TIJATYË ËNÄˈKTËJK NAYAJTËËWËDËP
¿Tidaa ko yˈoyëty nëjkxëm mä yˈëxpëktë Jyobaa tyestiigëty?
Jyobaa tyestiigëty majtskˈok tyuˈukmuktë tuˈukpë sëmään. ¿Wiˈix jap yˈëxpëktë? ¿Wiˈix mbudëkëyaˈanyëty ko jap mnëjkxëty?
¿Ti tyuundëp mä tyuˈukmuktë?
Yëˈë jap näjxpë ëwij käjpxwijën diˈib yajpatp mä Biiblyë, ko jap mnëjkxëty mbudëkëyanëp parë:
Xynyijawët ja tëyˈäjtën mä pënën Dios.
Xyjaygyukët tiko tyam duˈun tijaty tyuny jyatyëty.
Mˈitët oyjyaˈay.
Xypyäädëdë oybyë mëtnaymyaayëbë.
¿Mnijäˈäwëbë nety? Diˈib mas niˈigyë yajmaytyakp mä tyuˈukmuktë Jyobaa tyestiigëty, yëˈë Diosë yˈAnaˈam Kyutujkën (Matewʉ 6:9, 10; 24:14; Lukʉs 4:43).
¿Tiko yˈoyëty ets mnëjkxët?
Jaˈko tijaty jap näjxp mbudëkëyanëp. Ja ëwij käjpxwijën diˈib jap näjxp, mbudëkëyanëp parë mˈitët wijy (Proverbios 4:5). Tyääbë yëˈë yˈandijpy ko Biiblyë mnëˈëmoˈoyan mduˈumoˈoyanëp mä mjukyˈäjtën, ets nan yˈatsoowëmbijtypy tijaty nnayajtëˈëwëm extëm:
Sëmäängëxy nan näjxpë diskursë mä yajnimaytyaˈaky extëm:
¿Tiko mbäät nnaytyuktuˈumoˈoyëm ja käjpxwijën diˈib yajpatp mä Biiblyë?
¿Pën mbäät nˈaˈoˈkëm ko nbatëmë amay jotmay?
¿Ti tyam xytyukmëduˈunëmë Diosë yˈAnaˈam Kyutujkën?
Brenda jyënaˈany: “Tuˈugë nmëguˈugëts diˈibëts mëët nˈeskuelëˈaty myiiny mä tuˈukmujkën. Ta nyaxweˈtsy nbëˈääyëts etsëts mëët nˈijxmujky ja liibrë. Ok, tats xyˈanmääy ko diˈib mëjˈixy jyäˈäwë, yëˈë ko ja nmëguˈukˈäjtëm tkonëˈëktë kyëˈë ets yˈatsoowëmbittë. Nenduˈunëts xyˈanmääy ko mä tsyäjptëjk kyaj tmëdattë ëxpëjkpajn extëm ëtsäjtëm”.
¿Mnijäˈäwëbë nety? Mä yˈëxpëktë Jyobaa tyestiigëty kyaj yaˈˈamdoyë meeny sentääbë, mbäät namayˈäjtën mdëkë.
Pënaty jap mˈixyˈataampy mbudëkëyanëp. Biiblyë jyënaˈany ko pääty nduˈukmujkëm parë nnaymyëjääwmoˈoyëm nixim niyam (Ebreeʉsʉty 10:24, 25). Jantsy jotkujk nnayjyäˈäwëm ko nduˈukmujkëm mëdë jäˈäy diˈib tsyojktëbë Dios etsë myëguˈuktëjk, pes may tyamë jäˈäy kyaj tmëmay tmëdäjtë jyiiky myëguˈuk.
Elisa jyënaˈany: “Kots näˈäty ngutsuˈujënë mon tukëts nnayjyawëty ets tëts nˈanuˈkxënë, per kots nëjkxy mä tyuˈukmuktë Jyobaa tyestiigëty oyëts japë jäˈäy xyajnayjyawëdë. Kots njëmbijnë mäts ndëjk jotkujkëts nnayjyäˈäwënë ets listë parëts ja jakumbom nwinguwäˈägët ja jukyˈäjtën”.
¿Mnijäˈäwëbë nety? Abëtsemy nyaxwinyëdë ja jyaˈˈaty 120,000 naxyë tuˈukmujkën ets 60,000 naxyë lugäär mä ryeunyonkˈattë. Të yajwijtspëtsëmy ko mä tuˈukpë jëmëjt, ja yajkojˈyë Tëjk mä yˈëxpëktë Jyobaa tyestiigëty naa 1,500 mët ko niˈigyë nyimayëdë.a
a Pën mnijawëyaampy mä tyuˈukmuktë tëkë yä “Tyuˈukmuktë Jyobaa tyestiigëty” ets ta net xymyoˈoyëdë klik mä jyënaˈany “Ëxtäˈäy mä wingon mwëˈëmxëty”.