Kyaj yëˈë tmaytyäˈägäˈäny ko Jyobaa xytyukxondakëm ko nbatëmë amay jotmay, mëdiˈibën tyukxondakypy yëˈë ko nmëmadakëm. ¿Këdii mjotkujkmooyëp ko xynyijawë ko Jyobaa jotkujk nyayjyawëty ko nmëmadakëm ja amay jotmay ets ko kyaj nmastutëm? (Sal. 5:12). Jyobaa kyupëjkë Abrahán mët ko tmëmadaky ja amay jotmay mëdiˈibë wyinguwäˈkë. Yajnäjxë wäˈäts ets oy mëët yˈijty (Gén. 15:6; Rom. 4:​13, 22). Nanduˈunën jyaty mët ëtsäjtëm, kyaj Dios xykyupëkäˈänëm mët ko jam ti tuunk nikëjxmˈäjtëm mä nduˈukmujkëm o mët ko oy njantsy Diosmëduˈunëm. Netën xykyupëkäˈänëm pën nmëmadakëm ja amay jotmay ets pën kyaj nmastutëm. Ets mbäät duˈun niˈamukë nduˈunëm oy ti njäjt nnijäˈäwëm, oy wyiˈixëty ja xëëw jëmëjt ets oy wiˈixëm ja amay jotmay nwinguwäˈkëm. ¿Jam tyam xypyaatyë amay jotmay? Pën jam, jamyats ko Jyobaa kyaj mmastuˈudäˈänyëty, per net pën kyaj nanduˈun xymyastuˈuty. Ko nnijäˈäwëm ko Jyobaa agujk jotkujk nyajnayjyäˈäwëm, ta mas niˈigyë nmëbëjkëm tijaty nˈëwxijt njëjpˈijxëm. w23.12 paj. 11 parr. 13, 14

Jat wiˈix oy mgäjpx mmaytyäˈägët. Niˈamukë yetyëjkjäˈäy oy ko tjattët wiˈix oy kyäjpx myaytyäˈäktët, yäˈädë yëˈë yˈandijpy tmëdoowˈittët wiˈix jam yajmëtmaytyäˈäktë, tjaygyukëdët wiˈix wyinmaytyë ja myëguˈuktëjk ets wiˈix nyayjyawëdë (Prov. 20:5). Parë xynyijawët, oy ko xyˈixët wiˈix ja nmëguˈukˈäjtëm ja wyiin jyëjp ttuny, ja yˈääw yoˈkn tpëjktaˈaky ets wiˈix mëtkajpxy mmëtmaytyaˈagyëty. Yäˈädë yëˈë yˈandijpy ko tsojkëp mëët myajpäädët, per pën jeˈeyë xynyijayë mä korree, xytyuknigexyë mensaje ets kyaj mëët duˈun mgajpxy myaytyaˈaky mas niˈigyë mtsiptäˈägäˈänxëty. Pääty oy ko xytyunëdë mëjääw ets këˈëm mëët ndimykyäjpx mdimymyaytyäˈägët (2 Fwank 12). Tuˈugë Diosmëduumbë tsojkëp nanduˈun tˈixët ti nyijukyˈataampy ets ti tyukˈixaampy ja fyamilyë (1 Tim. 5:8). Pääty oy ko ti xyjyatët ets yëˈë net mnijukyˈatëp (Apos. 18:​2, 3; 20:34; Éfes. 4:28). Tun mëk ets këdii jeˈeyë tijaty xytyuunˈawë, net nëjkx myajtukjotkujkˈaty ets xypyaatyë mduunk. w23.12 paj. 27 parr. 12, 13

Ko mä Biiblyë yajmaytyaˈagyë “Jyobaa myëj xëëw”, yëˈë yˈandijaampy ko jyäˈtët ja tiempë mä Jyobaa dyajkutëgoyaˈanyë myëtsipëty ets mä dyajnitsoˈogäˈäny ja kyäjpn, extëm tëëyëp ojts duˈun tˈoktuumbë (Is. 13:​1, 6; Ezeq. 13:5; Sof. 1:8). “Jyobaa myëj xëëw” ja tsyondäˈägäˈäny ko nety kyutëgooytyaˈay tukëˈëyë ja relijyonk mëdiˈibë kyaj tyëyˈäjtënëty ets kyugëxëyaˈany mä Armajedon. Parë ntsokwëˈëmëm mä yäˈädë ayoˈon tyunäˈäny jyatäˈänyëty, jëjpˈam ets desde tyam nnayjyëjpˈijxëm. Jesus ojts jyënaˈany ets kontiempë nnayjyëjpˈijxëm ko nety tsyondaˈaky ja “mëk ayoˈon”, ets ko tsojkëp xëmë duˈun nduˈunëm parë kyaj nnaygyumanäjxëm (Luk. 12:40; Mat. 24:21). Apostëlë Pablo ojts dyajtuny kanäägë ijxpajtën mä Primera Tesalónikʉ parë tpudëjkë ja Diosmëduumbëty ets nyayjyëjpˈixëdët ko jyäjtët ja Jyobaa myëj xëëw. Pablo nyijäˈäwëbë nety ko jekyë tiempë yˈaknaxäˈäny parë myinët ja kutëgoˈoyën (2 Tes. 2:​1-3). Per ojts tˈanëëmë ja myëguˈuktëjk parë nyayjyëjpˈixëdët extëmxyëp jyawë tyimwingoonë ja kutëgoˈoyën. Ëtsäjtëm, tsojkëp nanduˈun tyam nmëmëdoˈowëm extëmë Pablo jyënany. w23.06 paj. 8 parr. 1, 2