¿Wiˈix nyaxäˈäny mä Yajniˈëxpëkë wiˈix ngäjxwäˈxëm?

Mä tyäˈädë poˈo tsyondaˈaky, të kanäk pekyë ayuk tyëgatsy diˈib miimp mä Yajniˈëxpëkë wiˈix ngäjxwäˈxëm. Yä yajnigajxy wiˈix të wyeˈemy diˈib ojts myiny mä Wiˈix nduˈunëmë Diosë Tyuunk, mayë 2009 mä jyënaˈany: “Nˈokˈëxpëjkëm tijaty naxäämp mä Yajniˈëxpëkë wiˈix ngäjxwäˈxëm”.

◼ Diskursë. Yëˈë yˈandijpy ko jeˈeyë yajnimaytyäˈägäˈäny ets kyaj pën tˈatsoojëmbitët, ets yëˈë yajnimaytyäˈägëp diˈib niˈigyë pudëkëdëp ja nmëguˈukˈäjtëm.

◼ Yajtëw ets yaˈˈatsoojëmbitët. Tyäˈädë duˈun nyaxy extëm ko Yaˈëxpekyë La Atalaya. Waanë jeˈeyë yajnimaytyäˈägët ko tsyondäˈägët ets ko kyëxët. Diˈib patëp dyajnaxët kyaj nëgoo jeky tnimaytyäˈägët, ets duˈun ja tekstë yajkäjxët extëm ja tiempë tnasˈixë. Kyaj yajkäjxëdë parrafo jaayë jeˈeyë pën yajnigäjxp.

◼ Nimaytyäˈäk ets yajtëw. Tyäˈädë kyaj jeˈeyë yajnimaytyäˈägët extëmë diskursë, nan yajtëwëp nanduˈun.

◼ Demostrasyonk etsë entrebistë. Ko mä programë tˈamdowët tuˈugë demostrasyonk, ja nmëguˈukˈäjtëm diˈib patëp yëˈë nyikëjxmˈäjtypy ets tˈixët pën yajnaxëp ja demostrasyonk. Yëˈë yˈanëëmëp diˈib mbäät oy dyajnaxy ets diˈib yajkypyë oybyë ijxpajtën. Kontiempë tˈixët pënaty yajnaxtëp parë ttuundäˈäktët. Kyaj yëˈë tˈanëëmët diˈib näämnëm näjxtëp käjxwäˈxpë, per mbäät tˈanëëmë ets tpudëkët ja diˈib yajnaxaampy. Pënaty yajnäjxtëp kyaj jyëxk tmoˈoyët pënaty jam myëdooˈijttëp. Ja tuk peky, diˈibë entrebistë patëp jam nyaxët mä plataformë, kyaj mä jam yˈuˈunyë. Jëjpˈam ets yajtuundäˈägëdë entrebistë etsë demostrasyonk. Pën ja diˈib yajnäjxypy kyaj nëgoo tiempë nyekywyëˈëmxëty, kyaj mbäät wyinmay ets kyaj nyekynyaxët ja entrebistë o demostrasyonk. Pënaty pyudëjkëbë mëjjäˈäytyëjk, oy ko jawyiin dyajtëwët ja diˈib yajnejxypyë jëjpˈamˈäjtën mä mëjjäˈäytyëjk o niduˈuk ja mëjjäˈäy pën diˈib mbäät tˈanëëmë ets dyajnaxët ja entrebistë o demostrasyonk.

Extëm yä të yajnigajxy duˈun yajtunäˈäny, per ko näˈäty mä programë tëgatsy tnigäjxët, ta duˈun meerë nyajnäjxëm. Ko nduˈunëm extëm yä të yajnigajxy, ta nëjx tijaty yajtuny oy ets “extëm pyaatyëty” (1 Kor. 14:40).