¿Wiˈix mbäät nyajkëm ja oybyë ijxpajtën?
1. ¿Ti ijxpajtënë myooyë Jesus ja yˈëxpëjkpëty?
1 Jesus jyënany: “Kupëktë tyäˈädë kukapë diˈibëts ëj nbëjtakypy mä miitsëty, es ëxpëktë [...] ja nduˈunënëts” (Mat. 11:29). Yä nbëjkëmë kuentë ko Jesus kyaj jeˈeyë ojts tnaskäjxë tijaty yajtunäämp. Nˈokwinmäˈäyëm tijaty jyäjttë ja yˈëxpëjkpëty ko tˈijxtë wiˈix tijaty ttuuny. Jesus ajiiky amëguˈuk yˈijty, oyjyaˈay ets tsyojkë jäˈäy (Mat. 8:1-3; Mar. 6:30-34). Yujy tudaˈaky yˈijty (Fwank 13:2-5). Ko mët ja yˈëxpëjkpëty ojts yˈëwäˈx kyäjxwäˈxtë, ta tˈijxtë ko Jesus jantsy tuumbë jäˈäy ets ko jantsy oy tyukniˈˈixë ja tëyˈäjtën (Luk. 8:1; 21:37, 38). Ets ëtsäjtëm, ¿ti ijxpajtën nyäjkëm mä ndëjkˈayoˈoyëm?
2. Nigäjx wiˈix mbäädë jäˈäy pyudëkëty ko xyˈijxëm wiˈix naywyit nayxyojxëm ets wiˈix njäˈäyˈäjtëm.
2 Jäˈäy diˈib nmëtmaytyakëm. Mbäädë jäˈäy mëjwiin kajaa pyudëkëty ko xyˈijxëm adëyë naywyit nayxyojxëm, ko oy njäˈäyˈäjtëm ets ko naytyukjotmaytyuˈunëm mët yëˈë (2 Kor. 6:3; Fili. 1:27). Nan yˈijxtëp ko nyajtuˈunëmë Biiblyë, ets jantsy oy nyayjawëdë ko mëdë wintsëˈkën nmëdoˈoˈijtëm wiˈix xyˈanmäˈäyëm. Nˈokjamyajtsëm ko jëjpˈam ets duˈun nduˈunëm parë jäˈäy tmëdooˈitët ja tëyˈäjtën.
3. Nigäjx wiˈix mbäät mëjwiin kajaa nbudëjkëmë nmëguˈukˈäjtëm.
3 Nmëguˈukˈäjtëm diˈib mëët nˈëxpëjkëm. Mëjwiin kajaa nanduˈun nbudëjkëmë nmëguˈukˈäjtëm ko tˈixtë wiˈix tijaty nduˈunëm. Extëm ko ndukxondakëmë Diosë tyuunk, ta nanduˈun ndukninäjxëm. Ets duˈun extëm tuˈugë pujx dyajjëjpë myëëbujxn, nanduˈun jyaty mëdë nmëguˈukˈäjtëm. Extëm ko xyˈijxëm nmëtmaytyakëmë jäˈäy jantsy oy mët ko jawyiin të nˈëxpëjkëm, mbäät pyudëkëdë parë nanduˈun ttundët (Pro. 27:17). Ko yajxon ngujäˈäyëm pënaty tsyojkënyëˈajtypyë Diosë yˈayuk ets tsojk nijëmbijtëm, ta nyäjkëmë oybyë ijxpajtën. Kajaa nbudëjkëmë nmëguˈukˈäjtëm ko jantsy oy nduˈunëmë Diosë tyuunk (2 Tim. 4:5).
4. ¿Tiko mbäät näˈä ganäˈäty nwinmäˈäyëm ti ijxpajtën nyäjkëm?
4 ¿Tiko näˈä ganäˈäty mgawinmay wiˈix tijaty xytyuny ets wiˈix mgajxy maytyaˈaky parë xyˈixët wiˈix xypyudëkë mmëguˈuk? Ko nyäjkëmë oybyë ijxpajtën, ta jotkujkë Jyobaa nëjx nyayjawëty. Ets nan nëjxëp njënäˈänëm extëmë apostëlë Pääblë jyënany: “Paˈijxëgyëty jaˈa nˈijxpajtëny miity ajkëxy, duˈun neby ëëty jaˈa Kristo yˈijxpajtëny ëëty nbaˈijxëjëny” (1 Cor. 11:1, Nuevo Testamento de Mazatlán, [NTM]).