Jonás diˈibë mëj äjkx ojts jyëënyëty

OK IXË tyäˈädë yetyëjk diˈib yam mejnyoty. Axëëk yam jyaty, ¿këdii? ¡Yëˈë tadë mëj äjkx jëënanëp! ¿Mnijäˈäp ti txëˈäjtyë tyäˈädë yetyëjk? Ja txëˈäjty Jonás. Min nˈokˈijxëm wiˈix nyayajtëjkë mëj jotmayoty.

Jonás yëˈë kyugajpxyë Jyobaa. Näämnëmë netyë kugajpxy Eliseeʉ yˈooky ko Jyobaa tˈanmääyë Jonás: Nëjx Nínive mä tadë mëj käjpn. Yëˈko tadë axëkˈäjtënë diˈib jamë jäˈäy tyuundëp të myëjwindëjkënë ets yëˈëjëts ntsojkypy ets nëjx xytyukmëgajxyë pyoky.

Perë Jonás kyaj nyëjxany. Pääty ttuktëjkë tuˈugë barkë diˈib wiinktsoo nëjxp. Jyobaa kyaj tˈoyˈijxy ko Jonás kyeky. Pääty mä ja mejny dyajmiiny tuˈugë mëk poj tuu diˈib axtë yajkupaˈatsan ja barkë. Ja barkë yajˈyoˈobyëty ta jyantsy tsyëˈkëdë, ets tmëyaxkaktë ja diosëty ets pyudëkëdët.

Taanëmë Jonás jyënany: Ëjts yëˈëts nˈawdäjtypyë Jyobaa, tadë Dios diˈib yajkojë tsäjp etsë Naxwinyëdë. Kakpëts ja yam yëˈko kyajts ndunäˈäny diˈibëtsë Jyobaa të xyˈanëëmë. Ta ja barkë yajˈyoˈobyë yajtëëjëdë: ¿Wiˈixë net ndundët etsë tyäˈädë mëk poj tuu nyaxët?

Ta Jonás yˈatsoojy: Kujëbijpnäjxkëts mejnyoty ets ta tyäˈädë mejny dëˈënyë wyëˈëmët. Ja barkë yajˈyoˈobyëty kyaj tjakujëbijpnaxandë Jonás, per ko niˈigyë ja mëk poj ojts myiinë ta tkujëbijpnäjxtë mejnyoty. Ta netyë ja mejny dëˈënyë ojts wyëˈëmë ets ja mëk poj tuu.

Ko nety ja Jonás jap mejnyoty, ta tuˈugë mëj äjkx jyëˈënë. Per kyaj yˈoˈky. Tëgëk xëë tëgëk ux yˈijty äjkx jodoty. Japë Jonás mëk tjantsy jäˈäjë tiko nety të tkamëmëdoyë Jyobaa ets të kyanejxy Nínive. ¿Pääty mnijäˈäp ti tyuun?

Jonás ta tmënuˈkxtakyë Jyobaa ets tˈamdooyë naybyudëkë. Päätyë Jyobaa ojts dyajnejxy ja äjkx windëˈëtstuujy, ets jam tˈëˈtsy ja Jonás. Ok ta Jonás ojts nyejxy Nínive. ¿Këdii yëˈë tyäˈädë xytyukniˈijxëm ko jëjpˈam ets nduˈunëm tëgekyë diˈibë Jyobaa xytyukˈanaˈamëm?