Ja nWintsënˈäjtëmë yˈAˈux: yëˈë tuˈugë xëëw mä Dios yajmëjawë

NIˈAMUKË Dios mëduumbëty yajtukˈanaˈamdë ets tjamyatstëdë Jesukristë yˈoˈkën xëëw, diˈibë Biiblyë nanduˈun tyijpy ja “Nintsënˈäjtëmë yˈaˈux” (1 Korintʉ 11:20). ¿Tiko jyëjpˈamëty ets yajjamyatsët? ¿Näˈä mbäät yajtuny ets wiˈix?

Jesukristë dyajnaxkëdakyë tyäˈädë jamyajtsënë, ja ux ko ja judiyëtëjk ttundë ja Paskë xëëw, mä ja jëmëjt 33. Tyäˈädë Paskë ja ijty ttundë jëmëjt jëmëjt, ets extëm ja judiyëtëjk tmaytsyowdë ja xëëw poˈo ja kyaˈay 14 äämbë nisán. Tyäˈädë nisán poˈo ja yˈääntsondaˈaky mä ja poˈo nyaxy mä nety të yˈäänë naa tuk sëmäänë marsë. Ets mä ja poˈo nyaxy, ta ijty ja judiyëtëjk tmaytsyowdë 13 xëëw parë ttundë ja Paskë.

Mä tyäˈädë ux, ja mä Jesus ttuunyë Paskë mëdë yˈapostëlëtëjk, ets ko ttuundääytyë ta tˈëxkejxy ja Judas Iscariote ets dyajtsondaky ja tuˈugë aˈux diˈib yajtijp ja nWintsënˈäjtëmë yˈAˈux. Tyäˈädë aˈux yëˈë yajnitëgäjts ja Paskë xëëw diˈibë nety tyuundëbë judiyëtëjk, pääty yajtuny tëgok tuˈukpë jëmëjt.

Mä Matewʉ yajnimaytyaˈaky wiˈix yajtuuny: “Jesus tkoneˈky ja tsäjkaaky, ta jyënany: Dyoskujuyëbë, Dios. Es ko ttujkwaˈxy, ta tmooytyë ja yˈapostëlëty es tˈanëëmëdë: Kaytyë. Tyäˈädëtsë dëˈën extëmts ja niniˈx. Netyë tkoneˈky tuˈugë [kopë] mëdë binë es jyënany: Dyoskujuyëbë, Dios. Ta tmooytyë ja yˈapostëlëty es tˈanëëmëdë: Uuktë nidëgekyë miitsëty mä tyäˈädë [kopë]. Mët ko tyäˈädëtsë dëˈën extëmts ja neˈpynyën diˈibë yajnaxkëdakypyë jembyë tëyˈäjtën [“kajpxyˈatypyë”, TNM], es yajtamäˈäny yajˈyokäˈäny es dëˈën yajmaˈxët ja pyojpëtyë naxwinyëdë jäˈäyëty” (Matewʉ 26:26-28, OTJ).

Ta jäˈäy diˈib myëbëjktëp ko Jesus jyantsy yajjëmbijtë nyiniˈkx kyëbäjk tsäjpkaaky, ets ja nyeˈpyny binë. Per ko Jesus ojts ttujkwaˈkxy ja tsäjpkaaky, amuumë nety ja nyiniˈkx kyëbäjk tmëdaty. ¿Mbäädë net njënäˈänëm ko ja apostëlëty yëˈëdën jyantsy tsyuˈtstë ja Jesusë nyiniˈkx kyëbäjk ets tˈuktë ja nyeˈpyny? Kyaj, pes duˈunxyëp nyajxy extëmë jäˈäy ttsuˈutsyë myëëjäˈäy, ets ja neˈpyny kyaj mbäät tˈuuktë, yëˈko yajkubojkypyë Diosë yˈanaˈamën (Génesis 9:3, 4; Levítico 17:10). Jesus jyënany: “Tyäˈädë binë yëˈë extëmts jyawë ja neˈpynyën diˈibë yajtamäämp yajˈyokäämp mët mijtskëjxmëtyë mbekyëty es wyäˈätsët es nmoˈoyäˈändë jembyë kumäˈäny” (Lukʉs 22:20, OTJ). ¿Jaˈa duˈun ja binë jantsy jëmbijt extëmë “jembyë kumäˈäny” o jembyë kajpxyˈatypyë? Kyaj, kyaj mbäät duˈun jyëmbijty, yëˈko ko ti yajkajpxyˈaty kyaj yaˈixy o yajtony.

Päätyë tsäjpkaaky jeˈeyë nyikejy extëm ja Kristë nyiniˈkx kyëbäjkë wäˈätspë. Jesus yëˈë yajtuunë tsäjpkaaky diˈib kyaj tmëdatyë lebaduurë, diˈibë nety të nyadëkë mä ja Paskë të ttundë (Éxodo 12:8). Ko Biiblyë tmaytyaˈagyë lebaduurë, näˈäty yëˈë yˈandijpy ko ti tmëdatyë poky o ko ti kyaj wyäˈätsëty. Päätyë tadë tsäjpkaaky diˈib kyaj tmëdatyë lebaduurë, yëˈë nikajp ja Jesusë nyiniˈkx kyëbäjkë wäˈätspë, diˈib nitii poky tkamëdaty (Matewʉ 16:11, 12; 1 Korintʉ 5:6, 7; 1 Peedrʉ 2:22; 1 Fwank 2:1, 2).

Tadë binë yëˈë nikajpë Jesusë nyeˈpyny diˈib yajtsodëjkëp ja jembyë kajpxyˈatypyë. Jesus ojts jyënaˈany ko nyeˈpyny yajtamäˈäny yajˈyokäˈäny parë yajmaˈkxët ja poky kaytyey. Duˈuntsoo netë naxwinyëdë jäˈäy nyaxy wäˈäts Dios windum, ets mbäädë net nääk tyëkëdë mä ja jembyë kajpxyˈatypyë mëdë Jyobaa (Ebreeʉsʉty 9:14; 10:16, 17). Tyäˈädë jäˈäyëty diˈib tëjkëdëp mä ja jembyë kajpxyˈatypyë ja nyiwinëˈattë 144,000 ets yëˈë diˈib nëjkxandëp tsäjpotm. Jam tyunäˈändë rey ets saserdotë parë ttukˈoyˈatët niˈamukë naxwinyëdë jäˈäy (Génesis 22:18; Jeremías 31:31-33; 1 Peedrʉ 2:9; Diˈibʉ Jatanʉp o Apocalipsis 5:9, 10; 14:1-3).

¿Pënatyën mbäät tkaytyë tsäjpkaaky ets tˈuuktë binë diˈib näjxp mä yajtuny ja nWintsënˈäjtëmë yˈAˈux? Duˈun extëm të nˈijxëm, yëˈëyë mbäät tkaytyë ets tˈuuktë diˈib mëdë Jyobaa të tkajpxyˈattë parë nyëjkxäˈändë tsäjpotm. Mët yëˈëgyëjxmë Diosë myëjääw tnijawëdë ets yˈittët seguurë ko yëˈëdën të yajwinˈixtë ets nyëjkxtët tsäjpotm parë yˈanaˈamdët (Romanʉs 8:16). Jesus nan të tkajpxyˈaty mëdë tyäˈädë jäˈäyëty parë mëët yajkutuktët (Lukʉs 22:29).

Per ¿ti net tyuundëp pënaty jukyˈatandëp winë xëëw winë tiempë mä ja it lugäärë tsujpë yä Naxwiiny? Nëjkxtëp mä yajtunyë nWintsënˈäjtëmë yˈAˈux, duˈun extëmë Jesus ojts tniˈanaˈamë. Ko nyëjkxtë ta dyaˈixëdë ko myëjjäˈäwëdëp, oy tkakaytyë tsäjpkaaky ets tkaˈuuktë binë. Yëˈë Jyobaa tyestiigëty ttundë tyäˈädë nWintsënˈäjtëmë yˈAˈux tëgok tuˈukpë jëmëjt, ko ja xëëw të tyëjkënë mä yˈany 14 nisán. Oy niwaanë jäˈäy yˈakwëˈëmdë diˈib nëjkxandëp tsäjpotm, niˈamukë mbäädë Dios mëduumbë tmëjjawëdë tyäˈädë xëëw. Ko tpäättë tyäˈädë nWintsënˈäjtëmë yˈAˈux ja mä mëjwiin kajaa tpawinmaytyë wiˈixë Jyobaa mëdë Jesukristë mëk xyjantsy tsyojkëm (Fwank 3:16).