand Junction (Colorado). Japëtsë ndääk ndeety pryekursoorˈäjttë ets yëˈë naytyukˈijxëdë ko tyuundë kamoty ets ko tkuentˈattë jëyujk animal. Ta jap nyaxkëdaky tuˈugë tuˈukmujkën mët ko Jyobaa pyudëjkëdë ets ko mëk tyuundë. Jats nnëbejty 20 äämbë junië 1948, ets yëˈëtsë ndeety xyajnëbajt mä tuˈugë mëjnëë, nan nëbajttë jäˈäy diˈibë nety të tnijawëdë tëyˈäjtën. Niduˈuk yëˈë Billie Nichols mëdë kyudëjk, diˈib ok tuundë sirkuitë ets ok, ta nanduˈun tyuunyë myäänk mëdë kyudëjk.

Nuˈunëts ndukfamilyëˈattë ak yëˈëjëts mëët naymyaayëdë pënaty jantsy oy Dios mëduundëp. Extëm nˈokpëjtakëm, jantsy oyëts ijty mëët naymyayëdë familyë Steele: Don mëdë Earlene, Dave mëdë Julia, etsë Si mëdë Martha. Njantsy nyimaytyäˈägandëbëts ijtyë Diosë yˈayuk mët yëˈëjëty. Mëjwiin kajaajëts xypyudëjkë ja oybyë ijxpajtën diˈibëts xymyooytyë. Xytyukniˈˈijxëdëts ko mbäät kyaj naa nëgoobë njukyˈäjtëm ets ko mbäät jotkujk nyajpatëm pën yëˈë jawyiin nbëjtakëmë Diosë Kyutujkën.

NËJKXYËTS JATËGOK WIINKTSOOW

Kojëtsë netyë njëmëjt 19, ta Bud Hasty diˈibëts nety mëdë nfamilyë nyaymyayëty xywyooyëts parëts nëjkx mëët ndundë prekursoor mä tuˈugë lugäär diˈib Estados Unidos, tajëts ojts nëjkxy. Ok, tajëts ja sirkuitë xyˈanmääytyë parëts nëjkxtët Ruston (Luisiana). Mä tyäˈädë lugäär, tapë nety nimayë Testiigëty diˈib të yˈëxtëkëwäˈknëdë. Ets ja sirkuitë jyënany parëts ndundët ja reunyonk oy pën kyaminët. Päätyëts nˈëxtääytyë tuˈugë lugäär mäjëts nduˈukmuktët ets tajëts yajxon nyaˈoˈoyëdë. Tim ogäˈän, jeˈeyëts nimajtsk nreunyonkˈäjttë ets ak ëjtsëts nyajnäjxtëp ja diskursë, mientrës tuˈuk dyajnaxy, ta ja tuˈuk yˈatsoowëmbity. Ets pën naxäämbë demostrasyonk, tajëts nimajtsk nyajnaxtë, ¡oyë nety nipënë jäˈäy diˈibëts xyˈixtëp! Per tëgok, ta myiiny tuˈugë nmëguˈukˈäjtëm diˈib mëjjäˈäy mëˈˈënäˈknë, ets ok, ta nanduˈun myiindë nääk diˈibëts nyaˈëxpëjktëp ets pënatyë nety të yˈëxtëkëwäˈknëdë. Ko waanë tiempë nyajxy, ta nyaxkëdaky tuˈugë tuˈukmujkën.

Tëgok mëdë Bud, yëˈëjëts nmëtmaytyaktë diˈib nyiwintsënˈäjtypyë Iglesia de Cristo. Tajëts tijaty xyajtëëwdë ets ojts tnigajpxy kanäägë tekstë diˈibëtsë nety kyaj nnijawë. Axëëgëts nnayjäˈäwë, per xypyudëjkëts parëts yajxon nwinmayët tijatyëts nmëbëjkypy. Tajëts tuk sëmään ojts nbayoˈoy axtë kootspäät tijatyëts nety të xyajtëy. Yëˈë diˈib niˈigyë yajkëktëjkëtsë nmëbëjkën axtë nbäädanëts jatëgokë duˈumbë jäˈäy.

Ko tiempë nyajxy, tajëtsë sirkuitë xyˈanmääy etsëts nëjkxët mä siudad El Dorado (Arkansas). Mä tuˈugë tuˈukmujkën diˈib yajtëgoyˈajtypyë naybyudëkë. Nuˈunëts jap nˈijty, kanäkˈokëts ojts nëjkxy Colorado mä yajmëjwowdë pënaty yaˈˈanmääytyëp ets syoldäädëˈattët. Tëgok, tajëts xyjamyëdäjttë prekursoorëty, per ayoˈonbattëts jap Texas ets windëgooytyaayëts ja ngarrë. Tajëts ojts nmëgäjpxtë tuˈugë nmëguˈukˈäjtëm diˈibëts xymyënëjkxtë mä tyëjk ets ok, ta mä reunyonk. Mä ja reunyonk, ta ojts yajtukkäjpxë ko tëjëts nˈayoˈonbäättë, tajëts ojts xymyoˈoytyë ja nmëguˈukˈäjtëm oy nuˈunënë meeny. Ets ja nmëguˈukˈäjtëm diˈibëtsë nety të xyajnëjkxtë mä tyëjk, ojts ttooky 25 dolar ja ngarrëts.

Ojtsëts nbäättë pënëts xymyënëjkxtëp Wichita. Japë nety tsyëënë McCartney, tuˈugë prekursoor diˈibëts mëdë nfamilyë nyaymyayëty. Yëˈë tamë nety nimajtskë myäänk, Frank mëdë Francis. Tyambäät duˈunyëmëts mëët jantsy oy naymyayëdë. Yëˈëjëts xytyukmëdoˈktë tuˈugë kyarrë 25 dolar diˈibë nety naa tuknë, extëmtsë nety ja ngarrë të yajkujuy. Duˈunëts tim ogäˈän nˈijxy wiˈixëtsë Jyobaa xymyoˈoy tijatyëts nyajtëgoyˈajtypy, mët ko yëˈëjëtsë nety jëjpˈam nbëjtakëp ja Kyutujkën. Kojëts jam nˈijty, tajëtsë tyäˈädë familyë xytyukˈixyˈäjttë Bethel Crane, tuˈugë kiixy diˈib jantsy oyjyaˈay. Yëˈë nety tyääkˈäjtypyë Ruth, tuˈugë nmëguˈukˈäjtëm diˈib jyantsy tsyojkënyëˈajtypyë Diosë tyuunk, diˈib tsënaapy Wellington (Kansas). Ruth duˈunyëm tyuuny prekursoora axtë ko netyë jyëmëjt 90. Jats nbëjky mëdë Bethel 1958, kyajnëmë nety nyaxy tuk jëmëjt mäjëtsë nayˈixyˈatëdë. Kojëts nbëjktääytyë, tajëts nimajtsk nduundë prekursoor jap El Dorado.

NGUPËJKTËTS MÄJATYËTS NYAJKAJXTË

Yëˈëjëtsë nety nbanëjkxanëdëbë yˈijxpajtënë nmëguˈukˈäjtëm diˈibëts nˈixyˈäjttë kojëts nmutskˈäjttë. Päätyëts nnayjënanëdë ko ngupëkandëbëts oytyim diˈibë tuungëty diˈibëtsë Diosë kyäjpn xymyooytyëp. Tim jawyiin, japëts nyajkajxtë prekursoor espesial Walnut Ridge (Arkansas). Ets mä jëmëjt 1962, jantsy jotkujkëts nnayjäˈäwëdë kojëts nyajwoowdë mä Eskuelë diˈib Galaad, klase 37. Nan jotkujkëts nnayjäˈäwëdë ko tuˈugyëtsë nety mëët nˈëxpëkäˈändë Don Steele. Kojëts nˈëxpëjkpëtsëëmdë, tajëts nyajkajxtë mëdë Bethel jap Nairobi (Kenia). Mon tukëts nnayjäˈäwëdë kojëts ojts ntsoˈonëdë Nueva York, per nan jotkujkëts nnayjäˈäwëdë ko ja abionk nyaxkugakë, pes tapë nety yˈawixtë ja nmëguˈukˈäjtëm.

Netyëts ojts nˈyujtë jap Kenia ets njantsy tyukxondaktëts wiˈixëts jap ngäjpxwäˈkxtë. Pënëts tim jawyiin nyaˈëxpëjktë ets yˈaxäjëdë tëyˈäjtën, yëˈë Chris mëdë Mary Kanaiya. Tyambäät duˈunyëm tmëdundë Dios jap Keniab (ixë notë). Kyum jëmëjt, tajëts nyajkajxtë Kampala, (Uganda). Ëëtsëty diˈib tim jawyiin tuundë misioneerë mä tadë paˈis. Jantsy jotkujkëts nnayjawëdë kojëts njamyatstë tadë tiempë, pes nimayë netyë jäˈäy diˈib nyijawëyandëbë tëyˈäjtën, ets nimay nyëbajttë. Jatsë nety jap kujk nˈittë África tëgëk jëmëjt ja kujkm, kojëts ja ngudëjk ojts wyeˈemy uˈunkmëët, tajëts njëmbijttë Estados Unidos. Jantsy mon tukëts nnayjäˈäwëdë kojëts ojts ntsoˈonëdë África, duˈun extëmëts nnayjäˈäwëdë kojëts ntsoˈondë Nueva York. Mëkëtsë nety ntsoktë jäˈäy diˈib África ets jënandëts ko jats näˈä njëmbittët.

TYËGÄJTSTËTS JA NJUKYˈÄJTËN

Japëts ojts nëjkxtë tsënaabyë Colorado mäjëtsë netyë ndääk ndeety yˈittë. Ko waanë yˈijty, ta myaxuˈunkˈäjtyë Kimberly ja nëëxëts diˈib kaˈaxkopk. Ets kyum 17 poˈo, ta myaxuˈunkˈäjtyë Stephany. Nbëjtaktëtsë nwinmäˈäny parëts oy nyajˈyaaktët. Päätyëts nduundë mëjääw parëts ndukniˈˈijxëdë ja tëyˈäjtën. Nanduˈunëtsë nety ndunäˈändë extëmtsë wiinkpë xymyooytyë oybyë ijxpajtën. Pes nnijäˈäwëdëbëtsë nety ko oybyë ijxpajtën mbäät mëjwiin kajaa pyudëkëdë uˈunk ënäˈk. Per nan nnijäˈäwëdëbëts ko kyaj yëˈë tˈandijy ko seguurë Dios mëdundët. Pes jotmaymyëëdëts njënäˈäny ko nimajtskëtsë nmëgaˈax ojts tmastuˈuttë Jyobaa. Nˈawijxypyëts ets ja näˈä jyëmbittët parë tpanëjkxtët ja oybyë ijxpajtën diˈibëts yajmooytyë.

Njantsy tyukxondaktëts nyajˈyaaktët ja nnëëxëty ets xëmëts mëët tijaty nduundë. Wingonëtsë nety ntsëënëdë mä siudad Aspen (Colorado). Jap tapë lugäär mä jäˈäy jyëdittë yeloty, pääty niˈamukëts ndukjäjttë. Nëjkxtëbëts ijty näˈäganäˈäty, ets japëts mët ja nnëëxëty ngäjpx nmaytyäˈäktë. Nan ntsojkënyëˈäjttëbëts ijty nëjkxtët muum kamoty parëts jam nmäˈädë winwäˈätstuuy etsëts ngäjpx nmaytyäˈäktë mäjëts jam nxamdë. Ets ko ojts yaˈkpëtsëëmnëdë, tajëts ijty xyajtëwdë extëm: “¿Tijëts ndundëp kojëtsë nety nˈyaˈkˈabajnëdë?” ets “¿pënëts nëjkx nbëktë?”. Nduundëtsë mëjääw parëts ndukniˈˈijxëdë ttsoktëdë Jyobaa. Xëmëts nˈanmääytyë ets tpëjtäˈäktëdë wyinmäˈäny parë tyundët prekursoor ets ko yëˈëyë pyëktëp ja diˈib mëët kyijpxyë wyinmäˈäny parë tmëdundëdë Jyobaa. Nan ndukjaygyujkëdëts ko mas oy ko kyaj mutsk pyëktët. Xëmëts ijty nˈanëëmëdë: “Oy ko kyaj mnapëktët, jaanëm ko xyaˈˈabattët 23”.

Mëdëtsë ngudëjk yëˈëts nbanëjkxtë yˈijxpajtënë ndääk ndeetyëts. Päätyëts nduundë mëjääw parëts ojts xëmë nwoownëjkxtë ja nnëëxëtyëts mä reunyonk ets käjpxwäˈkxpë. Nan xëmëts ijty nyajjäjtäˈäktë nmëguˈukˈäjtëm diˈib yëˈëyë aduˈuk tyuundëbë Diosë tyuunk. Ets ndukmëtmaytyaktëbëts ijty ja nnëëxëty wiˈixëts jantsy jotkujk nduundë misioneerë. Nan xëmëts nˈanmääytyë kojëts nwoownëjkxäˈändë África, ets jantsy xondaktëp ijty.

Xëmëts nˈëxpëjktë tuk familyë. Nduundaktëbëts ijty mëdëts ja nnëëxëty wiˈix mbäät tˈatsoowëmbittë ko pën ti yajtëwëdët mä eskuelë. Jyantsy tyukxondaktëp ijty ets nan kaktëp ja tsyëˈëgë. Per ko ojts yaˈknëdë, ojts näˈäty nyaygyugäjpxëdë ko kyaj yˈëxpëkäˈändë. Tëgok, tajëts ja nmaˈkxtujkënë kyejxy ets tajëts nˈanmääytyë nyëjkxtët mä kyuartë ets ko tëjëts ngaˈëxpëktë. Duˈunyë ojts wyëˈëmëdë, ta tyëjkëdë jëëy yaxpë ets jyënandë ko ëxpëkandëp. Tajëts nbëjktë kuentë ko tamë nety ogäˈän dyajtsobäättë tijatyë Jyobaa tukniˈˈijxëp. Ko tiempë nyajxy, ta mëjwiin kajaa ojts ttukxondaknëdë kojëts nˈëxpëktë tuk familyë, jaa mä ijty tnigäjpxtë wiˈix nyayjawëdë ets wyinmaytyë. Näˈäty, tap ijty diˈib kyaj tkupëkäˈändë extëmë Biiblyë tyukniˈˈixë. Mëkëts njajäˈäwëdë, per diˈib tyukˈoy, yëˈë kojëts nnijäˈäwëdë wiˈixën meerë wyinmaytyë. Tajëts ijty nmëtmaytyäˈäktë etsëts nyajwinmaytyë, ets ok, ta tkupëktë extëmë Jyobaa jyënaˈany.

NˈIJXWËˈËMDËTS KO NIˈIGYË TSYËGÄJTSYËTSË NJUKYˈÄJTËN

Jantsy pojënëts njäˈäwëdë ja xëëw tiempë nyajxy kojëts nyajˈyaˈktë ja nnëëxëty. Dyoskujuyëmë Jyobaa etsë nyax kyäjpn, tëjëts ndukniˈˈixëdë nuˈunëts të nmadäˈäktë parë ttsoktëdë Jyobaa. Jantsy jotkujkëts nnayjäˈäwëdë ko nimajtsk tyuundëjkëdë prekursoor ko dyajkëjxtë sekundaaryë ets ko nety të tjattë wiˈix këˈëm nyayˈixëdët. Jap ojts nyëjkxtë Dios mëduumbë Cleveland (Tennessee) mëët nimajtskë nmëguˈukˈäjtëm, pes jap tëgoyˈäjtpë netyë naybyudëkë. Mëkëts nbaˈˈayoowdë, per jantsy jotkujkëts nnayjäˈäwëdë ko ja jyukyˈäjtën dyajtundë mä Diosë tyuunk. Tajëts jatëgok mëdë Bethel ndukniwinmäˈäyëdë ndunäˈändë prekursoor. Kojëts duˈun nduundëjkëdë, tajëts ok nyaˈˈanmääytyë parëts ngudundëdë sirkuitë ets nan tuundëts mä asamblee.

Mä nety kyanëjkxtënëm ja nnëëxëtyëts jap Tennessee, ta ojts nyëjkxtë bakasyonkˈäjtpë Londres (Inglaterra) ets nan ojtstë Betel. Stephany ja netyë jyëmëjt 19, ta jap tˈixyˈajty tuˈugë betelitë diˈib xyëˈäjtypy Paul Norton. Ets ko jatëgok yˈojtstë Inglaterra, ta Kimberly tˈixyˈajty tuˈugë betelitë diˈibë xyëˈäjtypy Brian Llewellyn, diˈibë nety tuump mëdë Paul. Ko Stephany dyaˈˈabejtyë jyëmëjt 23, ta pyejky mëdë Paul. Ets ko nyajxy tuk jëmëjt, ta Kimberly pyejky mëdë Brian, ja netyë jyëmëjt 25. Pääty, nimajtsk ja pyëjktë ko netyë jyëmëjt të nyäjxnëdë 23. Jantsy jotkujkëts nnayjäˈäwëdë ko tpattë oybyë jyamyëët.

Nnëëxëtyëts duˈun jyënäˈändë ko yëˈë të pyudëkëdë ja ijxpajtën diˈibëts të nmoˈoytyë ets diˈib mmooyëdë ja nyanwelë tyatwelë parë jawyiin të tpëjtäˈäktë Diosë Kyutujkën, oy näˈäty dyaˈˈamääytyäˈäktë meeny sentääbë (Matewʉ 6:33). Abril mä jëmëjt 1998, ta Paul mëdë Stephany yajwoowdë mä Eskuelë diˈib Galaad klase 105, ets ok ta yajkajxtë Malaui, tuˈugë paˈis diˈib África. Nan jaa mä tadë tiempë, Brian mëdë Kimberly yajwoowdë mä Betel diˈib Londres. Ets ok, ta yajkajxtë mä Betel diˈib Malaui. Jantsy jotkujkëts nnayjäˈäwëdë kojëts ja nnëëxëty yajxon dyajtundë ja jyukyˈäjtën.

NYAJMOˈOYTYËTSË WIINKPË TUUNK MÄ DIOSË KYÄJPN

Eneerë 2001, tajëts ojts xymyëgajpxyë nmëguˈukˈäjtëm Marais diˈibëts të nmaytyaktsoony. Tyäˈädë nmëguˈukˈäjtëm yëˈë nyikëjxmˈäjtypyë Departamento de Servicios de Traducción. Tajëts xytyukmëtmaytyaky ko pënaty tuundëp mä tyäˈädë departamentë, yëˈë nety yakandëp tuˈugë kursë ets yajpudëkët abëtsemy nyaxwinyëdë pënaty kyäjpxnäjxtëbë ëxpëjkpajn wiink ayuk parë yajxon tjaygyukëdët diˈib kyäjpxnäjxtëp. Jatsë netyë njëmëjt 64, ets yëˈëjëtsë nety xymyoˈoyandëp ja kursë parëts ëjts ndukniˈˈixët pënaty käjpxnäjxtëp. Tajëts mëdë ngudëjk nmënuˈkxtakyë Jyobaa ets nan ojtsëts nmaytyäˈäktë mëdëtsë ndäägëty parëts nˈamdoowdë käjpxwijën. Oyë nety nimajtsk të myëjjäˈäyëndë ets dyajtëgoyˈatäˈändë ja naybyudëkëtyëts, ojtsëts xykyaxtë. Tajëts ojts ngajpxy Patterson parëts ngupëjktë tyäˈädë tuunk xondaˈakyˈääw xondaˈakyjyot.

Per tajëts ja ndääk tnijäˈäwë ko yëˈë myëdäjtypyë kanser. Tajëts mëët nmaytyaky etsëts nˈanmääy ko mas oy kojëts nwëˈëmdët parëts nguentˈattët etsëts mëët naybyudëkëdët ja nmëgaˈax Linda. Per ja ndäägëts kyaj tkupëjky, duˈunëts xyˈanmääy: “Mas axëëgëts nnayjawëyaˈanyëty pën kyaj mnëjkxtë”, etsë Linda nanduˈun jyënany. Päätyëts ojts nëjkxtë Patterson. Mëjwiin kajaats nmooytyë dyoskujuyëm ko duˈun jyënandë ets nan nmooytyëtsë dyoskujuyëm ja nmëguˈukˈäjtëm diˈib pudëjkëdë. Jeˈeyëtsë nety tukxëëwnëm nˈittë Patterson, kojëtsë Linda ojts xymyëgajpxy ko tëjëts ja ndääk yˈoˈknë. Per duˈunëts nduundë extëmtsë nety ja ndääk të xyˈanëëmëdë, niˈigyëts ja nwinmäˈäny nbëjtaktë mä diˈibëts nety nduundëp.

Jantsy jotkujkëts nnayjäˈäwëdë kojëts nyajkajxtë mä Betel diˈib Malaui, pes japë nety yˈittë ja nnëëxëtyëts mët ja myëmëjjäˈäyëty ets japëtsë nety nyakäˈändë ja kursë. Jantsy jotkujkëts nnayjäˈäwëdë kojëts jatëgok tuˈugyë nyajpattë. Ok, tajëts nyäjktë ja kursë jap Zimbabue, ets ok Zambia. Jatsë nety kujk tëgëk jëmëjt ja kujkm nyaktë ja kursë, kojëts nyaˈˈanmääytyë etsëts jatëgok njëmbittët Malaui. Yëˈëjëts jap njääytyë nmëguˈukˈäjtëmë yˈeksperiensyë diˈibë nety të yajpajëdittë mä tyäˈädë paˈis mët ko kyaj ttuktëkëyäˈändë politikëc (ixë notë).

Jantsy mon tukëts jatëgok nnayjäˈäwëdë kojëts ojts ntsoˈonëdë África mä jëmëjt 2005. Tajëts njäjttë mäjëtsë ndëjk jap Basalt (Colorado). Tyambäät japëts ndundë prekursoor mëdë Bethel. Mä jëmëjt 2006, ta Brian mëdë Kimberly tsyënaaytyaknbëjktë ndëjkpëˈääyëts parë dyajˈyaaktë nimajtskë nyëëx, Mackenzie etsë Elizabeth. Paul mëdë Stephany japyëm tyundë Malaui, Paul yëˈë tuump Komitee mä Sukursal. Jats tyamë njëmëjtnë naa 80 ets jantsy jotkujkëts nnayjawëty ko näägë ënäˈktëjk diˈibëts mëët nduundë, yëˈë tyam nyikëjxmˈäjttëp diˈibëts ijty nduumpy. Parëtsë nnëëxëty etsëtsë nˈokˈënäˈkëty të nmoˈoytyë oybyë ijxpajtën, xëmëts të ndundë mëjääw parëts të nbanëjkxtë oybyë ijxpajtën diˈibëts xymyooytyë wiinkpë Dios mëduumbëty. Päätyëts agujk jotkujk të njukyˈattë.