Ja apostëlë kyäjxwäˈxtë amëk jotmëk

MÄJK xëë naty të nyaxy mä Jesus pyatëkë tsäjpotm, ko tyuˈukmujktë naa 120 yˈëxpëjkpë jam Jerusalen, meerë naty ja Pentekostes xëë mä jëmëjt 33. Ko ajotkumonë yajmëdooy extëmë mëk poj, ta niˈamukë kyäjxpëjktääytyë wiink ayuk. ¿Ti naty tuun jäjtëp? Yëˈë natyë Dios të myoˈoyëdë ja espiritë santë.

Jam Jerusalen mayjyaˈayë naty të jyäˈttë diˈib tsoˈondëp wiink käjpn parë xyëˈatäˈändë. Ko tmëdoodë ja Jesusë yˈëxpëjkpë myëtmaytyäˈägëdë mä yˈayuk, ta myonyˈijx myonyjäˈäjëdë. Peedrë ta tnimaytyaky ko yëˈë naty adëëp diˈib ja kugajpxy Joel nyaskäjxë, ko Dios tmoˈoyaˈanyë espiritë santë pënaty mëduunëdëp parë ttundëdë mëjˈäjtën (Joel 2:28, 29). Ko ttuundë ja mëjˈäjtën ta Dios dyajnigëxëˈky ko yëˈë naty kyäjpnˈataampy pënaty pyanëjxtëbë Kristë, ets kyaj nyekyyëˈëjëty ja israelitëty. Pääty tsojkëbë naty tmëbëktëdë Kristë pënaty myëdunandëbë Dios.

Per ta ja myëtsipëty pyajëdijtsondakëdë. Tëgok ja apostëlëty yajpëjtaktë pujxndëgoty, per koots ta tuˈugë anklës dyaˈˈawatsy ja pujxndëjkˈää ets yˈanmääyëdë parë niˈigyë kyäjxwäˈxtët. Ko xyëënytyaky ta tyëjkëdë mä ja templë ets tnimaytyaktë Jesus. Ta ja wintsëndëjk jyantsy jotˈambëjktë ets yˈanmääyëdë parë kyaj nyekykyäjxwäˈxtët. Per yëˈëjëty ta yˈatsoodë: “Koonëm tsyekyëty es nmëmëdoˈojëm ja Dios es këdiinëm ja jäˈäyëty” (Apostʉlʉty 5:28, 29).

Per ja myëtsipëty ta niˈigyë jyantsy tyukjotˈambëjkëdë. Näägë judiyë ojts tniwäämbattë Esteebë, ja Jesusë yˈëxpëjkpë, ets ta ojts tkukäˈätstë. Tamë naty yajpäätyë Saulë diˈib tsoˈomp Tarsë, diˈib jyantsy yˈaxëkˈijxypyë Jesusë yˈëxpëjkpëty. Ko yajkukäˈtsy ja Esteebë, ta Saulë ojts nyejxy Damaskë parë tmatsäˈäny niˈamukë Jesusë yˈëxpëjkpë. Per mä naty jam tyuˈuyoˈoy, ta nyigëdakë jäjënë diˈib ojts yajwiintsëty. Ta tmëdooy tuˈugë ayuk jantsy mëk: “Saulë, Saulë, ¿ti kots xypyajëdity? Net ja Saulë dyajtëëy: ¿Mbën mijts, Wintsën? Es yˈatsoojë: Ëjtsëts Jesus” (Apostʉlʉty 9:3-5).

Ko nyajxy tëgëk xëë, ta Jesus tkejxy tuˈugë yˈëxpëjkpë diˈib xyëˈäjtypyë Ananiiës parë nëjx jatëgok dyaˈijxpekyë Saulë. Ta nyëbejty ets tyëjkë ëwäˈx käjxwäˈxpë. Ok, ta ojts yaˈixyˈäjnë extëmë apostëlë Pääblë, diˈib kajabäät ojts tkäjxwaˈxyë Diosë yˈayuk.

Ja Jesusë yˈëxpëjkpëty yëˈëyë naty tyukmëtmaytyaktëp ja Diosë yˈAnaˈam Kyutujkën ja judiyëty ets ja samaritanëty. Per tëgok, ta tuˈugë anklës ojts tmëgajxyë Kornelyë, tuˈugë soldäädë wintsën diˈib Romë diˈib myëbejkypyë Dios, ets tˈanmääy parë tnigaxëdë apostëlë Peedrë. Ok, ta Peedrë mëdë myëguˈuktëjk ojts tninëjxtë Kornelyë ets ta ttukmëtmaytyaktë Diosë yˈayuk. Tamë naty ja Peedrë myaytyaˈaky ko niˈamukë ojts tˈaxäjëdë espiritë santë, ta Peedrë yˈanmääyëdë ets nyëbattët xyegyëjxmë Jesus. Ta yˈawatsy ja nëˈë tuˈu parë oytyimpënëty tpäädët ja jukyˈäjtënë xëmëkyëjxmbë, ets yajkäjxwäˈxët ja oybyë ayuk naxwinyëdë abëtsemy.

(Jap yajnimaytyaˈaky mä Apostʉlʉty 1:1–11:21.)