“Yëˈë mmëgaˈax jikypyëkëp jatëgok”

1. ¿Wiˈixë Matthew dyajnigëxëˈky ko jyantsy myëbëjkypyë nety ko oˈkpë jukypyëkandëp?

MATTHEW, tuˈugë mixyuˈunk mëdiˈibë wëxtujkë jyëmëjt pëjk ijxëp ets kanäkˈok të yajtsujknë. Tëgok, yëˈë nety mëdë tyääk tyeety tˈixtë JW Broadcasting^® ets mä nety tˈijxtäˈäyanëdë, ta pyëtsëëmy tuˈugë ëy mä yaˈixy wiˈixë jäˈäy tˈagëˈë tˈaxäjëdë ja jyëëky myëguˈuk mëdiˈibë jukypyëjktëp.b Ko tˈijxtääytyë, ta Matthew tkëˈëmëmäjtsë ja tyääk tyeety ets tˈanmääy: “Mamaa, papaa, ¿të xyˈixtë ko pën oˈkpëts jukypyëkäämbëts jatëgok? Nëjkxëbëts xyˈëwxit xyjyëjpˈixtë, këdii nëgoo may mdäjtë”. ¿Mbawinmaapy wiˈixë tyääk tyeety nyayjyäˈäwëdë Matthew ko duˈun jyënany? Yëˈë ijtpë nety seguurë ko oˈkpë jantsy jukypyëkandëp.

2, 3. ¿Tiko yˈoyëty nbawinmäˈäyëm ko oˈkpë jukypyëkandëp?

² Oy ko näˈäganäˈäty njamyajtsëm ko oˈkpë jyukypyëkäˈändë (Fwank 5:28, 29). ¿Tiko? Jaˈko kyaj nnijäˈäwëm wiˈix myiny kyëdaˈaky ja xëëw jukyˈäjtën. Pes mbäät xypyatëm tuˈugë mëk päˈäm o ajotkumonë yˈooky tyëgoyë jëëky mëguˈuk (Ecl. 9:11; Sant. 4:13, 14). Per mëdiˈibë mbäät xypyudëjkëm parë nmëmadakëmë duˈumbë ayoˈon jotmay, yëˈë ko nnijäˈäwëm ko oˈkpë jyukypyëkäˈändë (1 Tes. 4:13). Biiblyë jyënaˈany ko nDeetyˈäjtëmë Jyobaa, xyˈixyˈäjtëm yajxon ets ko mëk xytsyojkëm (Luk. 12:7). Jyobaa wäˈäts xyˈixyˈäjtëm, pääty duˈun jatëgok xyajpëdëˈëgäˈänëm extëmë nety njäˈäyˈäjtëm ets nëjkxëp jatëgok tijaty njamyajtstäˈäyëm. Pën tyam oˈk tëgoˈoyëm, Jyobaa xyajjukypyëkäˈänëm parë njukyˈäjtëm xëmëkyëjxm.

³ Mä yäˈädë artikulo yëˈë nnimaytyäˈägäˈänëm tiko mbäät nmëbëjkëm ko oˈkpë jukypyëkandëp. Yajkëktëkëyaampy nanduˈunë mëbëjkën extëm jyënaˈanyë tekstë mëdiˈibë tyuktsondakypyë yäˈädë artikulo: “Yëˈë mmëgaˈax jikypyëkëp jatëgok” (Fwank 11:23). Ta net nˈaknimaytyäˈägäˈänëm ti mbäät nduˈunëm parë niˈigyë nmëbëjkëm ko oˈkpë jantsy jukypyëkandëp.

TIKO MBÄÄT NMËBËJKËM KO OˈKPË JANTSY JUKYPYËKANDËP

4. ¿Ti xypyudëkëyäˈänëm parë nmëbëjkëm mëdiˈibë yajtukwandakëm? Nimaytyäˈäk mët tuˈugë ijxpajtën.

⁴ Ko tii nyajtukwandakëm, mbäät nmëbëjkëm pën ijtëm seguurë ko ja mëdiˈibë të xytyukwandakëm xyjyantsy xypyudëkëyäˈänëm ets ko myëdäjtypyë mëkˈäjtën o ja madakën parë duˈun ttunët. Okwinmay ko mjëën mdëjk wyindëgoy mët ko kom të jyantsy tyuˈuy, per ta tuˈuge mëtnaymyaayëbë mˈanëˈëmxëty: “Ta nbudëkët parë nˈagojëmë mdëjk”. Mnijäˈäwëp ko tëyˈäjtën jyënaˈany ets ko mjantsy pyudëkëyanëp. Ets nnijäˈäwëm nanduˈun ko mbäät duˈun ttuny mët ko jëngojp tëjkojp ets myëdäjtypyë tyuumbajn. Nanduˈunën ko Dios të xytyukwandakëm ko dyajjukypyëkäˈäny pënaty të yˈooktë, mbäät nmëbëjkëm mët ko jyantsy tyunaambyën duˈun, pes myëdäjtypyë mëkˈäjtën parë duˈun ttunët.

5, 6. ¿Tiko nˈijtëm seguure ko Jyobaa jyantsy yajjukypyëkaampy pënaty të yˈooktë?

⁵ ¿Waˈanda Jyobaa tjantsy yajjukypyëkäˈäny pënaty të yˈooktë? Tiko këdii. Pes pënaty jyaaytyë Biiblyë ojts tkujayëdë ko Jyobaa jyantsy yajjukypyëkaampy pënaty të yˈooktë (Is. 26:19; Os. 13:14; Diˈibʉ Jat. 20:11-13). Ets ko tii Jyobaa twandaˈaky seguurë ko tkuytyuny (Jos. 23:14). Jyobaa jyantsy yajjukypyëkaambyën pënaty të yˈooktë. ¿Tiko duˈun njënäˈänëm?

⁶ Job ijtpë nety seguurë ko pën oˈkp, Jyobaa yajjukypyëkanëp (Job 14:14, 15, notë). Niˈamukë Diosmëdumbëty mëdiˈibe të yˈooktë, Jyobaa yajjukypyëkanëdëp jatëgok parë jyukyˈattët agujk jotkujk ets oy mëk. Per ¿waˈandaa Jyobaa dyajjukypyëkäˈänyë jäˈäy mëdiˈibe kyaj yˈixyˈäjtëdë? Yajjukypyëkaampy (Apos. 24:15). Duˈun, pes tsyojkypy parë myëdunëdët ets jyukyˈattët xëmëkyëjxm yä Naxwiiny (Fwank 3:16). Yäˈädë yëˈë xytyukˈijxëm, ko Jyobaa jyantsy yajjukypyëkaampy pënaty të yˈooktë.

7, 8. ¿Tiko nˈijtëm seguurë ko Jyobaa myëdäjtypyë mëkˈäjtën parë dyajjukypyëkëdë oˈkpë?

⁷ ¿Myëdäjtypyë Jyobaa mëkˈäjtën parë dyajjukypyëkëdë oˈkpë? Tiko këdii, pes yëˈë “diˈibë tëgekyë mëkˈäjtën myëdäjtypy” (Diˈibʉ Jat. 1:8). Mbäät tmëmadaˈaky oytyim mëdiˈibëtyë myëtsip axtë ja oˈkën (1 Kor. 15:26). Ko duˈun nnijäˈäwëm, xypyudëjkëm ets xyjyotkujkmoˈoyëm. Min nˈokˈijxëm wiˈix jyajty kyëbejtyë Emma Arnold, yëˈë mëjwiin kajaa twinguwäˈkë amay jotmay mëdë fyamilyë ko tyuunë Segunda Guerra Mundial. Oˈk tëgooy nimayë jyëëky myëguˈuk mä ja soldäädëtëjk mëk dyajtuundë jäˈäy. Parë ja nyëëx tjotkujkmooy, duˈun tˈanmääy: “Koxyëp kyajukypyëkäˈändë oˈkpë, duˈunxyëp extëm ja oˈkën mas niˈigyë mëkˈäjtën tmëdaty këdiinëmë Dios. Per kyaj tyëyˈäjtënëty”. Yäˈädë yëˈë xytyukˈijxëm ko Jyobaa myëdäjtypy ja mëkˈäjtën parë dyajjukypyëkëdë oˈkpë, pes yëˈë xymyoʼoyëmë jukyˈäjtën. Ets seguurë ko dyajjukypyëkäˈäny pënaty të yˈooktë.

⁸ Ja tuk pëky tiko mbäät nmëbëjkëm ko Dios jyantsy yajjukypyëkaambyë oˈkpë, yëˈë ko wäˈäts winë tjamyajtstäˈäy. Biiblyë jyënaˈany ko ak xëëw xëëwë mëtsäˈä tmëdaty (Is. 40:26). Jyobaa jyamyajtstaapy niduˈuk niduˈugë jäˈäy mëdiˈibë të yˈooktë (Job 14:13; Luk. 20:37, 38). Yëˈë wäˈäts tjamyajtstäˈäy wiˈix yˈixëty ja jäˈäy, wiˈix jyaˈayˈajty, wiˈix jyukyˈajty ets tijaty tyuun.

9. ¿Tiko xymyëbëky ko Jyobaa yajjukypyëkaampy pënaty të yˈooktë?

⁹ Extëm kujk nˈijxëm, mbäät nmëbëjkëm ko oˈkpë jukypyëkandëp, pesë Jyobaa jyantsy tyunaambyën duˈun ets myëdäjtypyë mëkˈäjtën. Ja tuk pëky tiko mbäät nmëbëjkëm, yëˈë ko Jyobaa të tˈokˈyajjukypyëjkpë jäˈäyëty. Mä Biiblyë myaytyakypy nanduˈun ko Jyobaa myooy näägë jäˈäyëty ja mëkˈäjtën parë dyajjukypyëkëdë oˈkpë, extëmë Jesus. Min nˈoknimaytyakëm wiˈixënë Jesus dyajjukypyejky tuˈugë oˈkpë mëdiˈibë yajmaytyakp mä Fwank kapitulo 11.

KO YˈOˈKY TUˈUGË JESUSË MYËTNAYMYAAYËBË

10. ¿Ti tuun jäjtë Betania, ets ti tyuunë Jesus? (Fwank 11:1-3).

¹⁰ (Käjpxë Fwank 11:1-3). Jam Betania tamë netyë Jesusë myëtnaymyaayëbë tsyëënëdë, yëˈë Lázaro mët ja myëgaˈaxëty, María etsë Marta (Luk. 10:38-42). Ko nety jyëjpkëxanë jëmëjt 32, ta Lázaro pyäˈämbejty, ja myëgaˈaxëty jantsy jotmaybyattë ets kyajxtë tuˈugë jäˈäy parë nëjkx ttukˈawanë Jesus ko Lázaro pëjkëp. Jesus jagamë nety yajpääty, ja naa majtsk xëëw niyeˈeyën (Fwank 10:40). Waˈanë netyë Lázaro të yˈoˈknë ko Jesus yajtukˈawäˈänë ko mëjtaˈagyë nety pyekyëty. Per oyë Jesus tjanijäˈäwë ko Lázaro të yˈoˈknë, majtsk xëëw ojts yˈakwëˈëmë mä nety jam yajpääty. Pääty ko jyajty Betania tyaxkxëëwëbë nety yˈoˈknë. Mëjwiin kajaa nety jyotkujkmoˈoyäˈänëdë ja myëtnaymyaayëbëty ja miläägrë mëdiˈibë nety tyunaampy ets dyajmëjpëtsëmäˈäny ja Tyeetyë xyëëw (Fwank 11:4, 6, 11, 17).

11. ¿Ti xytyukniˈˈijxëm extëmë Jesus nyaymyaayë mëdë Lázaro ets ja myëgaˈaxëty?

¹¹ ¿Ti xytyukniˈˈijxëm extëmë Jesus nyaymyaayë mëdë Lázaro ets ja myëgaˈaxëty? María mëdë Marta kyaj tˈanmääytyë ja kugajpxy parë nëjkxë Jesus twoy ets jyaˈtët Betania. Jeˈeyë tˈanmääytyë parë ttukˈawanët ko Lázaro pëjkëp (Fwank 11:3). Jesus mbäätxyëp desde jam dyaˈˈagëdakyë Lázaro, per nëjkxan Betania parë yajpäädäˈänyë mëdë Marta etsë María. ¿Mmëdäjtypy tuˈugë mëtnaymyaayëbë mëdiˈibë mbäät mbudëkëty oy wiˈix xykyaˈˈanëëmët? Pën mmëdäjtypy, mnijäˈäwëp ko mbäät mbudëkëty ko xypyäädëdë amay jotmay (Prov. 17:17). Pën nbanëjkxëmë Jesusë yˈijxpajtën, ta nanduˈun mëët nnaymyayäˈänëm ja nmëguˈukˈäjtëm. Min nˈokˈijxëm tijaty ak tuun ak jäjtë.

12. ¿Wiˈixë Jesus tˈanmääyë Marta, ets tiko nety mbäät tmëbëky extëm yaˈˈanmääy? (Fwank 11:23-26).

¹² (Käjpxë Fwank 11:23-26). Ko Marta tnijäˈäwë ko Jesus tamë nety jyäˈtanë Betania, ta netyë ojts tninëjkxy. Duˈun tˈanmääy: “Wintsën, kooxyëp mijë nety mjaaty yää, kyajxyëp të [yˈooky] ja nmëgaˈaxëts” (Fwank 11:21). Jesus ojtsxyëp tjayaˈˈagëdaˈagyë Lázaro, per kyaj duˈun ttuuny mët ko yëˈë nety tyunaampy mëdiˈibë jäˈäy yajmonyˈix yajmonyjyawëdëp. Jesus, ta tˈanmääyë Marta: “Yëˈë mmëgaˈax jikypyëkëp jatëgok”. Ets parë niˈigyë tmëbëkët, ta tˈanmääy: “Ëjtsë dëˈën ja jikypyëjkën es ja jikyˈäjtën”. Jyobaa ojts tmoˈoyë Jesusë mëkˈäjtën parë dyajjukypyëkëdë oˈkpë. Ets tyuunën duˈun, pes të nety dyajjukypyeky tuˈugë kixyuˈunk ets tuˈugë mixy mëdiˈibë jyawë ja xëëw oˈk (Luk. 7:11-15; 8:49-55). Per ¿mbäädë nety dyajjukypeky tuˈugë jäˈäy mëdiˈibë tyaxkxëëwbë yˈoˈknë ets të ja nyiniˈkx wyindëgoonyë?

“¡LÁZARË, PËTSËM JAP!”

13. Extëm jyënaˈanyë Fwank 11:32-35, ¿ti Jesus tyuun ko tˈijxy ja María mët ja mayjyaˈay jyantsy jyëˈëy jyantsy yäˈäxtë? (Ix nanduˈunë dibujë).

¹³ (Käjpxë Fwank 11:32-35). Okpawinmay ko María jyaˈty ets nanduˈun tˈanëëmë Jesus extëmë Marta jyënany: “Wintsën, kooxyëp mijë nety mjaaty yää, kyajxyëpts të [yˈooky] ja nmëgaˈax”. Ko Jesus tmëdooy wiˈixë María ets ja mayjyaˈay tjantsy nyijëˈëy tjantsy nyiyäˈäxtë Lázaro, ta tpaˈˈayooy ets nanduˈun tyëjkë jëëy yaxpë. Jesus wäˈätsë nety tnijawë ko mëk yajpaˈˈayoy tuˈugë jëëky mëguˈuk ko yˈooky. Ets pyudëkëyaambyë netyë Marta mëdë María parë kyaj nyekyjyëˈëy nyekyyäˈäxtët.

14. Ko Jesus tpujëˈëy tpuyaxë María, ¿ti xytyukniˈˈijxëm mä Jyobaa?

¹⁴ Ko Jesus tpujëˈëy tpuyaxë María, yëˈë xytyukniˈˈijxëm ko Jyobaa yëˈë tuˈugë Dios mëdiˈibë paˈˈayoop. ¿Tiko duˈun njënäˈänëm? Jaˈko mä jatuˈukpë artikulo ojts nˈijxëm ko Jesus yëˈë yajxon yajnigëxëˈkypy wiˈixë Tyeety nyayjyawëty ets wyinmay (Fwank 12:45). Ko ngäjpxëm mä Biiblyë wiˈixë Jesus tpujëˈëy tpuyaxë ja myëtnaymyaayëbëty, yëˈë nanduˈun xytyukˈijxëm ko Dios xypyaˈˈayoˈowëm ko tˈixy nnijëˈëy nniyaxëm ja njëëkyˈäjt nmëguˈukˈäjtëm (Sal. 56:8). Ko duˈun nnijäˈäwëm, ¿kedii niˈigyë net nmëwingonäˈänëmë Jyobaa ja Dios mëdiˈibë paˈˈayoop?

15. Extëm jyënaˈanyë Fwank 11:41-44, ¿ti tuun jäjtë mä Lázaro nyaxtëjkë? (Ix nanduˈunë dibujë).

¹⁵ (Käjpxë Fwank 11:41-44). Jesus ta jyajty mä netyë Lázaro të nyaxtëkë ets ojts tniˈanaˈamë parë yajkuˈagëëytyuˈudët. Per ja Marta, ta yˈanmääyë ko xuˈknëbë nety. Jesus ta yˈatsoowë: “¿Ti kyajts mij të nˈanëëmë ko xymyëbëkët, mˈixëp ja Diosë myëjˈäjtën?” (Fwank 11:39, 40). Ta Jesus pyäˈtˈijxy tsäjpotm ets tmënuˈkxtakyë Tyeety. Yëˈë nety tyukˈixaampy ja mayjyaˈay ko yëˈëjën ja Tyeety pudëkëyanëp mä ja miläägrë mëdiˈibë jam tyunaampy. Ta net yaxkeky: “¡Lázarë, pëtsëm jap!”, ets ta pyëtsëëmy. Jesus yëˈë tyuun mëdiˈibë tsipë jäˈäy tmëbëktët.

16. ¿Wiˈix xypyudëjkëmë Fwank kapitulo 11 parë niˈigyë nmëbëjkëm ko oˈkpë jantsy jukypyëkandëp?

¹⁶ Mëdiˈibë yajmaytyakp mä Fwank kapitulo 11 xypyudëjkëm parë nmëbëjkëm ko oˈkpë jantsy jukypyëkandëp. Nˈokjamyajtsëm ko Jesus tˈanmääyë Marta: “Yëˈë mmëgaˈax jikypyëkëp jatëgok” (Fwank 11:23). Jyobaa mëdë Jesus jyantsy yajjukypyëkandëp pënaty të yˈooktë. Ets yajjëjptëgoyandëp ja oˈk tëgoˈoyën mëdiˈibë tyam xyajjëˈëy xyajˈyaxëm ets xyajmoˈon xyajtujkëm. Ko Jesus dyajjukypyëjkyë Lázaro yëˈë xytyukˈijxëm ko myëdäjtypyë mëkˈäjtën parë dyajjukypyëkëdë oˈkpë. Nˈokjamyajtsëm nanduˈun ko tˈanmääyë Marta: “¿Ti kyajts mij të nˈanëëmë ko xymyëbëkët, mˈixëp ja Diosë myëjˈäjtën?” (Fwank 11:40). Ta kanäk pëky mëdiˈibë xytyukniˈˈijxëm ko Dios jyantsy yajjukypyëkaampy pënaty të yˈooktë. Per ¿ti mbäät nduˈunëm parë niˈigyë nmëbëjkëm?

¿TI MBÄÄT NDUˈUNËM PARË NIˈIGYË NMËBËJKËM KO OˈKPË JUKYPYËKANDËP?

17. ¿Ti mbäät nduˈunëm ko nety ngäjpxëm mä Biiblyë wiˈixë oˈkpë jyukypyëjktë?

¹⁷ Nˈokkäjpxëm wiˈix jyukpyëjktë jäˈäy mëdiˈibë Biiblyë myaytyakypy ets nˈokpawinmäˈäyëm. Mä Biiblyë niduktujkë jäˈäy yajmaytyaˈaky mëdiˈibë jukypyëjktë yä Naxwiiny.c Oy ko winmäˈäny nbëjktakëm ets nˈëxpëjkëm tuˈuk tuˈuk. Mientrës duˈun nduˈunëm, nˈokˈijxëm ko jantsy jukypyëjktë, duˈunë yetyëjk, toxytyëjk etsë ënäˈkuˈunk. Nˈokˈijxëm tijaty xytyukniˈˈijxëm ko nˈëxpëjkëm wiˈix tuˈuk tuˈuk jyukypyëjktë ets wiˈix xytyukˈijxëm ko Jyobaa jyantsy yajjukypyëkaampy pënaty të yˈooktë ets ko myëdäjtypyë mëkˈäjtën parë duˈun ttunët. Per mëdiˈibë mbäät niˈigyë nbawinmäˈäyëm yëˈë wiˈixë Jesus jyukypyejky. Mëgoˈpxˈamë jäˈäy tˈijxtë ko Jesus jantsy jukypyëjk, etsë yäˈädë yëˈë xytyukˈijxëm ko mbäät nmëbëjkëm ko jukypyëkandëp pënaty të yˈook të tyëgoytyë (1 Kor. 15:3-6, 20-22).

18. ¿Wiˈix mbäät xypyudëjkëmë ëy mä yajnimaytyaˈagyë oˈkpë jyukypyëkäˈändë? (Ix nanduˈunë notë).

¹⁸ Nˈoknaytyukpudëjkëm ja “ëy diˈibë mëët ja Dios yajmëjjawë” mëdiˈibë myaytyakypy ko oˈkpë jyukypyëkäˈändëd (Éfes. 5:19). Ko nmëdoowˈijtëmë yäˈädë ëy, xypyudëjkëm parë niˈigyë nmëbëjkëm ko oˈkpë jantsy jukypyëkandëp. Pääty, oy ko xëmë nmëdoowˈijtëm ets nˈëˈëwëm ko nety nDiosˈawdäjtëm tuk familyë etsë net nnimaytyakëm ti xytyukniˈˈijxëm. Nˈokjäjtëm agëbajky ets nˈokˈyajwëˈëmëm mä jot winmäˈäny. Pën nduˈunëm duˈun, nëjkxëp xypyudëjkëm ets xyjyotkujkmoˈoyëm ko nety nwinguwäˈkëmë amay jotmay o ko nety yˈooky tyëgoyë jëëky mëguˈuk. Jyobaa, yëˈë xytyukpudëkëyäˈänëmë yˈespiritë santë parë njamyajtsëm wiˈix jyënaˈany ja ëy.

19. ¿Tiko mbäät nbawinmäˈäyëm wiˈix ja oˈkpë jyukypyëkäˈändë? (Ixë rekuäädrë “¿Tijaty myajtëwaampy?”).

¹⁹ Nˈokpawinmäˈäyëm tijaty. Jyobaa duˈun ojts xyajkojëm parë tijaty nbawinmäˈäyëm. Pääty, nˈoknaybyawinmäˈäyëm mä ja jembyë jukyˈäjtën. Tuˈugë nmëguˈukˈäjtëm duˈun jyënaˈany: “Xëmëts nnaybyawinmayëty mä ja jembyë jukyˈäjtën axtë duˈunëts njawë ko tamëts jyawë ja pëjy ujts nxuukˈaty”. Nˈokpawinmäˈäyëm wiˈix nnayjyawëyäˈänëm ko mëët naybyatëm ja Diosmëduumbëty mëdiˈibë yajmaytyaktëp mä Biiblyë. ¿Pën niˈigyë mˈixyˈataampy? ¿Ti myajtëwaampy? Nˈokpawinmäˈäyëm nanduˈun wiˈix nnayjyawëyäˈänëm ko nëjkx nnaybyatëm mët ja jëëky mëguˈuk mëdiˈibë të yˈook të tyëgoytyë. Wiˈix xyˈanëëmëyaˈany, wiˈix xyˈagëˈëjëyaˈany xyˈaxäjëyaˈany ets wiˈix agujk jotkujk mnayjyawëyaˈanyëty ko jatëgok xywyinguˈixët.

20. ¿Ti mbäät nduunˈadëtsëm?

²⁰ Nˈokkuëˈëw nˈokkukäjpxëmë Jyobaa ko të xytyukwandakëm dyajjukypyëkäˈäny pënaty të yˈook të tyëgoytyë. Mbäät nˈijtëm seguurë ko tyunaambyë duˈun, mët ko myëdäjtypyë mëkˈäjtën ets tsyojkënyëˈajtypyën duˈun ttunäˈäny. Duˈunxyëp extëmë Jyobaa xyˈanmäˈäyëm niduˈuk niduˈuk: “Jukypyëkäämp jatëgok ja mjëëky mmëguˈuk”. Pääty, nˈokmëbëjkëm ko ja oˈkpë jantsy jukypyëkandëp. Pën nduˈunëm duˈun, ta niˈigyë Jyobaa nmëwingonäˈänëm, pes yëˈëjën të jyënaˈany ko oˈkpë dyajjukypyëkäˈäny.