Jacob pyat mayë amay jotmay. Extëm ja nimajtskpë myäänk, Simeón mëdë Leví, yajnibaxëtëjkëdë ja fyamilyë ets nanduˈunë Jyobaa xyëëw. Jacob ojts nanduˈun yˈooky ja kyudëjk Raquel, ko nety dyajmaxuˈunkˈaty ja myëmajtskpë yˈuˈunk. Ets ko Jacob ojts myëjjäˈäyënë, ta ojts nyëjkxnë Egipto mët ko jyamˈäjty ja yuu mä ja yˈit lyugäär (Gén. 35:​16-19; 37:28; 45:​9-11, 28). Oy duˈunë Jacob tˈokpatyë amay jotmay, duˈunyëm tmëbëjkyë Jyobaa ets tijaty tukwandakë. Etsë Jyobaa tukˈijxë ko kupëjkëbë nety. Extëm nˈokpëjktakëm, mëjwiin kajaa myooyë ja jyukyˈäjt myadakën. Seguurë ko Jacob kyuˈëˈëw kyukäjpxë Jyobaa ko jatëgok nyaybyatë mët ja yˈuˈunk José, pes të nety nyäjxnë kanäk jëmëjt mä kyaj tˈokˈijxnë. Jacob myëmadak ja amay jotmay mët ko mëkë nety tmëdatyë mëbëjkën mä Jyobaa (Gén. 30:43; 32:​9, 10; 46:​28-30). Ëtsäjtëm, mbäät nanduˈun nmëmadakëmë amay jotmay pën mëk nmëdäjtëm ja mëbëjkën. w23.04 paj. 15 parr. 6, 7

Mä yäˈädë tekstë japë David ojts tnigajpxy ko Jyobaa mëkë nety tsyokyëty, ko jantsy oy yˈijxˈity kyuentëˈatyëty ets ko jantsy oy mëët yˈity. Duˈun jyënany: “Jyobaa yëˈëts nBastoorˈäjtypy”. David kyaj tsyëˈkë mët ko yëˈë Jyobaa tyukjotkujkˈäjt ets nëˈëmooy tuˈumooyë. Nyijäˈäwëbë nety nanduˈun ko xëmë tsyokäˈänyëty. Min nˈokˈijxëm tiko duˈun ttukjotkujkˈäjty. David ijt seguurë ko Jyobaa mëkë nety tsyokyëty mët ko xëmë myooyë tijatyë nety yajtëgoyˈajtypy. Nyijäˈäwëbë nety ko oy mëët nyayjyawëty ets ko kupëjkëp. Pääty ijt seguurë ko oy ti tyun jyatëdët, Jyobaa xëmë nety myoˈoyaˈanyëty tijaty yajtëgoyˈajtypy. Ko David tnijäˈäwë ko Jyobaa tsojkëp ets ko ijxˈitan kuentëˈatanëp, yëˈë pudëjkë parë agujk jotkujk nyayjyäˈäwë ets kyaj ti tmëmay tmëdäjët (Sal. 16:11). w24.01 paj. 28, 29 parr. 12, 13

Ko nyajxyë tsip mä Segunda Guerra Mundial, ta ja Diosmëduumbëty niˈigyë ojts yˈëwäˈkx kyäjpxwäˈkxnëdë, duˈunën mayë jäˈäy të tˈixyˈattë Jyobaa ets tmëdundë. Ets tyam, nanduˈunyëm yajkäjpxwaˈkxyë Diosë yˈayuk abëtsëmy nyaxwinyëdë. Pënaty Wyoowˈyoˈoytyëbë Diosë kyäjpn, yëˈë Jesus naytyuknëˈëmooy naytyuktuˈumooyëdëp. Yëˈëjëty tyuundëbë mëjääw parë tnëˈëmoˈoy ttuˈumoˈoytyë myëguˈuktëjk extëmë Jyobaa mëdë Jesus ttsoktë, mët yëˈëgyëjxm ja sirkuitë ets pënaty tuundëp mëjjäˈäy. Pënaty nëjkxandëp tsäjpotm ets niˈamukë pënaty tuundëp mëjjäˈäy, yˈaˈoygyëˈëjoty myëdatëdë Jesus (Diˈibʉ Jat. 2:1). Kom pokyjyaˈay yajpäättë, mbäät nanduˈun tyëgoytyë extëm jyäjttë Moisés, Josué etsë apostëlëty (Núm. 20:12; Jos. 9:​14, 15; Rom. 3:23). Nnijäˈäwëm ko Jesus yëˈë nyëˈëmoopy tyuˈumoopy ja tuumbë mëdiˈibë kuwijy ets nanduˈun ja nmëguˈukˈäjtëm mëdiˈibë tuundëp mëjjäˈäy. Ets duˈunyëm ttunäˈäny, pääty nˈoktukjotkujkˈäjtëm. w24.02 paj. 23, 24 parr. 13, 14