Jesus dyakyë käjpxwijën mä tuˈugë kopk

Ko netyë Jesus të twinˈixy ja nimäjmajtskpë yˈapostëlëty, ta jyënajky kopkëjxy ets ojts nyijkxy mä nety ja mayjyaˈay të tyuˈukmuktë. Ja jäˈäyëty jamë nety tsyoondë Galilea, Judea, Tiro, Sidón, Siria ets diˈib jatsoo tsoˈondëp mä mëjnëë diˈib xyëwˈäjtypy Jordán. Dyajmiindë jäˈäy diˈib yuumëët päˈämmëët o diˈibë nety yaˈˈayoowëdëbë kaˈoybyë etsë Jesus yaˈˈagëdakëdë. Ta nyaxweˈtsy kopkpëˈääy ets tmëtmaytyaktsoˈonyë jäˈäy. Yëˈë nyimaytyak ti mbäät nduˈunëm pën nnaymyayäˈänëm mëdë Dios. Oy ko nˈijxëm ko nyajtëgoyˈäjtëmë Jyobaa ets nnijäˈäwëm ti mbäät nduˈunëm parë ntsojkëm. Per kyaj mbäät ntsojkëmë Dios pën kyaj ntsojkëmë nmëguˈukˈäjtëm. Tsojkëp oy tijaty nduˈunëm ets nˈijtëm oyjyaˈay axtë mëdë jäˈäy diˈib xymyëtsipˈäjtëm.

Jesus jyënany: “Kyaj yëˈëyë xytsyokëdë mëtnaymyaayëbë, nan mtsokëp ja mëtsip ets xypyokymyaˈkxët amumduˈukjot. Ets pën ja pën xyyajjotˈambëky, netyë ninëjkx parë xyˈamdowëdë maˈkxën. Duˈun jäˈäyˈat mëdë mëguˈuk extëm xytsyoky jyaˈayˈatët mët mijts”.

Jesus nan yäjkë käjpxwijën mä wiˈix mbäät nˈijxëm tijaty nmëdäjtëm. Jyënany: “Niˈigyë jyëjpˈamëty nnaymyaˈayëm mëdë Jyobaa ets kyaj dyuˈunëty ko nmëdäjtëm mayë meeny sentääbë. Yëˈko mbäädë maˈtspë tmënëjkxyë meeny sentääbë, per ko mëdë Jyobaa mnaymyayëdët nipën mgapëjkxëdët. Pääty këdii nëgoo xymyëmay xymyëdäjˈyë mgäˈäy mˈukën o mwit mxox. Okˈixë joon jëyujk. Dios yëˈë xëmë mooyëdëbë jyeˈxy pyeky. Pes kyaj mbäät xyyajˈyonyë mjukyˈäjtën ko xymyëmay xymyëdäjët. Jamyats ko Jyobaa nyijäˈäwëp tijaty xëmë myajtëgoyˈajtypy”.

Nipënnëmë nety duˈun tkamëdoy extëmë Jesus myaytyaky. Pes kyaj nety duˈun tyukniˈˈixëdë ja diˈib nyiwintsënˈäjttëbë relijyonk. ¿Tiko Jesus jantsy oy yaˈëxpëjky? Yëˈko tukëˈëyë diˈib tukniˈˈijxë jamë nety tsyoony mä Jyobaa.