Wyäˈkwëˈëmë ja xëë

OK IXË Joswee. Yëˈë jamë xëë yˈanmaapy: ¡Xëë katë myiˈxy! Ta ja xëë dëˈënyë ojts wyëˈëmë ets yˈaany jatëgok tuk xëë. ¡Jyobaa yëˈë diˈib ja Xëë ojts dëˈënyë dyajwëˈëmë! Per min nˈokˈijxëm tiko Joswee ttsojky ets ja xëë wyäˈkwëˈëmët.

Ko ja nimëgoxkpë reyë axëkjäˈäybyë ojts tninëjxtë ja Gabaon ets mëët tsyiptunäˈändë, ta ja jäˈäyëty diˈib Gabaon tkajxtë tuˈugë yetyëjk diˈib ojts tˈanëëmë Joswee: Tadë nimëgoxkpë reyëty diˈib tsënääytyëp kopkoty të xynyibëdëˈktëts. ¡Joˈomdë tyamyë ets pudëjkëdëtsëk!

Netyë Joswee tsyoˈondë mët niˈamukë tsyiptuumbëty. Tuk tsuˈum ojts tyuˈuyoˈoytyë. Ets ko jyäjttë jam Gabaon, ta ja nimëgoxkpë reyë tsyiptuumbëty tsyëˈkëdë ets kyaktë. Ta Jyobaa ojts dyajkäˈäyë tëtsn jantsy mëjaty dëˈën extëmë tsää, ets mas nimay ja myëtsipëty yˈoˈktë mët ja tëtsn ets kyaj dyëˈënëty diˈibë israelitëty yaˈoˈktë.

Ta ja Joswee tˈijxy ko ja Xëë tam tyëkëyanë ets ko mbäät ja myëtsipëty kyaˈaktë ko kyootsënët. Päätyë Joswee tmënuˈkxtakyë Jyobaa. Ta tˈanmääjy ja Xëë: ¡Xëë katë myiˈxy! Ta ja Xëë dëˈënyë ojts wyëˈëmë axtë ko ja israelitëty dyajkëjxtë ja tsip ets myadaktë.

Jam Kanán tamnëmë nety yˈakweˈemy mayë rey diˈib yˈaxëkˈijxypyë Diosë kyäjpn. Ja jyejky tëdujk jëmëjt etsë Joswee mëdë tsyiptuumbëty dyajkutëgooytyë 31 rey diˈibë nety jam Kanán. Taanëmë netë Joswee ojts dyajwaˈxy ja nax ets tmooytyë ja familyë mëdë nyidëëmp nyiˈääts diˈibë nety kyaj tmëdattë nyax.

Ko Joswee jyukyˈajty mëdë myëtnaymyaayëbëty, ja israelitëty myëmëdoodë Jyobaa. Kanäk jëmëjt jyantsy nyajxy, ta Joswee ojts yˈoˈknë, ja netyë jyëmëjt 110. Ets ta nandëˈënë myëtnaymyaayëbë ojts yˈoˈktääynyëdë, ta axëëk ja israelitë yˈadëtstë ets nyayajtëjkëdë jotmayoty. Päätyë net ttsojktë etsë Dios pyudëkëdët.