YAJTËˈËWËN DIˈIB YAˈˈATSOOJËMBIJTP MÄ BIIBLYË
¿Tiko mbäät njamyajtsëmë Jesusë yˈoˈkën xëë?
¿Ti nˈawijx njëjpˈijxëm mët ko Jesus yˈoˈky? (Isaías 25:8; 33:24)
Nitii duˈun mëj kyanaxy extëm ko yajjamyetsyë Jesusë yˈoˈkën xëë, pes mët ko yˈoˈky, ta tjuuybyëtsëëmyë naxwinyëdë jäˈäyë jyukyˈäjtën. Kyaj jäˈäy ojts kyojy parë ttunët diˈib axëëk, ni parë myëjjäˈäyët ets yˈoogët (Génesis 1:31). Perë Adán, ja tim jawyiimbë yetyëjk, yëˈë yajtëjkë poky kaytyey. Päätyë Jesus tkëyajkyë jyukyˈäjtënë parë nˈawäˈätspëtsëˈëmëm mä poky etsë oˈkën. (Käjpxë Matewʉ 20:28 etsë Romanʉs 6:23.)
Mëjwiin kajaa Dios ojts xytsyojkëm ko tkejxyë yˈUˈunk yä Naxwiiny parë ojts xykyuˈoˈkëm (1 Fwank 4:9, 10). Jesus ojts ttukˈaneˈemy ja yˈëxpëjkpëty parë adëyë yajjamyatsëdë yˈoˈkën xëë mët waanë binë etsë tsäjpkaaky. Ko duˈun nduˈunëm jëmëjt jëmëjt, ta ndukˈijxëmë Dios mëdë yˈUˈunk ko nmëjjäˈäwëm ko të xytsyojkëm. (Käjpxë Lukʉs 22:19, 20.)
¿Pën mbäät tkayë tsäjpkaaky ets tˈuugyë binë?
Ko tim jawyiinë Jesus ojts ttukˈaneˈemy ja yˈëxpëjkpëty parë yajjamyatsëdë yˈoˈkën xëë, ta tmaytyaky tuˈugë kajpxyˈatypyë (Matewʉ 26:26-28). Tyäˈädë kajpxyˈatypyë, yëˈë yaˈˈawats ja tuˈu parë mëdë yˈëxpëjkpëty etsë wiinkpë jäˈäy tyundët rey ets saserdotë jam tsäjpotm. Miyonkˈamë jäˈäy tjamyatsäˈändë Jesusë yˈoˈkën xëë, per yëˈëyë kyayandëbë tsäjpkaaky ets yˈuugandëbë binë diˈib tëjkëdëp mä tyäˈädë kajpxyˈatypyë. (Käjpxë Diˈibʉ Jatanʉp 5:10.)
Nuˈun kujk nyaxy majtsk mil jëmëjt, Jyobaa yëˈë wyinˈijxypy pënaty anaˈamandëp mëdë yˈUˈunk (Lukʉs 12:32). Tim niwaanë tyäˈädë jäˈäyëty ko yaˈijxkijpxyë mët diˈib jukyˈatandëp yä Naxwiiny winë xëë winë tiempë. (Käjpxë Diˈibʉ Jatanʉp 7:4, 9, 17.)