Ko oˈkpë jyukypyëkäˈändë: ¿Tiko mbäät nˈijtëm seguurë?

Mbäät näägë jäˈäy jyënäˈändë ko tsuu winmäˈäny ko nmëbëjkëmë oˈkpë jyukypyëkäˈändë. Perë apostëlë Pablo kyaj duˈun wyinmääy, yëˈë jyënany: “Pën yaayë mä tyäˈädë jikyˈäjtën yä naxwiiny nyajtuˈunëm ja Jesukristë myëbëjkën, diˈibaty kyaj tmëdundë Jesukristë mbäät jyënäˈändë mët ja tëyˈäjtën: Përoobë taadëty. Per diˈibë tim tëyˈäjtën, jaˈa dëˈën ko yëˈë Jesukristë jyikypyejky ko yˈeˈky. Dëˈën jaˈa extëm ja pëjtaˈay diˈibë jawyiin tëëmpˈäjtp. Päätyë dëˈën mët yëˈë xytyuknijäˈäm ko yëˈë diˈibaty të yˈoˈknëdë jikypyëktëp” (1 Korintʉ 15:19, 20). Pablo ijt seguurë ko jukypyëkandëbë oˈkpë. ¿Tiko? Yëˈko Jesukristë jyukypyejky (Apostʉlʉty 17:31).a Päätyë apostëlë Pablo ojts ttijˈyë Jesus “ja pëjtaˈay diˈibë jawyiin tëëmpˈäjtp”, pes yëˈë tim jawyiin jukypyëjk parë jyukyˈatët winë xëë. Ets pën yëˈë Jesus tim jawyiin jukypyëjk, yëˈë yˈandijpy ko ta wiinkpë diˈib ak jukypyëkandëp.

Ja tuk pëky tiko mbäät nˈijtëm seguurë ko jukypyëkandëbë oˈkpë, yëˈë ko Jyobaa, yëˈë Dios diˈib myëdäjtypyë tëyˈäjtën, “kyaj yˈandaˈaky” (Titʉ 1:2). Yëˈë ninäˈä kyaˈˈandaˈakynyëm ets ninäˈä xykyawinˈëënäˈänëm. Pääty wiˈix mˈokwinmay, ¿mbäädë Dios twandaˈaky ko dyajjukypyëkäˈänyë oˈkpë, ets kyaj tnekykyuytyunëdë yˈayuk oy tjamëdatyë madakën? Niwiˈixtsoo.

Mët ko xytsyojkëmë Jyobaa, ta të ttuknibëjtäägë dyajjukypyëkäˈänyë oˈkpë. Job dyajtëëy: “Pën tuˈugë jäˈäy oˈkp, ¿mbäät jatëgok jyukypyeky? [...] Mijts xymyëgäjpxäämp ets ëjts atsowäämp. Mjantsy tsyojkënyëˈataampy xyˈixäˈäny diˈibë mgëˈë të dyajkojy” (Job 14:14, 15). Job ijt seguurë ko ja Tyeetyë tsäjpotmëdë jyantsy tsyojkënyëˈataampy yajjukypyëkäˈänyëty. ¿Duˈunyëmëdaa Dios ttsojkënyëˈaty? Biiblyë jyënaˈany: “Ëjtsën Jyobaa; kyajëts ndëgatsy” (Malaquías 3:6). Duˈunë duˈun, Dios duˈunyëm ttsojkënyëˈaty dyajjukypyëkäˈänyë oˈkpë parë jyukyˈattët agujk jotkujk, extëm tuˈugë uˈunkteety ttsojkënyëˈatët diˈibë yˈuˈunk të yˈooky. Perë Dios kyaj jeˈeyë ttsojkënyëˈaty, myëdäjtypyë madakën parë dyajjukypyëkëdë oˈkpë (Salmo 135:6).

Jyobaa yëˈë yˈUˈunk myoˈoyaambyë mëjää parë dyajjukypyëkëdë oˈkpë ets yëˈë diˈib jantsy yajxondäˈäganëp pënatyë jyiiky myëguˈuk të yˈooktë. Jesus nan tsyojkënyëˈajtypy duˈun ttunäˈäny. ¿Wiˈix nnijäˈäwëm? Pes mä nety tkayajjukypyekynyëmë Lázaro, Jesus jëëy yax ko tˈijxy wiˈixë nety ja jäj jëmuˈumën dyajnaxtë ja Lázaro myëgaˈaxëty ets ja myëtnaymyaayëbëty (Fwank 11:35). Ets jatëgok, ko tˈijxy ja kuˈookytyoxytyëjk diˈibë nety ja myäänk të yˈooky, diˈib jeˈeyë tukpäjk, ta “tpaˈˈayooy ja kuˈeekytyoˈoxy es tˈanmääy: Katë mjëˈëy” mˈyaˈaxy. Ta netyë dyajjukypyejky ja mixy (Lukʉs 7:13). Tyäˈädë yëˈë xytyukˈijxëm ko Jesus mëk tjawë ko jäˈäy yˈooky. Pääty jantsy jotkujk nyayjawëyaˈanyëty ko nety dyajjukypyeky ja oˈkpëty ets ko nety ja moˈon tujkën dyajjëmbity jotkujkˈäjtën.

¿Të yˈoogyë mjiiky mëguˈuk? Waˈan mwinmay ko kyaj mbäät ti nyekyyajtuny. Perë Dios yajjukypyëkaambyë oˈkpë ets yëˈë yˈUˈunk të ttuknipëky. Jamyats ko Dios tsyejpy parë jam myajpäädët ets xyˈagëˈë xyˈaxäjët ja mjiiky mëguˈuk. Okpawinmay ko nety mëët xytyukniwitsëdë tijaty mdunandëp mä ja tiempë diˈib kyaj nyekyjëjpkëxäˈäny, mä ninäˈä mëët mganekynyayjëgäjpxëdët.

Lionel, diˈib të yˈokˈyajmaytyakpë, jyënaˈany: “Kojëts nyajtukmëtmaytyaky ko jukypyëkandëbë oˈkpë, kyajts nmëbëkany, duˈunëts nwinmääy ko yajwinˈëˈëmbëts. Per tajëts këˈëm nˈijxy mä Biiblyë ko tëyˈäjtën. ¡Njantsy yˈixaambyëts jatëgok ja ndatwelëts diˈib oˈk!”.

¿Mˈaknijawëyaampy niˈigyë? Jyobaa tyestiigëty mdukˈixanëdëp mëdë Biiblyë tiko yˈittë seguurë ko jukypyëkandëbë oˈkpë.b