Mbäät nanduˈun nduˈunëm extëm ja Jesusë yˈëxpëjkpëty ko ja kuduunktëjk dyajkuboktët nˈëwäˈkx ngäjpxwäˈkxëm. Ëtsäjtëm, mbäät nanduˈunë Jyobaa nˈamdoˈowëmë wijyˈäjtën etsë jotmëkˈäjtën. Ets nˈijtëm seguurë ko xypyudëkëyäˈänëm parë duˈunyëm ngäjpxwäˈkxëm. Nˈokˈanmäˈäyëmë Jyobaa parë xypyudëjkëm ets nmëmadakëmë amay jotmay. Tyam wiˈixëmë amay jotmay nbatëm, waˈan nyubajt nbäˈämbajtëm, yˈoogyë jëëky mëguˈuk, jyamˈatyë jotmay mä familyë ets ko nyajtukmëtsipˈäjtëm ko nDiosmëduˈunëm. Per niˈigyë nˈamaybyat njotmaybyatëm ko jyaˈˈatyë päˈäm mëdiˈibë ninäjxp ets ko xitsoow yatsoowë jäˈäy tsyiptundë. Pääty mëdiˈibë mbäät xytyuny, yëˈë xyaˈˈawäˈätsëdë mjot mgorasoon ets xytyukmëtmaytyäˈägëdë Jyobaa wiˈix mnayjyawëty. Duˈunxyëp extëm xytyukmëtmaytyaˈaky tuˈugë mmëtnaymyaayëbë. Ets mbäät mˈity seguurë ko Jyobaa mbudëkëyanëp (Sal. 37:​3, 5). Ko xëmë nnuˈkxtakëm, mbäät xypyudëjkëm parë nmëmadakëmë amay jotmay (Rom. 12:12). Jyobaa nyijäˈäwëp wiˈix jyat kyëbattë pënaty mëduunëdëp ets “myëdoopy ko yˈamdoy pyëjktsoyëtyë naybyudëkë” (Sal. 145:​18, 19). w23.05 paj. 5, 6 parr. 12-15

Ko jam ti nduknibëjktakëm, tsojkëp yajxon nbayeˈeyëm “tidënë Jyobaa tsyojkypy” o wiˈixën wyinmay, taanëmë net nduˈunëm (Efes. 5:​17, TNM). Ko mä Biiblyë nˈëxtäˈäyëm ja ëwij käjpxwijënë mëdiˈibë mbäät xypyudëjkëm, yëˈë nety nnijawëyäˈänëm wiˈixë Jyobaa wyinmay, pën oy ti ndunäˈänëm o kyaj. Ko nguytyuˈunëm ja Biiblyë yˈëwij käjpxwijën, nëjkxëp yˈoybyëtsëmy tijaty nduknibëjktakëm. Satanás, yëˈë jyatsojkypy ets kyaj tiempë nmëdäjtëm parë nmëduˈunëmë Dios (1 Fwank 5:19). Mbäät pojënë nnaytyukwinˈëˈënëm ja meeny sentääbë, tuunk o ko nˈëxpëjkëm mä eskuelë, ets kyaj nekyjyotmoˈoyëm ja Diosë tyuunk. Pën duˈun njäjtëm, yëˈë nety xytyukˈijxëm ko tam kujk xynyinäjxëm wiˈixë naxwinyëdë jäˈäy wyinmaytyë. Kyaj wyiˈixëty ko nduˈunëm, nmëdäjtëmë meeny sentääbë o nˈëxpëjkëm eskuelë, per kyaj yëˈë mbäät jëjpˈam nbëjktakëm mä jukyˈäjtën. w24.03 paj. 24 parr. 16, 17

Yäˈädë tekstë majtsk pëky mëdiˈibë nyigajpxypy: 1) ko ja oyjyaˈay pyattëbë amay jotmay ets 2) ko Jyobaa yëˈë yaˈˈawäätspëtsëëmëdëp. Tuk pëky mëdiˈibë Jyobaa tyuumpy parë xyaˈˈawäˈätspëtsëˈëmëm mä ja amay jotmay, yëˈë ko xytyukˈijxëm ko duˈunën nbäädäˈänëmë amay jotmay mientrës njukyˈäjtëm. Jyobaa xyˈanmäˈäyëm ko agujk jotkujk nyajpäädäˈänëm ko nmëduˈunëm. Per kyaj yëˈë tˈandijy ko kyaj nekypyäädäˈänëmë amay jotmay (Is. 66:14). Mëdiˈibënë Dios tsyojkypy, yëˈë ets jamyë jot winmäˈäny nbëjktakëm mä jukyˈäjtën mëdiˈibë miimp këdakp, ets yëˈënë duˈumbë jukyˈäjtën xytyukmëtsojkëm (2 Kor. 4:​16-18). Per mientrës jyaˈtyë yäˈädë tiempë, Jyobaa xypyudëjkëm tuˈuk tuˈugë xëëw parë nmëmadakëm ja amay jotmay (Lam. 3:​22-24). ¿Ti xytyukniˈˈijxëm ja yˈijxpajtënë Diosmëduumbëty mëdiˈibë yajmaytyaktëp mä Biiblyë ets nanduˈun pënaty tyam Diosmëduundëp? Ko mbäät ajotkumonë nbatëmë amay jotmay, per mbäät nmëmadakëm pën ndukˈijxpajtëmë Jyobaa (Sal. 55:22). w23.04 paj. 14, 15 parr. 3, 4