Jesus tyuunë mëjˈäjtën

DIOS yëˈë myooyë mëjää ja yˈUˈunk parë ttunëdë mëjˈäjtën diˈibë naxwinyëdë jäˈäy kyaj mbäät ttuny. Ko Jesus ttuuny kanäk naxë mëjˈäjtën mayjyaˈay wyinduuy, ta dyajnigëxeˈky ko mbäät tmëmadaktäˈäy diˈibë naxwinyëdë jäˈäy ninäˈä tkamëmadäˈägët. Min nˈokˈijxëm tuˈuk majtsk.

Yajkääy yaˈukë jäˈäy. Ja tim jawyiimbë mëjˈäjtën diˈibë Jesus tyuun, yëˈë ko ja nëë dyajjëmbijty binë. Ets majtskˈok dyajkääy milˈamë jäˈäy, mët mëgoxk tëdujkë tsäjpkaaky ets tuˈuk majtskë äjkx, ets axtë nadëjkë ja käˈäy ukën. Duˈun dyaˈijxë ko mbäät dyajkay dyaˈuugyë naxwinyëdë jäˈäy.

Yaˈˈagëdakë päˈäm jäˈäy. Jesus ojts “dyaˈˈagëdaˈaky ja jäˈäyëty diˈibaty pëjkëdëp” (Matewʉ 4:23). Yaˈˈagëdak diˈib myëdäjtypyë leprë päˈäm, diˈib moˈtp, këmäˈät tekymyäˈät, wiints etsë nat. Yaˈˈagëdakë jäˈäy oy ti päˈäm tmëdäjty.

Yajmoongëdakë mëk poj etsë mejny. Tëgok myiinyë mëk poj mä naty ttuknaxtë ja mejny diˈib Galileeë. Ta ja yˈëxpëjkpëty jyantsy tsyëˈkëdë, perë Jesus jeˈeyë pyatˈijxy tsäjpotm ets jyënany: “¡Amonyë! ¡Tëmijtkë!”. Ta netyë ja poj myoondääy (Markʉs 4:37-39). Jatëgok ojts yoˈoy nëëwingëjxy mä naty jyantsy myëk pojy (Matewʉ 14:24-33).

Myëmadak ja kaˈoybyëty. Tadë kaˈoybyëty diˈib nanduˈun yajtijtëp tsuu poj, mas kumëjää ets kyaj dyuˈunëty ëtsäjtëm. Yˈaxëktuumbyë jäˈäy diˈib të tyuktëkëdë ets tsip yˈawäˈätspëtsëmdët. Perë Jesus yaˈˈawäˈätspëtsëëmë jäˈäy ets kyaj ttsëˈkë ja kaˈoybyëty. Ko tˈanmääy ets ttukpëtsëëmduˈudët ja jäˈäy diˈibë naty të ttuktëkë, netyë myëmëdoojëdë mët ko tsyëˈkëdë.

Yajjukypyëjkë oˈkpë. Biiblyë ja ttijˈyë oˈkën, ja tim “okpë mëtsip” diˈib niˈamukë xymyëmadakëm (1 Korintʉ 15:26). Perë Jesus yaˈijxë ko mbäät tmëmadaˈaky ja oˈkën, pes yajjukypyëjk tuˈugë kixyuˈunk ets tuˈugë kuˈookytyoxytyëjkë yˈuˈunk. Per diˈib niˈigyë yajmonyˈijx yajmonyjäˈäp yëˈë ko dyajjukypyejkyë myëtnaymyaayëbë Lasarë, diˈibë naty tyaxk xëëjëp të yˈoˈknë. Mayë jäˈäy yˈijxëdë ets axtë ja myëtsipëty tˈëxkäjptë ko Jesus myëdäjtypyë mëjää (Fwank 11:38-48; 12:9-11).

¿Tiko Jesus ttuunyë mëjˈäjtën pën ja jäˈäyëty diˈib pyudëjkë päˈämbajttë jatëgok ets oˈktë? Yëˈë ojts dyaˈixyëty ko duˈun yˈanaˈamäˈäny extëm të yajnaskäjxë. Mbäät nˈijtëm seguurë ko tadë Rey diˈibë Dios të twinˈixy yëˈë diˈib yajjëjptëgoyaambyë yuu, päˈäm, oˈk tëgoˈoyën, dyajkutëgoyaˈanyë kaˈoybyëty ets tjëjpkuwäˈägëyaˈany diˈib ayoˈonbëjtakp extëmë nëë tuu o mëk poj. Jyobaa yëˈë diˈib të tmoˈoyë Jesusë mëkˈäjtën parë duˈun ttunët.

(Jap yajnimaytyaˈaky mä Matewʉ, Markʉs, Lukʉs, ets mä Fwank.)