Nijawë Diosë yˈAyuk

¿Wiˈix mbäät yajjamyetsyë Jesusë yˈoˈkën xëë?

Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Tiko Jesus ojts tniˈanaˈamë ets yajjamyatsëdë yˈoˈkën xëë?

Jesus ojts ttukˈaneˈemy ja yˈëxpëjkpëty parë yajjamyatsëdë yˈoˈkën xëë mä dyajtundëdë tsäjpkaaky etsë binë diˈib nikajp. Yëˈë tsäjpkaaky nyikejy ja nyiniˈkx, etsë binë, yëˈë nyeˈpyny. (Käjpxë Lukʉs 22:19, 20.)

Ja tsäjpkaaky diˈibë Jesus yajtuun kyaj tmëdäjtyë lebaduurë. Ets yëˈë yˈandijpy ja Jesusë nyiniˈkx diˈib kyaj pyokymyëëdëty, pes ko Biiblyë tmaytyaˈagyë lebaduurë yëˈë yˈandijpyë poky. Ko Jesus nyayäjkë wintsëˈkën, ta dyajjëjptëgooy ja Ley diˈibë Moisés yajmooy mä tniˈanaˈamë dyaktëdë jëyujk animal extëmë wintsëˈkën (Ebreeʉsʉty 10:5, 9, 10). Yëˈë binë nyikejy Jesusë nyeˈpyny, diˈib taam yojk parë yajmaˈkxëdë poky kaytyey. (Käjpxë 1 Peedrʉ 1:19; 2:24, etsë 3:18.)

2. ¿Näˈä mbäät njamyajtsëmë Jesusë yˈoˈkën xëë?

Jesus ja yˈoˈky 14 äämbë nisan poˈo mä Paskë xëë. Ko Xëë tyëjkënë ja mä judiyëty twijtsondäˈäktë jatuˈugë xëë. Jesus ja ttuuny ja Paskë aˈux mëdë yˈapostëlëty 14 äämbë nisan. Ets ok, ta ojts dyajtsondaˈaky ja tuˈugë jembyë aˈux: parë yajjamyatsëdë yˈoˈkën xëë. (Käjpxë Lukʉs 22:14, 15.)

Tyamë Dios mëduumbë jyamyajtstëbë Jesusë yˈoˈkën xëë, diˈibë Dios yäjk parë dyaˈˈawäˈätspëtsemyë naxwinyëdë jäˈäy mä poky etsë oˈkën (Éxodo 12:5-7, 13, 17). Ja judiyëty ja ijty ttundë Paskë tëgok mä tuˈukpë jëmëjt, nanduˈun tyam yajjamyetsyë Jesusë yˈoˈkën xëë, tëgok mä tuˈukpë jëmëjt, 14 äämbë nisan ko Xëë të tyëjkënë extëmë kyalendaaryë judiyëty. (Käjpxë Fwank 1:29.)

3. ¿Pënaty mbäät tkaytyë tsäjpkaaky ets tˈuuktë binë?

Ko Jesus dyajnäjxy ja kopë diˈib myëdäjtypyë binë mä ja yˈapostëlëty, ta tˈanmääy: “Tyäˈädë kopë nyikejy ja jembyë kajpxyˈatypyë” (1 Corintios 11:25, Traducción del Nuevo Mundo). Tyäˈädë jembyë kajpxyˈatypyë yëˈë yajnitëgäjts ja kajpxyˈatypyë diˈibë Dios tyuun mët ja israelitëty ko tmooy ja Ley. Jyobaa të nety ttukwandaˈaky ja israelitëty ko tkäjpnˈatäˈäny pën myëmëdoodëp tukëˈëyë diˈib tyukˈaneˈempy (Éxodo 19:5, 6). Per kom kyaj myëdoodë, ta dyajnaxkëdaky jatuˈugë jembyë kajpxyˈatypyë. (Käjpxë Jeremías 31:31.)

Jyobaa ojts ttunyë tyäˈädë jembyë kajpxyˈatypyë mët tuk grupë jäˈäy, 144,000, ets mët yëˈëgyëjxm mbäädë mayjyaˈay tpäättë kunuˈkxën. Miyonkˈam jyukyˈatäˈändë winë xëë ko nety ja Naxwinyëdë të jyëmbity jantsy tsuj mët yëˈëgyëjxm ko nyaxkëdaky ja jembyë kajpxyˈatypyë. Yä Naxwiiny, niwaanë yˈakwëˈëmdë 144,000 ets yëˈë jeˈeyë mbäät tkaytyë tsäjpkaaky ets tˈuuktë binë mët ko yëˈëjëty tëjkëdëp mä ja jembyë kajpxyˈatypyë. Etsë Jesusë nyeˈpyny yëˈë yajtsodëjkëbë tyäˈädë kajpxyˈatypyë. (Käjpxë Lukʉs 12:32 etsë Diˈibʉ Jatanʉp [Apocalipsis] 14:1, 3.)

4. ¿Wiˈix ndukˈoyˈäjtëm ko nëjkxëm mä yajjamyetsyë Jesusë yˈoˈkën xëë?

Ko njamyajtsëmë Jesusë yˈoˈkën xëë jëmëjt jëmëjt, yëˈë xypyudëjkëm ets nmëjjäˈäwëm ko Dios mëjwiin kajaa xytsyojkëm. Pääty tkejxyë yˈUˈunk yä Naxwiiny parë tkuˈoogëdë poky kaytyey. Mä yajjamyetsyë Jesusë yˈoˈkën xëë, ja mä mbäät nwinmäˈäyëm këkpäät nuˈunën nmëjjäˈäwëm ko ojts xykyuˈoˈkëm ets wiˈix mbäät ndukˈijxëmë Jesus mëdë Jyobaa ko nmëjjäˈäwëm. (Käjpxë Fwank 3:16 etsë 2 Korintʉ 5:14, 15.)

Pën mˈaknijawëyaampy, ix mä pajina 206 axtë 208 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.