Nˈokˈyajtuˈunëmë foyetë ¿Ti xytyukniˈˈijxëmë Diosë yˈAyuk? parë nyajtsondakëmë maytyaˈaky
1. ¿Ti jembyë naybyudëkë nmëdäjtëm parë ngäjpxwäˈkxëm?
1 Tyää näämnëm të nˈaxäjëmë jembyë foyetë diˈib xyëˈäjtypy ¿Ti xytyukniˈˈijxëmë Diosë yˈAyuk? Extëm të nˈijxëm, kanäägë tekstë tmëminy mä tuˈuk tuˈugë yajtëˈëwën diˈibë Biiblyë myaytyakypy, nanaduˈun myiny extëmë liibrë Razonamiento, pääty mbäät xypyudëjkëm parë nyajtsondakëmë maytyaˈaky. ¿Wiˈix mbäät nyajtuˈunëmë tyäˈädë foyetë parë nduˈundakëm wiˈixë jäˈäy nmëtmaytyäˈägäˈänëm?
2. ¿Wiˈix mbäät nyajtuˈunëmë foyetë ¿Ti xytyukniˈˈijxëmë Diosë yˈAyuk? mä ngäjpxwäˈkxëm?
2 Extëm nˈokpëjtakëm, mbäät yëˈë nyajtuˈunëmë yajtëˈëwën 8 ets nˈanmäˈäyëmë jäˈäy: “Yëˈëjëts ja mëët nmaytyäˈäktë mëjënbäˈä mëdëjkpäˈä ets nimay dyajtëwdë pën yëˈë Diosë pyoky ko nˈayoˈojëm. [Mä näägë lugäär niˈigyë yˈoybyëtsëmy ko ndukˈijxëm ja yajtëˈëwën diˈib miimp mä foyetë.] Ets mijts ¿wiˈix mˈokwinmay? [Waˈan tˈatsoojëmbity.] Biiblyë yˈatsoojëmbijtypy”. Ta net xykyäjpxët ets xynyimaytyäˈägët tuˈuk o majtskë tekstë diˈib miimp mä foyetë. Pën ja jäˈäy yˈoymyëdoopy, ta xytyukˈixët mä foyetë tsyondaˈaky ja 20 yajtëˈëwën diˈib myëmiimpy ets xyˈanëëmët ko mbäät tuˈuk xynyimaytyaˈaky ko jatëgok mjëmbitët. Nan mbäät xyˈawanë tuˈugë ëxpëjkpajn diˈib mëdë jäˈäy nˈëxpëjkëm ets xyˈanëëmët ko jap niˈigyë tˈaknimaytyaˈaky diˈib mëët të xyˈixy.
3. ¿Wiˈix mbäät nyajtuˈunëmë jembyë foyetë parë nyajtsondakëmë maytyaˈaky mä jäˈäy diˈib kyaj tmëbëktë Kristë?
3 Yajtëˈëwënë 4 etsë 13 axtë 17, mbäät xypyudëjkëm ko ngäjpxwäˈkxëm mä jäˈäy diˈib kyaj tmëbëktë Kristë. Extëm nˈokpëjtakëm, yëˈë yajtëˈëwënë 17 mbäät nyajtuˈunëm parë jäˈäy nˈanmäˈäyëm: “Yëˈëtsë jäˈäy nguˈijxëdëp parëts nbudëkëdë familyë. Tëjëts nbëktë kuentë ko tuˈuk tuˈugë xëë, niˈigyë twinguwäˈägëdë amay jotmay. ¿Wiˈix mijts mˈokwinmay? [Waˈan tˈatsoojëmbity.] Mayë kasäädë jäˈäy yëˈë myëmëdoodëp tyäˈädë ää ayuk: Yëˈë kasäädë toxytyëjk twintsëˈëgëdët yëˈë nyaˈay. [Mbäät kyaj xyˈanëëmë ko yëˈë mnigajpxypyë Éfesʉ 5:33. Ets pën yëˈë mëtmaytyakypy tuˈugë toxytyëjk, mbäät yëˈë xynyigajpxyë Éfesʉ 5:28.] Wiˈix mˈokwinmay, ¿pudëjkëbë kasäädë jäˈäy ko tpanëjkxtë tyäˈädë käjpxwijën?”.
4. ¿Ti mbäät xytyuny ko xyajjëjpkëxëdë maytyaˈaky mët ja jäˈäy diˈib kyaj tmëbëkyë Kristë?
4 Ko nmëtmaytyaktäˈäyëmë jäˈäy, mbäät nˈanmäˈäyëm ko jatëgok njëmbitäˈänëm parë nˈakˈyajnëjkxëmë maytyaˈaky. Ko jatëgok nnijëmbijtëm, mbäät mëët nimaytyakëm jatuˈugë tekstë diˈib miimp mä ja yajtëˈëwën diˈibë nety të nˈijxëm. Mijts mˈixëp näˈä xytyukmëtmaytyäˈägët ko ja käjpxwijën diˈib mëët të xyˈixtë jap tsyoony mä Biiblyë. Extëmë nety mëdë jäˈäy të mmaytyäˈäktë ets wiˈixë nety të tˈixyë Biiblyë, ta xyˈawanët tuˈugë ëxpëjkpajn diˈib mbäät tˈoymyëdoy. (Ixë Wiˈix nduˈunëmë Diosë Tyuunk diˈib disiembrë 2013, pajina 3 axtë 6.)